Beto Vila Ve Bampangi Yina Melembaka na Kimpeve

1. Sambu na nki beto fwete sala ngolo sambu na kusyamisa bantu yina melembaka na kimpeve?

¹ Keti nge mezaba mpangi mosi ya melembaka na kimpeve? Ziku yandi kevukanaka dyaka ve ti dibundu mpi mevilaka nzila. Mbala yankaka nge kutanaka ti yandi na ntangu nge vandaka kusamuna nzo na nzo. Beto fwete vila ve nde yandi kele kaka mpangi na beto ya kimpeve. Beto kezola kumonisa yandi nde beto kezolaka yandi kaka mpi kusadisa yandi na kuvutuka na dibundu mpi na ‘Ngungudi yina ke kebaka moyo na beto.’​—⁠1 Pie. 2:⁠25.

2. Inki mutindu beto lenda pesa bo kikesa?

² Monisa Dikebi: Kubinga mwa minuta na telefone to kukwenda kutala yandi lenda monisa mpangi yina melembaka na kimpeve nde beto mevilaka yandi ve. Inki beto lenda tuba? Beto lenda pesa yandi kikesa kana beto zabisa yandi kaka nde beto vandaka kuyindula yandi. Sala nde masolo na beno kuvanda ya mbote mpi ya ketunga. (Filp. 4:⁠8) Beto lenda tubila ngindu mosi ya beto sepelaka na yo na lukutakanu yina mekatuka kuluta. Beto lenda binga yandi mpi na kukwisa na lukutakanu ya dibundu, to na lukutakanu mosi ya nene mpi kuzabisa yandi nde beto tabumbila yandi kisika to kupesa yandi mbongo ya transpore.

3. Inki mutindu bo sadisaka mpangi-nkento mosi na kukuma dyaka ngolo na kimpeve?

³ Nsamuni mosi kukutanaka ti mpangi-nkento mosi ya kulembaka na kimpeve tuka bamvula kuluta 20 na teritware na bo. Ata na luyantiku mpangi-nkento yango kubuyaka na kulonguka Biblia, nsamuni yina kulandaka na kukwenda kutala yandi, mpi yandi vandaka kubikila yandi baperiodike yina vandaka kubasika. Na nima ya lukutakanu ya distrike, nsamuni yina kusolulaka ti mpangi yina kulembaka na kimpeve mwa bangindu ya mfunu ya lukutakanu, mpi nsukansuka, mpangi-nkento yango kukumaka dyaka ngolo na kimpeve.

4. Inki beto fwete sala kana muntu yina vandaka kukwisa dyaka ve na balukutakanu mevutukila kukwisa na balukutakanu?

⁴ Kana Muntu Mevutuka: Kana mpangi mosi ya kulembaka na kimpeve meyantika kukwisa dyaka na balukutakanu, inki beto fwete sala? Ntangu balongoki kuyambulaka Yezu sambu na mwa ntangu fyoti, inki Yezu kusalaka ntangu bo kutanaka dyaka? Yandi bingaka bo “bampangi” na yandi na kyese yonso, mpi yandi monisaka nde yandi vandaka kutudila bo ntima. Yandi pesaka bo nkutu mukumba mosi ya mfunu. (Mat. 28:​10, 18, 19) Ntangu fyoti na nima, bo kudipesaka mingi na kisalu ya kuzabisa nsangu ya mbote kukonda kulemba.​—⁠Bis. 5:⁠42.

5. Tubila bambandu ya ketadila muntu mosi ya melembaka na kimpeve yina beto fwete zabisa bankuluntu.

⁵ Na ntwala ya kulomba muntu yina kulembaka na kimpeve na kulonguka Biblia ti yandi, to na ntwala ya kulomba mpangi yina kulembaka na kimpeve na nsungi ya nda na kukwenda ti beto na kisalu ya kusamuna, beto fwete sosa ntete lutwadisu ya bankuluntu. Kana beto kutana ti muntu yina kulembaka na kimpeve na teritware na beto, beto fwete zabisa bankuluntu na mpila nde bo pesa lusadisu yina kele mfunu.

6. Inki kyese beto lenda wa kana beto sadisa bantu yina melembaka na kimpeve?

⁶ Mutindu Biblia kemonisa yo pwelele, kaka bantu yina tabaka ntinu tii na nsuka bantu taguluka. (Mat. 24:13) Yo yina, tula dikebi na bantu yina mebulaka dibaku to mevilaka nzila. Kana beto monisa zola ya Yehowa na kukanga ntima mpi na kutulaka dikebi ya masonga na bantu ya mutindu yina, beto lenda wa kyese ya kumona bo na ntangu bo kevutukila kusala kisalu na bo ya santu kumosi ti beto.​—⁠Luka 15:​4-10.