KAPU 17

Mutindu ya Kuvanda na Kyese

BETO yonso kezolaka kuvanda na kyese, mpidina ve?— Kansi bantu mingi ve kevandaka mpenza na kyese. Keti nge mezaba sambu na inki?— Sambu bo melongukaka ve kinsweki ya kyese. Bo keyindulaka nde kuzwa bima mingi kenataka kyese. Kansi ntangu bo kezwaka bima yango, kyese na bo kesukininaka ve na kumana.

Kinsweki ya mfunu yo yai. Longi ya Nene kutubaka nde: “Kiese ya kuluta mingi ke vandaka na kupesa, kansi na kubaka kiese ke vandaka fioti.” (Bisalu 20:35) Yo yina, inki mutindu beto le vanda na kyese?— Beto tavanda na kyese kana beto kepesa bankaka bima mpi kana beto kesala mambu sambu na bo. Keti nge mezabaka mambu yai?—

Bika beto yindula fyoti kima yai. Keti Yezu kutubaka nde muntu yina bo mepesa kima tavanda ve na kyese?— Ve, yandi tubaka ve mpidina. Keti nge kezolaka nde bo kabila nge kima?— Muntu yonso kezolaka nde bo kabila yandi. Beto kevandaka na kyese ntangu bo kekabilaka beto bima ya kitoko.

Kansi Yezu kutubaka nde kyese kevandaka mingi ntangu beto kepesaka. Yo yina, nani nge le tuba nde yandi mepesaka bima mingi na bantu kuluta bantu yonso?— Yehowa Nzambi.

Biblia ketuba nde Nzambi “ke pesaka bantu yonso moyo, mupepe ya kupema, ti bima yonso.” Yandi kepesaka beto mvula yina kekatukaka na zulu mpi ntangu, sambu banti kuyela mpi beto zwa madya ya kudya. (Bisalu 14:17; 17:25) Mpila ya kuyituka kele ve nde Biblia kebinga Yehowa ‘Nzambi ya kyese’! (1 Timoteo 1:11) Kukabila bankaka kele mosi na kati ya bima yina kepesaka Nzambi kyese. Ebuna kana beto kekabila bankaka, beto mpi le vanda na kyese.

Inki bima beto ke na yo ya beto le pesa na bantu yankaka? Inki nge le tuba?— Bantangu yankaka, sambu na kupesa muntu kado yo kelombaka kuvanda na mbongo. Sambu kana nge fwe baka kado yango na magazini, yo talomba nde nge sumba yo. Yo yina, kana nge kezola kupesa kado ya mutindu yina, ziku yo talomba nde nge bumba mbongo tii kuna yo talunga sambu na kusumba kado yango.

Kansi, yo kele ve nde bakado yonso bo kesumbaka yo na bamagazini. Mu mbandu, kana mwini ke mingi kilumbu mosi, dikopa mosi ya masa ya madidi kevandaka mbote mpenza. Yo yina, kana nge pesa kado yina na muntu yina ke na kiwina ya masa, nge le baka kyese yina kekatukaka na kupesa.

Kilumbu yankaka nge ti mama na nge beno le sala mikati. Yo tavanda mbote. Kansi nki kima nge le sala ti ndambu ya mikati na nge yina sambu yo pesa nge kyese kuluta yina ya nge zolaka kubaka kana nge dyaka mikati yonso nge mosi?— Nge le kabila nduku na nge ndambu ya mikati. Keti kilumbu mosi nge tandima na kusala dyambu yai?—

Longi ya Nene ti bantumwa na yandi yonso kuzabaka kyese ya kupesa. Keti nge mezaba nki bo pesaka na bantu yankaka?— Bo pesaka bo kima ya mbote ya meluta bima yonso na nsi-ntoto! Bo zabaka kyeleka ya metala Nzambi, mpi bo zabisaka nsangu yai ya mbote na bantu yankaka. Bo salaka yo kukonda kulomba mbongo na bantu yina bo vandaka kuzabisa nsangu yango.

Kilumbu mosi, ntumwa Polo ti nduku na yandi ya mbote longoki Luka kukutanaka ti nkento mosi yina zolaka mpi kubaka kyese ya kupesa. Bo kutanaka ti yandi na masa mosi. Polo ti Luka kukwendaka kuna sambu bo waka nde yo vandaka kisika ya kisambu. Mpi yo vandaka ya kyeleka, ntangu bo kumaka, bo monaka ndambu ya bankento kesamba.

Polo yantikaka na kuzabisa bankento yina nsangu ya mbote ya metala Yehowa Nzambi ti Kimfumu na yandi. Mosi na kati ya bankento yango zina na yandi kuvandaka Lidia, mpi yandi tulaka dikebi mingi mpenza. Na nima, Lidia zolaka kusala kima mosi sambu na kusonga nde yandi sepelaka mpenza na nsangu ya mbote ya yandi waka. Yo yina yandi bondilaka Polo ti Luka nde: ‘Kana beno me mona nde ya kyeleka mu me ndima Yehowa na ntima na munu, beno kwisa kuvanda na nzo na munu.’ Mpi yandi salaka yonso sambu bo kwenda na nzo na yandi.—Bisalu 16:13-15.

Lidia kuvandaka na kyese ya kuyamba bansadi yina ya Nzambi na nzo na yandi. Yandi zolaka bo sambu bo sadisaka yandi na kulonguka mambu ya metala Yehowa ti Yezu mpi mambu yina metala mutindu bantu le zinga kimakulu. Yandi vandaka na kyese na kupesa Polo ti Luka madya mpi kisika ya kupema. Ee, kupesa ya Lidia kupesaka yandi kyese mingi sambu yandi zolaka mpenza kupesa. Yai ke kima mosi ya beto fwe yibukaka. Mbala yankaka, muntu le tindika beto na ngolo nde beto fwe pesa kaka kado. Kansi, kana beto kezola ve mpenza kusala yo, kupesa ya mutindu yina tapesa beto ve kyese.

Mu mbandu, inki nge tasala kana nge ke ti babombo mingi ya nge kezola kudya? Kana mu songa nge nde nge fwe kabila mwana yankaka ndambu, keti nge tavanda na kyese ya kupesa yandi yo?— Kansi nki nge tasala kana kilumbu yankaka nge kele ti mwa babombo, ebuna nge mekutana ti nduku na nge yina nge kezolaka mingi mpenza? Kana nge mosi mebaka dibanza ya kukabila nduku na nge ndambu, keti yo tapesa nge ve kyese?—

Mbala mingi kana kele ti muntu mosi ya beto kezolaka mingi mpenza, beto kezolaka kukabila yandi konso kima yina beto ke na yo mpi beto kezolaka ve kupimisa yandi ata kima mosi. Beto fwe waka mpusa ya kusala mutindu yina sambu na Nzambi na ntangu zola na beto sambu na Yandi keyela.

Longi ya Nene kuzabaka nkento mosi ya nsukami yina kuvandaka na dibanza ya mutindu yina. Yandi monaka yandi na tempelo ya Yeruzalemi. Nkento yango kuvandaka kaka ti bibende ya fioti zole ya mbongo; yo yina mpamba yandi vandaka na yo. Kansi yandi tulaka yonso zole na kesi ya makabu ya tempelo. Ata muntu mosi ve kupusaka yandi na kusala yo. Bantu mingi ya kuvandaka pana kuzabaka nkutu ve kima ya yandi salaka. Yandi salaka yo sambu yandi zolaka kusala yo mpi sambu yandi zolaka mpenza Yehowa. Yo pesaka yandi kyese.—Luka 21:1-4.

Beto le pesa na mitindu mingi. Keti nge le yindula mwa mitindu yango?— Kana beto kepesa sambu beto kezola mpenza kupesa, beto tavanda na kyese. Yo yina Longi ya Nene ketubila beto nde: “Beno pesa makabu na bantu ya nkaka.” (Luka 6:38) Kana beto kesala mpidina, beto tapesaka bantu yankaka kyese. Mpi beto bantu kepesa, beto tavanda na kyese ya kuluta!

Beto tanga mambu yankaka yina kemonisa nki mutindu kukaba kepesaka kyese, na Matayo 6:1-4; Luka 14:12-14; mpi 2 Korinto 9:7.

[Kifwanisu ya kele na lutiti 92]

Sambu na nki Yehowa ke ‘Nzambi ya kyese’?

[Kifwanisu ya kele na lutiti 93]

Inki le pesa nge kyese mingi kuluta kudya mikati na nge, nge mosi mpamba?

[Kifwanisu ya kele na lutiti 94]

Inki Lidia ke na kutubila Polo ti Luka?

[Kifwanisu ya kele na lutiti 94]

Sambu na nki Lidia ke na kyese na kusadisa Polo ti Luka?

[Kifwanisu ya kele na lutiti 96]

Sambu na nki nkento yai ya nsukami ke na kyese na kupesa yonso ya yandi vandaka na yo?