Kisalu ya Mfunu Yina Bansadi ya Kisalu Ke Salaka

NTUMWA Polo sonikilaka dibundu ya Filipi nde: “Polo ti Timoteo, bampika ya Kristu Yezu, na basantu yonso yina kele na bumosi ti Kristu Yezu, bayina kele na Filipi, mpi na bankengi ti bansadi ya kisalu.” (Bafil. 1:1) Na verse yai, beto ke bakisa nde Polo tubilaka mpi bansadi ya kisalu. Ya kieleka, na bilumbu ya Polo, babakala yai vandaka kusala kisalu mosi ya mfunu sambu na kusadisa bankuluntu. Yo kele mpi mutindu mosi bubu yai. Bansadi ya kisalu ke salaka bisalu yina ke sadisaka bankengi mpi yo ke salaka nde dibundu kutambula na ndonga.

² Keti nge me zaba bansadi ya kisalu ya dibundu na beno? Keti nge me zaba bisalu mingi ya mbote yina bo ke salaka sambu na mambote na nge mpi ya dibundu ya mvimba? Ntembe kele ve nde Yehowa ke monaka nde bikesa yina babakala yai ke salaka kele mfunu mingi. Polo sonikaka nde: “Bantu yina ke salaka kisalu na mutindu ya mbote ke bakaka sambu na bo mosi lukumu ya mbote mpi masonga ya nene na lukwikilu disongidila na Kristu Yezu.”—1 Tim. 3:13.

MAMBU YINA BIBLIA KE LOMBAKA SAMBU NA KUKUMA NSADI YA KISALU

³ Bansadi ya kisalu fwete vanda ti luzingu ya mbote ya Bukristu. Bo fwete vanda bantu yina bo lenda tudila ntima mpi bo fwete lungisa mbote mikumba na bo. Diambu yai ke monana pwelele kana beto tadila mambu ya bo fwete lungisa yina Polo tubilaka na mukanda yina yandi sonikilaka Timoteo. Yandi tubaka nde: “Bansadi ya kisalu mpi fwete vanda bantu yina bo lenda zitisa, bantu ya kele ve ti ndinga-zole, bantu ya ke nwaka vinu mingi ve, bantu ya lukasi ve yina ke sosaka kubaka luta na banzila ya luvunu, kansi bantu ya ke taninaka kinsweki ya santu ya lukwikilu ti kansansa ya bunkete. Diaka, bo meka ntete bantu yai sambu na kuzaba kana bo me fwana; na nima bo sala bonso bansadi, kana bo lenda funda bo ve ata na kima mosi. Nsadi ya kisalu fwete vanda bakala ya nkento mosi, yandi fwete twadisa bana na yandi mpi nzo na yandi na mutindu ya mbote.” (1 Tim. 3:8-10, 12) Kulanda minsiku ya kunanguka yina bo me tulaka sambu na bansadi ya kisalu ke salaka nde bantu kutuba ve mambu ya mbi sambu na dibundu mpi sambu na bantu yina bo me pesaka mikumba ya mfunu.

⁴ Bansadi ya kisalu ke kudipesaka na kisalu ya kusamuna konso ngonda yo vanda bo kele baleke to bambuta. Bo ke monisaka kikesa na kisalu ya kusamuna bonso Yezu. Bo ke landaka mbandu ya Yehowa yina ke zolaka nde bantu kuguluka mutindu bo ke samunaka ti kikesa.—Yez. 9:7.

⁵ Babakala yina kele bansadi ya kisalu ke pesaka mbandu ya mbote na mutindu na bo ya kulwata, ya kuyidika nitu, ya kutuba, na mabanza mpi na bikalulu na bo. Bo ke vandaka ti mabanza ya mbote, yo yina bantu ya nkaka ke zitisaka bo. Diaka, bo ke bakaka na mbalu kinduku na bo ti Yehowa mpi mikumba na bo na dibundu.—Tito 2:2, 6-8.

⁶ Bo ‘mekaka bo ntete sambu na kuzaba kana bo me fwana.’ Nkutu na ntwala nde bo pona bo, bo monisaka mpenza nde bo kele babakala ya me kudipesaka. Bo me monisaka nde bo ke tulaka mambote ya Kimfumu na kisika ya ntete na luzingu na bo mpi bo ke zolaka kulungisa mikumba yonso yina bo ke pesaka bo. Ya kieleka, bo kele bambandu sambu na bampangi na dibundu.—1 Tim. 3:10.

BISALU YINA BO KE SALAKA

⁷ Bansadi ya kisalu ke salaka bisalu mingi ya mfunu sambu na mambote ya bampangi; yo ke salaka nde bankengi kulutisa ntangu mingi na kulonga mpi kugungula mameme. Ntangu bo ke pesaka bo bisalu, kimvuka ya bankuluntu ke tadilaka makuki ya konso muntu mpi bampusa ya dibundu.

⁸ Beto tubila mwa bisalu ya bo ke salaka: Bo lenda pesa nsadi ya kisalu mosi mukumba ya kutala mpi ya kupesa beto mikanda yina beto kele na yo mfunu mpi yina beto lenda sadila na kisalu ya kusamuna. Bankaka ke talaka mambu ya konti ya dibundu to mambu ya teritware. Bo ke pesaka bansadi ya kisalu ya nkaka mukumba ya kutambusa mikro, ya kusala na sonorizasio, ya kusala kisalu ya kuyamba bantu mpi ya kusadisa bankuluntu na mitindu ya nkaka. Yo ke lombaka bisalu mingi kibeni sambu na kutanina Nzo ya Kimfumu mpi kulanda kutula yo bunkete, yo yina mbala mingi bo ke lombaka bansadi ya kisalu na kusala bisalu yai.

⁹ Na mabundu mingi, bo ke pesaka konso nsadi ya kisalu mukumba mosi na kati ya mikumba yai. Kansi na mabundu ya nkaka, nsadi ya kisalu mosi lenda lungisa mikumba mingi. Bantangu ya nkaka, bansadi ya kisalu mingi lenda sala kisalu mosi. Kana bansadi ya kisalu kele mingi ve sambu na kulungisa mikumba ya nkaka na kati ya mikumba yai, kimvuka ya bankuluntu lenda pona bampangi-babakala yina me bakaka mbotika mpi yina kele mbandu ya mbote na kulungisa mikumba yango. Mpidina, bampangi yai ta zaba mbote mambu yina ta sadisa bo ntangu bo ta lungisa mambu yina bo ke lombaka sambu na kukuma bansadi ya kisalu. Kana bampangi ya babakala kele ve, bo lenda lomba mpangi-nkento yina kele mbandu ya mbote na kusala bisalu ya nkaka, ata bo ta pona yandi ve nsadi ya kisalu. Mpangi yina kele mbandu ya mbote kele muntu yina bampangi ya nkaka ke monaka nde yo me fwana na kulanda mbandu ya bikalulu mpi ya lusambu na yandi. Mutindu yandi ke kwendaka na balukutakanu, ke samunaka, luzingu na yandi ya dibuta, bansaka yina yandi ke ponaka, mutindu na yandi ya kulwata mpi ya kuyidika nitu to mutindu na yandi ya kusala mambu ya nkaka, ke vandaka mbandu ya mbote sambu na bampangi.

¹⁰ Na mabundu yina kele ti bankuluntu fioti kibeni, bo lenda lomba bansadi ya kisalu ya me fwana na kutadila ti bantu yina ke zola kubaka mbotika bangiufula ya mbotika na mambu ya me tala malongi. Mambu yango kele na kitini Bangindu ya Nkaka, Kitini 1: “Malongi Yina Bakristu Ke Kwikilaka.” Nkuluntu mpamba muntu fwete tadila kitini 2: “Mutindu Bakristu Fwete Zinga” sambu yo ke tubilaka mambu ya luzingu ya muntu.

¹¹ Bantangu ya nkaka, kimvuka ya bankuluntu lenda soba bisalu ya bansadi ya kisalu kana bo kele ti bikuma ya mbote ya kusala yo. Kansi yo ke vandaka mbote mingi kana bampangi ke lungisa mikumba ya mutindu mosi na ntangu ya nda sambu yo ke sadisaka bo na kuzaba kisalu yango mbote mpi na kusala yo mbote.

¹² Na mabundu ya nkaka, bo lenda pesa bisalu ya nkaka na bansadi ya kisalu yina ‘bantu yonso ke monaka pwelele’ nde bo ke yela na kimpeve. (1 Tim. 4:15) Kana bankuluntu kele mingi ve, bo lenda sadila nsadi ya kisalu mosi bonso kilandi ya nkengi ya kimvuka. Bantangu ya nkaka, bo lenda sadila yandi bonso nsadi ya kimvuka yina ta salaka na nsi ya lutwadisu ya bankuluntu. Bo lenda lomba bansadi ya kisalu na kusala masolo ya nkaka na Lukutakanu Luzingu mpi Kisalu, na kutwadisa kana mpila kele Kulonguka ya Biblia ya Dibundu mpi na kusala badiskure ya bantu yonso. Bo lenda pesa bansadi ya kisalu mikumba ya nkaka kana mpusa mosi ya ngolo me monana mpi kana bo ke lungisa mambu ya bo ke lombaka sambu na mikumba yango. (1 Pie. 4:10) Bansadi ya kisalu fwete kudipesa na luzolo yonso ntangu bo ke sadisaka bankuluntu.

¹³ Ata kisalu na bo kele ve mutindu mosi ti ya bankuluntu, yo kele mpi kisalu ya santu yina bo ke sadilaka Nzambi mpi yo kele mfunu sambu dibundu kutambula mbote. Na nima, kana bansadi ya kisalu ke lungisa mbote mikumba na bo mpi kana bo me fwana sambu na kukuma bangungudi mpi balongi, bankuluntu lenda pesa bazina na bo sambu bo kuma bankuluntu.

¹⁴ Kana nge kele mpangi-bakala yina kele toko to kana nge me katuka kubaka mbotika, keti nge ke sala bikesa sambu na kulungisa mambu ya bo ke lombaka sambu na kukuma nsadi ya kisalu? (1 Tim. 3:1) Mutindu bantu mingi kibeni ke ndima kieleka konso mvula, beto kele na mfunu ya babakala ya me fwana sambu bo baka mikumba na dibundu. Nge lenda monisa nde nge ke zola kubaka mikumba kana nge ke monisa mpusa ya kusadisa bantu ya nkaka. Nge lenda sala yo kana nge ke yindula mingi mbandu ya mbote ya Yezu. (Mat. 20:28; Yoa. 4:6, 7; 13:4, 5) Mpusa yina ta kuma ngolo ntangu nge ta kuma ti kiese sambu nge ke kabila bantu ya nkaka. (Bis. 20:35) Yo yina, kudipesa na kusadisa bantu ya nkaka, pesa maboko na bisalu ya kuyidika Nzo ya Kimfumu to sala bonso volontere devware ya mwana ya nzo-nkanda na Lukutakanu Luzingu mpi Kisalu. Kuzola kubaka mikumba ke tendula mpi kuyedisa bikalulu ya kimpeve mpi kuvanda ti kikalulu ya mbote ya kulonguka nge mosi. (Nk. 1:1, 2; Bag. 5:22, 23) Diaka, mpangi yina ke zola kubaka mikumba fwete monisa nde bo lenda tudila yandi ntima mpi nde yandi kele ya kwikama ntangu bo ke pesaka yandi mikumba na dibundu.—1 Bak. 4:2.

¹⁵ Bo ke ponaka bansadi ya kisalu na nsadisa ya mpeve santu sambu na mambote ya dibundu. Bampangi yonso na dibundu lenda monisa ntonda na bo sambu na kisalu ya ngolo yina bansadi ya kisalu ke salaka kana bo ke sala ti bo ntangu bo ke lungisaka bisalu yina bo me pesaka bo. Kana bampangi ke sala mutindu yai, bo ta monisa ntonda na bo sambu na mambu yina Yehowa me yidikaka sambu bantu ya nzo na yandi kulanda kuvanda na ndonga.—Bag. 6:10.