Bo Me Sala Lusilu na Yehowa

Kiteso ya bangonda zole na nima ya kubasika na Ezipte, bantu ya Izraele kumaka na Ngumba ya Sinai mpi bo salaka camp pana. Yehowa bingaka Moize, ebuna Moize mataka na ngumba, mpi yandi songaka Moize nde: ‘Mono me gulusa bantu ya Izraele. Kana bo lemfukila mono mpi bo zitisa bansiku na mono, bo ta kuma bantu na mono kibeni.’ Moize kulumukaka mpi songaka bantu ya Izraele mambu yina Yehowa tubaka. Bantu ya Izraele tubaka nki? Bo vutulaka nde: ‘Beto ta sala mambu yonso ya Yehowa me songa beto na kusala.’

Moize tombukaka diaka na ngumba. Kuna, Yehowa tubaka nde: ‘Na nima ya bilumbu tatu, mono ta solula ti beno. Kebisa bantu nde bo meka ve kumata na Ngumba ya Sinai.’ Moize kulumukaka mpi songaka bantu ya Izraele na kuyilama na kuwa mambu yina Yehowa ta tuba.

Bilumbu tatu na nima, bantu ya Izraele monaka nsemo ya nzasi mpi dituti ya ndombe na ngumba. Bo waka mpi makelele ya ngolo ya mvula mpi makelele ya mpungi. Na nima, Yehowa kulumukaka na ngumba na tiya. Bantu ya Izraele waka boma mingi yo yina bo tekitaka. Ngumba ya mvimba nikanaka ngolo mpi yo fulukaka ti midinga. Makelele ya mpungi vandaka kaka kukuma ngolo. Ebuna Nzambi tubaka nde: ‘Mono kele Yehowa. Beno fwete sambila ve ata nzambi mosi ya nkaka.’

Moize kwendaka diaka na ngumba, mpi Yehowa pesaka yandi bansiku sambu na bantu ya Izraele; yo vandaka kutubila mutindu ya kusambila yandi mpi mutindu bo fwete sala mambu. Moize sonikaka bansiku yina mpi na nima yandi tangilaka yo bantu ya Izraele. Bo silaka nde: ‘Beto ta sala mambu yonso ya Yehowa ke songa beto.’ Ee, bo salaka lusilu na Nzambi. Keti bo ta lungisa yo?