“Yo Vandaka Dikabu ya Kuluta Mbote Yina Mono Me Bakaka Ntete Ve”

Yai kele mutindu mwana-nkento mosi ya bamvula 13 kudiwaka ntangu bo pesaka yandi dikabu ya mwana-mbwa. Nkento mosi ya ke salaka mbote mumbongo tubaka nde ordinatere yina papa na yandi pesaka yandi ntangu yandi vandaka na nzo-nkanda, vandaka dikabu yina sobaka luzingu na yandi. Diaka, bakala mosi yina katukaka kukwela monaka nde karti yina nkento na yandi salaka na maboko mpi pesaka yandi sambu na aniversere ya ntete ya makwela na bo, vandaka dikabu ya kuluta mbote yina yandi me bakaka ntete ve.

Konso mvula, bantu mingi ke lutisaka ntangu mpi ke salaka bikesa na kusosa dikabu ya “kuluta mbote” yina bo lenda pesa nduku to mpangi mosi na dibaku mosi ya mfunu. Diaka, bantu mingi ta zola nde mambu kusalama mutindu beto me tubila yo na luyantiku. Ebuna nge? Keti nge ta zola kupesa to kubaka makabu yina bantu ta sepela ti yo mingi?

Kuvingila diambu ya mutindu yai lenda pesa kiese kibeni, kaka ve sambu na kiese yina muntu ya ke baka yo lenda wa, kansi mpi sambu na kiese yina muntu ya ke pesa yo lenda wa. Yo yina, Biblia ke tuba nde: “Kiese ke vandaka mingi na kupesa, kansi na kubaka kiese ke vandaka fioti.” (Bisalu 20:35) Ya kieleka, kiese ke kumaka mingi kana muntu yina me baka dikabu ke baka yo na valere mingi.

Ebuna, inki nge lenda sala sambu dikabu ya nge ke pesa kunatila nge mpi muntu yina ke baka yo kiese? Diaka, kana nge kele ve ti dikabu ya “kuluta mbote,” inki nge lenda sala sambu bantu kusepela kibeni ti dikabu ya nge ke pesa bo?