Timoteo Vandaka na Mpusa ya Kusadisa Bantu

Timoteo vandaka leke ya bakala yina vandaka na kiese ya kusadisa bantu. Yandi salaka banzietelo na bisika mingi sambu na kusadisa bankaka. Yo yina, yandi vandaka ti luzingu ya kiese kibeni. Keti nge ta zola kuwa disolo na yandi?—

Timoteo yelaka na mbanza mosi yina zina na yo Listre. Ntangu yandi vandaka mwana-fioti, nkaka na yandi Loisi mpi mama na yandi Enise yantikaka kulonga yandi mambu ya Yehowa. Ntangu Timoteo yelaka, yandi kumaka ti mpusa ya kusadisa bankaka na kuzaba mambu ya Yehowa.

Ntangu Timoteo vandaka leke, Polo zabisaka yandi na kusala nzietelo ti yandi sambu na kukwenda kusamuna na bisika ya nkaka. Timoteo ndimaka! Yandi ndimaka kukwenda mpi kusadisa bankaka.

Timoteo kwendaka ti Polo na mbanza Tesalonika na Masedonia. Sambu na kukuma kuna, bo tambulaka nzila ya nda mpi na nima bakaka maswa. Nsuka-nsuka ntangu bo kumaka, bo sadisaka bantu mingi na kuzaba mambu ya me tala Yehowa. Kansi, bantu ya nkaka sepelaka ve mpi sosaka kusala bo mbi. Yo yina, Polo ti Timoteo katukaka na mbanza yina mpi kwendaka kusamuna na bisika ya nkaka.

Bangonda fioti na nima, Polo zabisaka Timoteo na kuvutuka na Tesalonika sambu na kutala kana bampangi vandaka mbote. Yo lombaka nde Timoteo kumonisa kikesa kibeni sambu na kuvutuka na mbanza yina ya kigonsa! Kansi, Timoteo kwendaka sambu yandi vandaka kudiyangisa sambu na bampangi yina vandaka kuna. Ntangu yandi vutukaka, yandi natilaka Polo nsangu ya kiese. Bampangi ya Tesalonika vandaka mbote kibeni!

Timoteo salaka ti Polo bamvula mingi. Polo sonikaka na mukanda mosi nde Timoteo vandaka muntu ya kuluta mbote yina yandi lendaka kutinda sambu na kukwenda kusadisa bampangi na mabundu. Timoteo vandaka kuzola Yehowa mpi bantu ya nkaka.

Keti nge ke zolaka bantu mpi ke vandaka na mpusa ya kusadisa bo na kuzaba Yehowa?— Kana yo kele mpidina, nge lenda vanda ti luzingu ya kiese kibeni, kaka bonso Timoteo!