Keti Nge Kekwikilaka Kibeni na Nsangu ya Mbote?

“Kimfumu ya Nzambi me kuma penepene. Beno balula ntima. Beno ndima Nsangu ya Mbote.”​—MARKO 1:15.

1, 2. Inki mutindu nge lenda tendula Marko 1:14, 15?

YO VANDAKA mvu 30 ya T.B. ntangu Yezu Kristu yantikaka kisalu na yandi ya nene na Galilea. Yandi vandaka kulonga “Nsangu ya Mbote ya Nzambi,” mpi bantu ya Galilea mingi kubakaka kikesa na nsa na yandi yai: “Ntangu me lunga. Kimfumu ya Nzambi me kuma penepene. Beno balula ntima. Beno ndima Nsangu ya Mbote.”​—Marko 1:14, 15.

² ‘Ntangu kulungaka’ sambu Yezu kuyantika kisalu na yandi mpi sambu bantu kubaka lukanu mosi yina tasala nde Nzambi kundima bo. (Luka 12:54-56) ‘Kimfumu ya Nzambi kukumaka penepene’ sambu Yezu yina vandaka Ntotila ya bo ponaka kuvandaka ti bo. Kisalu na yandi ya kusamuna kupusaka bantu ya masonga na kubalula ntima. Kansi nki mutindu bo monisaka nde bo ‘kendimaka Nsangu ya Mbote,’ mpi nki mutindu beto mpi lenda sala kiteso mosi?

3. Na kusala nki mambu bantu memonisaka nde bo kekwikilaka na nsangu ya mbote?

³ Bonso Yezu, ntumwa Piere kusyamisaka bantu na kubalula ntima. Ntangu yandi vandaka kutubila Bayuda yina kuvandaka na Yeruzalemi na Pantekoti ya mvu 33 ya T.B., Piere tubaka nde: “Mbote konso muntu na kati na beno kubalula ntima, yandi kubaka mbotika na zina ya Yesu Kristo sambu Nzambi kulolula beno. Ebuna Nzambi ta pesa beno Mpeve-Santu makabu.” Mafunda ya bantu kubalulaka ntima, bo bakaka mbotika, mpi bo kumaka balongoki ya Yezu. (Bisalu 2:38, 41; 4:4) Na mvu 36 ya T.B., bantu ya makanda yina kubalulaka ntima kusalaka mpi mutindu mosi. (Bisalu 10:1-48) Na bilumbu na beto, lukwikilu na nsangu ya mbote mesadisaka mafunda ya bantu na kubalula ntima na masumu na bo, kudipesa na Nzambi, mpi kubaka mbotika. Bo mendimaka nsangu ya mbote ya luguluku mpi bo memonisaka lukwikilu na nkudulu ya kimenga ya Yezu. Dyaka, bo kesalaka mambu ya lunungu mpi bo kenwaninaka Kimfumu ya Nzambi.

4. Lukwikilu kele inki?

⁴ Kansi lukwikilu kele inki? Ntumwa Polo kusonikaka nde: “Kana muntu ke na lukwikilu, yandi zaba mbote-mbote nde yandi ta baka kima yina ya yandi ke tulaka ntima, yandi zaba mpi mbote-mbote nde bima yina ke monikaka na meso ve yo kele kaka.” (Baebreo 11:1) Lukwikilu na beto kesalaka nde beto mona mambu yonso ya Nzambi kesilaka na Ndinga na yandi nde yo kele mpenza ya kyeleka mpi bonso nde yo kele na kusalama dezia. Yo kele bonso nde beto kele dezia ti mukanda ya kendimisa beto nde nzo kapanda kele ya beto. Lukwikilu kele mpi ‘kuzaba mbote-mbote,’ to kidimbu ya kendimisa, bima yina kemonanaka ve. Meso na beto ya mabanza mpi ntima na beto ya kufuluka na ntonda kendimisaka beto nde mambu yango kele ya kyeleka, ata beto memonaka yo ve.​—2 Korinto 5:7; Efezo 1:18.

Beto Kele na Mfunu ya Lukwikilu!

5. Sambu na nki lukwikilu kele mfunu mingi?

⁵ Beto mebutukaka ti mpusa mosi ya kimpeve kansi beto kebutukaka ve ti lukwikilu. Ya kyeleka, “bantu yonso ve ke zolaka kundima Nsangu ya Mbote.” (2 Tesalonika 3:2) Yo yina, Bakristu fwete vanda ti lukwikilu sambu na kubaka mambu ya Yehowa mesilaka. (Baebreo 6:12) Na nima ya kutanga bambandu mingi ya lukwikilu, Polo kusonikaka nde: “Sambu na beto, bantu yonso yina mingi kele batemwe na beto, beto kele na kati-kati na bo, ebuna bo ke tala mambu ya beto ke sala. Mpidina beto katula mambu yonso yina ke pesa beto kilo, masumu yina ke zola kukangisa beto nzila konso ntangu, ebuna beto baka ntinu, beto kwenda na ntwala, beto landa kaka nzila yina ya beto fweti kwendila. Beto tula meso na beto kaka na Yesu, sambu lukwikilu na beto katukaka na yandi, yandi mpi muntu ke bongisaka lukwikilu na beto sambu yo kuma ya kulunga.” (Baebreo 12:1, 2) Inki kele “masumu yina ke zola kukangisa beto nzila konso ntangu”? Yo kele kukonda lukwikilu, to nkutu kuvidisa lukwikilu yina nge vandaka na yo ntete. Sambu lukwikilu na beto kuvanda kaka ngolo, beto fwete “tula meso na beto kaka na Yesu” mpi kulanda mbandu na yandi. Beto fwete buya mpi mansoni, kulosa bisalu ya kimuntu, mpi kutina zola ya bima ya kinsuni, filozofi ya inza, mpi malongi ya luvunu. (Galatia 5:19-21; Kolosai 2:8; 1 Timoteo 6:9, 10; Yude 3, 4) Dyaka, beto fwete kwikila nde Nzambi kele ti beto mpi nde ndongisila yina kele na Ndinga na yandi kele kibeni ya mbote.

6, 7. Sambu na nki yo kele mbote kusamba sambu na kulomba lukwikilu?

⁶ Beto lenda yedisa ve lukwikilu kaka na ngolo na beto mosi. Lukwikilu kele mosi na kati ya bambuma ya mpeve santu ya Nzambi, to ngolo ya kisalu na yandi. (Galatia 5:22, 23) Yo yina, inki beto fwete sala kana yo kelomba nde beto kumisa lukwikilu na beto ngolo? Yezu kutubaka nde: “Kana beno zaba kupesa makabu ya mbote na bana na beno, zaba nde Tata yina kele na zulu ta pesa mpenza Mpeve na yandi na bantu yina ke lombaka yandi Mpeve!” (Luka 11:13) Ee, bika beto samba sambu na kulomba mpeve santu, sambu yo lenda sadisa beto na kuyedisa lukwikilu ya beto kele na yo mfunu sambu na kusala luzolo ya Nzambi ata na ntangu ya mpasi mingi.​—Efezo 3:20.

⁷ Yo kele mbote na kusamba sambu na kulomba lukwikilu mingi. Ntangu Yezu zolaka kubasisa demo yina kuvandaka na mwana bakala mosi, tata ya mwana yango kubondilaka Yezu nde: “Mono ke kwikila, kansi sadisa mono, sambu lukwikilu na mono kele ya fioti.” (Marko 9:24) Balongoki ya Yezu kutubaka nde: “Yika beto lukwikilu.” (Luka 17:5) Yo yina, bika beto samba Nzambi sambu na lukwikilu, mpi beto tula ntima nde yandi kepesaka mvutu na bisambu ya mutindu yina.​—1 Yoane 5:14.

Kukwikila na Ndinga ya Nzambi Kele Mfunu

8. Inki mutindu kutula lukwikilu na Ndinga ya Nzambi lenda sadisa beto?

⁸ Mwa ntangu fyoti na ntwala ya lufwa na yandi ya kimenga, Yezu zabisaka balongoki na yandi nde: “Beno kumona mpasi ve na ntima. Beno tula ntima [“lukwikilu,” NW] na Nzambi, beno tula ntima mpi na mono.” (Yoane 14:1) Beto Bakristu, beto kekwikilaka na Nzambi mpi na Mwana na yandi. Kansi nki beto lenda tuba sambu na Ndinga na yandi? Yo lenda vanda na ngolo ya kupusa beto na kuvanda na luzingu ya mbote kana beto kelonguka yo mpi kesadila yo na kutulaka mpenza ntima nde yo kepesaka ndongisila ti lutwadisu ya kuluta mbote yina mefwana sambu na beto.​—Baebreo 4:12.

9, 10. Inki mutindu nge lenda tendula mambu yina Yakobo 1:5-8 ketuba sambu na lukwikilu?

⁹ Luzingu na beto bantu ya kukonda kukuka kevandaka ya mpasi mpenza. Kansi, lukwikilu na Ndinga ya Nzambi lenda sadisa beto kibeni. (Yobi 14:1) Mu mbandu, kana beto kezaba ve nki mutindu beto lenda nwana ti dyambu mosi ya mpasi. Ndinga ya Nzambi kepesa beto ndongisila yai: “Kana muntu mosi na kati na beno ke na mayele ve, yandi lomba yo na Nzambi, ebuna Nzambi ta pesa yandi yo; sambu Nzambi ke zolaka kukaba mingi na bantu yonso na ntima ya mbote. Kansi muntu yina ke lomba na Nzambi, yandi fweti tula ntima kaka nde yandi ta baka mambu yina ya yandi me lomba. Sambu muntu yina ke na ntima zole ntangu yandi ke lomba, yandi kele bonso kitembo ya masa yina ya mupepe ke tombulaka na zulu ti ke nataka na ndambu yonso. Muntu ya mutindu yina lenda tula ntima diaka ve nde yandi ta baka konso kima na Mfumu Nzambi, sambu yandi kele muntu mosi ya ntima zole, yandi mpi ke balulaka bikalulu na yandi konso ntangu.”​—Yakobo 1:5-8.

¹⁰ Yehowa Nzambi tanganina beto ve sambu beto mekonda mayele mpi sambu beto kelomba yandi yo na kisambu. Kansi, yandi tasadisa beto na kutadila yo na mutindu mosi ya mbote. Bampangi na beto ya Bakristu, to kulonguka na beto ya Biblia lenda benda dikebi na beto na baverse yina lenda sadisa beto. To mpeve santu ya Yehowa lenda twadisa beto na mutindu yankaka. Tata na beto ya zulu tapesa beto mayele na yandi sambu na kunwana ti bampasi kana beto ‘ketula ntima kaka nde beto ta baka mambu yina ya beto me lomba, kukonda kuvanda na ntima zole.’ Kana beto kele bonso kitembo yina mupepe kenata kisakasaka, beto lenda kutula ntima ve nde Nzambi tapesa beto ata kima mosi. Sambu na inki? Sambu yo tamonisa nde beto kele na badute mpi beto kedyengana na kisambu to na mitindu yankaka, to nkutu na lukwikilu na beto na Nzambi. Yo yina, beto fwete vanda ti lukwikilu ya ngolo na Ndinga ya Nzambi mpi na lutwadisu yina yo kepesa beto. Bika beto tadila mwa bambandu ya kemonisa mutindu yo kepesaka lusadisu mpi lutwadisu.

Lukwikilu mpi Madya

11. Lukwikilu na Ndinga ya Nzambi kepesaka beto nki kivuvu ya kyeleka sambu na yina metala bampusa na beto ya konso kilumbu?

¹¹ Inki beto lenda sala kana beto kemona mpasi sambu na kukonda madya ti kisika ya kulala to sambu na kinsukami? Lukwikilu na Ndinga ya Nzambi kepesaka beto kivuvu ya kyeleka nde Yehowa talungisa bampusa na beto ya konso kilumbu mpi na ngidika ya bima ya mpa yandi tapesa bima mingi na bantu yonso yina kezolaka yandi. (Nkunga 72:16; Luka 11:2, 3) Beto lenda baka kikesa na kuyindulula mutindu Yehowa kupesaka madya na profete na yandi Elia na nsungi ya nzala. Na nima, Nzambi kutaninaka na mutindu mosi ya kuyituka ndambu ya fufu ya ble ti mafuta yina kusadisaka nkento mosi, mwana na yandi, mpi Elia na kuzingila. (1 Bantotila 17:2-16) Mutindu mosi mpi, Yehowa kulungisaka bampusa ya profete Yeremia ntangu bantu ya Babilone kuzyungaka Yeruzalemi. (Yeremia 37:21) Ata Yeremia ti Elia kuvandaka ve ti bima mingi ya kudya, Yehowa kusadisaka bo. Yandi kesalaka mpi mutindu mosi sambu na bayina kekwikilaka na yandi bubu yai.​—Matayo 6:11, 25-34.

12. Inki mutindu lukwikilu tasadisa nge na kuzwa bima ya kuzingila?

¹² Lukwikilu ti kusadila minsiku ya Biblia takumisa beto ve bamvwama na kinsuni, kansi yo tasadisa beto na kuzwa bima ya mfunu ya kuzingila. Beto baka mbandu: Biblia kelongisilaka beto na kuvanda masonga, kikesa, na kusala mingi. (Bingana 22:29; Longi 5:18, 19; 2 Korinto 8:21) Beto fwete bakisaka valere ya kuvanda na lukumu ya mbote na kisalu. Ata na bisika yina bisalu ya mbote kevandaka mpasi na kuzwa, bansadi ya masonga, ya mezaba kisalu mbote, mpi ya kesalaka mingi bo kefutaka bo mbote kuluta bankaka. Ata bansadi ya mutindu yai lenda vanda na bima ya kinsuni fyoti, bo kekondaka ve bima ya mfunu ya kuzingila mpi bo kevandaka na kyese ya kudya madya yina ya bo mosi kezwa.​—2 Tesalonika 3:11, 12.

Lukwikilu Kesadisaka Beto na Kukanga Ntima na Ntangu ya Mpasi

13, 14. Inki mutindu lukwikilu kesadisaka beto na kukanga ntima na ntangu muntu ya beto kezolaka mefwa?

¹³ Ndinga ya Nzambi kemonisa na nsadisa ya bambandu nde yo kele mbi ve kuvanda na mawa ntangu muntu mosi ya beto kezolaka mingi mefwa. Abrahami, Tata ya dibuta ya kwikama, kudilaka na lufwa ya nkento na yandi Sara yina yandi vandaka kuzola mingi. (Kuyantika 23:2) Davidi kuvandaka na mawa mingi ntangu bo zabisaka yandi nde mwana na yandi Absalomi mefwa. (2 Samuele 18:33) Ata Yezu, muntu yina vandaka ya kukuka, kudilaka mingi na lufwa ya nduku na yandi Lazare. (Yoane 11:35, 36) Ntangu muntu ya beto kezolaka mingi mefwa, yo lenda sala nde beto wa mpasi mingi kibeni, kansi kutula lukwikilu na balusilu yina kele na Ndinga ya Nzambi lenda sadisa beto na kukanga ntima na ntangu ya mpasi ya mutindu yai.

¹⁴ Polo kutubaka nde: ‘Mono ke tulaka ntima na Nzambi nde bantu ya mbote ti bantu ya mbi ta telama na lufwa.’ (Bisalu 24:15) Beto fwete vanda ti lukwikilu na ngidika ya Nzambi mebakaka sambu na kuvutula mafunda ya bantu na luzingu. (Yoane 5:28, 29) Abrahami ti Sara, Izaki ti Rebeka, Yakobo ti Lea tavandaka na kati ya bantu yina tafutumuka. Bo yonso kele ya kulala bubu yai na lufwa mpi bo kekinga lufutumuku na inza ya mpa ya Nzambi. (Kuyantika 49:29-32) Yo tavanda kyese mingi kibeni ntangu bantu ya beto vandaka kuzola mingi tatelema na mpongi ya lufwa sambu na kuzinga awa na ntoto! (Kusonga 20:11-15) Kansi na ntangu beto kevingila nde mambu yango kusalama, lukwikilu takatula ve mawa na beto yonso, kansi yo tasadisa beto na kuvanda penepene na Nzambi, yina kesadisaka beto na kukanga ntima na mpasi yina beto kewaka ntangu muntu ya beto zolaka mingi mefwa.​—Nkunga 121:1-3; 2 Korinto 1:3.

Lukwikilu Kepesaka Ngolo na Bantu Yina Kele ti Basusi

15, 16. (a) Sambu na nki beto lenda tuba nde bantu ya lukwikilu ya ntangu na beto yina kele na susi kele ve bantu ya ntete ya kuvanda ti susi? (b) Inki beto lenda sala sambu na kunwana na susi?

¹⁵ Ndinga ya Nzambi kemonisa mpi nde ata bantu yina kele ti lukwikilu, bo lenda nyokwama mpi na basusi. Na ntangu yandi mekamaka ngolo, Yobi kudiwaka nde Nzambi meyambula yandi. (Yobi 29:2-5) Nehemia kuvandaka ve na kyese sambu Yeruzalemi mpi bibaka na yo kuvanda ya kubeba. (Nehemia 2:1-3) Na nima ya kubuya Yezu, Piere kuwaka mawa mingi mpi yandi ‘dilaka ngolo.’ (Luka 22:62) Mpi Polo kusyamisaka bampangi na yandi Bakristu ya dibundu ya Tesalonika na ‘kupesa kikesa na bantu yina ke na ntima ya petepete.’ (1 Tesalonika 5:14) Yo yina, beto lenda tuba nde bantu ya lukwikilu yina kekutana ti mambu ya kepesa bo basusi bubu yai kele ve bantu ya ntete ya kuvanda na susi. Kansi, inki beto lenda sala sambu na kunwana ti susi?

¹⁶ Beto lenda kuma na susi sambu beto kenwana ti bampasi mingi ya ngolo. Olie na kusosa kumonisa yo yonso na mbala mosi, beto lenda kuka na kumanisa yo mosimosi na kusadilaka minsiku ya Biblia. Kusala mutindu yai lenda sadisa beto na kufyotuna susi na beto. Kisalu ya bukatikati mpi kupema ya kufwana lenda kusadisa beto mpi. Yo kele masonga nde: Kukwikila na Nzambi mpi na Ndinga na yandi kenataka mambote na kimpeve sambu yo kepesaka beto ngolo na kutula mpenza ntima nde yandi kekudibanzaka kibeni sambu na beto.

17. Inki mutindu beto kezaba nde Yehowa kekudibanzaka sambu na beto?

¹⁷ Piere kepesa beto kikesa na bangogo yai ya kekitisa beto ntima: “Beno kudikulumusa na nsi ya diboko ya ngolo ya Nzambi, na mpila nde yandi ta tedimisa beno na kilumbu yina ya yandi me tulaka. Beno katula mabanza na beno yina yonso ke yangisaka beno, ebuna beno pesa yo na Nzambi, sambu yandi muntu ke talaka mambu na beno.” (1 Piere 5:6, 7) Muyimbi-bankunga kuyimbaka nde: “[Yehowa] ke sadisaka bantu yonso yina ke zolaka kubwa, bantu yina me lemba yandi ke pesaka bo ngolo.” (Nkunga 145:14) Beto fwete kwikila na mambu yai ya kekitisa beto ntima, sambu yo kele na Ndinga ya Nzambi. Ata susi lenda baka ntangu mingi, lukwikilu na beto kebakaka kibeni ngolo na kuzaba nde beto lenda pesa basusi na beto yonso na Tata na beto ya zola yina kele na zulu!

Lukwikilu ti Mimekamu Yankaka

18, 19. Inki mutindu lukwikilu kesadisaka beto na kunwana ti maladi mpi na kupesa kikesa na bampangi na beto Bakristu yina kebela?

¹⁸ Beto lenda kutana ti mumekamu mosi ya nene ya lukwikilu na beto ntangu beto to muntu ya beto kezolaka mingi kebela maladi ya ngolo. Ata Biblia ketubila ve kubeluka na mutindu mosi ya kuyituka ya Bakristu bonso Epafrodite, Timoteo, mpi Trofime, ntembe kele ve nde Yehowa kusadisaka bo na kukanga ntima. (Filipi 2:25-30; 1 Timoteo 5:23; 2 Timoteo 4:20) Dyaka, na yina metala “muntu yina ke yindulaka bansukami,” muyimbi-bankunga kuyimbaka nde: “Mfumu Nzambi ta sadisa yandi kana yandi ke bela, yandi ta belula yandi.” (Nkunga 41:2-4) Inki mutindu bangogo ya muyimbi-bankunga lenda sadisa beto na kupesa kikesa na bampangi na beto Bakristu yina kebela?

¹⁹ Mutindu mosi ya kupesa lusadisu ya kimpeve kele kusamba ti bayina kebela mpi kusamba sambu na bo. Ata beto kelombaka ve nde bo beluka na mutindu mosi ya kuyituka bubu yai, beto lenda lomba nde Nzambi kupesa bo ngolo ya mabanza yina tasadisa bo na kuzinga ti maladi na bo mpi yandi pesa bo ngolo ya kimpeve yina bo kele na yo mfunu sambu na kukanga ntima na bansungi yina ya bo kelemba. Yehowa tasadisa bo, mpi lukwikilu na bo takuma ngolo na mpila bo ketula ntima na ntangu ya kekwisa yina “ata muntu mosi ve . . . ta tuba diaka nde: ‘Mono ke bela.’” (Yezaya 33:24) Beto kebaka kikesa kibeni na kuzaba nde na nzila ya Yezu Kristu yina kufutumukaka mpi na nsadisa ya Kimfumu ya Nzambi, bantu ya bulemfu tabeluka kimakulu na masumu, maladi, mpi lufwa! Sambu na mambu yai ya nene ya beto kekinga, beto kepesa matondo na Yehowa, ‘yina tabelula bamaladi na beto yonso.’​—Nkunga 103:1-3; Kusonga 21:1-5.

20. Sambu na nki beto lenda tuba nde lukwikilu lenda sadisa beto na “bilumbu ya mpasi” ya kimununu?

²⁰ Lukwikilu lenda kusadisa beto mpi na kukanga ntima na “bilumbu ya mpasi” ya kimununu, ntangu mavimpi mpi ngolo kekwenda na kumana. (Longi 12:1-7) Yo yina, minunu yina kele na kati na beto lenda samba mutindu muyimbi-bankunga yina kukumaka mununu kuyimbaka nde: “Mfumu, ntima na mono kele na nge. . . . Kubuya mono ve ntangu mono me kuma mununu, kubikisa mono ve ntangu ngolo na mono ke zola kumana.” (Nkunga 71:5, 9) Muyimbi-bankunga kuwaka kibeni nde yandi vandaka ti mfunu ya lusadisu ya Yehowa, mutindu bampangi na beto ya Bakristu yina melutisaka bamvula mingi na kisalu ya Yehowa mpi ya mekuma minunu bubu yai kewaka. Sambu na lukwikilu na bo, bo lenda tula ntima nde diboko ya Yehowa yina kezingaka mvula na mvula talanda na kutanina bo.​—Kulonga 33:27.

Beto Vanda Kaka ti Lukwikilu na Ndinga ya Nzambi

21, 22. Kana beto kele ti lukwikilu, inki mutindu yo kele na bupusi na ngwisana na beto ti Nzambi?

²¹ Kukwikila na nsangu ya mbote mpi na Ndinga ya Nzambi yonso kesadisaka beto na kufinama na Yehowa. (Yakobo 4:8) Ya kyeleka, yandi kele Nkwa-Kimfumu, kansi yandi kele mpi Ngangi mpi Tata na beto. (Yezaya 64:8; Matayo 6:9; Bisalu 4:24) Muyimbi-bankunga kuyimbaka nde: “Nge kele tata na mono, nge kele Nzambi na mono; nge kele Ngulusi na mono ti Dikunzi na mono.” (Nkunga 89:27) Kana beto tula lukwikilu na Yehowa mpi na Ndinga na yandi ya kupemama, beto mpi lenda mona yandi bonso ‘Ngulusi mpi Dikunzi na beto.’ Yai kele dibaku mosi ya kyese kibeni!

²² Yehowa kele Tata ya Bakristu yina mebutukaka na mpeve mpi ya bampangi na bo yina kele na kivuvu ya kuzinga na ntoto. (Roma 8:15) Mpi lukwikilu na Tata na beto yina kele na zulu lenda pesa bo nsoni ve. Davidi kutubaka nde: “Tata na mono ti mama na mono bo lenda buya mono, kansi nge Mfumu Nzambi, nge ta baka mono.” (Nkunga 27:10) Dyaka, Biblia kendimisa beto nde: “Mfumu Nzambi ta bika beno ve ata fioti sambu yandi . . . lenda bebisa lukumu ya zina na yandi ve.”​—1 Samuele 12:22.

23. Inki beto fwete sala sambu na kuta kinduku ya kimakulu ti Yehowa?

²³ Ya kyeleka, sambu na kuta kinduku ya kimakulu ti Yehowa, beto fwete vanda ti lukwikilu na nsangu ya mbote mpi kundima nde ya kyeleka Masonuku kele kibeni Ndinga ya Nzambi. (1 Tesalonika 2:13) Beto fwete vanda ti lukwikilu ya ngolo na Yehowa mpi kubika nde Ndinga na yandi kutemuna nzila na beto. (Nkunga 119:105; Bingana 3:5, 6) Lukwikilu na beto tayela kana beto kesamba yandi na kutulaka ntima na mawa mpi na lusadisu na yandi.

24. Inki ngindu ya kepesa kikesa kele na Roma 14:8?

²⁴ Lukwikilu kepusaka beto na kudipesa kimakulu na Nzambi. Kana beto kele ti lukwikilu ya ngolo, ata beto fwa, beto kele bansadi na yandi ya mekudipesaka yina kele ti kivuvu ya kufutumuka. Ee, “ata beto ke zinga ata beto ke fwa, beto kele kaka bantu ya [Yehowa].” (Roma 14:8) Bika beto vila ve ata fyoti dibanza yai ya kepesa kikesa na ntangu ya beto kelanda na kutula ntima na Ndinga ya Nzambi mpi ya beto kelanda na kutula lukwikilu na nsangu ya mbote.

Inki Mutindu Nge Tavutula?

• Lukwikilu kele nki, mpi sambu na nki beto kele ti mfunu ya kikalulu yai?

• Sambu na nki yo kele mfunu nde beto vanda ti lukwikilu na nsangu ya mbote mpi na Ndinga ya Nzambi yonso?

• Inki mutindu lukwikilu kesadisaka beto na kununga mimekamu ya mpila na mpila?

• Inki tasadisa beto na kuvanda kaka ti lukwikilu?

[Bifwanisu ya kele na lutiti 8]

Yehowa kusadisaka Yeremia ti Elia sambu bo vandaka ti lukwikilu

[Bifwanisu ya kele na lutiti 9]

Yobi, Piere, mpi Nehemia kuvandaka ti lukwikilu ya ngolo

[Bifwanisu ya kele na lutiti 11]

Sambu na kuta kinduku ya kimakulu ti Yehowa, beto fwete vanda ti lukwikilu ya ngolo na nsangu ya mbote