Kapu ya Kumi na Iya

Inki Mutindu Yehowa Ketwadisaka Organizasio na Yandi?

1. Inki mambu Biblia kesonga beto sambu na yina metala organizasio ya Yehowa, mpi sambu na nki mambu yango kele mfunu sambu na beto?

KETI Nzambi kele ti organizasio? Masonuku ya kupemama kezabisa beto nde ee yandi kele na yo. Na kati ya Ndinga na yandi, Nzambi kesonga beto kitini ya kuyituka ya organizasio yango ya zulu. (Ezekiele 1:1, 4-14; Daniele 7:9, 10, 13, 14) Ata beto lenda mona ve kitini yai ya kemonanaka ve, yo kele na bupusi ya ngolo na zulu ya bansambidi ya kyeleka bubu yai. (2 Bantotila 6:15-17) Organizasio ya Yehowa kele dyaka ti kitini yankaka ya kemonanaka ya kele awa na ntoto. Biblia kesadisa beto na kuzaba mpila yo kele mpi mutindu Yehowa ketwadisa yo.

Kuzabana ya Kitini Yina Kemonana

2. Inki dibundu ya mpa Nzambi kusalaka?

² Na nsungi mosi ya bamvula 1545, dikanda ya Izraele kuvandaka dibundu ya Nzambi. (Bisalu 7:38) Kansi Izraele kuzitisaka ve bansiku ya Nzambi mpi bo buyaka Mwana na yandi. Yo yina, Yehowa kubuyaka dibundu yina mpi yandi yambulaka yo. Yezu kuzabisaka Bayuda nde: ‘Ntangu yai, bwala na beno ta bika yo mosi kaka.’ (Matayo 23:38) Yo yina Nzambi kubasisaka dibundu mosi ya mpa, ya yandi salaka ti yo kuwakana ya mpa. Dibundu yango zolaka kuvanda ti bantu 144 000 yina Nzambi kuponaka sambu na kuvukana ti Mwana na yandi na zulu.​—⁠Kusonga 14:1-4.

3. Inki kusalamaka na Pantekoti ya mvu 33 ya T.B. ya kumonisaka pwelele nde banda kilumbu yina Nzambi kumaka kusadila dibundu ya mpa?

³ Bantu ya ntete ya dibundu yina ya mpa, Yehowa kupakulaka bo na mpeve santu na yandi na Pantekoti ya mvu 33 ya T.B. Sambu na yina metala dyambu yai ya nene, beto ketanga nde: “Ntangu kilumbu ya Nkinsi ya Pantekoti lungaka, bakristo yonso vandaka kisika mosi na kimvuka. Na mbala mosi, makelele bonso mupepe ya ngolo katukaka na zulu, yo kwisa kufuluka na nzo yina yonso ya bo vandaka. Baludimi kwisa kumonika na bo bonso baludimi ya tiya. Yo kabanaka, ebuna yo kwisaka kuvanda mosi-mosi na zulu ya konso muntu na kati na bo. Bo yonso fulukaka na Mpeve ya Nzambi.” (Bisalu 2:1-4) Mpidina mpeve ya Nzambi kumonisaka pwelele nde banda na kilumbu yina, kibuka ya bantu yai kukumaka kimvuka yina ya Nzambi tasadilaka sambu na kulungisa lukanu na yandi na nsi ya lutwadisu ya Yezu Kristu na zulu.

4. Banani bubu yai kesala organizasio ya Yehowa yina kemonana?

⁴ Bubu yai, bantu fyoti mpamba mebikalaka na ntoto na kati ya bantu yina 144 000. Kansi sambu na kulungisa mbikudulu ya Biblia, Nzambi mevukisaka “kibuka mosi ya nene” (NW) ya bamilio ya “mameme yankaka” (NW) ti ndambu ya bapakulami yina mebikalaka. Yezu, Ngungudi ya Mbote, mevukisaka mameme yankaka yai ti ndambu ya bapakulami yina mebikalaka na mpila nde bo kuma kaka kimvuka mosi ya yandi mosi Ngungudi na bo ketwadisa. (Kusonga 7:9; Yoane 10:11, 16) Bo yonso kesala dibundu mosi ya kele na bumosi, organizasio ya Yehowa yina kemonana.

Mutindu Organizasio ya Teokrasi Ketwadisamaka

5. Nani ketwadisaka organizasio ya Nzambi, mpi nki mutindu?

⁵ Bangogo ya Masonuku ya ketuba nde “dibundu ya Nzambi ya moyo” kemonisa pwelele muntu yina ketwadisa yo. Organizasio yango kele ya Teokrasi, to ya Nzambi ketwadisaka. Yehowa kepesaka bantu na yandi lutwadisu na nzila ya Yezu, muntu yina Yandi meponaka sambu na kuvanda Mfumu ya dibundu, mpi na nzila ya Biblia, yina kele Ndinga na Yandi mosi ya kupemama.​—⁠1 Timoteo 3:14, 15; Efeso 1:22, 23; 2 Timoteo 3:16, 17.

6. (a) Inki mutindu lutwadisu ya zulu kumonanaka na dibundu ya mvu-nkama ya ntete? (b) Inki kemonisa nde Yezu kele Mfumu ya dibundu tii bubu yai?

⁶ Lutwadisu yai kumonanaka pwelele na Pantekoti. (Bisalu 2:14-18, 32, 33) Yo monanaka dyaka na ntangu wanzyo ya Yehowa kutwadisaka kisalu ya kusamuna nsangu ya mbote na Afrika, ntangu ndinga ya Yezu kupesaka bantuma ntangu Saule muntu ya Tarse kubalulaka ntima, mpi ntangu Piere yantikaka kusala kisalu ya kusamuna na kati ya bantu ya Makanda. (Bisalu 8:26, 27; 9:3-7; 10:9-16, 19-22) Kansi, na nima, bantu vandaka kuwa dyaka ve bandinga ya kekatuka na zulu, bo vandaka kumona dyaka ve bawanzyo, mpi makabu ya mpeve ya kusala mambu ya kuyituka kuvandaka dyaka ve. Kansi, Yezu kusilaka nde: “Mono ta vandaka ti beno bilumbu yonso tii na nsuka ya ntoto.” (Matayo 28:20; 1 Korinto 13:⁠8) Bubu yai, Bambangi ya Yehowa kendimaka lutwadisu ya Yezu. Kana yo ve, mpila ya kusamuna nsangu ya Kimfumu na kati ya kimbeni ya ngolo zolaka kuvanda ve.

7. (a) Banani kesala kimvuka ya “mpika ya kwikama mpi ya mayele,” mpi sambu na inki? (b) Inki mukumba bo pesaka na “mpika”?

⁷ Ntangu fyoti na ntwala ya lufwa na yandi, Yezu kuzabisaka balongoki na yandi dyambu ya metala “mpika ya kwikama mpi ya mayele” yina ya yandi mosi Mfumu na yandi tapesa yandi mukumba ya nene. “Mpika” yina zolaka kuvanda pana ntangu Mfumu kutombukaka na zulu mpi yandi zolaka kulanda na kusala ngolo tii kuna ya Kristu tavutuka na kiyeka ya Kimfumu na yandi ya kukonda kumonana. Muntu mosi mpamba zolaka kukuka ve ata fyoti na kulungisa mukumba yai ya bo ketubila, kansi dibundu ya bapakulami ya Kristu zolaka kukuka na kulungisa yo. Sambu yandi sumbaka yo ti menga na yandi, Yezu kebinga yo “mpika” na yandi. Yandi pesaka ba mambre na yo kisalu ya kukumisa bantu balongoki mpi ya kudisa bo malembemalembe, na kupesaka bo “madia [ya kimpeve] . . . na ntangu ya mbote.”​—⁠Matayo 24:45-47, NW; 28:19; Yezaya 43:10; Luka 12:42; 1 Piere 4:⁠10.

8. (a) Inki mikumba kimvuka ya mpika kele na yo ntangu yai? (b) Sambu na nki yo kele mfunu na kundima malongi yina Nzambi kepesaka beto na nsadisa ya nzila yina yandi meponaka?

⁸ Sambu kimvuka ya mpika vandaka kusala kisalu ya Mfumu na kwikama yonso ntangu yandi vutukaka na mutindu mosi ya kukonda kumonana na mvu 1914, ntembe kele ve nde yandi pesaka yo mikumba ya nene na mvu 1919. Banda na mvula yina, mpika yango ketaka kimbangi ya Kimfumu na ntoto ya mvimba, mpi kibuka ya nene ya bansambidi ya Yehowa kele na kuvukana sambu na kuguluka na mpasi ya nene yina kekwisa. (Matayo 24:14, 21, 22; Kusonga 7:9, 10) Kibuka yai mpi ke na mfunu ya madya ya kimpeve, mpi kimvuka ya mpika kepesaka bo yo. Yo yina, sambu na kusepedisa Yehowa, beto fwete ndima bantuma ya yandi kepesaka beto na nsadisa ya nzila yina yandi kesadilaka mpi kusala na kuwakana ti yo.

9, 10. (a) Na mvu-nkama ya ntete, inki ngidika vandaka kusadisa bo na kuzwa bamvutu na bangyufula ya metala malongi mpi kutwadisa kisalu ya kusamuna nsangu ya mbote? (b) Bubu yai, inki ngidika ketwadisaka bisalu ya bantu ya Yehowa?

⁹ Inki beto lenda sala kana bantangu yankaka bangyufula kebasika na yina metala malongi mpi bametode na beto? Bisalu kapu 15 kesonga beto mutindu bantumwa kumanisaka ntembe yina kubasikaka na yina metala bantu ya Makanda yina kukumaka Bakristu. Bo nataka dikambu yango na bantumwa ti bankuluntu na Yeruzalemi, yina vandaka kusala bonso nto-kimvuka na ntangu yina. Bantu yango kuvandaka ve bantu ya kukuka, kansi Nzambi kusadilaka bo. Bo tadilaka baverse ya ketubilaka dyambu yina mpi kidimbu ya kumonisaka nde mpeve ya Nzambi kukangulaka nzila nde bantu ya Makanda kuwa nsangu. Ebuna na nima, bo bakaka desizio. Nzambi kusakumunaka ngidika yina. (Bisalu 15:1-29; 16:4, 5) Nto-kimvuka yai kutindaka bantu na kwenda kusala na mpila nde kisalu ya kusamuna Kimfumu kukwenda na ntwala.

¹⁰ Na bilumbu na beto, Nto-Kimvuka ya organizasio ya Yehowa yina kemonana mesalamaka na bampangi ya kupakulama na mpeve yina mekatukaka na bansi ya kuswaswana mpi yo kele na ntu-mbanza ya Bambangi ya Yehowa ya ntoto ya mvimba. Na lutwadisu ya Yezu Kristu, Nto-Kimvuka kesala na mpila nde lusambu ya kukonda mvindu kukwenda na ntwala na bansi yonso, yo ketwadisa bisalu ya kusamuna yina Bambangi ya Yehowa kesalaka na mafunda mingi ya mabundu na bo. Bantu yina kele na Nto-Kimvuka kendimaka dibanza ya ntumwa Polo kuvandaka na yo ntangu yandi sonikilaka bampangi na yandi Bakristu nde: “Beto ke songa beno na ngolo ve mambu yina ya beno fweti kwikila, sambu beno ke na lukwikilu ya ngolo. Kansi beto ke zola kusala ti beno sambu na kiese na beno.”​—⁠2 Korinto 1:⁠24.

11. (a) Inki mutindu bankuluntu ti bansadi ya kisalu keponamaka? (b) Sambu na nki beto fwete sala kumosi ti bantu yina ya bo meponaka?

¹¹ Bambangi ya Yehowa ya inza ya mvimba kebikilaka Nto-Kimvuka kiyeka ya kupona bampangi ya kufwana yina kevandaka na nswa ya kupona bankuluntu mpi bansadi ya kisalu sambu na kutalaka mabundu. Mambu ya bo kelombaka na bantu yina bo keponaka kele na kati ya Biblia mpi bo kevilaka ve nde bantu yango kele bantu ya kukonda kukuka mpi bo kesalaka bifu. Bankuluntu yina kepesaka bazina ya bantu yina bo tapona ti bayina keponaka bo kele na mukumba ya nene na meso ya Nzambi. (1 Timoteo 3:1-10, 12, 13; Tito 1:5-9) Yo yina, bo kesalaka kisambu sambu na kulomba lusadisu ya mpeve ya Nzambi mpi bo kesosaka lutwadisu na Ndinga na yandi ya kupemama. (Bisalu 6:2-4, 6; 14:23) Bika beto monisa ntonda na beto na “makabu ya bantu,” yai ya kesadisaka beto yonso na kuvanda na “kimvuka mosi . . . na lukwikilu na beto.”​—⁠Efezo 4:8, 11-16.

12. Inki mutindu Yehowa kesadilaka bankento na ngidika ya teokrasi?

¹² Masonuku kemonisa nde mukumba ya kutwadisa dibundu bo fwete pesa yo na babakala. Kansi yo ketendula ve nde bankento kele na mfunu ve, sambu bankento yankaka kele na kati ya bantu yina takwenda kuyala na Kimfumu ya zulu, mpi bo kesalaka mingi na kisalu ya kusamuna. (Nkunga 68:12) Dyaka, bankento kesalaka nde dibundu kuvanda na lukumu mosi ya mbote na ntangu bo kekudipesaka na kulungisa mikumba na bo ya dibuta na kwikama yonso. (Tito 2:3-5) Kansi mukumba ya kulonga na dibundu mepesamaka na babakala yina bo meponaka sambu na kusala yo.​—⁠1 Timoteo 2:12, 13.

13. (a) Inki dibanza Biblia kepesa bankuluntu na mutindu bo fwete tadilaka mukumba na bo? (b) Inki dibaku beto yonso kele na yo?

¹³ Na inza, muntu yina kevandaka na kiyeka ya nene, bo kemonaka yandi nde yandi kele mfunu mingi, kansi na kati ya organizasio ya Nzambi bo kelandaka nsiku yai: “Muntu yina me luta fioti na kati na beno yonso, yandi muntu me luta nene.” (Luka 9:46-48; 22:24-26) Masonuku kepesaka bankuluntu ndongisila nde bo keba sambu na kuvanda ve na bangindu ya kuyala bantu yina ya Nzambi mepesaka bo na kutala, kansi bo fwete vanda bambandu sambu na mameme. (1 Piere 5:2, 3) Kaka bantu fyoti mpamba ve, kansi Bambangi ya Yehowa yonso, babakala ti bankento, kele ti dibaku ya kitoko ya kuvanda bamonisi ya Mfumu ya inza ya mvimba, na ntangu bo ketubaka na zina na yandi na kudikulumusa yonso mpi na ntangu bo kezabisaka bantu mambu ya Kimfumu na yandi na bisika yonso.

14. Na nsadisa ya baverse yina bo metinda beto na kutanga, vutula bamvutu na bangyufula yai kele na nsuka ya paragrafe.

¹⁴ Yo kele mbote beto kudiyula nde: ‘Keti ya kyeleka mono kevandaka na ntonda na mutindu Yehowa ketwadisaka organizasio na yandi ya kemonana? Keti mutindu na mono ya kutadila mambu, kutuba na mono, mpi bisalu na mono kemonisaka yo?’ Kuyindulula bangyufula yai melanda lenda sadisa konso muntu na kati na beto na kuditala mbote.

Kana ya kyeleka mono kezitisaka Kristu nde yandi kele Mfumu ya dibundu, mutindu baverse yai melanda ketuba yo, inki mono tasalaka? (Matayo 24:14; 28:19, 20; Yoane 13:34, 35)

Na ntangu mono kendimaka na ntonda yonso nde madya ya kimpeve yina kimvuka ya mpika ti Nto-Kimvuka na yo kepesaka kele sambu na mambote na mono, pana yo kemonisaka nde mono kezitisaka nani? (Luka 10:⁠16)

Na kati ya dibundu, inki mutindu konso muntu, mingimingi bankuluntu, fwete zingaka ti bankaka? (Roma 12:⁠10)

15. (a) Inki beto kemonisaka na mutindu na beto ya kutadila organizasio ya Yehowa yina kemonana? (b) Inki mabaku beto kele na yo ya kumonisa nde Dyabulu kele muntu ya luvunu mpi ya kupesa ntima ya Yehowa kyese?

¹⁵ Bubu yai Yehowa ketwadisa beto na nzila ya organizasio na yandi ya kemonana yina Kristu ketambwisa. Mutindu ya beto ketadila ngidika yai kemonisaka mutindu ya beto ketadilaka dyambu ya metala kimfumu. (Baebreo 13:17) Satana ketubaka nde beto kekudibanzaka ntetentete sambu na kimuntu na beto mosi. Kansi kana beto ke ya kuyilama na kusala na konso kisika yina bo ke na mfunu na beto kukonda kubenda dikebi na kimuntu na beto mosi, pana beto tamonisa nde Dyabulu kele muntu ya luvunu. Kana beto kezola mpi kezitisa bantu yina ke na kiyeka na kati na beto mpi beto kebuya ‘kuleba bantu sambu na mambote na beto mosi,’ beto tasepedisa Yehowa. (Yude 16; Baebreo 13:⁠7) Ntangu beto kekwikama na organizasio ya Yehowa, beto kesonga nde Yehowa kele Nzambi na beto mpi nde beto kele ya kuvukana na lusambu na yandi.​—⁠1 Korinto 15:⁠58.

Mvutukila

• Bubu yai organizasio ya Yehowa yina kemonana kele inki? Lukanu na yo kele inki?

• Nani kele Mfumu ya dibundu ya bo ponaka, mpi na nsadisa ya nki bangidika ya kumonana yandi kepesaka beto lutwadisu ya zola?

• Inki mabanza ya mbote beto fwete yedisa sambu na bantu yina kele na organizasio ya Yehowa?

[Kifwanisu ya kele na lutiti 133]

Yehowa ketwadisaka beto na nzila ya organizasio na yandi ya kemonana yina Kristu ketambwisaka