Beno Sadisa Bo na Kuvutuka Kukonda Kusukinina!

“Na nani beto ta kwenda? Mambu ya nge ke tubaka yo ke pesaka moyo ya mvula na mvula.”​—YOA. 6:68.

1. Inki Piere kutubaka ntangu balongoki mingi kuyambulaka Yezu?

KILUMBU mosi balongoki mingi ya Yezu Kristu yina buyaka dilongi mosi ya yandi longaka kuyambulaka yandi. Yandi yulaka bantumwa na yandi nde: “Beno mpi, keti beno ke zola kwenda?” Piere vutulaka nde: “Mfumu, na nani beto ta kwenda? Mambu ya nge ke tubaka yo ke pesaka moyo ya mvula na mvula.” (Yoa. 6:51-69) Kisika yankaka ya kukwenda kuvandaka ve. Na ntangu yina dibundu ya Bayuda kuvandaka ve ti mambu ya kepesaka “moyo ya mvula na mvula,” mpi bubu yai beto lenda kuta ve ata fyoti mambu ya mutindu yai na Babylone ya Nene, kintinu ya nsi-ntoto ya mvimba ya mabundu ya luvunu. Sambu na konso muntu yina meyambulaka kibuka ya mameme ya Nzambi kansi ya kezola kusepedisa Yehowa, yai kele ntangu ya ‘kutelama’ mpi kuvutuka na kibuka.​—Roma 13:11.

2. Inki beto fwete vila ve na yina metala mambu ya kinsweki to ya kelomba kusambisa?

² Yehowa kumonisaka dikebi sambu na mameme ya Izraele yina kuvilaka. (Tanga Ezekiele 34:15, 16.) Mutindu mosi, bankuluntu kele ti mpusa mpi mukumba ya kusadisa bantu ya mefwanana ti mameme yina meyambulaka kibuka. Kana bo mepona nsamuni mosi sambu na kulonguka ti muntu yina kesalaka dyaka ve bisalu ya Bukristu ya kele na mpusa ya lusadisu, inki nsamuni fwete sala kana muntu yango mezabisa yandi nde yandi salaka disumu mosi ya nene? Na kisika ya kupesa bandongisila na dyambu ya kelomba kusambisa to dyambu ya kinsweki, nsamuni fwete zabisa yandi na kusolula ti bankuluntu. Kana yandi sala yo ve, nsamuni yandi mosi fwete zabisa bankuluntu.​—Levi 5:1; Gal. 6:1.

3. Muntu yina vandaka ti mameme 100 kusalaka nki ntangu yandi monaka dimeme yina kuvilaka?

³ Na disolo yina meluta, beto tubilaka kingana ya Yezu ya muntu yina kuvandaka ti mameme 100. Ntangu dimeme mosi kuvilaka na kibuka, yandi yambulaka mameme 99 mpi kwendaka kusosa dimeme yina kuvilaka. Yandi waka kyese mingi ntangu yandi monaka yo! (Luka 15:4-7) Beto kevandaka na kyese ya mutindu mosi ntangu dimeme mosi ya Nzambi yina kuyambulaka kibuka mevutuka. Sambu na zola na bo, mbala yankaka bankuluntu mpi bampangi yankaka ya dibundu kwendaka kutala muntu yina. Bo mpi kezolaka nde muntu yina kuvutuka na kibuka mpi kubaka lusadisu, lutaninu mpi lusakumunu ya Nzambi. (Kul. 33:27; Nk. 91:14; Bing. 10:22) Kana bo kele ti dibaku ya kusadisa muntu na kuvutuka na dibundu, inki bo lenda sala?

4. Inki beto lenda bakisa na Galatia 6:2, 5?

⁴ Ziku bo lenda syamisa muntu mosi na kuvutuka na dibundu na kumonisaka yandi na zola yonso nde Yehowa kezolaka mameme na yandi mpi kelombaka beto kaka mambu yina beto lenda sala. Yo ketadila kulonguka Masonuku, kukwenda na balukutakanu ya Bukristu, mpi kusamuna nsangu ya mbote ya Kimfumu. Yo lenda vanda mbote na kutanga Galatia 6:2, 5 (NW) mpi kutendula nde Bakristu lenda sadisana na kunata kizitu, kansi “konso muntu tanata kilo na yandi mosi” ya mikumba na yandi ya kimpeve. Ata muntu mosi ve lenda vanda ya kwikama na Nzambi sambu na beto.

Keti “Bampasi ya Luzingu” Kima Kulembisaka Bo?

5, 6. (a) Sambu na nki yo kele mfunu na kuwidikila na dikebi yonso ntangu bampangi-Bakristu yina kesalaka dyaka ve bisalu ya Bukristu kemonisa mawi na bo? (b) Inki mutindu nge lenda sadisa bantu ya kesalaka dyaka ve bisalu ya Bukristu na kubakisa nde kukonda kuvukana ti bantu ya Nzambi mesadisaka bo ve?

⁵ Sambu na kuzaba mutindu ya kusadisa bampangi-Bakristu yina meyambulaka kusala bisalu ya Bukristu, bankuluntu ti bansamuni yankaka ya kuyela fwete widikila na dikebi yonso ntangu bampangi yai kemonisa mawi na bo. Yindula nde nge kele nkuluntu yina mekwenda kutala bankwelani yina kekwisaka dyaka ve na dibundu sambu “bampasi ya luzingu” melembisaka bo. (Luka 21:34) Ziku mambu ya mbongo to mikumba mingi ya dibuta kupusaka bo malembe-malembe na kuyambula kusala bisalu ya Bukristu. Bo lenda vanda na mfunu ya lusadisu, kansi nge lenda tendudila bo nde kudivandila tasadisa bo ve. (Tanga Bingana 18:1, NW) Nge lenda yula bo na mayele yonso nde: “Keti beno kele na kyese mingi banda beno meyambulaka kukwenda na balukutakanu? Keti luzingu na beno ya dibuta mekumaka mbote mingi? Keti kyese ya Yehowa kekumisaka beno kaka ngolo?”​—Neh. 8:10.

⁶ Kuyindulula bangyufula yai lenda sadisa bantu ya kesalaka dyaka ve bisalu ya Bukristu na kumona nde, sambu bo kevukanaka dyaka ve ti dibundu, kimpeve na bo kele dyaka ve mbote mpi kyese na bo mekulumukaka. (Mat. 5:3; Baeb. 10:24, 25) Beto lenda sadisa bo na kubakisa nde kukonda kusamuna nsangu ya mbote mesalaka nde bo vidisa kyese. (Mat. 28:19, 20) Kana mpidina, yo kele mayele nde bantu yina kusala inki?

7. Beto lenda syamisa bantu yina meyambulaka kibuka na kusala inki?

⁷ Yezu kutubaka nde: “Beno keba! Beno lenda yindula ve na kusala bafete konso ntangu to na kulauka malafu, beno lenda yindula bampasi ya luzingu yai ve . . . Beno lala mpongi ve, beno samba Nzambi ntangu yonso, mpidina beno ta baka ngolo ya kutina mambu yonso yina ta bwa.” (Luka 21:34-36) Beno lenda syamisa bantu yina meyambulaka kibuka kansi ya kezola kumona kyese ya bo vandaka na yo ntete na kusamba sambu na kulomba mpeve santu mpi lusadisu ya Nzambi mpi na kusala na kuwakana ti bisambu na bo.​—Luka 11:13.

Keti Bo Bulaka Dibaku?

8, 9. Inki mutindu nkuluntu mosi lenda yindula ti muntu yina mebulaka dibaku?

⁸ Sambu bantu kele ya kukonda kukuka, matata lenda basika na kati na bo, mpi yo lenda budisa bankaka dibaku. Bankaka kubulaka dibaku ntangu mpangi mosi ya dibundu ya bo kezitisaka kufwaka minsiku ya Biblia. Kana muntu ya kesalaka dyaka ve bisalu ya Bukristu kulembaka na mutindu yai, nkuluntu yina mekwenda kutala yandi lenda tendula nde Yehowa kebudisaka ve ata muntu mosi dibaku. Yo yina sambu na nki muntu fwete fwa bangwisana na yandi ti Nzambi mpi bantu na yandi? Na kisika ya kusala mpidina, keti muntu yina fwete landa ve kusadila Nzambi, mpi kutula ntima nde Muntu yina “ke sambisaka bantu yonso ya nsi-ntoto” mezaba mambu yina kusalamaka mpi tayidika mambu na mutindu ya mbote? (Kuy. 18:25; Kol. 3:23-25) Kana muntu mosi mebula dibaku mpi mebwa, yandi tabikala ve na ntoto na luzolo yonso kukonda kumeka kutelama.

⁹ Kana yandi kezola kusadisa bo na kimpeve, nkuluntu lenda tuba nde na nima ya bamvula mingi bantu yankaka memonaka nde dyambu yina kubudisaka bo dibaku kele dyaka ve mfunu mingi. Ya kyeleka, dyambu yina kupusaka bo na kuyambula kusadila Yehowa lenda vanda dyaka ve. Kana muntu mosi kubulaka dibaku sambu bo pesaka yandi disipline, kuyindulula na kisambu lenda sadisa yandi na kubakisa nde na kiteso mosi buna yo fwanaka nde bo pesa yandi disipline yina mpi yo lombaka ve nde yandi bika nde disipline yina kubudisa yandi dibaku.​—Nk. 119:165; Baeb. 12:5-13.

Keti Dilongi Mosi Kulembisaka Bo?

10, 11. Inki bangindu muntu lenda sadila ntangu yandi kesosa kusadisa muntu yina vandaka kubakisa malongi yankaka ya Biblia na mutindu yankaka?

¹⁰ Bankaka meyambulaka kibuka ya Nzambi sambu bo ndimaka ve malongi yankaka ya Masonuku. Bantu ya Izraele yina kukatukaka na kimpika na Ezipte “vilaka mambu ya Nzambi salaka” sambu na bo, “bo vingilaka mpi ve nde yandi lungisa mambu ya yandi kanaka.” (Nk. 106:13) Yo lenda vanda mfunu na kuyibusa muntu yina kesalaka dyaka ve bisalu ya Bukristu nde “mpika ya kwikama mpi ya mayele” kepesaka madya ya mbote ya kimpeve. (Mat. 24:​45, NW) Yai mutindu yandi longukaka kyeleka. Yo yina sambu na nki yandi fwete baka ve lukanu ya kutambula dyaka na kyeleka?​—2 Yoa. 4.

¹¹ Ntangu yandi kesosa kusadisa muntu yina meyambulaka kibuka ya Nzambi, nkuluntu yango lenda tubila balongoki yina kuyambulaka Yezu sambu bo buyaka dilongi mosi ya yandi longaka. (Yoa. 6:53, 66) Sambu bo buyaka kuvukana ti Kristu mpi balongoki na yandi ya kwikama, bo vidisaka kimpeve mpi kyese na bo. Keti bantu yina meyambulaka kuvukana ti dibundu ya Bukristu mezwaka kisika yankaka yina kele na madya ya mbote ya kimpeve? Ve, sambu kisika yankaka kele ve!

Keti Bo Salaka Masumu ya Nene?

12, 13. Kana muntu mosi ya meyambulaka kibuka mendima nde yandi mesalaka disumu ya nene, nki mutindu nge lenda sadisa yandi?

¹² Bantu yankaka kuyambulaka kusamuna mpi kukwenda na balukutakanu sambu bo salaka masumu ya nene. Bo lenda yindula nde kana bo funguna masumu na bo na bankuluntu, bo tabasisa bo na dibundu. Kansi bo tabasisa bo ve na dibundu kana bo meyambulaka kikalulu yango ya mbi mpi mebalulaka ntima na masonga yonso. (2 Kor. 7:10, 11) Olie ya kubasisa bo na dibundu, bo tayamba bo, mpi bankuluntu tapesa bo lusadisu ya kimpeve yina bo kele na yo mfunu.

¹³ Kana nge kele nsamuni ya kuyela ya bo mepona sambu na kusadisa muntu yina kesalaka dyaka ve bisalu ya Bukristu, inki nge fwete sala kana yandi zabisa nge nde yandi mesalaka disumu mosi ya nene? Mutindu beto tubilaka yo, na kisika ya kusosa kuzaba mambu mingi, zabisa yandi na kusolula ti bankuluntu. Kana yandi kezola ve kusala mutindu yina, nge tamonisa nde nge kekudibanzaka sambu na zina ya Yehowa mpi mambote ya kimpeve ya dibundu na kusalaka na kuwakana ti lutwadisu ya Nzambi ya ketadila mambu ya mutindu yai. (Tanga Levi 5:1.) Bankuluntu tazaba mutindu ya kusadisa konso muntu yina kezola kuvutuka na kibuka mpi kuzinga na kuwakana ti luzolo ya Nzambi. Bo lenda pesa yandi ndola ya zola. (Baeb. 12:7-11) Kana muntu yango kundima nde yandi mesumukaka na Nzambi, meyambulaka kusala disumu yina, mpi mebalulaka mpenza ntima, bankuluntu tasadisa yandi, mpi Yehowa lenda lolula yandi.​—Yez. 1:18; 55:7; Yak. 5:13-16.

Kuvutuka ya Mwana Menata Kyese

14. Ta kingana ya Yezu ya mwana yina kuvilaka na bangogo na nge mosi.

¹⁴ Ntangu yandi kesosa kusadisa dimeme yina mevilaka, muntu yina bo ponaka lenda tubila kingana ya Yezu ya kele na Luka 15:11-24. Na kingana yina, leke mosi kubebisaka kimvwama na yandi na luzingu ya mansoni. Nsukansuka yandi kumaka kuyina luzingu yina. Yandi kumaka na nzala, ti mpusa ya bantu ya dibuta na yandi, mpi kubakaka lukanu ya kuvutuka na nzo! Tata na yandi kumonaka yandi ntangu yandi vandaka ntama, kubakaka ntinu mpi kuyambaka yandi, kupesaka yandi beze, mpi kufulukaka na kyese. Kuyindulula kingana yai lenda pusa muntu yina mevilaka na kuvutuka na kibuka. Sambu ngidika yai ya bima tafwa ntama ve, yandi fwete ‘vutuka na nzo’ kukonda kusukinina.

15. Sambu na nki bantu yankaka keyambulaka dibundu?

¹⁵ Bantu mingi yina meyambulaka dibundu kele mpenza ve bonso mwana yina kuvilaka. Sambu na bankaka, bo yambulaka dibundu malembe-malembe, mutindu bwatu yina bo mekanga ve nsinga kekitaka malembe-malembe mpi kekumaka ntama ti dibungu. Bankaka kekudiyangisaka sambu na bampasi yo yina bo ketulaka ve dikebi na mambu ya kimpeve. Bankaka dyaka kebikaka nde muntu mosi ya dibundu kubudisa bo dibaku, to bo keyambulaka dibundu sambu bo kendima ve dilongi mosi buna ya Masonuku. Bantu fyoti kukumaka kusala masumu. Kansi, bangindu ya beto metubila ya ketadila konso mbandu lenda sadisa nge na kupesa lusadisu na bantu yina meyambulaka kibuka sambu na bikuma yai to yankaka na kuvutuka na ntwala nde yo kuma nsukinina.

“Kuvutuka ya Mbote na Nzo, Mwana!”

16-18. (a) Inki mutindu nkuluntu mosi kusadisaka mpangi mosi yina vandaka kusala dyaka ve bisalu ya Bukristu na nsungi ya bamvula mingi? (b) Sambu na nki mpangi yai kulembaka, nki mutindu bo sadisaka yandi, mpi nki mutindu dibundu kuyambaka yandi?

¹⁶ Nkuluntu mosi ketuba nde: “Kimvuka ya bankuluntu na beto kesalaka mpenza kikesa sambu na kutala bantu yina kesalaka dyaka ve bisalu ya Bukristu. Mu yindulaka mpangi-bakala mosi ya mu longukaka ti yandi mpi ya mu sadisaka na kuzaba kyeleka. Yandi vandaka kusala dyaka ve bisalu ya Bukristu na nsungi ya bamvula 25 mpi yandi kutanaka ti dyambu mosi ya mpasi mingi, yo yina mu tendudilaka yandi mutindu kusadila minsiku ya Biblia lendaka kusadisa yandi. Na nima ya mwa ntangu, yandi yantikaka kukwisa na Nzo ya Kimfumu mpi kundimaka kulonguka Biblia sambu na kukumisa ngolo lukanu na yandi ya kuvutuka na kibuka.”

¹⁷ Sambu na nki yandi yambulaka kusala bisalu ya Bukristu? Yandi kendima nde: “Mu yantikaka kutula dikebi mingi na mambu ya nsi-ntoto kuluta mambu ya kimpeve. Na nima mu yambulaka kulonguka, kusamuna, mpi kukwenda na balukutakanu. Kima yankaka ya mu kezaba kele nde, mu yambulaka kuvukana ti dibundu ya Bukristu. Kansi dikebi ya masonga yina nkuluntu mosi kutudilaka munu kusadisaka munu na kuvutuka.” Bampasi ya mpangi yina yantikaka kumana ntangu yandi ndimaka nde mpangi mosi kulonguka Biblia ti yandi. Yandi ketuba nde, “Mu bakisaka nde kima vandaka kukonda na luzingu na mono kuvandaka zola mpi lutwadisu ya Yehowa ti ya organizasio na yandi.”

¹⁸ Inki mutindu bo yambaka mpangi yai na dibundu? Yandi ketuba nde: “Mu kekudiwa bonso mwana yina kuvilaka ya Yezu Kristu kutubilaka. Nkutu, mpangi-nkento mosi ya mununu yina kuvandaka na dibundu bamvula 30 meluta mpi ya kele kaka ngolo kutubaka na mono nde, ‘Kuvutuka ya mbote na nzo, Mwana!’ Bangogo yai kusimbaka mpenza ntima na munu. Mu vutukaka mpenza na nzo. Mpi mu kezola kumonisa ntonda ya masonga sambu na zola, kukanga ntima, mpi dikebi yina bankuluntu mpi dibundu ya mvimba kumonisilaka munu. Zola na bo sambu na Yehowa mpi nkweno kusadisaka munu na kuvutuka na kibuka.”

Syamisa Bo na Kubaka Lukanu Kukonda Kusukinina!

19, 20. Inki mutindu nge lenda syamisa bantu yina kesalaka dyaka ve bisalu ya Bukristu na kuvutuka na kibuka kukonda kusukinina, mpi nki mutindu nge lenda songa bo nde Nzambi kelombaka beto ve mambu mingi?

¹⁹ Beto kezinga na bilumbu ya nsuka, mpi nsuka ya ngidika ya bima ya ntangu yai mefinama. Yo yina, syamisa bantu yina kesalaka dyaka ve bisalu ya Bukristu na kukwisa na balukutakanu ya Bukristu kukonda kusukinina. Yibusa bo nde Satana kesosa kufwa bangwisana na bo ti Nzambi mpi kupusa bo na kuyindula nde kuyambula lusambu ya kyeleka tasadisa bo na kumanisa bampasi ya luzingu. Nge lenda ndimisa bo nde kima tapesa bo kupema ya kyeleka kele kaka kuvanda balongoki ya kwikama ya Yezu.​—Tanga Matayo 11:28-30.

²⁰ Yibusa bantu ya kesalaka dyaka ve bisalu ya Bukristu nde Nzambi kelombaka beto na kusala yina beto lenda sala. Ntangu balongoki kusepelaka ve mutindu Maria, mpangi ya Lazare, kupakulaka Yezu mananasi ya ntalu mingi ntangu fyoti na ntwala ya lufwa na yandi, Yezu kutubaka nde: “Beno bikisa yandi. . . . Yandi me sala mambu yina ya yandi me mona mpila ya kusala.” (Mar. 14:6-8) Yezu kukumisaka mufwidi ya nsukami yina kutulaka dikabu ya fyoti mpenza na tempelo. Yandi salaka yina yandi lendaka. (Luka 21:1-4) Bamingi na kati na beto lenda kwenda na balukutakanu ya Bukristu mpi kusala kisalu ya kusamuna. Ti lusadisu ya Yehowa, bantu mingi yina kesalaka dyaka ve bisalu ya Bukristu bubu yai takuka mpi kusala yo.

21, 22. Nge lenda ndimisa bantu yina tavutuka na Yehowa nde inki?

²¹ Kana muntu yina mefwanana ti dimeme mpi ya meyambulaka kibuka kewa boma ya kukutana dyaka ti bampangi na yandi, nge lenda yibusa yandi kyese yina bantu kuwaka ntangu mwana yina kuvilaka kuvutukaka na nzo. Bantu yina kevutukaka na dibundu kepesaka bampangi kyese ya mutindu mosi. Syamisa bo na kubaka lukanu ya kuvanda bambeni ya Satana mpi ya kukwenda penepene na Nzambi ntangu yai.​—Yak. 4:7, 8.

²² Bo tayamba bantu yina tavutuka na Yehowa na kyese yonso. (Mawa 3:40) Ntembe kele ve nde bantangu ya kyese yina bo lutisaka na kisalu ya Yehowa tanatila bo kyese mingi. Balusakumunu mingi kevingila bantu yina tavutuka na kibuka kukonda kusukinina!

Inki Mvutu Nge Tapesa?

• Inki mutindu nge lenda sadisa Mukristu yina kubulaka dibaku mpi kesalaka dyaka ve bisalu ya Bukristu?

• Inki bangindu nge lenda sadila sambu na kusadisa muntu yina meyambulaka kibuka sambu yandi ndimaka ve dilongi mosi?

• Inki mutindu beto lenda sadisa muntu yina kewa boma na kuvutuka na dibundu?

[Kifwanisu ya kele na lutiti 23]

Kuyindulula kingana ya Yezu ya mwana yina kuvilaka lenda pusa bankaka na kuvutuka na kibuka