Kitini ya 2
Lukwikilu ya Kyeleka Kele Inki?
KUVANDA ti lukwikilu ya kyeleka kelombaka mambu mingi kuluta kukwikila kaka nde Nzambi kele. Bamilio ya bantu kekwikilaka nde Nzambi kele kansi bo kesalaka mambu ya mbi na luzolo yonso. “Lukwikilu” ya mutindu yina kele bonso mbongo ya luvunu. Yo kemonanaka bonso ya kyeleka kansi yo kevandaka mpenza ya luvunu. Yo yina, lukwikilu ya kyeleka kele inki?
Lukwikilu ya kyeleka kesimbamaka na nzayilu ya sikisiki ya Masonuku ya Santu. Masonuku yai ya kupemama kezabisaka beto kyeleka na yina metala Nzambi mpi yo kesadisaka beto na kuzaba yandi. Yo kemonisaka bansiku, balukanu, mpi malongi na yandi. Na kati ya malongi yango beto lenda tanga:
• Nzambi kele kaka mosi. Yandi mefwanana ve ata na muntu mosi.
• Yezu kele ve Nzambi Nkwa-Ngolo Yonso. Yandi kele profete ya Nzambi.
• Nzambi kebuyaka lusambu ya biteki ya mitindu yonso.
• Bantu kevingila kilumbu ya kusambisa yina kekwisa.
• Bantu mingi yina mefwaka tafutumuka na Paladisu.
Lukwikilu ya kyeleka kepusaka beto na kusala mambu ya mbote. Mambu yango kepesaka Nzambi lukumu mpi yo kenatilaka beto ti bantu yankaka mambote. Na kati ya mambu yango beto lenda tanga:
• kusambila Nzambi.
• kuyedisa bikalulu yina Nzambi kesepelaka ti yo—mingi-mingi zola.
• kuyambula mabanza mpi bampusa ya mbi.
• kulanda na kukwikila na Nzambi ata beto kekutana ti mambu ya mpasi.
• kulonga bankaka mambu ya Nzambi.
Inki Mutindu Nge Lenda Yedisa Lukwikilu ya Kyeleka?
Lomba lusadisu ya Nzambi. Profete Moize sambaka Nzambi nde: “Songa mono mabanza na nge mpidina mono ta zaba nge mbote-mbote, mono ta pesa nge kaka kiese.”a Nzambi waka kisambu yina mpi pesaka yandi mvutu. Moize kumaka mbandu ya kuluta mbote na yina metala lukwikilu. Nzambi tasadisa nge mpi na kuyedisa lukwikilu ya kyeleka.
Baka ntangu ya kulonguka Masonuku ya Santu. Beto lenda zwa Masonuku ya kupemama, tanga mpi Torah, Bankunga, mpi ba-Evanzile, na Biblia ya Santu, mukanda yina bo mebalulaka mpi mekabulaka mingi kuluta mikanda yonso na ntoto ya mvimba. Keti nge kele ti mukanda yai ya kupemama?
Sadila bandongisila ya Masonuku ya Santu na luzingu na nge ya konso kilumbu. Bonso misisa, lukwikilu keyelaka kana beto kesadila yo. Lukwikilu mpi keyelaka ntangu nge kemonisa yo. Nge mosi tamona nde bandongisila ya Nzambi kele mbote. Nkutu, bandongisila ya mbote yina kele na Masonuku ya Santu metomisaka luzingu ya bantu mingi. Bambandu ya kele na disolo yina kelanda kemonisa yo.
[Noti na nsi ya lutiti]
Inki Mvutu Nge Tapesa?
• Lukwikilu ya kyeleka kesimbamaka na inki?
• Lukwikilu ya kyeleka kepusaka bantu na kusala nki mambu ya mbote?
• Inki mutindu nge lenda yedisa lukwikilu ya kyeleka?
[Lupangu/Kifwanisu ya kele na lutiti 4]
Nzambi Taninaka Ndinga na Yandi
Beto lenda ndima nde Nzambi metaninaka Masonuku ya Santu na mutindu mosi ya mbote sambu na beto bubu yai. Nzambi Nkwa-Ngolo Yonso lenda tanina mukanda na yandi. Ndinga na yandi ketuba nde: “Matiti ke yumaka, bintuntu ke bebaka, kansi ndinga ya Nzambi na beto yo ta zinga tii kuna!”—Yezaya 40:8.
[Kifwanisu ya kele na lutiti 4]
Bonso mbongo, lukwikilu fwete vanda ya kyeleka sambu yo vanda mfunu
[Kifwanisu ya kele na lutiti 5]
Lukwikilu ya kyeleka kepusaka na kusala mambu ya mbote
[Kifwanisu ya kele na lutiti 5]
Bonso misisa, lukwikilu keyelaka kana beto kesadila yo