Beto Tanina Ngemba mpi Bunkete ya Dibundu

KONSO mvula bantu mingi ke kotaka na nzo ya lusambu ya bunkete ya Yehowa kaka mutindu Biblia tubilaka yo. (Mika 4:1, 2) Beto kele kibeni na kiese ya kuyamba bo na “dibundu ya Nzambi”! (Bis. 20:28) Bo ke sepelaka kusadila Yehowa kisika mosi ti beto na paladisu na beto ya kimpeve yina kele bunkete mpi na ngemba. Mpeve santu ya Nzambi mpi bandongisila ya mayele yina kele na Ndinga na yandi ke sadisaka beto na kutanina ngemba mpi kusala nde dibundu kulanda kuvanda bunkete.—Nk. 119:105; Zek. 4:6.

² Ntangu beto ke sadilaka minsiku ya Biblia, beto ‘ke lwataka kimuntu ya mpa.’ (Bakol. 3:10) Beto ke landaka ve mambu ya fioti-fioti yina lenda basisa mavwanga mpi kukonda kuwakana na kati na beto. Ntangu beto ke tadilaka mambu mutindu Yehowa ke tadilaka yo, beto ke nungaka bupusi ya nsi-ntoto yina ke kabulaka bantu mpi beto ke salaka na bumosi bonso dibuta ya bampangi ya ntoto ya mvimba.—Bis. 10:34, 35.

³ Ata mpidina, bantangu ya nkaka mambu ya mpasi ke basikaka mpi yo ke bebisaka ngemba mpi bumosi ya dibundu. Sambu na nki? Mbala mingi, sambu na kukonda kuzitisa bandongisila ya Biblia. Beto fwete landa kunwana ti bikalulu na beto ya kukonda kukuka. Ata muntu mosi ve na kati na beto me konda disumu. (1 Yoa. 1:10) Mpangi mosi lenda sala kima ya mbi mpi yo lenda kumisa dibundu mvindu to kubebisa kimpeve na yo. Beto lenda lwadisa mpangi mosi na mambu ya beto me tuba to me sala kukonda kuyindula to mambu yina mpangi mosi me tuba to me sala, lenda lwadisa beto to kupesa beto mpasi. (Bar. 3:23) Kana mambu ya mutindu yai me salama, inki beto lenda sala sambu na kuyidika yo?

⁴ Yehowa me tadilaka mambu yai na zola yonso. Ndinga na yandi ke pesaka beto bandongisila ya ke monisa mambu ya beto fwete sala kana mambu ya mpasi me basika. Bankuluntu, disongidila bangungudi ya zola mpi ya kimpeve kele pana sambu na kusadisa konso muntu na kati na beto. Kana beto ke sadila bandongisila ya Biblia yina bo ke pesaka beto, beto ta zinga diaka mbote ti bantu ya nkaka mpi Yehowa ta landa kundima beto. Kana bo me pesa beto ndola to bo me nganina beto sambu na disumu ya beto me sala, beto fwete ndima nde disipline yina ke monisa nde Tata na beto ya zulu ke zolaka beto.—Bing. 3:11, 12; Baeb. 12:6.

KUYIDIKA MAVWANGA YA FIOTI-FIOTI

⁵ Bantangu ya nkaka kuswana to mavwanga ya fioti-fioti lenda basika na kati ya bampangi na dibundu. Bo fwete yidika yo na nswalu yonso mpi ti zola ya kimpangi. (Baef. 4:26; Bafil. 2:2-4; Bakol. 3:12-14) Nge ta yidika mambu ya mpasi yina ke tadila kinduku na nge ti mpangi ya nkaka kana nge ke sadila ndongisila yai ya ntumwa Piere: “Beno zolana ngolo, sambu zola ke fikaka masumu mingi.” (1 Pie. 4:8) Biblia ke tuba nde: “Beto yonso ke bulaka sakuba mbala mingi.” (Yak. 3:2) Kana beto ke sadila Munsiku ya Wolo disongidila, kusadila bantu ya nkaka mambu yonso yina beto ke zolaka nde bo sadila beto, mbala mingi beto ta vilaka mpi ta lolulaka bifu ya fioti-fioti.—Mat. 6:14, 15; 7:12.

⁶ Kana nge me bakisa nde mambu ya nge tubaka to salaka lwadisaka mpangi mosi, nge fwete sala ngolo sambu na kutula nswalu ngemba ti yandi. Kuvila ve nde yo kele mpi ti bupusi na kinduku na nge ti Yehowa. Yezu pesaka balongoki na yandi ndongisila yai: “Ebuna, kana nge ke nata dikabu na nge na mesa-kimenga mpi kuna nge me yibuka nde mpangi na nge kele ti makambu ti nge, bika dikabu na nge pana na ntwala ya mesa-kimenga, mpi kwenda. Ntete, tula ngemba ti mpangi na nge, na nima ntangu nge ta vutuka, pesa dikabu na nge.” (Mat. 5:23, 24) Mbala ya nkaka, nge bakisaka yandi ve. Kana yo kele mpidina, sala yonso sambu beno solula. Kana bampangi yonso na dibundu ke solula mbote, bo ta wakanaka mpi bo ta yidikaka mambu ya mpasi yina ke basikaka sambu na kukonda kukuka na beto.

KUPESA BANDONGISILA YA BIBLIA YINA KELE MFUNU

⁷ Bantangu ya nkaka, bankengi lenda mona nde bo fwete pesa mpangi mosi bandongisila sambu na kusadisa yandi na kusoba mabanza na yandi. Yo ke vandaka ve ntangu yonso pete. Ntumwa Polo sonikilaka Bakristu ya Galatia nde: “Bampangi, kana muntu mosi ke kwenda na nzila ya mbi na ntwala nde yandi bakisa yo, beno bantu yina kele ya kuyela na kimpeve, beno sosa kusungika muntu yina na mawete.”—Bag. 6:1.

⁸ Ntangu bankuluntu ke gungulaka kimvuka ya mameme, bo ke taninaka dibundu na bigonsa mingi ya kimpeve mpi bo ke salaka yonso sambu makambu ya ngolo kubasika ve. Bankuluntu ke salaka ngolo sambu kisalu yina bo ke salaka na dibundu kuwakana ti mambu yai ya Yehowa silaka na nzila ya Yezaya: “Konso muntu ta vanda bonso kisika ya kubumbana mupepe, kisika ya kubumbana mvula ya mupepe ya ngolo, bonso bamasa na ntoto ya me konda masa, bonso kivudi ya ditadi mosi na ntoto ya kuyuma.”—Yez. 32:2.

KUTULA BANTU YINA KE TAMBULA NA MUTINDU YA KISAKA-SAKA KIDIMBU

⁹ Ntumwa Polo kebisaka bampangi sambu na bantu ya nkaka yina lenda bebisa dibundu. Yandi sonikaka nde: “Beto ke songa beno nde, beno vanda ntama ti konso mpangi yina ke tambula na mutindu ya kisaka-saka kansi ve na kuwakana ti bansiku yina beno bakaka na beto.” Yandi tendulaka mambu yina ntangu yandi sonikaka nde: “Kana muntu ke lemfuka ve na mambu ya beto me sonika na mukanda yai, beno tula yandi kidimbu mpi beno bika kuvukana ti yandi, sambu yandi wa nsoni. Beno baka yandi ve bonso mbeni, kansi beno landa kukebisa yandi bonso mpangi.”—2 Bate. 3:6, 14, 15.

¹⁰ Bantangu ya nkaka, mpangi mosi lenda sala ve disumu ya nene yina lenda sala nde bo basisa yandi na dibundu, kansi yandi lenda monisa kukonda luzitu ya mingi na bansiku ya Nzambi yina fwete twadisa Bakristu. Yo lenda vanda nde yandi kele molo ya nene to ke tubaka kaka mambu ya mbi sambu na bantu ya nkaka to yandi kele kibeni mvindu. Yandi lenda vanda mpi muntu yina ke ‘kudikotisaka na mambu yina me tala [yandi] ve.’ (2 Bate. 3:11) To yandi lenda vanda muntu yina ke sadilaka mayele ya mbi sambu na kubaka mambote ya kinsuni na bampangi ya nkaka to yandi ke salaka bansaka ya kulutisa ntangu yina kele kibeni ya mbi. Kikalulu yai kele mbi kibeni; yo lenda bebisa lukumu ya dibundu mpi Bakristu ya nkaka.

¹¹ Bankuluntu ta pesa ntete muntu yina ke tambula na mutindu ya kisaka-saka bandongisila ya ke katuka na Biblia sambu na kusadisa yandi. Kansi, kana yandi ke landa kumona mpamba minsiku ya Biblia ata bo me pesa yandi bandongisila mingi, bankuluntu lenda baka desizio ya kusala diskure sambu na kukebisa dibundu. Bankuluntu ta tadila mambu na mutindu ya mbote sambu na kuzaba kana diambu yina kele mbi kibeni mpi ke yangisa bantu ya nkaka sambu bo sala diskure ya kukebisa dibundu. Mutubi ta pesa bandongisila ya me fwana na yina me tala kikalulu yina ya kisaka-saka, kansi yandi ta tanga ve zina ya mpangi yina ke tambula kisaka-saka. Mpidina, bantu yina me zaba diambu yina bo ke tubila na diskure ta baka lukanu ya kuvukana diaka ve mpamba-mpamba ti muntu yina, ata bo ta landa kuvukana ti yandi sambu na mambu ya kimpeve mpi “kukebisa yandi bonso mpangi.”

¹² Beto lenda tula ntima nde kana bampangi yina kele ya kwikama na dibundu ke vukana ve mpamba-mpamba ti muntu yina ke tambula kisaka-saka, yandi lenda wa nsoni sambu na bikalulu na yandi mpi yo lenda pusa yandi na kubalula ntima. Kana yo me monana pwelele nde muntu yina ke tambula diaka ve kisaka-saka, yo ta vanda diaka ve mfunu na kutadila yandi bonso muntu yina bo me tula kidimbu.

KUYIDIKA MASUMU YA NKAKA YA NENE

¹³ Kana beto ke landaka ve bifu ya bampangi mpi ke lolulaka bo, yo ke tendula ve nde beto ke kangaka meso na masumu to beto ke ndimaka yo. Beto lenda tuba ve nde mambu yonso ya mbi ya beto ke salaka, beto ke salaka yo sambu na kukonda kukuka. Diaka, yo ta vanda ve mbote kana beto ke kanga meso na masumu ya nene. (Levi 19:17; Nk. 141:5) Kuwakana ya Nsiku vandaka kundima nde masumu ya nkaka kele mbi kuluta ya nkaka; yo kele mpi mutindu mosi na dibundu ya Bukristu.—1 Yoa. 5:16, 17.

¹⁴ Yezu tubaka pwelele mutindu ya kuyidika mambu ya nene yina lenda basika na kati ya bampangi Bakristu. Tala mambu yina yandi tubaka na kusala: “Kana mpangi na nge me sala disumu, [1] kwenda mpi songa yandi kifu na yandi, kaka nge ti yandi mpamba. Kana yandi wila nge, nge me vutula mpangi na nge na nzila ya mbote. Kansi, kana yandi wila nge ve, [2] baka muntu mosi to bantu zole, sambu mambu yonso lenda ndimama kana bambangi zole to tatu me ta kimbangi. Kana yandi wila bo ve, [3] tuba na dibundu. Kana yandi wila mpi ve dibundu, bika nde yandi vanda sambu na nge bonso muntu ya makanda mpi bonso kalaki ya mpaku.”—Mat. 18:15-17.

¹⁵ Na kutadila mbandu yina Yezu pesaka na nima, yina bo me sonikaka na Matayo 18:23-35, yo ke monana nde na kati ya masumu yina bo ke tubila na Matayo 18:15-17, mosi me tala mambu ya mbongo to bima ya nkaka, mu mbandu kukonda kufuta mfuka to kukusa sambu na kuyiba. To mpi kukusila muntu makambu, diambu mosi ya ke bebisaka kibeni lukumu ya muntu.

¹⁶ Kana nge kele ti mambu ya ke monisa nde mpangi mosi na dibundu me sadila nge disumu ya mutindu yina, kunwanina ve na kukwenda kuzabisa bankuluntu sambu na kulomba bo nde bo kotila nge. Mutindu Yezu pesaka ndongisila, solula ntete ti mpangi yina nge ke bokutila. Sosa kuyidika dikambu yango kaka nge ti yandi kukonda kukotisa muntu ya nkaka. Kuvila ve mambu yina Yezu tubaka. Yandi tubaka ve nde ‘kwenda mbala mosi mpamba mpi songa yandi kifu na yandi.’ Yo yina, kana muntu me ndima ve kifu na yandi mpi me lomba ve ndolula, yo ta vanda mbote na kusolula diaka ti yandi kilumbu ya nkaka. Kana beno me yidika dikambu yango mutindu yina, ntembe kele ve nde mpangi yina salaka nge mbi ta monisa ntonda mutindu nge tubilaka ve bantu ya nkaka mbi na yandi to nge bebisaka ve lukumu na yandi na dibundu. Kana nge me sala mutindu yai, nge ta “vutula mpangi na nge na nzila ya mbote.”

¹⁷ Kana mpangi yina salaka nge mbi me ndima mbi na yandi, me lomba ndolula mpi yandi me sala yonso sambu na kuyidika mambu, yo ta vanda ve mfunu na kukwenda ntama. Ata mbi yango vandaka ya nene, bampangi yina kele ti dikambu lenda yidika mbi yina kaka bo zole.

¹⁸ Kana nge me kuka ve kuvutula mpangi na nge na nzila ya mbote na nima ya kusonga yandi kifu na yandi “kaka nge ti yandi,” nge lenda sala mutindu Yezu tubaka, “baka muntu mosi to bantu zole,” mpi solula diaka ti mpangi na nge. Bantu yina nge ta baka fwete vanda mpi ti lukanu ya kuvutula mpangi na nge na nzila ya mbote. Yo kele mbote nde nge nata bantu yina vandaka ntangu mbi yina salamaka. Kansi kana muntu ya monaka yo kele ve, nge lenda nata mpangi mosi to bampangi zole sambu bo vanda ntangu beno ke solula. Bo lenda vanda ti eksperiansi na diambu yina beno ke yidika mpi bo lenda tuba kana diambu yina salamaka vandaka kibeni mbi. Bankuluntu ya nge me pona sambu na kuvanda ntangu beno ke solula, ke monisa ve dibundu sambu kimvuka ya bankuluntu ve bantu me pona bo sambu na kutadila diambu yina.

¹⁹ Kana beno me yidika ve diambu yina na nima ya kusala bikesa mbala mingi, disongidila beno solulaka beno zole mpi nge nataka muntu mosi to bantu zole ya nkaka mpi nge ke mona nde nge lenda yambula yo ve, pana nge fwete songa bankuluntu ya dibundu diambu yina. Kuvila ve nde lukanu na bo kele ya kutanina ngemba mpi bunkete ya dibundu. Kana nge me zabisa yo na bankuluntu, nge fwete bika diambu yina na maboko na bo mpi kutula ntima na Yehowa. Nge fwete bika mpi ve ata fioti nde bikalulu ya muntu ya nkaka kubudisa nge dibaku to yo manisa kiese na nge na kisalu ya Yehowa.—Nk. 119:165.

²⁰ Bangungudi ya mameme ta zikisa mambu yina. Kana yo monana pwelele nde mpangi yina sadilaka nge disumu ya nene mpi yandi ke balula ve ntima mpi ke zola ve kuyidika mambu na mutindu ya me fwana mpi na mutindu ya mbote, yo lenda vanda mbote nde kimvuka ya bankuluntu kubasisa muntu yina me sala disumu na dibundu. Mpidina bo ta tanina mameme mpi bunkete ya dibundu.—Mat. 18:17.

KUYIDIKA MASUMU YA NENE

²¹ Masumu ya nkaka ya nene, mu mbandu pite, bizumba, kuvukisa nitu babakala ti babakala to bankento ti bankento, kuvweza, apostazi, kusambila biteki mpi masumu ya nkaka ya nene ya mutindu mosi, ke lombaka ve nde muntu yina bo sadilaka mbi kusuka kaka na kulolula muntu yina salaka yandi mbi. (1 Bak. 6:9, 10; Bag. 5:19-21) Sambu masumu ya nene ya mutindu yai lenda bebisa bunkete ya kimpeve ya dibundu mpi ya bikalulu na yo, bo fwete zabisa yo na bankuluntu mpi bo bantu fwete tadila yo. (1 Bak. 5:6; Yak. 5:14, 15) Bampangi ya nkaka lenda solula ti bankuluntu sambu na kufunguna masumu na bo mosi to sambu na kuzabisa bo masumu yina bo me zaba yina bampangi ya nkaka me sala. (Levi 5:1; Yak. 5:16) Yo vanda na konso mutindu yina bankuluntu me wa disumu ya nene yina mpangi mosi ya me bakaka mbotika me sala, bankuluntu zole fwete zikisa ntete diambu yina. Kana bo me mona nde mambu yina bo songaka bo kele ya kieleka mpi banzikisa ke monisa nde disumu mosi ya nene salamaka, kimvuka ya bankuluntu ta pona bankuluntu tatu to kuluta sambu na kusala komite ya kusambisa sambu na kutadila diambu yina.

²² Bankuluntu ke kengilaka mameme na dikebi yonso sambu ata kima mosi ve kubebisa bo na kimpeve. Bo ke salaka mpi ngolo na kusadila mbote-mbote Ndinga ya Nzambi sambu na kusungika konso muntu yina salaka mbi mpi bo ke sosaka kusadisa yandi sambu yandi kuma diaka ti kimpeve ya mbote. (Yude 21-23) Yo ke wakana ti mambu yai ya ntumwa Polo songaka Timoteo: “Na ntwala ya Nzambi mpi ya Kristu Yezu, yina ta sambisa bantu yina kele na luzingu mpi bafwa, . . . Nganina, kebisa ngolo, siamisa, ti ntima ya nda yonso mpi mayele ya kulonga.” (2 Tim. 4:1, 2) Kusala mutindu yina lenda lomba bankuluntu ntangu mingi, kansi yo kele na kati ya bisalu ya ngolo yina bo kele ti yo. Dibundu ke bakaka bikesa na bo na valere mpi ke monaka nde “bo me fwana na kubaka lukumu mingi kibeni.”—1 Tim. 5:17.

²³ Konso mbala yina yo ke monana pwelele nde muntu salaka disumu, lukanu ya ntete-ntete ya bankuluntu ke vandaka ya kusadisa yandi na kubeluka na kimpeve. Kana yandi me balula ntima na masonga yonso mpi me bika nde bankuluntu kusadisa yandi mpi kana bo me nganina yandi, yo vanda na kingenga to na meso ya konso muntu yina taka kimbangi ntangu bo vandaka kusambisa yandi, yo ta pesa yandi disipline mpi ta pusa bantu yina monaka yo na kubanga kusala masumu. (2 Sam. 12:13; 1 Tim. 5:20) Kana komite ya kusambisa me nganina muntu, bo fwete pesa yandi bandola. Mpidina, bo lenda sadisa yandi na “kusungika banzila” ya makulu na yandi na mbala ya nima. (Baeb. 12:13) Na ntangu ya me fwana, bo ke katulaka bandola yango kana bo me mona pwelele nde yandi me banda diaka kukuma ngolo na kimpeve.

LUZAYISU YA KUNGANINA MUNTU

²⁴ Kana komite ya kusambisa me mona nde muntu me balula ntima kansi na nima disumu na yandi lenda zabana na dibundu to na kisika ya beno ke zingaka to kana yo ke lomba kukebisa dibundu sambu na nsumuki mosi ya me balula ntima, bo ta pesa luzayisu ya nkufi na Lukutakanu Luzingu mpi Kisalu. Beno fwete tuba nde: “Bo me nganina mpangi [zina ya muntu].”

KANA KOMITE ME BAKA LUKANU YA KUBASISA MUNTU NA DIBUNDU

²⁵ Bantangu ya nkaka, muntu yina salaka mbi kudikotisaka mingi kibeni na luzingu ya masumu mpi yandi me buya kundima lusadisu yina bo ke pesa yandi. Mbala ya nkaka, “bisalu yina ke monisa nde [yandi] me balula ntima” lenda monana ve na ntangu bo ke sambisa yandi. (Bis. 26:20) Yo ta lomba kusala inki? Kana mpidina, yo kele mfunu na kubasisa na dibundu muntu yina salaka masumu mpi ya ke zola ve kubalula ntima, mpidina yandi ta vanda diaka ve nduku ya bansadi ya Yehowa yina kele bunkete. Bikalulu ya mbi ya muntu yina ta bebisa diaka ve dibundu, mpidina yo ta tanina bunkete ya bikalulu mpi ya kimpeve ya dibundu mpi lukumu na yo ya mbote. (Kul. 21:20, 21; 22:23, 24) Ntangu ntumwa Polo zabaka bikalulu ya mbi ya muntu mosi ya dibundu ya Korinto, yandi longisilaka bankuluntu na kupesa “muntu ya mutindu yina na Satana . . . , mpidina mpeve [ya dibundu] lenda guluka.” (1 Bak. 5:5, 11-13) Polo tubilaka mpi bantu ya nkaka ya mvu-nkama ya ntete yina bo basisaka na dibundu sambu bo kolamaka na kieleka.—1 Tim. 1:20.

²⁶ Kana komite ya kusambisa me baka lukanu ya kubasisa na dibundu muntu yina salaka masumu kansi me buya kubalula ntima, bo fwete songa yandi desizio yina mpi bo fwete songa yandi pwelele kikuma to bikuma ya Biblia yina me sala nde bo basisa yandi na dibundu. Kana bo me songa yandi lukanu yango, komite ya kusambisa fwete songa yandi nde kana yandi ke mona nde bo me sambisa yandi ve mbote mpi yandi ke zola nde bo tadila diaka desizio yina, yandi fwete sonika yo na mukanda mpi kumonisa pwelele bikuma yina ke pusa yandi na kulomba nde bo tadila diaka desizio yango. Bo ta pesa yandi bilumbu nsambwadi sambu na kusonika, banda na kilumbu yina komite me zabisa yandi desizio na bo. Kana kimvuka ya bankuluntu me baka mukanda ya mutindu yina, bo fwete binga to kusonikila nkengi ya nziunga mpi yandi ta pona bankuluntu ya me fwana yina ta sala komite ya kuzikisa kusambisa ya ntete sambu na kuwidikila diaka muntu yina salaka disumu. Bo ta sala kibeni ngolo na kuwidikila muntu yina me lomba nde bo zikisa kusambisa ya ntete na mposo yina ke landa mposo ya bo me baka mukanda na yandi. Kana muntu me lomba nde bo zikisa kusambisa ya ntete, bo ta pesa ntete ve luzayisu ya kubasisa yandi na dibundu. Na ntangu bo ke vingila, bo ta buyisa yandi na kupesa bamvutu to na kusala kisambu na balukutakanu mpi bo ta pesa yandi ve mikumba ya sipesiali na dibundu.

²⁷ Kuzikisa kusambisa ya ntete kele dibaku ya kumonisila muntu yina bo me funda ntima ya mbote mpi yo ke pesaka dibaku ya kuwa yandi diaka. Yo yina, kana bo me sala bikesa ya me fwana sambu na kukutana ti yandi mpi yandi me buya kukwisa sambu bo widikila yandi diaka, bo ta pesa luzayisu nde bo me basisa yandi na dibundu.

²⁸ Kana yandi me zola ve nde bo tadila diaka mambu na yandi, komite ya kusambisa ta tendudila yandi mfunu ya kubalula ntima mpi mambu yina yandi fwete sala sambu na kuvutuka na dibundu na ntangu ya me fwana. Yo kele mutindu ya kusadisa yandi mpi ya kumonisila yandi ntima ya mbote mpi bo fwete sala yo ti kivuvu nde yandi ta soba luzingu na yandi mpi nde na nima yandi ta fwana na kuvutuka na organizasio ya Yehowa.—2 Bak. 2:6, 7.

LUZAYISU YA KUBASISA MUNTU NA DIBUNDU

²⁹ Kana yo ke lomba nde bo basisa nsumuki yina me balula ve ntima na dibundu, bo ta pesa luzayisu ya nkufi nde: “[Zina ya muntu] kele diaka ve Mbangi ya Yehowa.” Luzayisu yina ta sadisa bampangi ya kwikama na dibundu na kuvukana diaka ve ti yandi.—1 Bak. 5:11.

KUDIKATULA NA DIBUNDU

³⁰ Bo ke sadilaka bangogo “kudikatula na dibundu” sambu na kutubila muntu yina me bakaka mbotika kansi yina ke buya na luzolo yonso nde yandi kele Mukristu mpi ke tuba nde yandi ke zola diaka ve nde bantu kubinga yandi to kuzaba nde yandi kele Mbangi ya Yehowa. To mambu yina yandi ke sala ke monisa nde yandi kele diaka ve na kati ya dibundu, mu mbandu yandi me kuma muntu ya organizasio mosi ya nsi-ntoto yina balukanu na yo ke wakana ve ti malongi ya Biblia mpi yina Yehowa me silaka na kupesa ndola.—Yez. 2:4; Kus. 19:17-21.

³¹ Ntumwa Yoane sonikaka mambu yai sambu na bantu yina buyaka lukwikilu na bo na bilumbu na yandi: “Bo vandaka na kati na beto kansi bo bikisaka beto sambu bo vandaka ve bantu na beto; sambu kana bo vandaka bantu na beto, bo zolaka kubikala ti beto.”—1 Yoa. 2:19.

³² Kana muntu me kudikatula na dibundu, luzingu na yandi na meso ya Yehowa kele kibeni ya kuswaswana ti luzingu ya Mukristu yina me lembaka na kimpeve, disongidila yina ke samunaka diaka ve. Muntu lenda lemba na kimpeve sambu yandi ke longukaka diaka ve Ndinga ya Nzambi mbala na mbala. Mbala ya nkaka yandi kutanaka ti bampasi to mbangika mpi yo me salaka nde yandi sadila diaka ve Yehowa ti kikesa. Bankuluntu mpi bampangi ya nkaka ya dibundu ta landa kupesa Mukristu yina me lembaka na kimpeve lusadisu ya kimpeve yina me fwana.—Bar. 15:1; 1 Bate. 5:14; Baeb. 12:12.

³³ Kansi kana Mukristu mosi me pona na kudikatula na dibundu, bo ta pesa luzayisu yai ya nkufi sambu dibundu kuzaba diambu yina: “[Zina ya muntu] kele diaka ve Mbangi ya Yehowa.” Beto fwete tadila muntu ya mutindu yai mutindu beto ke tadilaka muntu yina bo me basisa na dibundu.

KUVUTULA MUNTU NA DIBUNDU

³⁴ Bo lenda vutula na dibundu muntu yina bo basisaka to yina kudikatulaka na dibundu kana yandi ke monisa pwelele nde yandi me balula ntima mpi yandi me monisa na ntangu mosi ya kufwana nde yandi me yambula luzingu na yandi ya masumu. Yandi ke monisa nde yandi kele diaka ti mpusa ya ngolo ya kuvanda ti kinduku ya mbote ti Yehowa. Bankuluntu ke bikaka nde ntangu ya kufwana kuluta, disongidila bangonda mingi, mvula mosi, to nkutu bamvula mingi, na kutadila mambu ya konso muntu sambu muntu yina bo basisaka na dibundu kumonisa nde yandi me balula kibeni ntima. Kana kimvuka ya bankuluntu me zwa mukanda ya muntu yina ke lomba nde yandi vutuka na dibundu, komite ya kuvutula muntu na dibundu fwete solula ti yandi. Komite yina ta zikisa “bisalu yina ke monisa nde [yandi] me balula ntima” mpi bo ta tala kana yo ke lomba kuvutula yandi na dibundu na ntangu yina to ve.—Bis. 26:20.

³⁵ Kana muntu yina ke zola nde bo vutula yandi na dibundu me katuka na dibundu ya nkaka kisika bo basisaka yandi na dibundu, dibundu yina yandi kele ta sala komite ya kuvutula yandi na dibundu mpi komite yango ta kutana ti yandi sambu na kutadila diambu na yandi. Kana bankuluntu ya dibundu yina yandi kele me sala komite ya kuvutula yandi na dibundu mpi kana bo me mona nde bo fwete vutula yandi na dibundu, bo ta sonikila kimvuka ya bankuluntu ya dibundu yina basisaka yandi. Bakomite yonso zole ta sala na bumosi sambu na kuzikisa nde bo me vukisa mambu yonso sambu na kubaka desizio ya mbote. Kansi, komite ya kuvutula muntu na dibundu ya dibundu yina sambisaka yandi ntete bantu ta baka desizio ya kuvutula yandi na dibundu to ve.

LUZAYISU YA KUVUTULA MUNTU NA DIBUNDU

³⁶ Kana komite ya kuvutula muntu na dibundu me ndima nde muntu yina bo basisaka na dibundu to yina kudikatulaka na dibundu me balula kibeni ntima mpi bo fwete vutula yandi na dibundu, bo ta pesa luzayisu ya kuvutula yandi na dibundu na dibundu yina bo basisaka yandi. Kana muntu yango kele ntangu yai na dibundu ya nkaka, bo ta pesa mpi luzayisu yina na dibundu yina yandi kele. Beno fwete tuba kaka nde: “[Zina ya muntu] me kuma diaka Mbangi ya Yehowa.”

MASUMU YA ME TALA BANA YA ME BAKAKA MBOTIKA YINA ME KUMA NTETE VE BAMBUTA NA KUTADILA NSIKU YA LETA

³⁷ Kana mwana yina me bakaka mbotika mpi ya kele ntete ve mbuta na kutadila nsiku ya leta me sala disumu ya nene, beno fwete zabisa bankuluntu. Ntangu bankuluntu ke tadila masumu ya nene ya mwana yina me sala, yo ta vanda mbote nde bibuti na yandi yina me bakaka mbotika kuvanda pana. Bo ta sala na bumosi ti komite ya kusambisa, kansi bo ta sosa ve nde mwana na bo ya me sala disumu kubaka ve ndola yina me fwana. Kaka mutindu bo ke salaka mambu kana mbuta me sala disumu, komite ya kusambisa ta sala ngolo sambu na kunganina mpi kuvutula mwana yina me sala disumu na nzila. Kansi, kana mwana yina me balula ve ntima, bo ta basisa yandi na dibundu.

KANA NSAMUNI YINA ME BAKAKA NTETE VE MBOTIKA ME SALA DISUMU

³⁸ Inki yo ta lomba kusala kana nsamuni yina me bakaka ntete ve mbotika me sala disumu ya nene? Bo lenda basisa yandi ve na dibundu sambu yandi me bakaka ve mbotika mpi me kumaka ntete ve Mbangi ya Yehowa. Mbala ya nkaka yandi bakisaka ve mbote-mbote minsiku ya Biblia mpi kana bo me pesa yandi bandongisila ya mbote, yo lenda sadisa yandi na “kusungika banzila” ya makulu na yandi.—Baeb. 12:13.

³⁹ Kana yandi me sala disumu mpi yandi ke zola ve kubalula ntima ntangu bankuluntu zole me solula ti yandi mpi me sala yonso sambu na kusadisa yandi, yo ta vanda mbote na kuzabisa dibundu. Bo ta pesa luzayisu yai ya nkufi: “[Zina ya muntu] kele diaka ve nsamuni ya me bakaka ntete ve mbotika.” Dibundu ta yantika kutadila yandi bonso muntu ya nsi-ntoto. Ata bo me basisa yandi ve na dibundu, Bakristu fwete keba sambu bo kangama ve ti yandi. (1 Bak. 15:33) Dibundu ta ndima diaka ve rapore na yandi ya kisalu ya kusamuna.

⁴⁰ Na nima ya mwa ntangu, muntu yina bakaka ntete ve mbotika ya bo katulaka na ndonga ya bansamuni lenda zola kukuma diaka nsamuni. Kana mpidina, bankuluntu zole ta solula ti yandi mpi ta zikisa kana yandi me yela na kimpeve. Kana yandi me lungisa mambu ya bo ke lombaka, bo ta pesa luzayisu yai ya nkufi: “[Zina ya muntu] me kuma diaka nsamuni ya me bakaka ntete ve mbotika.”

YEHOWA KE SAKUMUNAKA LUSAMBU YA NGEMBA MPI YA BUNKETE

⁴¹ Bubu yai bantu yonso yina ke kwisaka na dibundu ya Nzambi ke vandaka na kiese na kati ya paladisu ya kimpeve yina Yehowa me tulaka bansadi na yandi. Matiti ke buta mingi kibeni na nseke na beto ya kimpeve mpi masa ya kieleka yina ke pesaka beto kikesa ke kuma mingi. Yehowa ke taninaka beto mpi na nzila ya organizasio na yandi yina Kristu ke twadisaka. (Nk. 23; Yez. 32:1, 2) Mutindu beto kele na paladisu ya kimpeve na bilumbu yai ya nsuka ya me fuluka ti mavwanga, beto ke wa ve boma ata ya kima mosi.

⁴² Kana beto ke tanina ngemba mpi bunkete ya dibundu, beto ta landa kubika nde nsemo na beto ya kieleka ya Kimfumu kupela. (Mat. 5:16; Yak. 3:18) Yehowa ta sakumuna beto mpi beto ta vanda na kiese ya kumona bantu mingi yina ta zaba yandi mpi ta vukana ti beto sambu na kusala luzolo na yandi.