Kapu ya Nana
‘Nwana ti Bampeve ya Mbi’
1. Sambu na nki beto fwete tula dikebi na bisalu ya bampeve ya mbi?
BANTU mingi kesekaka sambu na kuvweza ngindu ya kutuba nde bampeve ya mbi kele. Kansi yo kele ve dyambu mosi ya kuvweza. Ata bantu kendimaka yo to ve, bampeve ya mbi kele, mpi bo kemekaka na kuyangisa konso muntu. Bansambidi ya Yehowa mpi kele na kati ya bantu yango. Nkutu, bo kele bantu ya ntete ya bampeve yina ketulaka meso. Ntumwa Polo kekebisa beto mutindu yai sambu na bo: “Beto ke nwanaka ti bantu ve, kansi beto ke nwanaka ti bawanzio yina ke na kiyeka ya kuyala bantu, ti bampeve yina ke yalaka nsi yai ya mpimpa, ti bampeve ya mbi yina kele na zulu.” (Efezo 6:12) Na bilumbu na beto, bampeve ya mbi kenyokulaka bantu ngolo kibeni sambu bo mekulaka Satana na zulu mpi yandi medasukaka, sambu yandi mezaba nde ntangu na yandi mebika fyoti.—Kusonga 12:12.
2. Inki mutindu beto lenda nunga bitumba ti bampeve ya mbi yina kele na ngolo ya meluta ngolo ya bantu?
2 Keti mpila kele ya kununga bitumba ti bampeve ya mbi yina kele na ngolo ya meluta ngolo ya bantu? Ee, yo kelomba kaka kutula mpenza ntima na Yehowa. Beto fwete wila yandi mpi kulemfuka na Ndinga na yandi. Kana beto kesala mutindu yina, beto lenda kuditanina na minyokudi ya nitu, ya mabanza, mpi ya mawi yina kenyokulaka bantu yina kele na kimpika ya Satana.—Yakobo 4:7.
Bamfumu ya Inza Yina Kele na Zulu
3. Banani kibeni Satana memengaka ngolo mpenza, mpi nki mutindu?
3 Yehowa ketendudilaka beto mbotembote mambu ya kelutaka na inza mutindu yandi kemoninaka yo ntangu yandi ketalaka yo na zulu. Yandi pesaka ntumwa Yoane mbona-meso mosi yina kusadisaka Yoane na kumona Satana kemonana bonso ‘Dragoni, mbisi ya nene mpi ya mbwaki.’ Yandi vandaka ya kuyilama na kusosa mpila ya kumina mbala mosi Kimfumu ya Mesia ya Nzambi na ntangu yo butukaka na zulu na mvu 1914. Ntangu yandi nungaka ve, Satana kubasisaka kimbeni ya ngolo sambu na kunyokula bamonisi ya Kimfumu yango awa na ntoto. (Kusonga 12:3, 4, 13, 17) Inki mutindu Satana kesalaka bitumba yango? Yandi kesadilaka bantu na yandi mosi yina kemonisaka yandi.
4. Ngolo ya baluyalu ya bantu kekatukaka na nani, mpi nki mutindu beto mezaba yo?
4 Na nima Yoane kumonaka mbisi mosi ya mfinda yina kuvandaka na bibongo kumi ti ba-ntu nsambwadi, mbisi yina vandaka na kiyeka ya “kuyala bantu ya makanda yonso ti ya bandinga yonso ti ya bansi yonso.” Mbisi yina kele kifwani ya ngidika ya politiki ya inza ya mvimba. Bo zabisaka Yoane nde “Dragoni [Satana Dyabulu] pesaka yandi ngolo na yandi, kiti na yandi ya kimfumu ti kiyeka na yandi ya nene.” (Kusonga 13:1, 2, 7) Ya kyeleka, ngolo ti kiyeka ya baluyalu ya bantu kekatukaka na Satana. Yo yina, mutindu ntumwa Polo kusonikaka, bamfumu yina “ke yalaka nsi yai” kele “bampeve ya mbi yina kele na zulu,” bayina keyalaka bimfumu ya bantu. Bantu yonso yina kezola kusambila Yehowa fwete bakisa mbotembote ntendula ya mambu yai.—Luka 4:5, 6.
5. Sambu na nki bubu yai bo ketula bamfumu ya politiki kisika mosi?
5 Ata bamfumu mingi ya politiki ketubaka nde bo kesambilaka, ata insi na bo mosi ve kelemfukaka na luyalu ya Yehowa to ya Mfumu yina yandi meponaka, Yezu Kristu. Bo yonso kenwanaka ngolo kibeni sambu na kutanina kiyeka na bo mosi. Bubu yai, mutindu mukanda ya Kusonga kemonisa yo, “mambu ya bampeve ya mbi ketubaka” ketulaka bamfumu ya inza ya mvimba kisika mosi sambu na kunwana “bitumba ya kilumbu ya nene ya Nzambi [Nkwa-Ngolo Yonso]” na Armagedoni.—Kusonga 16:13, 14, 16; 19:17-19.
6. Sambu na nki beto fwete keba na mpila nde beto kotila ve ngidika ya Satana?
6 Konso kilumbu, luzingu ya bantu kenyokwama sambu na mavwanga ya politiki, ya bimvuka ya bantu, ya kimvwama, mpi ya lusambu yina kekabula mabuta ya bantu. Mbala mingi, na kutuba to na bisalu na bo, bantu kekotilaka insi, dikanda, ndinga, to kimvuka ya bantu na bo. Ata ntangu mavwanga yango ketadila ve bantu kapanda, mbala mingi yo kesalamaka nde bantu yango kukotila ndambu mosi mpi kukuma kontre ndambu yankaka. Kansi ata bo kekotila nani to bo kekotila nki kikuma, na nani kibeni bo kepesaka maboko na bo? Biblia ketuba pwelele nde: “Nsi-ntoto [ya mvimba] kele na maboko ya Muntu ya Mbi.” (1 Yoane 5:19, NW) Ebuna, inki mutindu muntu lenda buya nde bo kusa yandi mpila bo kekusaka bantu yankaka? Kaka kana yandi kesala kikesa na mambu yonso sambu na kukotila Kimfumu ya Nzambi mpamba mpi yandi kebuya kukota na mavwanga yonso ya inza.—Yoane 17:15, 16.
Mayele ya Kukusa ya Muntu ya Mbi
7. Inki mutindu Satana kemonisaka mayele na yandi na kusadilaka lusambu ya luvunu?
7 Banda na luyantiku ya luzingu ya bantu, Satana kenyokulaka bantu na kutuba to na nitu sambu na kukatula bo na lusambu ya kyeleka. Yandi kesadilaka mpi mayele mingi ya mbi ya nsi-nsi ya kevandaka mpasi na kubakisa. Na nsadisa ya lusambu ya luvunu, yandi mekangaka na mayele yonso kitini ya nene ya bantu na mpimpa, yandi kepusaka bo na kuyindula nde bo kesadilaka Nzambi. Sambu bo mekonda nzayilu ya sikisiki ya Nzambi mpi zola sambu na kyeleka, bisalu ya mabundu ya bankisi ti ya ketedimisaka mawi kebendaka bo to bo keyitukaka na kumona bisalu ya ngolo ya mabundu yango. (2 Tesalonika 2:9, 10) Kansi bo kekebisa beto nde ata na kati ya bantu yina kuvandaka ntete na kati ya kyeleka, “bantu ya nkaka ta [bwa, NW] . . . ; bo ta lemfuka na bampeve ya luvunu ti na malongi ya bampeve ya mbi.” (1 Timoteo 4:1) Inki mutindu yo lenda salama?
8. Inki mutindu Satana lenda benda beto na dibundu ya luvunu ata beto kesambilaka Yehowa?
8 Na mayele ya nsi-nsi, Satana kesadilaka kulemba ya nitu na beto. Keti boma ya bantu keyalaka beto tii bubu yai? Kana mpidina, ziku beto talemba sambu bampangi na beto ya kinsuni to bantu yina beto kezingaka na bo penepene kenyokula beto. Keti beto kele lulendo? Kana yo kele mutindu yina, beto lenda wa makasi ntangu bo kepesa beto bandongisila to ntangu bantu yankaka kendima ve bangindu na beto. (Bingana 15:10; 29:25; 1 Timoteo 6:3, 4) Olie ya kubongisa mutindu na beto ya kutadila mambu na mpila nde beto landa mbandu ya Kristu, beto lenda yantika kulanda bangindu ya bantu yina “kelebaka makutu” nde kutanga Biblia mpi kuzinga luzingu ya mbote melunga. (2 Timoteo 4:3, NW) Sambu na Satana, ata beto kwenda kukota na dibundu yankaka to beto bikala na dibundu na beto mosi, yo metala yandi ve. Lukanu na yandi kele kaka nde beto sambila ve Yehowa na mutindu ya Yandi kelombaka yo na nzila ya Ndinga na yandi mpi ya organizasio na yandi.
9. Inki mutindu Satana kesadilaka na mayele yonso mpusa ya kuvukisa nitu sambu na kulungisa balukanu na yandi?
9 Na mayele yonso, Satana kepusaka dyaka bantu na kulungisa bampusa na bo na banzila ya mbi. Yandi kesalaka yo na mutindu yandi kepusa bantu na kusala mansoni. Sambu bo kebuyaka kulanda bandongisila ya Biblia ya metala bikalulu ya mbote, bantu mingi na inza kemonaka kuvukisa nitu na kati ya bantu yina mekwelanaka ve bonso kima ya mbote ya bo pesilaka bo nzila to bonso mutindu mosi ya kumonisa nde bo mekuma bambuta. Kansi, inki beto lenda tuba sambu na bantu yina mekwelaka? Mingi kesalaka bizumba. Nkutu ata bizumba mesalama ve na makwela na bo, bantu mingi kesosaka kufwa makwela to kukabwana ti nkwelani na bo sambu bo kwenda kuzinga ti muntu yankaka. Mayele ya mbi ya Satana kepusaka bantu na kuzinga na byese ntangu yai, mpi na kukonda kuyindula malanda ya mbi yina lenda kumina bo mosi mpi bantu yankaka na nima. Yo kepusaka bo nkutu na kuvilana mingimingi bangwisana na bo ti Yehowa mpi Mwana na yandi.—1 Korinto 6:9, 10; Galatia 6:7, 8.
10. Inki bamwaye Satana kesadilaka sambu na kubalula bangindu na beto na yina metala mansoni ti mubulu?
10 Mpusa yankaka ya bantu kebutukaka na yo kele ya kusala bansaka ya kulutisila ntangu. Kana yo kele ya mbote, bansaka ya kulutisila ntangu kepesaka kikesa na nitu, na mabanza, mpi na mawi. Kansi nki mutindu beto kesalaka ntangu Satana kesadilaka na mayele yonso bantangu ya kubaka mupepe sambu na kupusa beto na kusala mambu yina kewakana ve ti mabanza ya Nzambi? Mu mbandu, beto kezaba nde Yehowa memengaka pite ti mubulu. Ntangu bafilme, baprograme ya televizio, to bateyatre kesongaka mambu ya mutindu yina, keti beto kefongaka sambu na kutala mambu yina yonso? Kuvila mpi ve nde, Satana tasala yonso na mpila nde mambu yai kubeba dyaka ngolo kibeni na ntangu yai ya lufwa na yandi mekuma penepene, sambu “bantu ya mbi ti bantu ya luvunu, mbi na bo ta kwisa mingi, sambu bo ta kusaka bantu ya nkaka, bantu ya nkaka mpi ta kusaka bo.” (2 Timoteo 3:13) Yo yina, beto fwete keba ntangu yonso na bangindu ya mbi ya Satana.—Kuyantika 6:13; Nkunga 11:5; Roma 1:24-32.
11. Inki mutindu muntu yina mezabaka kyeleka na yina metala bampeve ya mbi lenda bwa na mutambu kana yandi keba ve?
11 Beto mezaba mpi mbote nde Yehowa kesepilaka ve ata fyoti ti bantu yina kekotaka na konso mutindu yina ya lusambu ya bampeve ya mbi, mu mbandu, kutuba mambu yina takwisa na ntwala, kinganga ngombo, kindoki, to kusolula ti bantu yina mefwaka. (Kulonga 18:10-12) Kana beto keyibuka mambu yai ntangu yonso, beto takwenda ve kusolula ti banganga, mpi ya kyeleka beto tandima ve kuyamba bo na nzo na beto sambu bo kwisa kusadila beto bisalu na bo ya bampeve ya mbi. Kansi, keti beto tawidikila bo kana bo mebasika na televizio na beto to na Internet? Ata beto lenda ndima ve nde nganga-nkisi kusansa beto, keti beto lenda kangisa mwana na beto ya mebutuka nsinga na diboko, ti ngindu nde yo tatanina yandi na dyambu ya mbi? Mutindu beto mezabaka nde Biblia kebuyaka lusambu ya bampeve ya mbi, keti beto lenda ndima nde bapastere ya kesambilaka bantu kukwisa kusambila beto ntangu beto kebela?—Galatia 5:19-21.
12. (a) Inki mutindu Satana kesadilaka miziki sambu na kupusa beto na kuyindula mambu yina beto kezabaka nde yo kele mbi? (b) Inki mutindu kulwata, kubongisa nsuki, to mutindu ya kutuba ya muntu lenda monisa nde yandi kelanda luzingu ya bantu yina Yehowa kebuyaka? (c) Inki beto fwete sala kana beto kezola kutina mitambu ya Satana?
12 Biblia ketuba nde yo kele mbote ve beno na kutuba (na bangindu ya mbi) sambu na pite ti mambu ya nsoni ya mitindu yonso. (Efeso 5:3-5) Kansi nki beto tasala kana bo metula mambu ya mutindu yai na kati ya bankunga yina kele ti miziki mpi ritme ya kitoko? Keti beto tayantika kuyimba bankunga yina kekumisa kuvukisa nitu na nganda ya dikwela, kusadila bima yina kelausaka sambu na kupesa kyese na nitu, mpi bisalu yankaka ya masumu? To mutindu beto mezabaka nde beto fwete landa ve luzingu ya bantu yina mekudikotisaka na mambu yina, keti beto keyunsaka kuvanda na midele ya bilele na bo, kubongisa nsuki, to kutuba bonso bo sambu na kumonana bonso bo? Satana kesadilaka mpenza mayele ya kubumbana sambu na kupusa bantu na kulanda bangindu na yandi ya mbi! (2 Korinto 4:3, 4) Sambu na kutina mitambu ya mayele na yandi ya mbi, beto fwete landa ve mambu ya inza yai. Beto fwete vila ve bantu yina “ke yalaka nsi yai ya mpimpa” mpi beto fwete nwana ngolo kibeni ti bupusi na bo.—1 Piere 5:8.
Beto Kele na Binwaninu ya Kunungila
13. Inki mutindu, yo lenda salama nde beto nunga inza ya Satana keyalaka ata beto kele bantu ya kukonda kukuka?
13 Na ntwala ya lufwa na yandi, Yezu kusongaka bantumwa na yandi nde: “Beno vanda na kikesa! Mono me bedisaka [“nungaka,” NW] . . . nsi-ntoto yai.” (Yoane 16:33) Bo mpi lendaka kununga. Bamvula 60 na nima, ntumwa Yoane kusonikaka nde: “Nani lenda bedisa mambu ya mbi yina kele awa na nsi-ntoto, yandi nunga? Kaka muntu yina ke ndimaka nde Yesu kele Mwana-Nzambi.” (1 Yoane 5:5) Beto tamonisa lukwikilu ya mutindu yina kana beto kelemfuka na minsiku ya Yezu mpi ketula ntima na Ndinga ya Nzambi, mutindu Yezu kusalaka yo. Inki beto fwete sala dyaka? Beto fwete kangama na dibundu yina ya Yezu kele Mfumu. Kana beto mesala mbi, beto fwete balula ntima na masonga yonso mpi kulomba ndolula na Nzambi na nsadisa ya kimenga ya Yezu. Kana beto kesala mutindu yina, ata beto kele bantu ya kukonda kukuka mpi ya kesalaka bifu, beto mpi lenda nunga.—Nkunga 130:3, 4.
14. Tanga Efeso 6:13-17, na nima sadila bangyufula ti baverse ya bo mepesa na paragrafe yai sambu na kutadila mutindu nge lenda baka mambote ya konso kinwaninu ya kimpeve.
14 Sambu na kununga, beto fwete baka ‘binwaninu yonso ya Nzambi ke pesaka beto,’ kukonda kumona ata mosi bonso kima ya mpamba. Kangula Biblia na nge na Efeso 6:13-17, mpi tanga binwaninu yango yonso. Na nima, na ntangu nge tavutulaka bamvutu na bangyufula yina kelanda, sosa kuzaba nki mutindu nge lenda baka mambote ya kekatukaka na lutaninu yina konso kitini ya kinwaninu yango kepesaka.
“Lwata [. . .] kieleka mutindu [nge] ke lwataka mukaba na luketo”
Ata beto mezabaka kyeleka, inki mutindu kulonguka mbala na mbala, kuyindulula bakyeleka ya Biblia, mpi kuvukana na balukutakanu lenda tanina beto? (1 Korinto 10:12, 13; 2 Korinto 13:5; Filipi 4:8, 9)
“Lwata [lunungu bonso, NW] kinkutu ya bibende na ntulu”
Nani ketulaka minsiku ya lunungu? (Kusonga 15:3, NW)
Pesa mbandu ya kemonisa nki mutindu kukonda kuzitisa banzila ya lunungu ya Yehowa lenda bebisa muntu na kimpeve. (Kulonga 7:3, 4; 1 Samuele 15:22, 23)
“Lwata Nsangu ya Mbote ya ngemba mutindu [nge] ke lwataka basapatu na makulu”
Sambu na nki kutambusa makulu na beto sambu na kutubila bantu mambu ya Nzambi mebongisaka sambu na kutula ngemba kele lutaninu? (Nkunga 73:2, 3; Roma 10:15; 1 Timoteo 5:13)
‘Dibaya ya nene ya lukwikilu ya ke taninaka na batolotolo’
Kana beto kele na lukwikilu ya ngolo, inki beto tasala na ntwala ya muntu yina kesala ngolo nde beto kuma na badute to beto banga? (2 Bantotila 6:15-17; 2 Timoteo 1:12)
‘Mpu ya bibende ya kegulusaka’
Inki mutindu kivuvu ya luguluku kesadisaka beto na kutina mutambu ya basusi ya kuluta ndilu ya bima ya kinsuni? (1 Timoteo 6:7-10, 19)
‘Mbele ya bitumba ya mpeve’
Na nki beto fwete tula ntima ntangu yonso ya beto kenwana ti mambu yina ketula kimpeve na beto to ya bantu yankaka na kigonsa? (Nkunga 119:98; Bingana 3:5, 6; Matayo 4:3, 4)
Inki kima yankaka kele mfunu sambu na kununga mvita ya kimpeve? Mbala ikwa beto fwete sadila yo, mpi sambu na banani? (Efezo 6:18, 19)
15. Inki mutindu beto lenda nwana mvita ya kimpeve?
15 Beto basoda ya Kristu, beto kele na kati ya kibuka ya basoda mingi yina kenwana mvita ya kimpeve. Kana beto kekangula meso ntangu yonso mpi kesadila mbote binwaninu yina Nzambi mepesaka beto, beto tabela ve mvita yai. Kansi, beto tapesa bansadi yankaka ya Nzambi kikesa. Beto tavanda ya kuyilama na kunwana, na kupanza nsangu ya mbote ya Kimfumu ya Mesia ya Nzambi, yina kele luyalu ya zulu ya Satana kenwanisaka na ngolo yonso.
Mvutukila
• Sambu na nki bansambidi ya Yehowa kekotaka ve na mavwanga ya inza?
• Tanga mwa mayele ya mbi ya Satana kesadilaka sambu na kufwa Bakristu na kimpeve?
• Inki mutindu binwaninu ya kimpeve yina Nzambi mebongisilaka beto ketaninaka beto na mvita ya kimpeve?
[Bifwanisu ya kele na lutiti 76]
Makanda kevukana sambu na mvita ya Armagedoni