Baleke​—Inki Mutindu Beno Tasadila Luzingu na Beno?

mosi ya nkento ketuba nde: “Mono kezolaka kubaka mambote ya kuluta mingi na luzingu na mono.” Ntembe kele ve nde nge mpi kezolaka mambu ya mutindu mosi. Kansi nki mutindu kibeni nge lenda baka “mambote ya kuluta mingi” na luzingu? Bantu yina kezabisaka bansangu, banduku na nge, mpi mbala yankaka balongi na nge lenda tuba nde sambu na kubaka yo nge fwete sosa kuvanda na mbongo mingi mpi kusala kisalu mosi ya lukumu, to mpi kuvanda muntu ya nene ya mezabana mingi!

Kansi, Biblia kekebisa baleke nde kusosa kuvanda na bima mingi ya kinsuni “kele kaka mupepe.” (Longi 4:4) Yo kele mutindu yina sambu Baleke fyoti mpamba kezwaka kimvwama ti lukumu yango. Mbala mingi bayina kezwaka yo kebakisaka nde yo kelungisaka mpenza ve bampusa ya bo vandaka na yo. Leke mosi ya Angleterre yina kukotaka banzo-nkanda ya nene mpi ya lukumu sambu na kuvanda ti kisalu ya mbongo mingi ketuba nde: “Yo kele bonso karton ya mpamba. Kana nge kangula yo, ata kima mosi kele ve na kati.” Ya kyeleka, ntangu yankaka nge lenda zwa kisalu mosi yina lenda natila nge kimvwama mpi kusala nde nge zabana mingi. Kansi yo lenda lungisa ve ‘mpusa na nge ya kimpeve.’ (Matayo 5:3, NW) Dyaka, 1 Yoane 2:17 (NW) kekebisa nde “nsi-ntoto ke na kuluta.” Ata nge nunga na inza yai, yo tavanda sambu na ntangu fyoti.

Yo yina, Longi 12:1 kelongisila baleke nde: “Beno yindula Muntu yina salaka beno ntangu beno kele kaka baleki.” Ya kyeleka, mutindu ya kuluta mbote ya kusadila luzingu na nge kele kusala kisalu ya Yehowa Nzambi. Kansi, nge fwete lungisa ntete mambu ya bo kelombaka sambu na kusala kisalu ya Nzambi. Inki mutindu nge lenda lungisa yo? Mpi kusala kisalu ya Nzambi kelombaka inki?

Sala Ngolo na Kukuma Mbangi ya Yehowa

Ntetentete, nge fwete kuna mpusa ya kusadila Nzambi, kansi mpusa yango kekwisaka ve yo mosi, ata bibuti na nge kele Bakristu. Nge fwete sala kinduku ya nge mosi ti Yehowa. Leke mosi ya nkento ketuba nde: “Kisambu tasadisa nge na kuvanda ti bangwisana ya nge mosi ti Yehowa.”​—Nkunga 62:8; Yakobo 4:8.

Roma 12:2 ketubila dyambu yankaka ya nge fwete sala. Yo ketuba nde: “Beno [tesa beno mosi, NW] mambu yai ya Nzambi ke zolaka: mambu yina kele ya mbote, mambu yina ke pesaka yandi kiese, mambu yina ke na kifu ve.” Keti yo kekuminaka nge na kutula ntembe na mambu yankaka ya bo melongaka nge? Kana mpidina, landa ndongisila yai ya Biblia kepesa, mpi ‘tesa nge mosi’ sambu na kuzaba kana mambu yai kele ya kyeleka! Sosa-sosa nge mosi. Tangaka Biblia ti mikanda yina ketendulaka yo. Kansi, kulonguka mambu ya Nzambi kelombaka ve kaka kusimba mambu na ntu. Bakaka ntangu ya kuyindulula mambu ya nge ketanga sambu yo kota ya ntima na nge ya kifwani. Kana nge kesala mpidina, yo tanata nge na kuyantika kuzola Nzambi mingi.​—Nkunga 1:2, 3.

Na nima, meka na kuzabisa bantu yankaka mambu ya nge kelonguka kana okazio kumonana, mbala yankaka nge lenda sala yo na banduku na nge ya nzo-nkanda. Dyambu ya kelanda kele kukwenda kulonga nzo na nzo. Bantangu yankaka, nge lenda kutana ti mwana ya nzo-nkanda na beno na ntangu nge kelonga nsangu ya mbote, mpi yo lenda pesa nge nsoni na luyantiku. Kansi Biblia kelongisila beto na ‘kumonaka nsoni ve na kuzabisa Nsangu ya Mbote.’ (Roma 1:16) Nsangu ya nge kelonga kepesaka luzingu ti kivuvu! Sambu na nki kuwa nsoni ntangu nge kezabisa yo?

Kansi, kana bibuti na nge kele Bakristu, ziku nge kefidisaka bo dezia na kisalu yai. Kansi, keti nge lenda sala mingi kuluta kutelema pima na ntwala ya kyelo to kukabula baperiodike ti ba trakiti? Keti nge lenda tuba nge mosi na ntwala ya kyelo? Keti nge lenda sadila Biblia sambu na kulonga muntu ya nge kesolula ti yandi? Kana nge takuka ve, lomba lusadisu na bibuti na nge to na mpangi mosi ya kuyela na dibundu. Baka lukanu ya kukuma nsamuni ya nsangu ya mbote ya mebakaka ntete ve mbotika!

Na nima, yo talomba nde nge kudipesa, disongidila, kusala lusilu na Nzambi nde nge tasadila yandi luzingu na nge ya mvimba. (Roma 12:1) Kansi, kudipesa kele kaka ve dikambu na nge mosi. Nzambi kelombaka bantu yonso na ‘kundima na meso ya bantu nde Yesu kele Mfumu.’ (Roma 10:10) Na ntangu ya mbotika, nge tatuba ntete na munoko nde nge ke na lukwikilu. Na nima, nge tabaka mbotika na masa. (Matayo 28:19, 20) Ya kyeleka, mbotika kele dyambu ya mfunu kibeni. Kansi, kuwa ve boma sambu nge kemona neti nde nge talungisaka ve mambu yonso. Kana nge tula ntima na Nzambi sambu na kusadisa nge, yandi tapesa nge “ngolo ya nene” sambu yo sadisa nge na kuvanda kikesa.​—2 Korinto 4:7; 1 Piere 5:10.

Na ntangu nge tabaka mbotika, nge takuma Mbangi ya Yehowa. (Yezaya 43:10) Dyambu yai tavanda na bupusi ya ngolo kibeni na mutindu ya nge tasadilaka luzingu na nge. Kana nge mekudipesa, nge fwete ‘yindula diaka ve luzingu na nge mosi.’ (Matayo 16:24) Nge lenda yambula balukanu ti bampusa na nge yankaka sambu na ‘kusosa ntete Kimfumu ya Nzambi.’ (Matayo 6:33) Ebuna kudipesa ti mbotika takangudila nge banzila mingi ya kusala yo. Bika beto tadila ndambu ya banzila yango.

Mitindu ya Kusadila Nzambi Ntangu Yonso

● Kukuma mupasudi-nzila kele mosi na kati ya mitindu yango. Mupasudi-nzila kele Mukristu ya mebakaka mbotika yina kepesaka mbandu ya mbote, yandi meyilamaka na kulutisa kiteso ya bangunga 70 konso ngonda na kisalu ya kuzabisa nsangu ya mbote. Kulutisa ntangu mingi na kisalu ya bilanga tasadisa nge na kutomisa mayele na nge ya kuzabisa mpi ya kulonga nsangu ya mbote. Bapasudi-nzila mingi memonaka kyese ya kusadisa balongoki na bo ya Biblia na kukuma Bambangi ya mebakaka mbotika. Keti kele ti kisalu ya kinsuni yina lenda pesa kyese ti mambote mutindu yai?

Sambu na kuzwa mbongo ya kuzingila, bapasudi-nzila mingi kesalaka kisalu ya kinsuni yina kebakaka bo bangunga mingi ve. Bamingi kelongukaka kisalu ya maboko na nzo-nkanda to na bibuti na bo sambu na kuyilama na ntwala na kusala kisalu yai. Kana nge ti bibuti na nge beno kemona nde yo kele mbote nge landa nzo-nkanda na nima ya kubaka diplome na nge, nge fwete zaba nki kepusa nge na kukota na nzo-nkanda yango, yo fwete vanda ve sambu na kuzwa mbongo mingi, kansi sambu na kusadisa nge na kusala kisalu ya kusamuna mpi mbala yankaka kusala kisalu ya ntangu yonso.

Kansi, kima ya kuluta mfunu na luzingu ya mupasudi-nzila kele ve kisalu na yandi ya kinsuni, kansi kisalu na yandi ya kusamuna, disongidila, kusadisa bantu yankaka na kuzwa luzingu! Keti nge lenda baka lukanu ya kukuma mupasudi-nzila? Mbala mingi, kisalu ya kimupasudi-nzila kenatilaka muntu mikumba yankaka. Mu mbandu, bapasudi-nzila yankaka kekwendaka na bisika yina bo kevandaka ti mpusa ya kuluta mingi ya bansamuni ya Kimfumu. Bankaka kelongukaka ndinga mosi ya banzenza mpi kesalaka ti dibundu mosi ya insi yina bo kesadilaka ndinga yina ya banzenza to nkutu na insi ya banzenza. Ya kyeleka, luzingu ya kimupasudi-nzila kepesaka mambote mingi!

● Nzo-Nkanda ya Bansamuni ya Kimfumu kele mutindu yankaka ya kisalu. Lukanu ya nzo-Nkanda yai ya bangonda zole kele ya kupesa formasio na bapasudi-nzila ya kuyela, yina kele ti luzolo ya kuyambula babwala na bo sambu na kukwenda kusamuna bisika yina mpusa kele mingi. Bo ke tubaka nde: “Mono yandi yai, tinda mono.” Mpidina, bo ke landaka mbandu ya Yezu Kristu, Nsamuni ya kuluta nene na ntoto. (Yezaya 6:8; Yoane 7:29). Kukwenda kisika ya nkaka yina kele ntama ti bwala na yandi lenda lomba nde yandi vanda ti luzingu ya kukonda mindondo. Mutindu ya kuzinga, mwini, madidi, mpi madia lenda swaswana kibeni ti yina yandi me yikanaka ti yo. Diaka, yo lenda lomba nde yandi longuka ndinga mosi ya mpa. Nzo-nkanda yai ke sadisaka bankwelani mpi bampangi ya babakala ti ya bankento ya bampumpa ya kele ti bamvula 23 tii 65, na kuyedisa bikalulu ya kimpeve yina bo kele na yo mfunu sambu na kisalu na bo mpi mayele yina ta sadisa bo na mpila nde Yehowa mpi organizasio na yandi kusadila bo mingi.

● Kisalu na Betele ketendula kusala bonso volontere na banzo ya filiale mosi ya Bambangi ya Yehowa. Bantu yankaka ya dibuta ya Betele kesalaka mbala mosi na kisika ya bo kebasisaka mikanda ya ketendulaka Biblia. Bankaka kesalaka bisalu yina kesadisaka bantu yina kebasisaka mikanda, mu mbandu, kutanina banzo mpi bima ya kisalu to kulungisa bampusa ya kinsuni ya dibuta ya Betele. Bisalu yina yonso kele mikumba ya kisalu ya santu ya beto kesadilaka Yehowa. Dyaka, bantu yina kele na Betele kele na kyese sambu bo kezabaka nde mambu yonso ya bo kesalaka kesadisaka ntalu ya nene ya bampangi na bo na ntoto ya mvimba.

Ntangu yankaka, bo kebingaka bampangi yina mezaba mbote kisalu mosi na kwisa kusala na Betele. Kansi, bampangi mingi bo kelongaka bo kisalu kana bo mekwisa. Bantu yina kesalaka na Betele kesalaka ve sambu na kuzwa bima ya kinsuni, kansi bo kesepilaka ti madya, kisika ya kulala, mpi kamwa mbongo ya bo kepesaka bo sambu na kulungisa bampusa na bo. Leke mosi yina kesalaka na Betele ketendula kisalu na yandi mutindu yai: “Yo ke kitoko mingi! Kulanda manaka ya kisalu ya mutindu mosi kevandaka mpasi, kansi mu mebakaka mambote mingi na kusala awa.”

● Kisalu ya kutunga kepesaka muntu nzila ya kutunga banzo ya bafiliale mpi Banzo ya Kimfumu. Bansadi yina ke tungaka Banzo ya Kimfumu, mutindu bo kebingaka bo, ke pesaka maboko na kisalu yai. Yo kele mutindu mosi ya kisalu ya santu, yo kele ya kufwanana ti kisalu ya bantu yina kutungaka tempelo ya Salomo. (1 Bantotila 8:13-18) Lusadisu yina bansadi ya ke tungaka Banzo ya Kimfumu kebakaka kele mutindu mosi ti yina ya dibuta ya Betele kebakaka. Bampangi ya babakala ti ya bankento yai kele ti dibaku ya nene ya kusala kisalu yai sambu na lukumu ya Yehowa!

Sadila Yehowa ti Moyo ya Mvimba

Kusadila Yehowa kele mutindu ya kuluta mbote ya kusadila luzingu na nge. Keti nge lenda baka lukanu ya kusadila Nzambi ntangu yonso? Solula ti bibuti na nge, ti bankuluntu ya dibundu na nge, mpi ti nkengi ya nzyunga na beno mambu yina ketadila kisalu ya ntangu yonso. Kusadila Yehowa kele mutindu ya kuluta mbote ya kusadila luzingu na nge. Keti nge lenda baka lukanu ya kusadila Nzambi ntangu yonso? Solula ti bibuti na nge, ti bankuluntu ya dibundu na nge, mpi ti nkengi ya nzyunga na beno mambu yina ketadila kisalu ya ntangu yonso. Kana nge kezola kusala na Betele, to kukota Nzo-Nkanda ya Bansamuni ya Kimfumu, kwendaka na lukutakanu yina bo kesalaka na balukutakanu ya distrike sambu na bantu yina kezolaka kusala bisalu yai.

Ya kyeleka, bantu yonso ve mefwana to lenda kuka kusala kisalu ya ntangu yonso. Ntangu yankaka maladi, mpasi ya mbongo, mpi mikumba ya dibuta kepesaka ve bantu yankaka nzila ya kusala na kiteso yina ya bo kezolaka. Kansi, Bakristu yonso ya mekudipesaka fwete zitisa nsiku yai ya Biblia: “Nge fweti zola Mfumu Nzambi na nge, na ntima na nge yonso, na luzolo na nge yonso [“moyo ya mvimba,” NW] ti na mabanza na nge yonso.” (Matayo 22:37) Yehowa kelomba nge na kusala mingi na kiteso yina luzingu na nge kepesa nge nzila ya kusala. Yo yina, ata luzingu na nge kele nki mutindu, tula kisalu ya Yehowa na kisika ya ntete. Tula balukanu ya nge lenda lungisa na kisalu ya Nzambi. Ee, ‘yindula Muntu yina salaka nge ntangu nge kele kaka leki.’ Kana nge sala mutindu yina, nge tabaka mambote ya mvula na mvula!

Kana beto me zabisa yo ve, mikapu ya Biblia me katuka na Bible na Kituba, 1990.

5/14