Kapu 94

Mfunu ya Kusamba mpi ya Kudikulumusa

NA NTWALA, ntangu yandi vandaka na Yudea, Yezu kutaka kingana mosi yina metadila mfunu ya kukwamina na kusamba. Ntangu yai, na nzyetolo na yandi ya nsuka na Yeruzalemi, yandi ketubila dyaka mingi mfunu ya kukonda kulemba na kusamba. Ngatu Yezu kele kaka na Samaria to na Galilea ntangu yandi ketela balongoki na yandi kingana yai ya nkaka:

“Na bwala mosi kuvandaka na zuzi mosi yina vandaka kutina Nzambi boma ve; yandi vandaka kuzitisa bantu ya nkaka mpi ve. Na bwala yango yina kuvandaka mpi na nkento mosi ya mufwidi, yandi vandaka kwisa kutubila zuzi yina mbala mingi nde: ‘Zenga makambu na beto na mpila nde mono kununga, ebuna mbeni na mono kubela.’ Zuzi yina vandaka kubuya mbala mingi na kusala mutindu nkento yina vandaka kuzola. Kansi na nima, yandi tubaka na ntima na yandi nde: ‘Ata mono ke tinaka Nzambi boma ve, ata mono ke zitisaka bantu ya nkaka ve, kansi mufwidi yai ke yangisa mono; yo yina, mono ta sadisa yandi. Kana ve, yandi ta kwisaka kuvutuka mbala mingi sambu na kulembisa mono.’ ”

Na nima Yezu mesadila nkenda yai, na kutubaka nde: “Beno wa mambu ya zuzi yai ya [kukonda lunungu, NW] me tuba. Keti Nzambi ta sadisa ve bantu yina ya yandi solaka, bayina ke bingaka yandi mpimpa ti mwini sambu yandi sadisa bo, [ata yandi kesadilaka ntima ya nda sambu na bau, NW]?”

Yezu kezola kutuba ve ata fyoti nde Yehowa Nzambi kele bonso zuzi yai ya kukonda lunungu. Kansi, kana ata nkutu zuzi ya kukonda lunungu tandima ndomba ya kukwamina, mbefula fwete vanda ve nde Nzambi, yina kele ya lunungu mpi ya mbote, tapesa mvutu kana bansadi na yandi kulemba ve na kusamba. Yau yina, Yezu kelanda nde: “Mono ke tubila beno nde yandi [Nzambi] ta sadisa bo nswalu.”

Mbala mingi, bantu ya kudikulumusa ti bansukami bau kekandikilaka bau lunungu, kansi bantu ya ngolo ti bamvwama kenungisamaka mbala na mbala. Kansi, Nzambi tatula dikebi kaka ve na mpila nde muntu ya mbi kubaka ndola ya lunungu, kansi tandimisama mpi nde bansadi na yandi ketadilama na lunungu yonso na kubaka luzingu ya mvula na mvula. Kansi bantu ikwa kekwikilaka na nsyamu yonso nde Nzambi tanata lunungu nswalu?

Na kutubilaka mingimingi lukwikilu na ngolo ya kisambu, Yezu keyufula nde: “Ntangu Mwana-muntu ta kwisa awa na nsi-ntoto, keti yandi ta kwisa kukuta bantu ti lukwikilu?” Ata nkutu ngyufula yango meyambulama nkatu mvutu, yau lenda kupesa ngindu nde lukwikilu ya mutindu yina tavanda ntangu Yezu takuma na ngolo ya Kimfumu.

Na kati ya bayina kewidikila Yezu, kele ti bantu ya nkaka kekudimona mingi sambu na lukwikilu na bau. Bau kekuditudila ntima nde bau kele bantu ya lunungu, mpi bau kevwenza bantu ya nkaka. Balongoki ya nkaka na kati ya balongoki ya Yezu lenda mpi kuvanda na kati ya kibuka yina. Ebuna yandi meta kingana yai sambu na bantu ya mutindu yina:

“Kuvandaka na bantu zole, bo kwendaka na [tempelo, NW] sambu na kusamba. Muntu mosi vandaka Mufarize, ebuna muntu ya nkaka vandaka kalaki yina ke futisaka bantu mpaku. Mufarize yina kwendaka kutelama mwa-ntama yandi mosi, ebuna yandi sambaka mutindu yai nde: ‘Nzambi, mono ke pesa nge mersi, sambu mono kele ve bonso bantu yonso yina kele bamiyibi, bantu ya [kukonda lunungu bantu ya bizumba, NW]. Mono ke pesa nge mersi mpi sambu mono kele ve bonso kalaki yai ya mpaku. Na konso mposo mono ke buyaka kudia mbala zole sambu na kusamba nge; bima yonso ya mono ke bakaka mono ke kabisaka yo na ndambu kumi, ebuna ndambu mosi mono ke pesaka nge makabu.’ ”

Bafarize mezabanaka na lusikisu ya lunungu na bau sambu na kuyitukisa bankaka. Kintete ti Kiya kele bilumbu ya bau mekudiponinaka sambu na kubuya madya, mpi bau kefutaka na dikebi yonso ata dikumi ya fyoti ya matiti ya bilanga na bau. Mwa bangonda na ntwala, bau kumonisaka mbote luvwezo na bau sambu na bantu ya mpamba na ntangu ya Nkinsi ya Bisasa ntangu bau kutubaka nde: “Bantu yina kuzaba ve Bansiku ya Moize, [disongidila, ntendula ya Bafarize mepesaka yau] ebuna bo kele bantu yina ya Nzambi me singaka.”

Na kulandaka kingana na yandi, Yezu metubila muntu ya “kusingama” ya mutindu yina nde: “Kalaki yina ya mpaku telamaka ka yandi mwa-ntama fioti. Yandi vandaka kumona mpila ve ya kutala na zulu. Kansi yandi vandaka kubula na ntulu na yandi sambu na kusonga mawa na yandi. Yandi vandaka kutuba nde: ‘Nzambi wila mono mawa sambu, mono kele muntu ya masumu.’ ” Sambu kalaki ya mpaku mendima masumu na yandi na kudikulumusa yonso, Yezu ketuba nde: “Mono ke tubila beno nde ntangu kalaki yai ya mpaku vutukaka na nzo na yandi Nzambi ndimaka yandi, kansi yandi ndimaka Mufarize yina ve. Sambu Nzambi ta kulumusa bantu yina yonso ke kudinangulaka, ebuna yandi ta nangula bayina yonso ke kudikulumusaka.”

Na yau dyaka, Yezu ketubila mingi mfunu ya kudikulumusa. Mpila ya kuyituka kele ve nde balongoki ya Yezu bau mosi kubanza mambu yai, kana beto kezaba nde bau kuyelaka na kimvuka ya Bafarize, bantu yina vandaka kudimona nde bau kele bantu ya lunungu mpi bantu ya kuvandaka na bupusi mingi mpi vandaka kutula mbalu ya mingi na bapozisio ti ndonga. Kansi, dilongi ya kudikulumusa ya inki mutindu Yezu melonga! Luka 18:​1-14; Yoane 7:⁠49.

▪ Sambu na inki zuzi ya kukonda lunungu mendima ndomba ya mufwidi, mpi inki dilongi kingana ya Yezu kelonga?

▪ Ntangu Yezu takwisa inki lukwikilu yandi tasosa?

▪ Banani Yezu ketela kingana na yandi yina metala Mufarize ti kalaki ya mpaku?

▪ Inki nkadilu ya Bafarize fwete kubuyama?