Kitini ya 4

Nzambi Kele Nani?

BANTU kesambilaka banzambi mingi. Kansi Masonuku ya Santu kelongaka nde yo kele kaka ti Nzambi mosi ya kyeleka. Beto lenda fwanisa yandi ve ti nzambi yankaka, yandi kele ya kuluta kuzanguka mpi Nzambi ya mvula na mvula. Yandi gangaka bima yonso yina kele na zulu ti na ntoto, mpi yandi pesaka beto luzingu. Yo yina, yo mefwana nde beto sambila kaka yandi.

Nzambi kele na batitre mingi kansi yandi kele kaka ti zina mosi​—YEHOWA. Nzambi zabisaka Moize nde: “Songa bantu ya Israele mpi nde: ‘[Yehowa, NW], Nzambi ya bankaka na beno, Nzambi ya Abrahami, ya Izaki ti ya Yakobi, yandi muntu me tinda mono na beno. Yai kele zina na mono tii kuna; bantu yina ta butuka na nima na beno, bo ta bingaka mono na zina yai.’” (Kubasika 3:15) Zina Yehowa kele bambala 7000 na kati ya Masonuku ya Santu. Mutindu Nkunga 83:18, (NW) ketuba sambu na Nzambi, “nge, ya kele na zina Yehowa, nge mpamba kele Muntu ya Kuluta Kuzanguka na zulu ya ntoto ya mvimba.”

Ata muntu mosi ve memonaka Nzambi. Nzambi songaka Moize nde: “Nge lenda mona ilungi na mono ve sambu ke na muntu ve lenda mona ilungi na mono ebuna yandi zinga diaka.” (Kubasika 33:20) Nzambi kezingaka na zulu mpi yandi kemonanaka ve na meso ya bantu. Yo kele mbi na kusala to na kusambila kiteki, kifwanisu, to kidimbu mosi ya mefwanana ti Nzambi. Yehowa Nzambi pesaka ntuma yai na nzila ya Moize: “Kusala ve biteki to bifwanisu ya bima yina kele kuna na zulu to awa na nsi-ntoto to na masa yina kele kuna na nsi ya ntoto. Kufukama ve na ntwala ya biteki sambu na kusambila yo, sambu mono [Yehowa, NW], Nzambi na nge, mono kele Nzambi mosi ya zwa, mono ke ndimaka banzambi ya nkaka ve.” (Kubasika 20:2-5) Na nima, na nsadisa ya profete Yezaya, Nzambi kutubaka nde: “Mono . . . kele [Yehowa, NW], yo yina zina na mono! Lukumu na mono, mono ta pesa yo ve na nzambi ya nkaka, ata na biteki mpi ve!”​—Yezaya 42:8.

Bantu yankaka kekwikilaka na Nzambi kansi bo lenda mona yandi bonso muntu mosi ya bo lenda zaba ve mpi ya bo lenda kwenda ve penepene na yandi, to bonso muntu mosi ya bo fwete tina boma na kisika ya kuzola yandi. Inki nge keyindula? Keti Nzambi ketudilaka nge dikebi? Keti nge lenda zaba yandi mpenza, ata nkutu kukwenda penepene na yandi? Bika beto tala mambu yina Masonuku ketuba na yina metala bikalulu ya Nzambi.

Inki Mvutu Nge Tapesa?

• Sambu na nki beto fwete sambila Nzambi?

• Zina ya Nzambi kele nani?

• Sambu na nki beto fwete sadila ve biteki to bidimbu sambu na kusambila Nzambi?

• Inki mutindu Nzambi kesadilaka mpeve santu na yandi mpi bawanzyo na yandi sambu na kulungisa luzolo na yandi?

[Lupangu ya kele na lutiti 11]

Mpeve Santu ya Nzambi mpi Bawanzio na Yandi

Inki mutindu Nzambi kelungisaka luzolo na yandi? Mutindu mosi yina Nzambi kelungisaka luzolo na yandi kele na kutindaka mpeve santu na yandi. Mpeve santu ya Nzambi kele muntu ve, wanzio ve, kansi yo kele ngolo na yandi ya kisalu ya kemonanaka ve, ngolo yina kemanaka ve ya yandi kesadilaka sambu na kulungisa konso kima yina yandi mezola. Nzambi kusadilaka ngolo yai sambu na kuganga zulu mpi ntoto. “Mfumu Nzambi tubaka nde: ‘Zulu ti bima yonso kele na zulu yo vanda’ ebuna yo vandaka.” (Nkunga 33:6) Kuyantika 1:2 ketendula nde, ntangu ntoto vandaka ntete ya kufuluka ti masa mpi Nzambi vandaka kuyidika yo sambu bantu kuzinga, “mpeve ya Nzambi vandaka kuluta na zulu ya masa.” Na nima, Nzambi kusadilaka mpeve santu na yandi sambu na kuganga bima yonso ya kele na luzingu awa na nsi-ntoto.

Nzambi kesadilaka mpi bawanzio sambu na kulungisa luzolo na yandi. Nzambi gangaka bo sambu na kuzinga ti yandi na zulu. Bawanzio kele na ngolo mingi. Bo kezabisaka nsangu ya Nzambi mpi kelungisaka mikumba yankaka ya mfunu. Mumbandu, Masonuku kebingaka Bansiku yina Nzambi pesaka na Moize nde “bansiku ya bawanzio.” Bawanzio ya Nzambi kesadisaka mpi bansadi na yandi yina kele na ntoto. Nkutu, Masonuku kebingaka bawanzio ya Nzambi “bampeve yina ke sadilaka Nzambi, bayina ya yandi ke tindaka sambu na kwenda kusadisa bantu yina ta guluka.”​—Baebreo 1:14; 2:2.

[Kifwanisu ya kele na lutiti 10]

Maniskri ya ntama ya Masonuku ya kele ti zina ya Nzambi (Rouleau de la mer Morte)

[Kifwanisu ya kele na lutiti 11]

Masonuku kebingaka Bansiku yina Nzambi pesaka na profete Moize nde “bansiku ya bawanzio”