Kimfumu ya Nzambi kele nki?

MAMBU YINA BIBLIA KE TUBAKA

“Nzambi ya zulu ta tula kimfumu mosi yina ta fwa ve ata fioti.” —Daniele 2:44, Mbalula ya Nsi-Ntoto ya Mpa.

“Bo me pesa beto mwana mosi ya bakala; mpi luyalu ta vanda na zulu ya mapeka na yandi.”—Yezaya 9:6.

YO LENDA TENDULA INKI SAMBU NA NGE

• Luyalu mosi ya lunungu yina lenda natila nge mambote.—Yezaya 48:17, 18.

• Na nsi-ntoto ya mpa yina ke kwisa, nge ta vanda ti luzingu ya kiese mpi mavimpi ya mbote.—Kusonga 21:3, 4.

KETI BETO LENDA KWIKILA KIBENI MAMBU YINA BIBLIA KE TUBAKA?

Ee, sambu na bikuma kiteso ya zole:

• Yezu monisaka mambu yina Kimfumu ya Nzambi ta sala. Yezu longaka balongoki na yandi na kusamba sambu Kimfumu ya Nzambi kukwisa mpi luzolo na yandi kusalama na ntoto. (Matayo 6:9, 10) Yezu monisaka mutindu kisambu yai ta lungana.

  Ntangu Yezu vandaka na ntoto, yandi disaka bantu yina vandaka na nzala, belulaka bambefo, mpi futumunaka bafwa! (Matayo 15:29-38; Yoane 11:38-44) Sambu yandi kele Mfumu ya Kimfumu ya Nzambi, Yezu monisaka na ntwala mambu ya kitoko yina Kimfumu ya Nzambi ta sala sambu na bantu na yo. —Kusonga 11:15.

• Mambu ya ke luta na nsi-ntoto ke monisa nde Kimfumu ya Nzambi ta kwisa ntama mingi ve. Yezu bikulaka nde bitumba, nzala mpi kunikana ya ntoto ta vanda na nsi-ntoto na ntwala nde Kimfumu ya Nzambi kutula ngemba na ntoto.—Matayo 24:3, 7.

  Beto ke mona mambu yango bubu yai. Yo yina, beto ke tula ntima nde ntama mingi ve Kimfumu ya Nzambi ta sukisa mambu yina yonso na ntoto.