Sadisa Bantu Yina Mevilaka na Kibuka
“Beno kwisa kusepela ti mono, sambu mono me mona dimeme na mono yina vilaka.”—LUKA 15:6.
1. Inki mutindu Yezu kumonisaka nde yandi kele ngungudi ya zola?
BIBLIA kebingaka Yezu Kristu, Mwana mosi kaka ya kubutukaka ya Yehowa, nde “ngungudi ya nene yina ke kebaka mameme.” (Baeb. 13:20) Masonuku kutubilaka na ntwala kukwisa na yandi, mpi kumonisaka nde yandi vandaka Ngungudi mosi ya sipesiali yina sosaka kuzwa “mameme [ya Izraele] yina me vilaka.” (Mat. 2:1-6; 15:24) Dyaka, mutindu ngungudi lenda pesa luzingu na yandi sambu na kutanina mameme, Yezu kufwaka bonso kimenga ya nkudulu sambu na bantu ya mefwanana ti mameme yina zolaka kundima kimenga na yandi.—Yoa. 10:11, 15; 1 Yoa. 2:1, 2.
2. Ziku nki mesalaka nde Bakristu yankaka kusala dyaka ve bisalu ya Bukristu?
2 Kansi yo kele mawa na kumona nde bantu yankaka yina vandaka ntete kusepela ti kimenga ya Yezu mpi kudipesaka na Nzambi kevukanaka dyaka ve ti dibundu ya Bukristu. Ziku kulemba nitu, maladi, to mambu yankaka melembisaka kikesa na bo mpi mesalaka nde bo sala dyaka ve bisalu ya Bukristu. Kansi, sambu bo baka ngemba ti kyese yina Davidi kutubilaka na Nkunga ya 23, bo fwete vanda na kati ya kibuka ya Nzambi. Mu mbandu, yandi yimbaka nde: “Mfumu Nzambi, nge kele ngungudi na mono, mono lenda konda kima ve.” (Nk. 23:1) Bantu yina kele na kibuka ya Nzambi kekondaka ve ata kima mosi na kimpeve, kansi yo kele ve mutindu mosi sambu na bantu yina mevilaka. Nani lenda sadisa bo? Inki mutindu beto lenda sadisa bo? Inki beto lenda sala sambu na kusadisa bo na kuvutuka na kibuka?
Nani Lenda Sadisa?
3. Inki mutindu Yezu kumonisaka mambu yina fwete salama sambu na kugulusa dimeme ya Nzambi yina mevilaka?
3 Yo kelombaka bikesa ya masonga sambu na kugulusa dimeme ya Nzambi yina mevilaka. (Nk. 100:3) Yezu kumonisaka dyambu yai ntangu yandi tubaka nde: “Kana muntu ke na mameme nkama, ebuna dimeme mosi me vila, yandi ta sala nki? Keti yandi ta bikisa ve mameme ya nkaka yina makumi uvwa na uvwa sambu na kwenda kusosa dimeme yina me vila? Mono ke tubila beno mambu ya kieleka: Kana yandi mona yo, yandi ta mona kiese mingi sambu na yo. Kiese na yandi ta luta kiese yina ya yandi ke monaka sambu na mameme makumi uvwa na uvwa yina vilaka ve. Mutindu mosi, Tata na beno yina kele na zulu ke zolaka ve nde ata leki mosi na kati ya baleki yai kuvila.” (Mat. 18:12-14) Nani lenda sadisa bantu yina mefwanana ti mameme mpi ya mevilaka na kibuka?
4, 5. Bankuluntu fwete vanda ti nki nkadilu na yina metala mameme ya Nzambi?
4 Kana bankuluntu kezola kusadisa dimeme yina mevilaka, bo fwete vila ve nde kibuka ya Nzambi kele dibundu ya mesalama na bantu yina mekudipesaka na Yehowa, disongidila, ‘mameme ya mfunu ya Nzambi kekebaka.’ (Nk. 79:13) Mameme yai ya zola kele ti mfunu ya dikebi ya zola, mpi yo ketendula nde bangungudi ya zola fwete tudila bo dikebi ya masonga. Kusala baviziti ya kingungudi ya zola lenda sadisa bo mpenza. Bandongisila ya zola yina ngungudi kepesa bo lenda tunga bo na kimpeve mpi kuyedisa mpusa na bo ya kuvutuka na kibuka.—1 Kor. 8:1.
5 Bangungudi ya kibuka ya Nzambi kele ti mukumba ya kusosa mameme yina mevilaka mpi ya kumeka na kusadisa bo. Ntumwa Polo kuyibusaka bankuluntu ya Efezo ya ntama mikumba na bo ya kingungudi ntangu yandi tubaka nde: “Beno keba beno mosi, beno keba mbote-mbote mameme yina ya mpeve ya Nzambi me pesaka beno na kutala. Beno keba mbote-mbote dibundu yina ya Nzambi bakaka na menga ya mwana na yandi mpenza.” (Bis. 20:28) Mutindu mosi, ntumwa Piere kusyamisaka bambuta bantu ya kupakulama nde: “Beno fweti yilama na kutala mbote-mbote bantu yina ya Nzambi pesaka beno na kutala; beno fweti vanda bonso bangungudi ke kebaka mbote mameme na bo. Beno tala bantu na beno na luzolo na beno mosi, mutindu Nzambi ke zolaka nde beno sala, kansi na kingolo-ngolo ve. Beno sala kisalu na beno ve sambu na kubaka mbongo, kansi beno sala yo na luzolo ti kiese. Beno vanda ve na mabanza ya kuyala bantu yina ya Nzambi pesaka beno na kutala, kansi beno fweti vanda bantu yina ke songaka mbandu ya mbote na kati ya bantu na beno.”—1 Pie. 5:1-3.
6. Sambu na nki mameme ya Nzambi kele mpenza na mfunu ya dikebi ya bangungudi bubu yai?
6 Bangungudi ya Bakristu fwete landa mbandu ya Yezu, “ngungudi ya mbote.” (Yoa. 10:11) Yandi vandaka kudibanza mingi sambu na mameme ya Nzambi mpi yandi monisaka mfunu ya kukeba bo ntangu yandi songaka Simoni Piere na ‘kukeba mameme na yandi.’ (Tanga Yoane 21:15-17.) Bubu yai mameme kele mpenza na mpusa ya ngolo ya dikebi yina, sambu Dyabulu mekumaka kusala bikesa mingi sambu na kufwa kwikama ya bantu yina mekudipesaka na Nzambi. Satana kesadilaka bifu ya kinsuni mpi nsi-ntoto sambu na kunata mameme ya Yehowa na kusala masumu. (1 Yoa. 2:15-17; 5:19) Mingimingi, bantu yina kesalaka dyaka ve bisalu ya Bukristu kele ya kulemba mpi ya kukonda lutaninu mpi yo yina bo kele na mfunu ya lusadisu sambu na kusadila ndongisila ya ‘kutambula na mpeve.’ (Gal. 5:16-21, 25, NW) Sambu na kusadisa mameme ya mutindu yai beto fwete lomba lutwadisu ya Nzambi mpi mpeve na yandi, mpi kusadila Ndinga na yandi mbote-mbote.—Bing. 3:5, 6; Luka 11:13; Baeb. 4:12.
7. Sambu na nki yo kele mfunu nde bankuluntu kugungula bantu ya mefwanana ti mameme yina kele na nsi ya lutwadisu na bo?
7 Na Izraele ya ntama, ngungudi vandaka kusadila nti ya nda ya kele bonso muhangu sambu na kutwadisa mameme. Ntangu mameme vandaka kukota to kubasika na lupangu, bo vandaka kuluta na nsi ya nti ya ngungudi mpi na mutindu yina yandi lendaka kutanga bo. (Levi 27:32; Mis. 2:12; 7:14) Mutindu mosi, ngungudi ya Mukristu fwete zaba mbote-mbote mameme ya Nzambi mpi kuzaba mavimpi ya kimpeve ya konso dimeme. (Fwanisa ti Bingana 27:23.) Yo yina, kugungula kele na kati ya mambu ya mfunu yina kimvuka ya bankuluntu ketadilaka. Yo ketadila kubaka bangidika sambu na kusadisa mameme yina mevilaka. Yehowa yandi mosi kutubaka nde yandi zolaka kusosa mameme na yandi mpi kupesa bo dikebi ya bo vandaka na yo mfunu. (Ezek. 34:11) Yo yina, Nzambi kesepelaka ntangu bankuluntu mpi kesalaka bikesa sambu na kusadisa mameme yina mevilaka na kuvutuka na kibuka.
8. Na nki mitindu bankuluntu lenda tudila mameme dikebi ya masonga?
8 Kana mpangi-Mukristu mosi kebela, viziti ya ngungudi ya kibuka ya Nzambi lenda pesa yandi kyese ti kikesa. Yo lenda vanda mutindu yina kana bo tula dikebi ya masonga na dimeme mosi ya kebela na kimpeve. Bankuluntu lenda tanga masonuku, kutadila disolo mosi, kutubila mambu ya bo tubilaka na lukutakanu, kusamba kumosi ti dimeme yango, mpi buna na buna. Bo lenda tendudila yandi nde bampangi ya dibundu tasepela na kumona yandi dyaka na balukutakanu ya dibundu. (2 Kor. 1:3-7; Yak. 5:13-15) Kukwenda kutala yandi, kubinga yandi na telefone, to kusonikila yandi mukanda lenda sadisa yandi mpenza! Kusadisa dimeme mosi ya mevilaka na kibuka lenda matisa mpi kyese ya ngungudi yina ya Mukristu.
Kikesa ya Kimvuka
9, 10. Sambu na nki nge tatuba nde bankuluntu mpamba ve bantu fwete kudibanza sambu na mameme yina mevilaka?
9 Beto kezinga na bantangu ya mpasi mpi ya bantu kele ti mambu mingi ya kusala, yo yina ziku beto lenda mona ve nde mpangi-Mukristu mosi ke na kuyambula kuvukana ti dibundu. (Baeb. 2:1) Kansi, mameme ya Yehowa kele mfunu na meso na yandi. Konso dimeme kele mfunu, kaka mutindu konso kitini ya nitu kevandaka mfunu. Yo yina, beto yonso fwete tudila mpenza bampangi na beto dikebi mpi kuyindula mpenza bampangi yankaka. (1 Kor. 12:25) Keti nge kevandaka ti kikalulu yai?
10 Ata bankuluntu kebakaka kisika ya ntete na kusosa mpi kusadisa mameme yina mevilaka, bankengi ya Bakristu mpamba ve bantu fwete kudibanza sambu na bampangi-Bakristu yina. Bampangi yankaka lenda sala kumosi ti bangungudi yai. Beto lenda mpi fwete syamisa ti kusadisa na kimpeve bampangi na beto yina kele ti mfunu ya lusadisu sambu na kuvutuka na kibuka. Inki mutindu beto lenda pesa lusadisu yina?
11, 12. Inki mutindu bo lenda pesa nge dibaku ya kusadisa mpangi mosi ya kele ti mfunu ya lusadisu ya kimpeve?
11 Na bambandu yankaka, bankuluntu lenda baka bangidika sambu bansamuni ya Kimfumu ya kuyela kulonguka Biblia ti bantu ya kesalaka dyaka ve bisalu ya Bukristu yina memonisa mpusa ya kubaka lusadisu. Lukanu na beto kele ya kusadisa bantu yina na kuyedisa dyaka ‘zola yina bo vandaka na yo ntete.’ (Kus. 2:1, 4) Beto lenda tunga bampangi-Bakristu yai mpi kupesa bo kikesa na kimpeve kana beto tadila kumosi ti bo malongi yina bo kondaka ntangu bo vandaka kukwisa ve na dibundu.
12 Kana bankuluntu kulomba nge na kulonguka ti mpangi mosi ya kele ti mfunu ya lusadisu ya kimpeve, samba sambu Yehowa kutwadisa mpi kusakumuna bikesa na nge. “Songa Mfumu Nzambi bangindu na nge, mpidina yo ta bonga.” (Bing. 16:3) Yindulula baverse ya Biblia mpi bangindu ya kekumisaka lukwikilu ngolo yina nge lenda sadila ntangu nge talonguka ti bantu yina kele na mfunu ya lusadisu ya kimpeve. Yindulula mpi mbandu ya mbote ya ntumwa Polo. (Tanga Roma 1:11, 12.) Polo vandaka na mpusa ya kumona Bakristu ya Roma sambu na kupesa bo lusadisu ya kimpeve sambu na kukumisa lukwikilu na bo ngolo. Yandi vandaka kuvingila mpi nde bo pesana kikesa. Keti beto fwete vanda mpi ve ti nkadilu yai ntangu beto kesosa kusadisa mameme yina mevilaka na kibuka ya Nzambi?
13. Inki beno lenda tubila ntangu beno kelonguka ti mpangi yina kesalaka dyaka ve bisalu ya Bukristu?
13 Na ntangu beno kelonguka, nge lenda yula yandi nde, “Inki mutindu nge zabaka kyeleka?” Syamisa yandi na kutubila kyese yina yandi vandaka kubaka na balukutakanu, na kisalu ya kusamuna, mpi na balukutakanu ya distrike. Beno tubila bantangu ya kyese yina beno vandaka kulutisa mbala yankaka ti yandi na kisalu ya Yehowa. Zabisa yandi kyese yina nge kebakaka na mutindu nge kekwendaka penepene ya Yehowa. (Yak. 4:8) Monisa ntonda na nge na Nzambi sambu na mutindu yandi kelungisaka bampusa na beto bantu na yandi, mingimingi na kupesaka beto kikesa mpi kivuvu na bampasi na beto.—Roma 15:4; 2 Kor. 1:3, 4.
14, 15. Yo lenda vanda mbote na kuyibusa bantu yina kesalaka dyaka ve bisalu ya Bukristu nki balusakumunu ya bo vandaka kubaka ntete?
14 Mbala mingi, yo tavanda mbote na kuyibusa mpangi yina kesalaka dyaka ve bisalu ya Bukristu mwa balusakumunu yina yandi vandaka kubaka ntangu yandi vandaka kuvukana ti dibundu. Mu mbandu, yandi vandaka kubaka lusakumunu ya kukuma ti nzayilu mingi ya Ndinga mpi balukanu ya Nzambi. (Bing. 4:18) Ntangu yandi vandaka ‘kutambula na mpeve,’ (NW) ntembe kele ve nde yo vandaka pete sambu na yandi na kunwana ti bampukumuna ya kusala masumu. (Gal. 5:22-26) Dyaka, kansansa ya bunkete vandaka kusadisa yandi na kukwenda penepene ya Yehowa na kisambu mpi kuvanda na ‘ngemba ya Nzambi yina meluta mambu yonso ya bantu keyindulaka mpi ya kekebaka ntima ti mabanza na beto.’ (Filp. 4:6, 7) Bumba bangindu yai na mabanza, monisa dikebi ya masonga, mpi kuluta yonso syamisa na zola yonso mpangi na nge na kuvutuka na kibuka.—Tanga Filipi 2:4.
15 Yindula nde nge kele nkuluntu yina kesala viziti ya kingungudi. Nge lenda syamisa bankwelani yina kesalaka dyaka ve bisalu ya Bukristu na kuyindulula ntangu yina bo yantikaka kulonguka kyeleka ya Ndinga ya Nzambi. Kyeleka yango vandaka mbote mpenza, yo vandaka kupesa kyese mpi kukatula bo na kimpika na kimpeve! (Yoa. 8:32) Ntima na bo kufulukaka na ntonda sambu na mambu ya bo longukaka na yina metala Yehowa, zola na yandi, mpi balukanu na yandi ya kitoko! (Fwanisa ti Luka 24:32.) Yibusa bo dibaku ya mbote ya kisambu mpi bangwisana ya ngolo yina Bakristu ya mekudipesaka kevandaka na yo ti Yehowa. Syamisa na masonga yonso bantu yina kesalaka dyaka ve bisalu ya Bukristu na kundima dyaka “nsangu ya mbote” ya Yehowa, ‘Nzambi ya lukumu ti ya kiese.’—1 Tim. 1:11.
Landa na Kumonisila Bo Zola
16. Pesa mbandu mosi sambu na kumonisa nde bikesa sambu na kupesa lusadisu ya kimpeve kebutaka mpenza bambuma.
16 Keti bangindu ya beto metubila kesadisaka mpenza? Ee. Mu mbandu, leke mosi yina kukumaka nsamuni ya Kimfumu ntangu yandi vandaka ti bamvula 12 kuyambulaka kusamuna ntangu yandi kumaka ti bamvula 15. Kansi, na nima yandi vutukilaka kusamuna mpi yandi kesalaka kisalu ya ntangu yonso banda bamvula kuluta 30. Kima kusadisaka yandi na kukuma dyaka ngolo na kimpeve vandaka mingimingi lusadisu yina nkuluntu mosi kupesaka yandi. Yandi monisaka mpenza ntonda sambu na lusadisu yina ya kimpeve!
17, 18. Inki bikalulu tasadisa nge na kusadisa muntu yina mevilaka na kibuka ya Nzambi?
17 Kima kepusaka Bakristu na kusadisa bantu yina kesalaka dyaka ve bisalu ya Bukristu na kuvutuka na dibundu kele zola. Yezu kutubaka mutindu yai sambu na balongoki na yandi: “Nsiku mosi ya mpa ya mono ke pesa beno yo yai: Beno zolana beno na beno. Mutindu mono ke zolaka beno, beno mpi beno zolana beno na beno. Kana beno ke zolana beno na beno, bantu yonso ta zaba nde beno kele balonguki na mono.” (Yoa. 13:34, 35) Ya kyeleka, zola kele kidimbu mosi ya kesadisaka na kuzaba Bakristu ya kyeleka. Keti beto lenda monisa ve zola yina na Bakristu ya mebakaka mbotika ya kesalaka dyaka ve bisalu ya Bukristu? Beto fwete monisa yo mpenza! Kansi kupesa lusadisu yina kele mfunu lenda lomba kumonisa bikalulu mingi ya Bukristu.
18 Sambu na kukuka kusadisa muntu yina mevilaka na kibuka ya Nzambi, inki bikalulu nge fwete monisa? Katula zola, nge lenda vanda na mfunu ya kumonisa mawa, ntima-mbote, kikalulu ya pima, mpi kukanga ntima. Na kutadila luzingu ya muntu yango, nge lenda vanda mpi ti mfunu ya kulolula. Polo kusonikaka nde: “Beno fweti wila bantu mawa mingi, beno fweti vanda bantu ya mbote, beno lenda kudisonga ve, beno fweti vanda pima, beno fweti kanga ntima. Kana muntu mosi na kati na beno ke na mambu na muntu ya nkaka, mbote yandi kukanga ntima, yandi kulolula yandi. Beno fweti lolula bantu ya nkaka na kati na beno mutindu [Yehowa, NW] mpi me lolulaka beno. Na mambu yai yonso beno yika diaka kuzolana yina ta vukisa beno na kimvuka mosi ya kieleka mpenza.”—Kol. 3:12-14.
19. Sambu na nki yo kele mfunu na kusala kikesa na kusadisa bantu ya mefwanana ti mameme na kuvutuka na dibundu ya Bukristu?
19 Na disolo ya kulonguka ya kelanda beto tatadila sambu na nki bantu yankaka mevilaka na kibuka ya Nzambi. Yo tamonisa mpi mutindu bampangi lenda yamba bantu yina kevutuka na dibundu. Ntangu nge talonguka disolo yina mpi kuyindulula disolo yai, tula ntima nde bikesa yonso ya nge kesala ti kivuvu ya kusadisa bantu ya mefwanana ti mameme na kuvutuka na dibundu ya Bukristu kele mfunu. Na ngidika ya bima ya ntangu yai, bantu mingi kelutisaka luzingu ya mvimba na kusosa kuzwa bimvwama, kansi luzingu mosi mpamba kele mfunu mingi kuluta mbongo yonso ya kele na nsi-ntoto. Yezu kumonisaka dyambu yai na kingana ya dimeme yina kuvilaka. (Mat. 18:12-14) Bika nde nge yibuka ntangu yonso dyambu yai ntangu nge kesala bikesa ya masonga mpi ya ngolo sambu na kusadisa bantu ya Yehowa ya mefwanana ti mameme mpi ya yandi kezolaka yina mevilaka na kuvutuka na kibuka na yandi ya mameme.
Inki Mvutu Nge Tapesa?
• Inki mukumba bangungudi ya Bakristu kele na yo na yina metala bantu yina mevilaka na kibuka ya mefwanana ti mameme?
• Inki mutindu nge lenda kuka kusadisa bantu yina kevukana ve ntangu yai ti dibundu?
• Inki bikalulu lenda sadisa nge na kusadisa bantu yina mevilaka na kibuka?
[Kifwanisu ya kele na lutiti 17]
Bankuluntu kesalaka kikesa na zola yonso sambu na kusadisa bantu yina mevilaka na kibuka ya Nzambi