Kitini ya 11

Kumonisa Lukwikilu ya Kyeleka Bubu Yai

BANTU mingi bubu yai ketubaka nde bo kele ti lukwikilu. Kansi, Yezu longaka nde bantu fyoti tavanda ti lukwikilu ya kyeleka. Yandi tubaka nde: ‘Nzila ya nene yina ke nataka bantu na lufwa, bantu mingi ke kwendaka na nzila yina. Kansi kielo ti nzila yina ke nataka bantu na moyo yo kele nkaka mpenza, bantu fioti mpamba ke monaka yo.’​—Matayo 7:13, 14.

Inki mutindu bantu kemonisaka bubu yai nde bo kele ti lukwikilu ya kyeleka? Yezu tubaka nde: “Beno ta bakisa bo na mambu yina ya bo ke salaka. . . . Konso nti ya mbote ke butaka bambuma ya mbote, kansi konso nti ya mbi ke butaka bambuma ya mbi.” (Matayo 7:16, 17) Yo yina, lukwikilu ya kyeleka kebutaka “bambuma ya mbote.” Yo kepusaka bantu na kumonisa bikalulu yina Nzambi kezolaka. Inki mutindu bo kemonisaka yo?

Bo Kesadilaka Mbote Ngolo na Bo

Bantu yina kele ti lukwikilu ya kyeleka kesadilaka ngolo mpi kiyeka na bo sambu na kukumisa Nzambi mpi kusadila bankaka mambu ya mbote. Yezu longaka nde: “Kana muntu mosi na kati na beno zola vanda mbuta, yandi fweti sadila bantu ya nkaka.” (Marko 10:43) Mutindu mosi, babakala yina kele ti lukwikilu ya kyeleka kevandaka ve makambu ngolo, yo vanda na nganda to na banzo na bo. Bo kezolaka bankento na bo, kepesaka bo lukumu, mpi kelungisaka bampusa na bo na zola yonso. Masonuku ketuba nde: “Beno babakala, beno zola bankento na beno, beno wila bo makasi ve.” (Kolosai 3:19) “Beno babakala . . . ntangu beno ke zinga ti bankento na beno beno fweti bakisa nde bo kele ngolo mingi ve bonso beno. Beno fweti zitisa bo, sambu bo mpi ta baka na Nzambi makabu ya moyo nzila mosi ti beno. Beno fweti sala mpidina, ebuna ata kima mosi ve ta bebisa bisambu na beno.”​—1 Piere 3:7.

Mutindu mosi mpi, nkento yina kele ti lukwikilu ya kyeleka “fweti zitisa bakala na yandi.” (Efezo 5:33) Bankento fwete zola “babakala na bo ti bana na bo.” (Tito 2:4) Batata mpi bamama ya lukwikilu kelutisaka ntangu ti bana na bo mpi kelongaka bo bansiku mpi minsiku ya Nzambi. Bo kesadilaka bankaka mambu ti lukumu mpi luzitu yo vanda na banzo, na kisalu, mpi na konso kisika yina. Bo kezitisaka munsiku yai ya Masonuku: “Beno zolana ngolo bonso bana ya tata mosi ti mama mosi, beno tula ngolo na kusonga luzitu na beno.”​—Roma 12:10.

Bansadi ya Nzambi kelemfukilaka ntuma yai ya Masonuku: “Kundima kubaka avoka ve.” (Kubasika 23:8) Bo kesadilaka ve kiyeka na bo na mutindu mosi ya mbi sambu na mambote na bo mosi. Kansi, bo kesosaka mabaku ya kusadisa bankaka, mingi-mingi bayina kele na mfunu ya lusadisu. Bo ketulaka dikebi na ndongisila yai: “Beno vila ve na kusala mambu ya mbote ti na kusadisa bampangi na beno ya nkaka, sambu Nzambi ke zolaka makabu ya mutindu yina.” (Baebreo 13:16) Yo yina, bo kemonaka bukyeleka ya bangogo yai ya Yezu: “Kiese ke vandaka mingi na kupesa, kansi na kubaka kiese ke vandaka fioti.”​—Bisalu 20:35.

Bo Kelandaka Lunungu ya Nzambi

Bantu yina kevandaka ti lukwikilu kelemfukaka na bansiku ya Nzambi na luzolo yonso, mpi sambu na bo “bansiku na yandi kele mpasi ve.” (1 Yoane 5:3) Bo kezabaka nde “bansiku ya Mfumu Nzambi kele mbote mpenza . . . Bansiku ya Mfumu Nzambi kele ya kieleka, bantu yina ke landaka yo bo kele kiese; yo ke na kifu ve, yo ke kangulaka meso ya bantu.”​—Nkunga 19:8, 9.

Lukwikilu ya kyeleka kepusaka bo mpi na kubuya kuvanda ti bangindu ya mbi sambu na bantu yankaka. Bo kemonaka ve nde mpusu na bo, insi to luzingu na bo meluta ya bantu yankaka, kansi bo kelandaka mbandu ya Nzambi. “Nzambi ke zolaka bantu yonso mutindu mosi. Na konso dikanda ya bantu yandi ke ndimaka bantu yina ke zitisaka yandi ti ke salaka mambu ya mbote.”​—Bisalu 10:34, 35.

Lukwikilu ya kyeleka kepusaka bantu na “kusala mambu ya mbote konso ntangu.” (Baebreo 13:18) Dyaka, muntu yina kele ti lukwikilu ya kyeleka kebuyaka kutonga ya mbi mpi kukusila bankaka mambu. Na yina metala muntu yina Nzambi kezolaka, muyimbi-bankunga Davidi sonikaka nde: “Yandi ke tongaka bantu ya nkaka ve. Yandi ke salaka bampangi na yandi mbi ve.”​—Nkunga 15:3.

Bo Kemonisaka Mayele ya Kekatukaka na Nzambi

Balukwikilu ya bantu yina kevandaka ti lukwikilu ya kyeleka kesimbamaka kaka na Masonuku ya Santu. Bo kekwikilaka nde “bo sonikaka Mukanda ya Nzambi yonso na ngolo na yandi; mambu yonso kele na kati yo kele mfunu sambu na kulonga bantu mambu ya kieleka, sambu na kusungika bifu yina kele na mambu ya bantu ke longuka, sambu na kubongisa bantu, ti sambu na kulonga bantu na kuzinga luzingu mosi ya kinzambi.” (2 Timoteo 3:16) Na yina metala bangwisana na bo ti bantu yankaka, bo kemonisaka “mayele yina ke katukaka na [Nzambi]” yina ‘ke na kinzambi; ya ngemba, ya pima, ya kevandaka ya kuyilama sambu na kulemfuka; ya mbote; mpi ya kesalaka mambu ya mbote.’ (Yakobo 3:17) Bo kebuyaka binkulu yina Nzambi kendimaka ve ti bisalu ya bampeve ya mbi mpi ‘bo ketinaka banzambi ya biteki.’​—1 Yoane 5:21.

Bo Kemonisaka Zola ya Kyeleka

Profete Moize kutubaka nde: “Beno [fwete] zola Mfumu Nzambi, Nzambi na beno, konso muntu na ntima na yandi yonso ti na ngolo na yandi yonso.” (Kulonga 6:5) Bantu yina kevandaka ti lukwikilu kezolaka Nzambi na mutindu yina. Bo kezitisaka zina ya Nzambi, Yehowa. Bo ‘kepesaka Mfumu Nzambi mersi,’ mpi kesambaka na zina na yandi na lukwikilu. (Nkunga 105:1) Bansadi ya Nzambi ketulaka mpi dikebi na ntuma yai: “Zola mpangi na nge bonso nge mosi.” (Levi 19:18) Bo kebuyaka mubulu mpi kesalaka bikesa sambu “na kuzinga na ngemba ti bantu yonso.” (Roma 12:18) Na mutindu ya kifwani, bo ‘mekumisaka bambele na bo ya bitumba bansengo mpi makonga na bo bakupukupu.’ (Yezaya 2:4) Yo yina, bo ‘kezolanaka bo na bo’ mpi kevandaka na kati ya kimvuka ya bampangi ya nsi-ntoto ya mvimba. (Yoane 13:35) Keti nge lenda zaba bantu yango bubu yai?

Inki Mvutu Nge Tapesa?

• Inki mutindu beto lenda zaba bantu yina kele ti lukwikilu ya kyeleka?

• Inki mutindu bantu yina kevandaka ti lukwikilu kemonisaka bikalulu yai ya Nzambi

ngolo?

lunungu?

mayele?

zola?