“Yandi Longukaka Bulemfu”

1, 2. Sambu na nki tata ya zola ke sepelaka kana mwana na yandi ke lemfukila yandi, mpi inki mutindu Yehowa ke kudiwaka ntangu beto ke lemfukilaka yandi?

TATA mosi kele na kati ya nzo. Yandi ke tala mwana na yandi ya bakala ke sekana na lupangu ti banduku na yandi. Balo ya bo ke bula me kwenda kubwa na bala-bala. Mwana yina ke tala balo yango. Yandi ke zola nde yo vutuka na lupangu. Nduku na yandi mosi ke songa yandi na kubasika na bala-bala sambu na kubaka yo. Kansi yandi me nikisa ntu mpi me songa yandi nde: “Mono kele ve ti nswa ya kubasika na bala-bala.” Tata na yandi me seka. Yandi me sepela na mvutu yina mwana me pesa.

² Sambu na nki Tata yina me sepela? Sambu yandi me songaka mwana na yandi nde yandi fwete basika ve na bala-bala yandi mosi. Mwana yina me lemfuka, ata yandi ke zaba ve nde tata na yandi ke tala yandi. Tata me mona nde mwana ke bakisa nde yo kele mfunu na kulemfukila tata mpi tata me zaba nde mwana na yandi kele na lutaninu. Tata yina ke kudiwa mutindu Yehowa, Tata na beto ya zulu, ke kudiwaka. Nzambi me zaba nde kana beto ke zola kubikala ya kukangama na yandi mpi kubaka balusakumunu ya mbote yina yandi me songaka beto na bilumbu ke kwisa, beto fwete tudila yandi ntima mpi kulemfukila yandi. (Bingana 3:5, 6) Sambu na kusadisa beto na kusala yo, yandi tindilaka beto longi ya me luta balongi yonso.

3, 4. Inki mutindu Yezu “longukaka bulemfu” mpi “kumaka ya kukuka”? Pesa mbandu.

³ Biblia ke tuba kima mosi ya kuyituka sambu na Yezu: “Ata yandi vandaka mwana, yandi longukaka bulemfu na bampasi yina yandi kutanaka na yo. Mpi ntangu yandi kumaka ya kukuka, yandi kumaka nzila yina bantu yonso ya ke lemfukila yandi lenda baka luguluku ya mvula na mvula.” (Baebreo 5:8, 9) Mwana yai zingaka bamvula mingi kibeni na zulu. Yandi monaka mutindu Satana mpi bawanzio ya nkaka ya kukonda bulemfu kolamaka na Yehowa, kansi yandi kolamaka ve. Biblia tubaka na ntwala sambu na yandi nde: “Mono me kolama ve.” (Yezaya 50:5) Sesepi kana Yezu ke lemfukilaka Tata na yandi ntangu yonso, inki mutindu yandi “longukaka bulemfu”? Kana Yezu vandaka dezia muntu ya kukuka, inki mutindu yandi ‘kumaka diaka ya kukuka’?

⁴ Beto baka mbandu mosi. Soda mosi kele ti mbele ya bitumba. Kansi bo me sadilaka ntete ve mbele yango na bitumba. Ata mpidina, bo me salaka yo mbote kibeni. Sesepi, yandi ke zola kubaka mbele ya nkaka ya mbote kuluta na kisika ya mbele yai. Yo kele mbele ya bo me salaka ti kibende mosi ya ngolo kibeni. Diaka, bo me sadilaka yo dezia na bitumba mpi yo vandaka mbote. Yandi me sala mbote mutindu yandi me baka mbele yai ya ngolo, mpidina ve? Mutindu mosi, Yezu lemfukilaka Tata na yandi na mutindu ya kukuka na ntwala ya kukwisa na ntoto. Kansi, na nima ya kuzinga awa na ntoto, bulemfu na yandi kumaka mutindu ya nkaka. Mimekamu yina Yezu kutanaka ti yo awa na ntoto, yandi kutanaka ve ti yo ntangu yandi vandaka na zulu. Mimekamu ya yandi kutanaka ti yo awa mekaka bulemfu na yandi mpi kumisaka yo ngolo.

5. Sambu na nki yo vandaka kibeni mfunu nde Yezu kulefumkila Tata na yandi, mpi nki beto ta tadila na kapu yai?

⁵ Sambu Yezu kulungisa mukumba yina yandi kwisilaka awa na ntoto, yo lombaka nde yandi vanda bulemfu. Biblia ke bingaka Yezu nde “Adami ya nsuka” sambu yandi kwisaka na ntoto sambu na kusala mambu yina Adami kukaka ve disongidila, kulanda kulemfukila Yehowa Nzambi, ata na ntwala ya mimekamu. (1 Bakorinto 15:45) Kansi, Yezu vandaka kulemfukila ve Yehowa kaka sambu yo lombaka nde yandi sala mpidina. Yandi vandaka kulemfukila yandi na mabanza, na ntima, mpi na moyo na yandi yonso. Yandi salaka yo na kiese. Sambu na yandi, kusala luzolo ya Tata na yandi vandaka mfunu mingi kuluta kudia. (Yoane 4:34) Inki ta sadisa beto na kulanda mbandu ya bulemfu ya Yezu? Beto tadila ntete bikuma yina vandaka kupusa yandi na kulemfuka. Kana beto ke lemfukila Yehowa sambu na bikuma yina mosi, beto ta bwa ve na mpukumuna mpi beto ta sala luzolo ya Nzambi. Na nima, beto ta tadila mwa balusakumunu yina Yehowa ta pesa beto kana beto ke lemfukila yandi bonso Kristu.

Bikuma Yina Pusaka Yezu na Kulemfuka

6, 7. Inki vandaka mwa bikuma yina pusaka Yezu na kulemfukila Yehowa?

⁶ Yezu lemfukilaka Yehowa sambu yandi vandaka ti bikalulu ya mbote na ntima na yandi. Mutindu beto monaka yo na Kapu 3, Kristu vandaka muntu ya kudikulumusa na ntima. Bantu ya lulendo ke lemfukilaka ve ata muntu mosi, kansi kana beto kele bantu ya kudikulumusa, beto ta lemfukila Yehowa na luzolo yonso. (Kubasika 5:1, 2; 1 Piere 5:5, 6) Diaka, mambu ya Yezu vandaka kuzola mpi yina yandi vandaka kuzola ve ata fioti sadisaka yandi na kulemfukila Yehowa.

⁷ Diambu ya kuluta mfunu kele nde Yezu zolaka Yehowa, Tata na yandi ya zulu. Beto ta tubila mingi zola yina na Kapu 13. Zola yina sadisaka Yezu na kuvanda ti boma ya Nzambi. Yandi vandaka kuzola Yehowa mingi kibeni mpi kuzitisa yandi. Yo yina yandi vandaka kuzola ve ata fioti kupesa Tata na yandi mawa. Yezu vandaka ti luzitu ya mudindu sambu na Yehowa. Yo yina Yehowa vandaka kuwa bisambu na yandi. (Baebreo 5:7) Sesepi Yezu kele Ntotila ya Kimfumu ya Nzambi, mpi yandi ke yala na mutindu yina ke monisa nde yandi ke zitisaka Yehowa mingi mpi ke zolaka ntangu yonso kusepedisa yandi.​—Yezaya 11:3.

8, 9. Mutindu mbikudulu tubaka yo, inki mutindu Yezu kudiwaka sambu na lunungu mpi mambu ya mbi, mpi inki mutindu yandi monisaka mawi yina pwelele?

⁸ Muntu yina ke zolaka Yehowa fwete zola mpi ve ata fioti mambu yina Yehowa ke zolaka ve. Mu mbandu, tala mambu yai ya Biblia tubaka na ntwala sambu na Ntotila yina kele Mesia: “Nge zolaka lunungu, kansi nge mengaka mambu ya mbi. Yo yina Nzambi, Nzambi na nge, me tula nge mafuta ya kiese kuluta banduku na nge.” (Nkunga 45:7) “Banduku” ya Yezu vandaka bantotila ya nkaka ya dibuta ya Ntotila Davidi. Ntangu Yehowa ponaka Yezu, to tulaka yandi mafuta sambu na kuvanda Ntotila, Yezu waka kiese mingi kuluta bo yonso. Sambu na nki? Sambu Yehowa sakumunaka yandi mingi kuluta bantotila yina, mpi sambu luyalu na yandi ta natila bantu balusakumunu mingi kibeni. Yehowa sakumunaka yandi sambu zola na yandi sambu na lunungu mpi mutindu yandi vandaka kumenga mambu ya mbi, pusaka yandi na kulemfukila Nzambi na mambu yonso.

⁹ Inki Yezu salaka sambu na kumonisa mutindu yandi ke tadilaka lunungu mpi mambu ya mbi? Mu mbandu, inki yandi waka ntangu yandi monaka nde Yehowa me sakumuna balongoki na yandi sambu bo lemfukaka na bansiku yina yandi pesaka bo na yina me tala kisalu ya kulonga? Yandi vandaka na kiese ya mingi. (Luka 10:1, 17, 21) Ebuna ntangu bantu ya Yeruzalemi buyaka kuwa Yezu ata yandi mekaka mbala mingi kusadisa bo, Yezu waka inki mutindu? Yandi dilaka sambu bantu ya mbanza yina vandaka kaka kubuya kulemfukila Yehowa. (Luka 19:41, 42) Ntangu bantu vandaka kusala mambu ya mbote, Yezu vandaka kuwa kiese. Kansi ntangu bo vandaka kusala mambu ya mbi, yandi vandaka kuwa mawa.

10. Inki mutindu beto fwete tadila mambu ya lunungu mpi ya mbi, mpi inki ta sadisa beto na kusala yo?

¹⁰ Kana beto baka ntangu ya kuyindula mutindu Yezu vandaka kudiwa sambu na mambu ya mbote mpi ya mbi, beto ta landa mbandu na yandi mpi beto ta lemfukila Yehowa sambu na bikuma ya mbote. Ata beto kele bantu ya kukonda kukuka, beto lenda kuma kuzola mambu ya mbote mpi kubuya kibeni mambu ya mbi. Beto fwete samba Yehowa mpi kulomba yandi na kusadisa beto na kukuma kutadila mambu bonso yandi ti Mwana na yandi. (Nkunga 51:10) Ntangu beto ke samba mutindu yina, beto fwete buya mambu yina lenda kanga beto nzila ya kuyambula kutadila mambu ya mbote mpi ya mbi mutindu Yehowa ti Mwana ke tadilaka yo. Sambu na yo, beto fwete pona mbote-mbote bansaka ya kulutisila ntangu mpi bantu yina beto ke lutisaka ntangu ti bo. (Bingana 13:20; Bafilipi 4:8) Kana beto ke lemfukila Yehowa sambu na bikuma yina Yezu vandaka kulemfukila yandi, beto ta lemfukila yandi ve kaka sambu yo ke lomba nde beto sala mpidina. Beto ta sala mambu ya mbote sambu beto ke zolaka kusala yo. Beto ta buya kusala mambu ya mbi sambu beto ke mengaka yo kibeni, kansi ve sambu beto ke wa boma nde bo ta kanga beto.

“Yandi Salaka Disumu Ve”

11, 12. (a) Inki kuminaka Yezu na luyantiku ya kisalu na yandi? (b) Inki Satana songaka ntete Yezu sambu na kumeka yandi, mpi sambu na nki yandi salaka mpidina?

¹¹ Yezu yantikaka kisalu na yandi. Ntangu fioti na nima, Satana mekaka kikalulu na yandi ya kumenga disumu. Na nima ya mbotika na yandi, yandi salaka bilumbu mpi bampimpa 40 na ntoto ya zelo na zelo kukonda madia. Na nsuka ya bilumbu yina, Satana kwisaka kumeka yandi. Beto tala mayele ya mbi yina Satana sadilaka.​—Matayo 4:1-11.

¹² Satana tubaka ntete nde: “Kana nge kele mwana ya Nzambi, tuba na matadi yai yo kuma mampa.” (Matayo 4:3) Inki mutindu Yezu vandaka kudiwa na nima ya kukonda kudia bilumbu mingi? Biblia ke tuba pwelele nde: “Yandi waka nzala.” (Matayo 4:2) Satana zabaka nde Yezu vandaka kuwa nzala mpi yandi vandaka ya kulemba. Yo yina yandi sadilaka dibaku yina sambu na kumeka yandi. Yai mambu Satana songaka Yezu sambu na kuseka yandi: “Kana nge kele mwana ya Nzambi.” Satana zabaka nde Yezu vandaka “mwana ya ntete ya lugangu yonso.” (Bakolosai 1:15) Kansi Yezu bikaka ve nde masota yina ya Satana kupusa yandi na kukonda kulemfukila Yehowa. Yezu zabaka nde luzolo ya Nzambi vandaka ve nde yandi sadila ngolo na yandi sambu na bikuma ya bwimi. Yandi buyaka kusala mutindu yina. Mpidina, yandi monisaka nde yandi vandaka kutudila Yehowa ntima na kudikulumusa yonso sambu na kupesa yandi madia mpi kutwadisa yandi.​—Matayo 4:4.

13-15. (a) Inki mutindu Satana mekaka Yezu na mbala ya zole mpi ya tatu, mpi Yezu salaka inki? (b) Inki mutindu beto ke zaba nde Yezu vandaka ntangu yonso ya kuyilama sambu na kubwa ve na mimekamu ya Satana?

¹³ Ntangu Satana mekaka Yezu na mbala ya zole, yandi nataka yandi na kisika mosi ya nda na zulu ya ludi ya tempelo. Satana sadilaka na mutindu ya mbi Ndinga ya Nzambi mpi yandi songaka Yezu na kudilosa sambu na kuyitukisa bantu sambu bawanzio ta gulusa yandi. Mbala ya nkaka Yezu yindulaka nde, kana bantu yina vandaka na tempelo kumona kima yina ya kuyituka, ntembe kele ve nde bo zolaka kundima nde yandi vandaka Mesia ya lusilu. Mpi nde kana bantu kumona mutindu bawanzio ke kwisa kugulusa yandi mpi bo ndima nde yandi vandaka Mesia, yandi zolaka ve kukutana ti bampasi. Yezu zabaka nde Yehowa zolaka nde yandi vanda muntu ya kudikulumusa, kansi ve nde yandi sala kima mosi ya kuyituka sambu na kupusa bantu na kundima nde yandi vandaka Mesia. (Yezaya 42:1, 2) Diaka, Yezu buyaka kukonda kulemfukila Yehowa. Lukumu vandaka ve mfunu sambu na yandi.

¹⁴ Keti Yezu ta bwa na mpukumuna kana bo pesa yandi kimfumu? Na mpukumuna na yandi ya tatu, Satana songaka Yezu nde yandi ta pesa yandi bimfumu yonso ya ntoto kana yandi sambila yandi mbala mosi mpamba. Keti ngindu kwisilaka Yezu ata fioti na kusambila Satana? Yezu tubaka nde: “Katuka awa, Satana!” Yandi tubaka diaka nde: “Sambu bo me sonikaka nde: ‘Nge fwete sambila Yehowa Nzambi na nge, mpi yandi mpamba nge fwete sadila kisalu ya santu.’” (Matayo 4:10) Ata kima mosi ve lendaka kupusa Yezu na kusambila nzambi ya nkaka. Yezu zolaka kundima ve ata fioti kuyambula kulemfukila Yehowa kaka sambu na kubaka kimfumu awa na ntoto.

¹⁵ Keti Satana yambulaka kumeka Yezu? Yo kele ya kieleka nde, yandi katukaka ntangu Yezu songaka yandi na kukatuka. Kansi, Evanzile ya Luka ke tuba nde Diabulu “bikisaka yandi tii na ntangu ya nkaka ya mbote.” (Luka 4:13) Ya kieleka, Satana vandaka kusosa mabaku ya nkaka sambu na kupukumuna Yezu mpi kumeka yandi tii na nsuka. Biblia ke songa beto nde Satana vandaka ‘kumeka Yezu na mambu yonso.’ (Baebreo 4:15) Yo yina, Yezu vandaka ntangu yonso ya kuyilama sambu na kubwa ve na bampukumuna ya Satana; beto mpi beto fwete vanda ya kuyilama.

16. Inki mutindu Satana ke mekaka bansadi ya Yehowa bubu yai, mpi nki lenda sadisa beto na kubwa ve na mimekamu na yandi?

¹⁶ Satana ke landa kumeka bansadi ya Nzambi bubu yai. Kansi yo kele mawa, sambu mutindu beto kele bantu ya kukonda kukuka, mbala mingi yo ke vandilaka yandi ve mpasi na kumeka beto. Satana me zaba nde beto ke vandaka bwimi, lulendo, mpi ti nzala ya ngolo ya kiyeka. Yo yina, yandi ke sadilaka mbala mingi nzala ya bima ya kinsuni sambu na kumeka beto. Yo yina, yo kele mfunu nde beto bakaka mbala na mbala ntangu ya kuditadila na masonga yonso. Beto fwete yindula na mudindu mambu yina kele na 1 Yoane 2:15-17. Ntangu beto ke yindula baverse yina, beto fwete sosa kuzaba kana zola na beto sambu na Yehowa ke bwa madidi sambu beto kele ti banzala ya kinsuni, sambu beto ke zola kukuma ti bima mingi, to sambu beto ke zola kuyitukisa bantu ya nkaka. Beto fwete yibuka nde nsi-ntoto yai ti mfumu na yo Satana ta fwa ntama ve. Yo yina, bika beto bwa ve na mimekamu ya kusala masumu. Beto landa mbandu ya Mfumu na beto, sambu yandi “salaka disumu ve.”​—1 Piere 2:22.

“Mono Ke Salaka Ntangu Yonso Mambu Yina Ke Pesaka Yandi Kiese”

17. Inki mutindu Yezu kudiwaka na yina me tala kulemfukila Tata na yandi, kansi inki bantu ya nkaka lenda tuba?

¹⁷ Kulemfukila Nzambi ke tendula kaka ve kubuya kusala masumu; Kristu vandaka kusala yonso sambu na kuzitisa konso nsiku ya Tata na yandi. Yandi tubaka nde: “Mono ke salaka ntangu yonso mambu yina ke pesaka yandi kiese.” (Yoane 8:29) Yo ke monisa nde sambu beto lemfukila Yehowa, beto fwete sala mambu mingi kansi ve kaka kubuya kusala masumu. Beto fwete sala mpi mambu yina Yehowa ke lomba beto na kusala, kaka mutindu Yezu salaka. Kulemfuka mutindu yina natilaka Yezu kiese ya mingi. Ya kieleka, bantu ya nkaka lenda tuba nde yo vandaka mpasi ve sambu Yezu kulemfuka. Bo lenda yindula nde yandi vandaka kulemfuka kaka na Yehowa, yina kele ya kukuka. Kansi beto, beto fwete lemfuka mbala mingi na bantu ya kukonda kukuka yina kele ti kiyeka. Kansi diambu ya kieleka kele nde, Yezu vandaka kulemfuka na bantu ya kukonda kukuka yina vandaka ti kiyeka.

18. Inki mbandu Yezu bikaka sambu na baleke?

¹⁸ Ntangu Yezu vandaka kuyela, yandi vandaka na nsi ya kiyeka ya Maria ti Yozefi. Bo vandaka bibuti na yandi. Kansi bo vandaka bantu ya kukonda kukuka. Ntembe kele ve nde bonso bana mingi, yandi vandaka kumona bifu ya bibuti na yandi. Keti yandi kondaka kulemfukila bo to kukuma kusonga bo mutindu ya kutwadisa dibuta? Ve. Tala mambu yina Luka 2:51 ke tuba sambu na Yezu ntangu yandi vandaka ti bamvula 12: “Yandi landaka kulemfukila bo.” Yezu vandaka kulemfukila bibuti na yandi awa na ntoto. Yandi me bikilaka bana yonso ya kele Bakristu yina ke zola kulemfukila bibuti na bo mpi kumonisa nde bo ke zitisa bo, mbandu mosi ya mbote.​—Baefezo 6:1, 2.

19, 20. (a) Inki mambu ya mpasi Yezu kutanaka ti yo na yina me tala kulemfuka na bantu ya kukonda kukuka? (b) Sambu na nki Bakristu ya kieleka bubu yai fwete lemfuka na bantu yina ke twadisaka bo?

¹⁹ Yezu pesaka mpi mbandu ya kuluta mbote sambu yandi lemfukilaka bantu ya kukonda kukuka na mambu mingi ya mpasi yina Bakristu ya kieleka bubu yai ta kutanaka ve ti yo ata fioti. Beto tadila nsungi ya kuswaswana yina yandi zingaka. Yehowa vandaka kundima banda ntama mutindu Bayuda vandaka kusambila yandi, ti tempelo na Yeruzalemi mpi kinganga-nzambi na yo. Kansi ntangu bikalaka fioti sambu Yehowa kubuya yo mpi kutula dibundu ya Bukristu na kisika na yo. (Matayo 23:33-38) Na nsungi ya ntangu yina, bamfumu mingi ya mabundu vandaka kulonga malongi ya luvunu yina bo vandaka kubaka na filozofi ya Bagreki. Na tempelo, mambu ya mbi kumaka mingi mpenza na mpila nde Yezu bingaka yo “nzo ya miyibi.” (Marko 11:17) Keti Yezu buyaka kukwenda na tempelo yina mpi na basinagoga? Ve. Yehowa vandaka kaka kusadila bangidika yina. Na ntwala nde Nzambi kusoba mambu yina, Yezu landaka kukwenda na bankinsi yina vandaka kusalama na tempelo mpi na sinagoga na bulemfu yonso.​—Luka 4:16; Yoane 5:1.

²⁰ Kana Yezu lemfukaka na ntangu yina ya lusambu ya bunkete bebaka, beto Bakristu ya kieleka, beto fwete landa na kulemfuka sambu beto ke zinga na ntangu yina Nzambi me vutulaka lusambu ya bunkete. Nzambi ke ndimisa beto nde yandi ta pesa ve ata fioti Satana nzila ya kukusa bantu yina kele na lusambu ya bunkete yina yandi me vutulaka. (Yezaya 2:1, 2; 54:17) Ya kieleka, beto yonso na dibundu ya Bukristu, beto kele bantu ya kukonda kukuka mpi ya ke salaka masumu. Kansi, keti beto fwete sadila kukonda kukuka ya bampangi ya nkaka sambu na kubuya kulemfukila Yehowa, mu mbandu, kubuya kukwenda na balukutakanu ya Bukristu to na kutuba mambu ya mbi sambu na bankuluntu? Ata fioti ve. Kansi, beto ke pesaka maboko na kiese yonso na bampangi yina ke twadisaka dibundu. Na bulemfu yonso, beto ke kwendaka na balukutakanu ya Bukristu mpi na balukutakanu ya nene, mpi beto ke sadilaka bandongisila yina bo ke pesaka beto ya ke katukaka na Biblia.​—Baebreo 10:24, 25; 13:17.

21. Inki Yezu salaka ntangu bantu pusaka yandi na kulemfukila ve Nzambi, mpi nki mbandu yandi me bikaka sambu na beto?

²¹ Yezu pesaka ve ata fioti bantu nzila, yo vanda banduku na yandi yina vandaka ti bangindu ya mbote, na kukanga yandi nzila ya kulemfukila Yehowa. Mu mbandu, ntumwa Piere mekaka na kundimisa Mfumu na yandi nde yo vandaka ve mfunu nde yandi mona mpasi mpi kufwa. Ata Piere vandaka ti bangindu ya mbote, Yezu buyaka ndongisila yina ya mbi sambu yo vandaka kukanga yandi nzila ya kusala luzolo ya Yehowa. (Matayo 16:21-23) Bubu yai bantangu ya nkaka, bampangi na beto ke vandaka ti bangindu ya mbote ntangu bo ke buyisaka beto na kulemfuka na bansiku mpi minsiku ya Nzambi. Kana bo sala mpidina, beto ke landaka mbandu ya balongoki ya Yezu ya mvu-nkama ya ntete mpi beto ke ‘lemfukilaka Nzambi bonso mfumu na kisika ya kulemfukila bantu.’​—Bisalu 5:29.

Yehowa Ke Sakumunaka Bantu Yina Ke Lemfukaka Bonso Kristu

22. Yezu pesaka mvutu na nki ngiufula, mpi nki mutindu?

²² Na kilumbu yina Yezu fwaka, bulemfu na yandi mekamaka na mutindu yina yo me mekamaka ntete ve. Na kilumbu yina ya mpasi, “yandi longukaka bulemfu” na kiteso ya kuluta nene. Yandi salaka luzolo ya Tata na yandi, kansi luzolo na yandi mosi ve. (Luka 22:42) Yezu kangamaka na Yehowa luzingu na yandi ya mvimba mpi yandi pesaka beto mbandu ya kukuka na yina me tala bulemfu. (1 Timoteo 3:16) Mutindu yandi salaka mpidina, yandi pesaka mvutu na ntembe yai ya basikaka bamvula mingi na ntwala: Keti muntu ya kukuka lenda landa kulemfukila Yehowa ata bo ke meka yandi? Adami ti Eva lemfukilaka ve Nzambi. Kansi ntangu Yezu kwisaka, mpi na mutindu yandi zingaka mpi fwaka, yandi monisaka nde Satana kele muntu ya luvunu. Yezu kele kigangwa ya kuluta mfunu na bigangwa yonso ya Yehowa me salaka mpi yandi lemfukaka ata ntangu bulemfu vandaka kunatila yandi bampasi mpi nkutu yo natilaka yandi lufwa.

23-25. (a) Kana beto ke landa kulemfukila Yehowa, beto ta monisa inki? Pesa mbandu. (b) Inki beto ta tadila na kapu yina ke landa?

²³ Kana beto ke lemfukila Yehowa, beto ta monisa nde beto ke zolaka yandi mpi beto ke zola kubikala ya kukangama na yandi luzingu na beto ya mvimba. Sambu Yezu lemfukaka, yandi monisaka nde yandi ke zolaka Yehowa mingi mpi yandi natilaka bantu yonso mambote. (Baroma 5:19) Yehowa sakumunaka Yezu mingi kibeni. Kana beto lemfukila Mfumu na beto Kristu, Yehowa ta sakumuna beto mpi. Bantu yonso yina ke lemfukila Kristu lenda baka “luguluku ya mvula na mvula.”​—Baebreo 5:9.

²⁴ Bantu yina ke kangamaka kaka na Yehowa ke bakaka lusakumunu ya nkaka. Bingana 10:9 ke tuba nde: “Muntu yina ke tambulaka na kwikama ta tambula na lutaninu.” Konso kima ya beto ke sala ya ke monisa bulemfu kele mfunu. Beto baka mbandu: beto lenda fwanisa muntu yina me kangamaka na Yehowa ti kutunga nzo mosi ya nene mpi ya kitoko ti babriki ya ngolo. Konso mbala ya muntu ke lemfukila Yehowa, yandi ke yika briki mosi. Briki mosi mpamba lenda monana ve mfunu, kansi konso briki kele ti kisika na yo mpi valere na yo. Mpi ntangu bo ke landisaka babriki mingi na zulu ya babriki ya nkaka, yo ke salaka nde kima mosi ya nene mpi ya mfunu kubasika. Kana beto ke landa kulemfukila Yehowa konso kilumbu mpi konso mvula, beto ta monisa nde beto ke zolaka yandi na ntima na beto ya mvimba mpi nde beto kele ya kukangama ti yandi.

²⁵ Muntu yina ke lemfukilaka Yehowa banda ntama ke monisaka mpi kikalulu ya kukanga ntima. Kapu yina ke landa ta tubila mbandu ya Yezu na yina me tala kikalulu yango.