Mameme ya Yehowa Kele na Mfunu ya Dikebi Ya Mingi

“Beto vila ve nde Mfumu Nzambi kele Nzambi! . . . Beto kele bantu na yandi, beto kele mameme na yandi.”​—NKUNGA 100:3.

1. Inki mutindu Yehowa ketadilaka bansadi na yandi?

YEHOWA kele Ngungudi ya Nene. Kana beto kele bansadi na yandi, yandi ketadilaka beto bonso mameme na yandi mpi ketudilaka beto dikebi ya ngolo. Tata na beto ya mazulu kelembikaka beto mingi, kepemisaka beto mpi ketwadisaka beto na “nzila ya mbote sambu na zina na yandi.” (Nkunga 23:​1-4) Ngungudi ya Mbote, Yezu Kristu, kezolaka beto mingi na mpila nde yandi kutambikaka moyo na yandi sambu na beto.​—Yoane 10:​7-15.

2. Bantu ya Nzambi kekudimonaka na mvwandilu ya inki mutindu?

² Bonso bantu yina kebakaka dikebi ya mingi, beto lenda kutuba kumosi ti muyimbi Bankunga nde: “Beno samba Mfumu Nzambi na kiese, beno kwisa kuyimba bankunga ya kiese na ntwala na yandi! Beno vila ve nde Mfumu Nzambi kele Nzambi! Yandi muntu salaka beto, beto kele ya yandi; beto kele bantu na yandi, beto kele mameme na yandi.” (Nkunga 100:​2, 3) Ee, beto kele na kyese mpi na lutaninu. Yau kele bonso beto metulamaka na lupangu ya mameme ya kutunga ti matadi sambu na kutaninama na bambisi ya makasi.​—Kutanga 32:16; 1 Samuele 24:3; Sofonia 2:6.

Bangungudi ya Luzolo ya Mbote ya Kibuka

3. Inki mutindu bankuluntu Bakristu ya kuponama ketadilaka kibuka ya Yehowa?

³ Mfunu ya kuyituka kele ve, beto kele na kyese bonso mameme ya Nzambi! Bankuluntu ya kuponama ketwadisaka beto. Bau “ke kumaka ve bamfumu,” sambu na kuyala na zulu na beto, to kuvanda bamfumu na zulu ya lukwikilu na beto. (Kutanga 16:13; Matayo 20:​25-28; 2 Korinto 1:24; Baebreo 13:7) Kansi, bau kele bangungudi ya zola yina kesadilaka dilongi yai ya ntumwa Piere: “[Beno gungula mameme ya Nzambi yina kele na nsi ya lusungiminu na beno, NW]. Beno tala bantu na beno na luzolo na beno mosi, mutindu Nzambi ke zolaka nde beno sala, kansi na kingolo-ngolo ve. Beno sala kisalu na beno ve sambu na kubaka mbongo, kansi beno sala yo na luzolo ti kiese. Beno vanda ve na mabanza ya kuyala bantu yina ya Nzambi pesaka beno na kutala, kansi beno fweti vanda bantu yina ke songaka mbandu ya mbote na kati ya bantu na beno.” (1 Piere 5:​2, 3) Ntumwa Polo songaka bankundi bankuluntu nde: “Beno keba beno mosi, beno keba mbote-mbote mameme yina ya [m]peve ya Nzambi me pesaka beno na kutala. Beno keba mbote-mbote Dibundu yina ya Nzambi bakaka na menga ya mwana na yandi mpenza.” Ebuna, matondo ya inki mutindu mameme kepesaka sambu na bantu yai ya kuponama na mpeve santu “na kutala mameme mbote-mbote”!​—Bisalu 20:​28-30.

4. Sambu na inki kinduku ti kibuka Charles T. Russell kuzabanaka mbotembote?

⁴ Yezu kupesaka dibundu “makabu ya bantu,” bankaka bonso “bapastere,” to bangungudi, yina ketalaka mameme ya Yehowa ti dikebi ya mingi. (Efezo 4:​8, 11) Mosi na kati ya bantu ya mutindu yina kuvandaka Charles T. Russell, prezida ya ntete ya La Société Watch Tower. Bau vandaka kubinga yandi Pastere Russell sambu na bisalu na yandi ya kugungula kibuka na zola mpi na mawa na nsi ya Mfumu Ngungudi, Yezu Kristu. Bubu, bankuluntu Bakristu keponamaka na Nto Kimvuka ya Bambangi ya Yehowa, mpi kekebaka na kusadila ve bangogo “pastere,” “nkuluntu,” to “longi” bonso bimfumu. (Matayo 23:​8-12) Kansi, bankuluntu ya bilumbu yai kesalaka kisalu ya kipastere, to ya kingungudi, sambu na mambote ya mameme ya Yehowa.

5. Sambu na inki bantu ya mpa fwete sosa na kuzaba bankuluntu ya kuponama ya Dibundu ya Bukristu?

⁵ Bonso bangungudi, bankuluntu kele ti kisalu ya mfunu sambu na kuyela ya bantu ya mpa. Yau yina, mukanda ya mpa Nzayilu ya Kenataka na Luzingu ya Mvula na Mvula ketuba na lutiti 168 nde: “Yikana ti bankuluntu na kati ya dibundu. Bau kele ti ngikana ya mingi na kusadila nzayilu ya Nzambi, sambu bau mekukisaka malombilu ya bankengi yina mepesamaka na Biblia. (1 Timoteo 3:​1-7; Tito 1:​5-9) Kudyengana ve mbundu na kupusana na mosi na kati na bau kana nge kele na mfunu ya lusadisu ya kimpeve sambu na kununga kikalulu to dyambu yina kele ve na kuwakana ti malombilu ya Nzambi. Nge tamona nde bankuluntu kelandaka ntuma ya Polo yina ketuba nde: ‘Beno tuba na bangogo ya kulembika sambu na myoyo ya kenyokwama na mabanza, beno vanda ti ntima ya nda na bantu yonso.’​—1 Tesalonika 2:​7, 8; 5:​14, NW.”

Kana Bantu ya Mpa Kezola Kusamuna

6. Inki ndonga fwete kulandama kana longoki ya mpa ya Biblia kezola kukuma nsamuni?

⁶ Kana longoki ya Biblia mebakisa nzayilu mpi meyantikaka kuvukana na balukutakanu, yandi lenda zola kukuma nsamuni ya Kimfumu, nsamuni ya nsangu ya mbote. (Marko 13:10) Kana mutindu yina, Mbangi yina kelongukaka Biblia ti yandi fwete kukutana ti nkengi ntwadisi, yina tapona nkuluntu mosi na Komite ya Kisalu ya Dibundu ti nkuluntu ya nkaka sambu na kukutana ti longoki ya Biblia ti longi na yandi. Disolo tasalama na mukanda Organisés pour bien remplir notre ministère, balutiti 98 ti 99. Kana bankuluntu yina zole memona nde muntu ya mpa kendima bakyeleka ya lufulu ya Biblia mpi kesadila minsiku ya Nzambi, bau tazabisa yandi nde yandi melunga na kuvukana na kisalu ya kusamuna na bantu yonso.a Kana yandi menata lapolo na yandi ya kisalu ya kusonika, yau tasonama na karti ya Lapolo ya Nsamuni ya Dibundu, karti ya tavanda na zina na yandi. Ntangu yai, muntu ya mpa lenda kupesa lapolo ya kisalu ya kimbangi na yandi kumosi ti mafuku ya bantu ya nkaka yina ‘ke samunaka nsangu ya Nzambi’ na kiese. (Bisalu 13:⁠5) Luzayisu tapesama na dibundu nde yandi mekuma nsamuni ya konda kubotama.

7, 8. Na inki mutindu nsamuni ya kukonda kubotama lenda kubaka lusadisu na kisalu ya kusamuna?

⁷ Nsamuni ya konda kubotama kele na mfunu ya lusadisu ya bankuluntu ti ya Bakristu ya nkaka ya kutela. Mu mbandu, kuyela na yandi ya kimpeve kele dyambu ya dikebi sambu na ntwadisi ya Kulonguka ya Mukanda ya Dibundu yina ya yandi kekwendaka. Nsamuni ya mpa lenda kumona mpasi na kutuba mbotembote na kisalu ya inzo na inzo. (Bisalu 20:20) Ebuna yandi kele na mfunu ya lusadisu, mingimingi ya muntu yina vandaka kutambwisa kulonguka ya Biblia ti yandi na mukanda Nzayilu. Lusadisu ya nsadilu ya mutindu yina kele na mfunu mingi, sambu Yezu mpi kulongaka balongoki na yandi sambu na kisalu ya kusamuna.​—Marko 6:​7-13; Luka 10:​1-22.

⁸ Kana beto zola nde kisalu na beto kununga, kudibongisa na ntwala kele dyambu mosi ya mfunu. Yau yina, bansamuni yina zole lenda kuvukana ntete na kuyidika bansonga yina kepesamaka na Kisalu na Beto ya Kimfumu ya konso ngonda. Kana bau mebanda kisalu na bau na bilanga, muntu yina kele na ngikana ya mingi lenda kubaka kyelo ya ntete to mpi ti ya zole. Na nima ya nkotilu mosi ya mbote, bansamuni yonso zole lenda kuvukana na kuta kimbangi. Kusala kisalu ya kusamuna kumosi na mwa ndambu ya bamposo lenda kunata bamvutukilu ya mpa ya kitoko to nkutu mpi kulonguka ya Biblia na inzo na mukanda Nzayilu ya Kenataka na Luzingu ya Mvula na Mvula. Nsamuni yina kele na ngikana mingi lenda kutwadisa kulonguka na mwa nsungi mosi ya ntangu mpi kupesa yau na nima na nsamuni ya mpa ya Kimfumu. Kyese ya inki mutindu bansamuni yonso zole tavanda na yau kana longoki ya Biblia mendima nzayilu ya Nzambi!

9. Inki bangidika kesalamaka kana nsamuni mosi kezola kubaka mbotika?

⁹ Mutindu nsamuni ya konda kubotama kemonisa kuyela ya kimpeve, yandi lenda kudipesa na Yehowa na nzila ya kisambu mpi kundima na kubaka mbotika. (Fwanisa ti Marko 1:​9-11.) Yandi tazabisa mpusa na yandi ya kubaka mbotika na nkengi ntwadisi ya dibundu, yina tasola bankuluntu na kuvutukila ti nsamuni bangyufula ya kele na balutiti 175 tii 218 ya Organisés pour bien remplir notre ministère. Bangyufula kele ya kuvukisama na bitini iya, mpidina kana mpila kele, yau lenda kutadilama kumosi ti bankuluntu tatu ya kuswaswana. Kana bau mendima nde nsamuni ya konda kubotama kele ti mbakisa ya mbote ya malongi ya Biblia mpi mekuka na mitindu ya nkaka, bau tasonga yandi nde yandi lenda kubaka mbotika. Bonso mbutu ya kudipesa na yandi mpi mbotika, yandi tabaka ‘kidimbu’ ya luguluku.​—Ezekiele 9:​4-6.

Kulungisa Bansatu ya Sipesiali

10. Na nsuka ya kulonguka na yandi ya mukanda Nzayilu mpi mbotika, inki mutindu muntu lenda kuyedisa nzayilu na yandi ya Masonuku?

¹⁰ Kana muntu memanisa kulonguka na yandi ya Biblia na mukanda Nzayilu mpi mebaka mbotika, yau lenda kuvanda ve mfunu na kulonguka dyaka mukanda ya zole ya mvimba, bonso Beto me Vukana na Lusambu ya Nzambi mosi Kaka ya Kyeleka.b Sambu, muntu yina mekatuka kubaka mbotika talonguka mambu mingi ntangu yandi kebongisa balukutakanu ya Bukristu mpi kevukana na yau mbala yonso. Yandi mpi tabaka nzayilu ya ngika mutindu kiwini ya kyeleka kepusa yandi na kutanga mpi kulonguka mikanda ya nkaka ya Bukristu yandi mosi mpi na kusolulaka mambu ya Masonuku ti bankundi bankwikidi. Ebuna inki tasalama kana mfunu ya lusadisu ya nkaka memonika?

11. (a) Inki mutindu Prisila ti Akilasi kusadisaka Apolo? (b) Inki lusadisu lenda kupesama na muntu ya kuyela yina mekatuka kubaka mbotika na dyambu ya dikwela?

¹¹ Ata Apolo, yina “zabaka Mukanda ya Nzambi mbote-mbote” mpi kulongamaka mbote-mbote na yina metala Yezu, yandi kubakaka mambote ntangu Prisila ti Akilasi “nataka yandi na inzo na bo, ebuna bo songaka yandi nzila ya Nzambi diaka mbote-mbote.” (Bisalu 18:​24-26; fwanisa ti Bisalu 19:​1-7.) Na yau, baka nde mu mbandu muntu ya kuyela yina mekatuka kubaka mbotika kele na kutadila dyambu ya kinduku ti nkento mpi makwela. Mukristu mosi ya kele ti ngikana ya mingi lenda kusadisa yandi na kusosa inki mikanda ya Watch Tower ketuba na dyambu yango. Mu mbandu, bangindu ya kesadisa na dyambu yai kele na mukanda Les jeunes s’interrogent ​— Réponses pratiques, Partie 7.c Nsamuni yina kulongukaka Biblia ti yandi lenda kutadila masolo yai ti muntu ya mpa, kansi yau tavanda dyaka ve kulonguka ya mukanda ya mvimba.

12. Inki lusadisu lenda kupesama na bankwelani ya mekatuka kubaka mbotika kana bau kele na mikakatanu?

¹² Beto tadila mbandu ya nkaka. Mbala ya nkaka bankwelani ya mekatuka kubaka mbotika lenda kuvanda na mpasi ya kusadila bansiku ya Nzambi. Bau lenda kubinga nkuluntu mosi na kusolula na bau na bankokila, na kusongaka bau dibanza ya Masonuku mpi bangindu ya kele na mikanda ya Watch Tower. Kansi, nkuluntu tabandulula dyaka ve kulonguka ya Biblia na mukanda mosi ti bankwelani yango.

Kana Muntu ya Mpa Mebwa

13. Sambu na inki bankuluntu ya dibundu fwete kumonisa nkenda na muntu ya mpa yina mebwa kansi memonisa mbalula ya ntima?

¹³ Bankuluntu kelandaka mbandu ya Ngungudi ya Nene, Yehowa, yina ketuba nde: “Mono mosi ta tala mameme na mono, . . . mono tasansa yina me lwala to ke bela.” (Ezekiele 34:​15, 16; Efezo 5:1) Na kuwakana ti ngindu ya mutindu yina, longoki Yude kutumaka nde bau kumonisa nkenda na Bakristu ya kupakulama yina vandaka kudyengana mbundu to yina kubwaka na masumu. (Yude 22, 23) Sambu, na masonga yonso beto ketulaka ntima na Bakristu yina kele na ngikana, ntembe kele ve nde nkenda ya mingi fwete kumonisama na muntu ya mpa yina mebotama​—⁠kamwana dimeme​—yina kebwa kansi kebalula ntima. (Luka 12:48; 15:​1-7) Sambu bankuluntu ‘kesambisaka sambu na Yehowa,’ bau fwete kumonisa dikebi ya mingi sambu na mameme ya mutindu yina mpi kusungika bau ti mpeve mosi ya kudikitisa.​—2 Bansangu 19:6; Bisalu 20:​28, 29; Galatia 6:1.d

14. Inki lenda kusalama kana nsamuni ya mekatuka kubaka mbotika mesala disumu ya ngolo, ye inki mutindu yandi lenda kubaka lusadisu?

¹⁴ Beto baka mumbandu nde, muntu ya mpa yina mebaka mbotika kuvandaka na kifu ya kunwa malafu mpi melawuka mbala mosi to zole. To, yandi kunungaka kikalulu ya kunwa makaya, kansi na mpukumuna, yandi menwa na kinsweki mbala mosi to zole. Ata nkutu mpangi na beto yai ya mpa mesamba sambu Yehowa kulolula yandi, yandi fwete kusosa lusadisu ya nkuluntu mosi sambu disumu yango kukuma ve kikalulu. (Nkunga 32:​1-5; Yakobo 5:​14, 15) Kana yandi metuba kifu na yandi na mosi na kati ya bankuluntu, nkuluntu yina fwete kusala ngolo na kulongisila muntu yina ya mpa na mutindu mosi ya mawa. (Nkunga 130:3) Ndongisila ya Masonuku lenda kukuka na kusungika banzila sambu na makulu na yandi. (Baebreo 12:​12, 13) Nkuluntu yai fwete kutadila bamvwandilu ya dyambu yango ti nkengi ntwadisi ya dibundu sambu na kuzaba inki lusadisu ya ngika fwete kupesama.

15. Na mambu ya nkaka, inki lenda kuvanda mfunu na kusala kana muntu yina mebakaka mbotika mesala masumu?

¹⁵ Na mambu ya nkaka, mfunu ya lusadisu ya mingi lenda kuvanda. Kana kuzabana ya mingi, kigonsa sambu na kibuka, to makambu ya nkaka ya ngolo kemonana, kimvuka ya bankuluntu fwete kupona bankuluntu zole na kufimpa dyambu yina. Kana bankuluntu memona nde dikambu kele ya ngolo mpi yau kelomba komite ya kusambisa, bau fwete kunata lapore na kimvuka ya bankuluntu. Ntangu yai kimvuka ya bankuluntu tapona komite ya kusambisa sambu na kusadisa muntu ya mesumuka. Komite fwete kutadila yandi ti zola yonso. Bau fwete kusala ngolo na kuvutula yandi na nzila na nsadisa ya Masonuku. Kana yandi mendima bikesa ya zola ya komite ya kusambisa, ebuna bau lenda kutala kana tavanda mfunu na yandi kuzwa dyaka ve mabaku ya kutuba na estrade na ntangu ya balukutakanu na Nzo ya Kimfumu to kana yandi lenda kuvanda na nswa ya kupesa bamvutu na balukutakanu yina kesalama na Nzo ya Kimfumu. Kansi, mutindu yau kesalamaka, yandi lenda kulanda kisalu na yandi ya kusamuna mpi lenda kuvanda na nswa ya kupesa bamvutu na balukutakanu.

16. Inki bankuluntu lenda kusala na kusadisa muntu ya mebebisa?

¹⁶ Kana muntu mevila nzila kundima, nkuluntu mosi to zole na komite ya kusambisa lenda kudibongisa sambu na kusala bamvutukilu ya kingungudi sambu na kugongisa lukwikilu na yandi mpi kutunga kundima na yandi ya bansiku ya lunungu ya Nzambi. Muntu na muntu na kati na bau lenda kusamuna kumosi ti yandi mbala na mbala. Bau lenda kusolula mpi bantangu ya nkaka, mbala ya nkaka na kusadilaka masolo ya kulunga ya Nzozulu ya Nkengi mpi Réveillez-vous!, kansi mfunu tavanda ve ya kuvutukila dyaka kulonguka ya Biblia na mukanda mosi ya mvimba. Ti dikebi ya mingi ya mutindu yina, mpangi yina kuvilaka nzila lenda kubaka kikesa ya kutelamina balebakani ya nsuni na bilumbu ya ntwala.

17. Inki mambu kelandanaka kana nsumuki ya kubotama kezola ve kubalula ntima mpi kubikisa banzila na yandi ya masumu?

¹⁷ Kansi, kuvanda muntu ya mpa ya mebaka mbotika kele ve kikuma ya kusala masumu nkatu kubalula ntima. (Baebreo 10:​26, 27; Yude 4) Kana nsumuki mosi yina mebakaka mbotika kebalula ntima ve mpi kebikisa ve banzila na yandi ya masumu, yandi fwete kubasisama na dibundu. (1 Korinto 5:​6, 11-13; 2 Tesalonika 2:​11, 12; 2 Yoane 9-11) Kana yau kelomba nde yau kusalama mutindu yina, kimvuka ya bankuluntu fwete kupona komite mosi ya kusambisa. Kana nzengolo ya nsuka kele kubasisa na dibundu, luzayisu yai ya nkufi fwete kupesama: “. . . mebasisama na dibundu.”e

Sadisa Bau na “Kukwenda na Ntwala”

18. Sambu na inki beto lenda kundima nde Bakristu yina mekatuka kubaka mbotika mpi bankaka fwete kuvanda kaka na bima mingi ya kulonguka na yina metala luzolo ya Yehowa?

¹⁸ Bansadi ya kuluta mingi ya Yehowa tabikala na kati ya kibuka. Kansi, kyese mingi dyaka, konso muntu na kati na beto mekuka na kukanga kinduku ya ngolo ti Tata na beto ya mazulu sambu beto tavanda kaka ya kukuka na kulonguka mambu mingi yina metala yandi ti luzolo na yandi. (Longi 3:11; Yakobo 4:8) Mafunda ya kubotamaka na Pantekoti ya mvu 33 ya T.B. vandaka nkatu ntembe na bima mingi ya kulonguka. (Bisalu 2:5, 37-41; 4:4) Mutindu mosi ti bantu ya makanda, yina vandaka kuzaba ntete Masonuku ve. Mu mbandu, yau vandaka mutindu yina na bantu yina kubotamaka na nima ya disolo ya Polo na Areopage na Atene. (Bisalu 17:​33, 34) Bubu yai mpi, bantu ya mekatuka kubaka mbotika kele na mambu mingi ya kulonguka mpi kele na mfunu ya ntangu ti ya lusadisu sambu na kusyamisa lukanu na bau ya kusikila na kusala mambu yina kele ya lunungu na ntwala ya Nzambi.​—Galatia 6:9; 2 Tesalonika 3:13.

19. Inki mutindu bayina kebakaka mbotika lenda kusadisama na “kukwenda na ntwala”?

¹⁹ Konso mvula, mafunda ya bantu kebakaka mbotika mpi kele na mfunu ya lusadisu na mpila nde bau lenda “kukwenda na ntwala.” (Baebreo 6:​1-3) Na kutubaka, na kupesaka mbandu, mpi na kupesaka lusadisu na kisalu ya kusamuna, nge lenda vanda ya kukuka na kusadisa bankaka na kulwata kimuntu ya mpa mpi kufula na “kulandaka kieleka.” (3 Yoane 4; Kolosai 3:​9, 10) Kana nge kele nsamuni ya ngikana, bankuluntu lenda kubinga nge na kusadisa nkwikidi ya mpa na kisalu ya kusamuna to na kusolula mwa masolo ya Masonuku ti yandi na ndambu ya bamposo, na mpila nde nge lenda kusyamisa lukwikilu na yandi na Nzambi, kundima na yandi ya balukutakanu ya Bukristu, mpi buna na buna. Kinduku na kati ya bangungudi ti kibuka kele bonso yina ya tata na ndongisila mpi bonso yina ya mama na ntima ya mbote. (1 Tesalonika 2:​7, 8, 11) Kansi, ndambu ya bankuluntu mpi bansadi ya kisalu ya dibundu lenda ve kutala makambu yonso ya mfunu na kati ya dibundu. Beto yonso kele bonso dibuta yina bamambere kesadisanaka bamosi ti bankaka. Konso muntu na kati na beto lenda kusala kima mosi sambu na kusadisa bankundi na beto bansambidi. Nge mosi kibeni lenda kuvanda ya kufwana na kupesa nsyamisa, ndembikilu na bayina kele na ntantu, mpi nsadisa na bayina kele na ngolo ve.​—1 Tesalonika 5:14, 15.

20. Inki nge lenda kusala na kuyalumuna nzayilu ya Nzambi mpi kupesa dikebi ya mingi na mameme ya Yehowa?

²⁰ Bantu kele na mfunu ya nzayilu ya Nzambi, ebuna mutindu nge kele Mbangi ya Yehowa, nge lenda kubaka kabu ya kyese na kuyalumunaka yau. Mameme ya Yehowa kele na mfunu ya dikebi ya mingi, ye nge lenda kusala kisalu ya zola na kusadisaka bau na kuzwa yau. Bika nde Yehowa kusakumuna kisalu na nge, mpi bika nde yandi kusadisa nge sambu na ngolo ya ntima ya mbote ya nge kesalaka na kusadisa mameme na yandi.

[Banoti na nsi ya lutiti]

Inki Mvutu Nge Tapesa?

◻ Inki mutindu Yehowa ketadilaka mameme na yandi.

◻ Inki lenda kusalama kana muntu ya mpa kezola kusamuna?

◻ Inki mutindu bankwikidi ya nkaka lenda kusadisa muntu ya mpa yina kele na mfunu ya lusadisu ya nkaka?

◻ Inki lusadisu bankuluntu kepesaka na bayina kesalaka masumu kansi kebalulaka ntima?

◻ Inki mutindu nge lenda kusadisa muntu yina mekatuka kubaka mbotika na “kukwenda na ntwala”?

[Kifwanisu ya kele na lutiti 10]

Charles T. Russell vandaka kuzabana mbotembote bonso ngungudi ya zola ya kibuka

[Kifwanisu ya kele na lutiti 12]

Bangungudi ya nkenda ketadilaka kibuka ya Nzambi ti ntima ya mbote