KAPU 21

Keti Beto Fwe Kudisikisa Sambu na Mambu Yonso?

KUDISIKISA ketendula inki? Keti nge mezaba?— Mbandu mosi yo yai. Keti nge memekaka dezia kusala kima mosi ya nge mezaba ve mbotembote? Ziku nge mekaka kubula balo. To mbala yankaka nge mekaka kubula silikoti. Keti muntu kusekaka nge nde, “Ah! Ah! Ah! Mu meluta nge”?— Kana muntu kusekaka nge mutindu yina tuba nde yandi vandaka kudisikisa.

Inki mutindu nge kewaka ntangu bantu yankaka kesalaka mutindu yina? Keti nge kesepelaka?— Ebuna, nge keyindula nde bankaka kewaka nki mutindu ntangu nge kekudisikisaka?— Keti yo ke mbote na kutuba na muntu yankaka nde, “Mu ke mbote kuluta nge”?— Keti Yehowa kesepelaka ti bantu ya kesalaka mutindu yina?—

Longi ya Nene kuzabaka bantu yina vandaka kuyindula nde bo vandaka mbote kuluta bankaka. Bo vandaka kudisikisa, to kumatisa mapeka, mpi kumona bankaka bonso bantu ya mpamba. Yo yina, kilumbu mosi, Yezu kutelaka bo disolo mosi sambu na kusonga bo nde kudisikisa kuvandaka mbi mpenza. Beto wa disolo yango.

Disolo yango metala Mufarize mosi mpi kalaki mosi ya mpaku. Bafarize vandaka balongi ya dibundu yina mbala mingi, vandaka kusala mambu bonso nde bo vandaka na lunungu to na kisantu ya kuluta bantu yankaka. Mufarize ya Yezu kutubilaka na disolo na yandi kwendaka na tempelo ya Nzambi na Yeruzalemi sambu na kusamba.

Yezu kutubaka nde kalaki ya mpaku yina mpi kukwendaka na tempelo sambu na kusamba. Bantu mingi vandaka kuzola ve bakalaki ya mpaku. Bo vandaka kumona nde bakalaki ya mpaku vandaka kuyiba bo. Mpi yo ke ya kyeleka nde bakalaki mingi ya mpaku kuvandaka ve masonga ntangu yonso.

Ntangu bo vandaka na tempelo, Mufarize yantikaka na kusamba Nzambi mutindu yai: ‘Nzambi, mono kepesa nge mersi na mutindu munu kele ve muntu ya masumu bonso bantu yankaka. Mono keyibaka ve bantu to kusala bantu yankaka mbi. Mono kele ve bonso kalaki ya mpaku yina kuna. Mono kele muntu ya lunungu. Mono kebuyaka kudya mbala zole na konso mposo sambu mono kuzwa ntangu mingi ya kuyindulula nge. Mpi mono kepesaka na tempelo ndambu kumi ya bima yonso ya mono kezwaka.’ Ya kyeleka, Mufarize kuyindulaka mpenza nde yandi vandaka mbote kuluta bankaka, mpidina ve?— Yandi tubilaka yo mpi Nzambi.

Kansi kalaki ya mpaku kusalaka ve mutindu yina. Nkutu yandi tombulaka ve meso na yandi na zulu na ntangu yandi vandaka kusamba. Yandi telamaka mwa ntama mpi yandi kitisaka ntu na yandi. Kalaki ya mpaku kuvandaka na mawa mpenza sambu na masumu na yandi, mpi yandi vandaka kubula ntulu na yandi sambu na mawa. Yandi sosaka ve kutubila Nzambi nde yandi vandaka muntu ya mbote. Kansi, yandi sambaka nde: ‘O Nzambi, wila mono mawa, mono muntu ya masumu.’

Nge keyindula nde nani na kati ya bantu yai zole kusepedisaka Nzambi? Mufarize, yina kuyindulaka nde yandi vandaka muntu ya mbote mingi? To kalaki ya mpaku, yina kuwaka mawa sambu na masumu na yandi?—

Yezu kutubaka nde kalaki ya mpaku muntu kusepedisaka Nzambi. Sambu na inki? Yezu kutendulaka nde: ‘Sambu muntu yina kesosaka kudimona nde yandi kele muntu ya mbote kuluta bantu yankaka, bo takulumusa yandi. Kansi muntu yina kekudikulumusaka, bo tanangula yandi.’—Luka 18:9-14.

Inki dilongi Yezu vandaka kulonga na disolo na yandi?— Yandi vandaka kulonga nde yo kele mbi na kuyindula nde beto ke mbote kuluta bankaka. Ata beto metuba ve nde beto kevandaka na bangindu yina, kansi mambu ya beto kesalaka le songa nde beto keyindulaka mutindu yina. Keti nge mesalaka dezia mutindu yina?— Beto tadila fyoti mbandu ya ntumwa Piere.

Ntangu Yezu kutubilaka bantumwa na yandi nde bo yonso tabikisa yandi ntangu bo takanga yandi, Piere kudisikisaka nde: ‘Ata bantu yonso kubikisa nge, mono tabikisa nge ve ata fyoti!’ Kansi Piere kudikusaka. Yandi kuditudilaka ntima mingi. Yandi bikisaka Yezu. Kansi, yandi vutukaka dyaka, mutindu beto tamona yo na Kapu 30 ya mukanda yai.—Matayo 26:31-33.

Beto baka mbandu mosi ya bilumbu yai. Kana bo meyula nge ti nduku na nge ya nzo-nkanda mwa bangyufula na nzo-nkanda, inki nge tasala kana nge kekuka kupesa bamvutu ya mbote nswalu, kansi mwana ya nzo-nkanda na beno yina yankaka kekuka ve? Ya kyeleka, nge kevandaka na kyese na ntangu nge kepesa bamvutu ya mbote. Kansi keti yo tavanda mbote nde nge yantika kudifwanisa ti muntu yina kekuka ve kuzwa bamvutu nswalu?— Keti yo kele mbote nde nge yantika kumona muntu yankaka mpamba sambu nde nge meluta yandi?—

Mufarize kusalaka mutindu yina. Yandi kudisikisaka nde yandi vandaka muntu ya mbote kuluta kalaki ya mpaku. Kansi Longi ya Nene kutubaka nde Mufarize kudikusaka. Yo kele ya kyeleka nde muntu mosi le kuka kusala dyambu mosi mbote kuluta muntu yankaka. Kansi yo ketendula ve nde yandi ke mpenza muntu ya kuluta mbote.

Yo yina, kana beto mezaba mambu mingi kuluta muntu yankaka, keti yo kepesa beto kikuma mpenza ya kudisikisa?— Yindula ntete. Keti beto mosi kusalaka butomfu na beto?— Ve, Nzambi muntu kupesaka beto yonso butomfu. Mpi mambu mingi ya beto mezabaka, beto longukaka yo na muntu yankaka. Ziku mambu ya beto mezaba beto tangaka yo na mukanda. To mbala yankaka muntu kusongaka beto yo. Ata mayele ya kusala dikambu mosi kukatukaka na beto mosi, inki kusadisaka beto na kusala yo?— Kima kusadisaka beto na kusala yo kele butomfu yina Nzambi mepesaka beto.

Kana muntu kesala kikesa na kusala kima mosi, yo ke mbote nde nge tubila yandi mambu yina tasyamisa yandi. Tubila yandi nde nge mesepela na mambu ya yandi mesala. Ziku, nge le sadisa yandi nkutu na kusala dyaka mbote. Si nge tazola nde bantu yankaka kusala mutindu yina sambu na nge, mpidina ve?—

Bantu mingi meluta bankaka na ngolo. Ebuna nki nge tasalaka kana nge meluta mpangi na nge ya bakala to ya nkento na ngolo? Keti nge fwe kudisikisaka sambu na yo?— Ve, nge fwe salaka ve mutindu yina. Kima kesadisaka beto na kuvanda na ngolo ke madya ya beto kedyaka. Nzambi muntu kepesaka ntangu mpi kenokisaka mvula sambu na kuyedisa bima ya kudya yonso ya beto kevandaka na yo mfunu, mpidina ve?— Yo yina, beto fwe pesaka mersi na Nzambi kana beto kekuma na ngolo mingi.—Bisalu 14:16, 17.

Ata muntu mosi ve na kati na beto kesepelaka na kuwa muntu mosi kekudisikisa, mpidina ve?— Beto yibuka bangogo yai ya Yezu: ‘Beno sala bantu yankaka mambu yina ya beno kezolaka nde bo sala beno.’ Kana beto kesala yo, beto tavanda ve ata fyoti bonso Mufarize yina kudisikisaka na disolo yina Longi ya Nene kutaka.—Luka 6:31.

Kilumbu mosi, muntu mosi kubingaka Yezu nde muntu ya mbote. Keti Longi ya Nene kutubaka nde, ‘Ee, mu ke muntu ya mbote’?— Ve, yandi tubaka yo ve. Kansi yandi tubaka nde: “Ata muntu mosi ve kele ya mbote, kaka Nzambi mpamba.” (Marko 10:18) Ata Longi ya Nene kuvandaka muntu ya kukuka, yandi kudisikisaka ve. Kansi yandi pesaka lukumu yonso na Tata na yandi, Yehowa.

Ebuna, keti kele ti muntu beto le sikisa?— Ee. Beto le sikisa Ngangi na beto, Yehowa Nzambi. Kana beto tala kitoko ya ntangu na lere yo kedindaka, to bima yankaka ya kitoko ya Nzambi mesalaka, beto le tubila muntu nde, ‘Nzambi na beto ya nene, Yehowa, muntu kusalaka yo!’ Beto fwe vanda ntangu yonso ya kuyilama sambu na kutubila bantu mambu ya nene ya Yehowa mesalaka dezia ti yina yandi tasala na bilumbu kekwisa.

Tanga mambu yina Masonuku ketuba sambu na yina metala kudisikisa, to kumatisa mapeka, mpi longuka nki mutindu beto fwe buya kudisikisa: Bingana 16:5, 18; Yeremia 9:23, 24; 1 Korinto 4:7 mpi 13:4.

[Kifwanisu ya kele na lutiti 113]

Sambu na nki Nzambi kusepelaka na kalaki ya mpaku, kansi na Mufarize ve?

[Kifwanisu ya kele na lutiti 115]

Kana nge mezaba mambu mingi kuluta muntu yankaka, keti yo ketendula nde nge ke muntu ya mbote kuluta yandi?

[Kifwanisu ya kele na lutiti 115]

Sambu na nki yo ke mbi na kudisikisa kana beto meluta muntu yankaka na ngolo?

[Kifwanisu ya kele na lutiti 116]

Inki kima mwana yai ke na kusikisa?