Biblia: Mbalu na Yau ya Kyeleka Kele Inki?
“BIBLIA kele diswekamu, mukanda ya kupesamaka ve sambu na kubakisama,” kemonisa mfumu ya dibuta mosi. Mfumu ya dibuta ya nkaka kemonisa nde: “Mono kezaba nde Biblia kele mukanda mosi ya mfunu, kansi mono kuzaba mambu mingi ve na kati na yau. Yau kele mpasi na kubakisa.”
“Bakristu mingi kuzaba . . . mambu fyoti na yina ketala Biblia,” kundimaka zulunalu The Toronto Star. Nkento mosi ya Katolika kutubaka nde: “Kuvanda na Biblia kepesaka mono kyese. Yau kenataka ngemba na kati ya ntima.” “Biblia kele bonso busole yina kesongaka muntu nzila na kati ya mazu, ya kitembo ya nzadi ya luzingu tii na kifulu mosi ya lutaninu,” ketuba mulobi ya bambisi ya masa. Na kati ya bangogo ya muntu mosi kuvandaka ntete na dibundu ya Hindu, “Biblia kele Ndinga ya Nzambi mpi dikabu sambu na bantu mpi kele nkisi sambu na maladi ya kimpeve.”
Bangindu sambu na mbalu ya kyeleka ya Biblia kele mingi mpi ya mutindu na mutindu. Ata mpidina, mbalu na yau ya kyeleka kele inki?
Biblia kele mukanda ya kuluta mfunu mpi ya mekabulamaka mingi na kati ya luzingu. Na balutiti na yau metulama bamvutu na makambu ya kuluta mpasi ya muntu kemonaka to ya yandi takutana na yau. Mbalu ya nsadilu ya ndongisila na yau kele ya kutesa ve. Nkadulu ya bantu yonso ya yau ketuma kele yau mosi kaka. Nsangu na yau kele ya ngolo mpi ya mbote. Mukanda yai ya mbalu ya kuluta nene mefwana na kubasisama na nzo-mikanda na beto mpi kutudilama mpenza dikebi mpi kutadila yau mbotembote.
Beto lenda kukangula Biblia na kundimisama mpenza nde yau kele ya kulunga, ya kutudila ntima, mpi ya kyeleka. Mambu ya nkenda ya metubamaka na kati na yau kendimama na nkenda ya bantu. Mbala na mbala, bansengumuna ya arkeyolozi kendima nde Biblia kele ya kutungama na mambu ya masonga mpi nde yau kele ya kyeleka. Masonga bansoniki 40 ya Biblia kemonisa bau bonso bantu ya masonga mpi ya kwikama. Kuwakana ya mambu kele na kati ya Biblia kemonisa nde yau mekatuka na muntu ve. Mambu yina kele na kati na yau kele ya kyeleka. Bantu ya yau ketubila kele bantu ya kyeleka. Bifulu mpi bisika ya kuvanda ya yau kesonga kele ya kyeleka. Dyaka, Biblia kele na bambikudulu ya ngolo yina kemonisa Yehowa Nzambi bonso Nkwa Biblia.—2 Piere 1:21.
Longi na beto ya nene kusalaka mbote yonso sambu nde nzayilu ya luzolo na yandi mpi ya balukanu na yandi kuvanda mfunu na bayina yonso kezolaka kuzaba yau. Na yau, Yehowa ketubila beto na bangogo ya pwelele nde luzolo na yandi kele nde bantu ya mitindu yonso kulonguka Ndinga na yandi mpi “kubaka nzayilu ya kufwana ya kyeleka.” (1 Timoteo 2:3, 4, NW; Bingana 1:5, 20-33) Yai kele mosi na kati ya bima ya kuluta mfunu ya beto lenda kusala na luzingu na beto. Nzayilu melombama sambu na beto yonso na kubaka. Bakristu ya ntama kubakisaka yau. Mosi na kati na bau kupusamaka na kutuba nde: “Mono kelanda kulomba kima yai na bisambu na mono nde zola na beno kukuma kuluta mingi dyaka ti nzayilu ya kyeleka mpi luswasukusu ya kulunga, sambu nde beno kubakisa mbotembote mambu ya kuluta mfunu .”—Filipi 1:9, 10; Kolosai 1:9, 10, NW.
Biblia kele nzila ya ntete ya Ngangi kesadilaka sambu kuzabisa luzolo mpi lukanu na yandi na dibuta ya bantu, mpi yau ketendula kisalu mosi mosi na kati na beto na lukanu yina. Na kati na yau kele na mambu ya kusalamaka ntama, mpi yau kepesa mboninu ya pwelele ya makwisa. Biblia ketubila dilongi ya kyeleka mpi kesonga beto inki beto fwete kukwikila to kukwikila ve. (Bisalu 17:11; 2 Timoteo 3:16, 17) Yau kepesa bantuma ya nkadilu ya konso muntu fwete kulanda, mpi yau ketwadisa bantu na nzila ya mbote mpi ya kyese. (Matayo, kapu 5 tii 7) Yau ketubila mingi Kimfumu ya Nzambi bonso kivuvu kaka mosi sambu na bantu mpi kemonisa inki mutindu luyalu na yandi kele kisadilu ya kukembisa zina na yandi mpi kunwanina Kimfumu na yandi. Biblia ketendula ntinu ya beto kele na yau mfunu sambu na kuvanda na ngwisani ya ngolo ya kufuluka na zola ti Ngulusi na beto, Yehowa.
Dyaka, Biblia kele mukanda mosi kaka yina ketwadisa nge na kubaka nsendo ya kuluta nene ya bantu tabaka—luzingu ya kukonda nsuka na kati ya paladisu na zulu ya ntoto bonso bantu ya kukuka. (Roma 6:23) Mwana mosi kaka ya Yehowa ketubila beto nde: “Yai kesongidila luzingu ya mvula na mvula: nde bau kulonguka na kuzaba nge Nzambi mosi kaka ya kyeleka, ti yina ya nge kutindaka Yezu Kristu.” (Yoane 17:3, NW) Ya kyeleka mukanda yai ya mbalu ya nene fwete kupusa beto na kulonguka inki beto fwete kusala sambu na kubaka dikabu ya luzingu ya mvula na mvula. Biblia kele mukanda ya fwete kubakisama, bonso tamonisa yau disolo ya kelanda.