Mambote Ya Kubanga Nzambi Ya Kyeleka

“Mono [Yehowa, NW] Nzambi na nge, mono muntu ke longa nge sambu na mambote na nge, mono muntu ke nata nge na nzila ya nge fweti landa.”​—YEZAYA 48:17.

1. Inki bampasi zolaka kutaninama na nkadilu ya kubanga Nzambi?

KANA Adami kukunaka nkadilu ya kubanga Nzambi, yau lendaka kukandikila yandi na kusala disumu yina kunataka lufwa ya kimakulu na yandi mosi mpi na mafunda ya bamvula ya mawa sambu na ndandana na yandi. Kana dibuta ya Izraele ya ntama kutadilaka ndongisila ya Yehowa sambu na kubanga yandi mpi kuzola yandi, dibuta yina zolaka ve kukwenda na kimpika na Babilone, nkutu bau zolaka ve kubuya Mwana ya Nzambi mpi kunata makambu na kutyamunaka menga na yandi. Kana bubu yai nza vandaka kubanga Nzambi, luvunu na luyalu to na kinkita, kufwa bantu, ti mvita zolaka kuvanda ve.​—Bingana 3:7.

2. Sambu na inki beto fwete kukuna nkadilu ya kubanga Nzambi, ata mambu ya nza ya kezyunga beto kele?

² Kansi, nkatu kutala mambu ya nza ya nzyunga na beto kesala, beto bonso bantu, mabuta, mabundu ya bansadi ya Yehowa lenda kubaka mambote na kukunaka nkadilu ya kubanga Nzambi ya kyeleka. Dyambu yai kele na kuwakana ti mbambuka ya Moize kupesaka na dibuta ya Izraele nde: “Inki Yehowa Nzambi na nge kelomba nge kana kele ve kaka kubanga Yehowa Nzambi na nge, sambu na kutambula na banzila na yandi yonso mpi kuzola yandi mpi kusadila Yehowa Nzambi na nge ti ntima na nge ya mvimba mpi moyo na nge ya mvimba; kulunda bansiku ya Yehowa . . . sambu na mambote na nge?” (Kulonga 10:12, 13, NW) Inki mwa mambote yango ya beto kebakaka ntangu beto kebanga Yehowa, Nzambi ya kyeleka?

Mayele​—Meluta Wolo na Mbalu

3. (a) Inki mambote ya ntete ya beto lenda kubaka? (b) Inki kele ntendula ya Nkunga 111:10?

³ Mambote ya ntete kele mayele ya kyeleka. Nkunga 111:10 (NW) ketuba nde: “Kubanga Yehowa kele luyantiku ya mayele.” Inki yau ketendula? Mayele kele kiyeka ya kusadila nzayilu mbote sambu na kubongisa makambu, na kutina kigonsa, mpi na kulungisa balukanu. Yau kelombaka luswasukusu. Luyantiku, kitini ya ntete, lufulu ya mayele ya mutindu yina, kele kubanga Yehowa. Sambu na inki? Sambu lugangu yonso kele kisalu ya maboko ya yandi. Yau mesimbama na yandi. Yandi pesaka bantu kuzonza ya bau mosi kansi yandi pesaka ve kiyeka ya kutwadisa bitambi na bau na mutindu ya mbote nkatu lutwadisu na yandi. (Yozue 24:15; Yeremia 10:23) Kaka kana beto kemonisa ntonda na mambu yina ya lufulu yina metala luzingu mpi kezinga na ngwisana ti yau, beto lenda kununga kimakulu. Kana Nzayilu na beto ya Yehowa kepesa beto kendimisa beto mpenza nde luzolo ya Nzambi talungana mpenza mpi nde lusilu ti kiyeka na yandi ya kupesa nsendo na bantu ya kwikama kele ya kyeleka, ebuna nkadilu ya kubanga Nzambi tapusa beto na kusala na mayele.​—Bingana 3:21-26; Baebreo 11:6.

4, 5. (a) Sambu na inki ndongolo ya nzo-nkanda ya nene ya toko mosi kupesaka yandi ve mayele ya kyeleka? (b) Na nima, inki mutindu muntu yango ti nkento na yandi kulongukaka mayele ya kyeleka, mpi na inki mutindu yau sobaka luzingu na bau?

⁴ Beto baka mbandu mosi. Bamvula mingi meluta, toko mosi vandaka kukota na nzo-nkanda ya nene ya Saskatchewan, na Canada. Na manaka ya malongi na yandi, byolozi kuvandaka, mpi bau longaka yandi kintukila. Na nima ya kubaka dipolomi na yandi, yandi kudipesaka mingi na kulonguka fiziki nikileyere, yandi bakaka dibenga na kulanda malongi na yandi na Toronto. Ntangu yandi vandaka kulonguka, yandi kumonaka ngidika ya ngituka na ndonga mpi na lukanu ya ntungulu ya ba atome. Kansi ata muntu mosi ve lendaka kupesa yandi mvutu na bangyufula yai: Nani kusalaka bima yai yonso? Inki ntangu? Mpi wapi? Nkatu kubaka bamvutu na bangyufula yina, keti yandi lendaka kusadila na mayele yonso mazaya na yandi na nza mosi ya kukumaka na bitumba ya zole ya nza ya mvimba? Inki lendaka kutwadisa yandi? Keti zola ya nsi? Mpwisa ya bansendo ya bima ya kinsuni? Keti ya kyeleka yandi kuzwaka mayele ya kyeleka?

⁵ Mwa ntangu fyoti na nima ya kubaka dipolomi na yandi, toko yango ti nkento na yandi yantikaka na kulonguka Biblia ti Bambangi ya Yehowa. Na kati ya Ndinga na yandi mosi Nzambi, bau kwisaka kubaka bamvutu ya bau vandaka kuzwa ve na ntwala. Bau kwisaka kuzaba Ngangi, Yehowa Nzambi. Mutindu bau kulongukaka mambu ya metala Moize ti Mbu ya Mbwaki mpi Daniele ti bankundi na yandi na Babilone, bau longukaka mfunu ya kubanga Nzambi kansi bantu ve. (Kubasika 14:10-31; Daniele 3:8-30) Nkadilu ya kubanga Nzambi ya mutindu yina ya kuvukisa ti zola ya Kyeleka ya Yehowa kuyantikaka na kupusa bau. Nswalu, luzingu na bau ya mvimba kusobaka. Na nima toko yango kuzabaka Nkwa kisalu ya maboko yina ya yandi kulongukaka na byolozi. Yandi yantikaka na kubakisa lukanu ya Nkwa mayele yina yandi kumonaka na kulonguka na yandi ya fiziki. Na kisika ya kusadila mazaya na yandi na kusala bisadilu ya lendaka kubungula bankundi na yandi, yandi ti nkento na yandi zolaka kusadisa bankaka na kuzola Nzambi mpi na kuzola nkweno. Bau kumaka bansamuni ya Kimfumu ya Nzambi ya ntangu yonso. Na nima, bau kotaka na nzo-nkanda ya Galaad, nzo-nkanda ya Biblia ya Watchtower mpi bau tindaka bau bonso bamisionere.

6. Kana beto kele na mayele yina metungama na kubanga Yehowa, inki mambu ya kukonda ntonina beto fwete kubuya na kulanda, mpi na kisika na yau, inki beto tasalaka?

⁶ Ya kyeleka, muntu yonso ve lenda kukuma misionere. Kansi beto yonso lenda kuyangalala na mayele yina metungama na kubanga Yehowa. Kana beto kukuna mayele yango, beto takudipesa ve na mpwisa yonso na bafilozofi ya bantu yina kebanzaka kaka na kuzaba kikuma ya luzingu. Beto takudipesa na kulonguka Biblia, ya kupemama na Nto ya luzingu, Yehowa Nzambi, muntu yina lenda kupesa beto luzingu ya mvula na mvula. (Nkunga 36:9; Kolosai 2:8) Na kisika ya kukuma bampika ya ngidika ya kinkita yina kefinama na mbungula, beto talanda ndongisila ya Yehowa sambu na kuyangalala na madya ti bilele, na kutulaka luwisanu na beto ti Yehowa na kisika ya ntete na luzingu. (1 Timoteo 6:8-12) Na kisika ya kusala bonso nde makwisa na beto mesimbama na kuzwa kisika ya kuluta kitoko na nza, beto tandima Ndinga ya Yehowa ntangu yau ketubila beto nde nza kele na kuluta kumosi ti bampwisa na yau, kansi yina kesala luzolo ya Nzambi tabikala kimakulu.​—1 Yoane 2:17, NW.

7. (a) Inki mutindu Bingana 16:16 kesadisa beto na kuvanda na sansa ya bukatikati ya mambu? (b) Na kutulaka kusala luzolo ya Nzambi na kisika ya ntete na luzingu na beto, inki bansendo yau kenataka?

⁷ Bingana 16:16 (NW) kesyamisa beto na kutubaka na masonga yonso nde: “Kubaka mayele [mayele yina keyantikaka ti kubanga Yehowa] kele mbote mpenza kuluta wolo. Mpi kubaka mbakisa meluta palata.” Mayele ya mutindu yina ti mbakisa tapusa beto na kukumisa kusala luzolo ya Yehowa kima ya kuluta mfunu na luzingu na beto. Inki kisalu Nzambi mepesaka na Bambangi na yandi na nsungi yai ya nkenda ya bantu? Kusamuna Kimfumu na yandi mpi kusadisa bantu ya ntima ya masonga na kukituka balongoki ya kyeleka ya Yezu Kristu. (Matayo 24:14; 28:19, 20) Yai kele kisalu ya kebuta bansendo ya luyangalalu ya kyeleka mpi kyese mingi. Yau yina, Biblia kele na kikuma ya mbote ya kutuba nde: “Kyese kele na muntu yina mezwa mayele.”​—Bingana 3:13, NW.

Lutaninu na Bisalu ya Mbi

8. (a) Pesa mambote ya zole ya kekatukaka na kubanga Nzambi? (b) Beto metaninama na inki mambi? (c) Inki mutindu nkadilu ya kubanga Nzambi kekumaka mvumbudi ya kikesa ya ngolo?

⁸ Mambote ya zole ya kekatuka na kubanga Nzambi kele nde beto ketaninama mpenza na kusala yina kele mbi. Bayina kezitisa Nzambi na mudindu kezengaka ve bau mosi inki kele mbote mpi inki kele mbi. Bau kemonaka ve mbi yina ya Nzambi ketuba nde yau kele mbote, bau ketadilaka mpi ve mambu ya Yehowa ketubaka nde yau kele mbi nde yau kele mbote. (Nkunga 37:1, 27; Yezaya 5:20, 21) Dyaka, muntu ya kepusama na nkadilu ya kubanga Nzambi kebikaka ve na kuzaba yina Yehowa ketuba nde yau kele mbote mpi yina yandi ketuba nde yau kele mbi. Muntu ya mutindu yina kezolaka yina Yehowa kezolaka mpi keyinaka yina Yehowa keyinaka. Sambu na yau, yandi kesalaka na kuwakana ti bansiku ya Nzambi. Na yau, mutindu yau memonisama na Bingana 16:6 (NW) yina ketuba nde: “Na kubanga Yehowa muntu ketinaka mambi.” Nkadilu ya kubanga Yehowa ya mutindu yina kekumaka mvumbudi ya ngolo ya kikesa sambu na kulungisa yina muntu lenda kukuka ve na kusala na ngolo na yandi mosi.

9. Inki bupusi mpwisa ya ngolo ya kukonda kuyinisa Nzambi kuvandaka na yau na zulu ya lukanu ya nkento mosi na Mexique, mpi yau kuvandaka ti inki mbutu?

⁹ Ata nkutu nkadilu ya kubanga Nzambi keyantika kuyela na kati ya muntu, yau lenda kusyamisa yandi na kubuya kusala dyambu mosi ya yandi lenda kumonina mpasi na luzingu na yandi ya mvimba. Mu mbandu, na Mexique, nkento mosi ya kuyimita kuyufulaka Mbangi ya Yehowa mosi ngyufula ya metala kubasisa divumu. Mbangi yango kutangilaka nkento yina mikapu mingi mpi kutendulaka na mutindu yai: “Sambu na Ngangi, luzingu kele mfunu mingi mpenza, ata luzingu ya bayina mebutuka ntete ve.” (Kubasika 21:22, 23; Nkunga 139:13-16) Ekizame ya Kiliniki kumonisaka nde mwana ndwelo na yandi lenda kuvanda mbote ve. Kansi ntangu yai, ya kupusama na yina ya yandi kumonaka na Ndinga ya Nzambi, nkento yango kubakaka lukanu ya kubuta mwana na yandi. Munganga na yandi kubuyaka na kumona yandi dyaka, mpi bakala na yandi kunwanisaka yandi na kubikisa yandi, kansi yandi kusyamininaka. Na nima ya ntangu fyoti mpenza, yandi butaka mwana ya nkento​—ya mbote, na mamvimpi ya mbote, mpi ya kitoko. Ya kupusama na ntonda, yandi sosaka Bambangi, mpi bau yantikaka kulonguka Ndinga ya Nzambi ti yandi. Na nima ya mvula mosi yandi ti bakala na yandi kubakaka mbotika. Na nima ya bamvula, na lukutakanu mosi ya distriki, bau kuyangalalaka mingi na kukutana dyaka ti Mbangi yina yandi kusolulaka na yandi na mbala ya ntete mpi na kusonga yandi mwana na bau ya nkento ya zolwa ya bamvula iya. Luzitu ya kufwana sambu na Nzambi ti mpwisa ya ngolo ya kukonda kuyinisa yandi kevandaka mpenza na bupusi ya ngolo na luzingu ya muntu.

10. Nkadilu ya kubanga Nzambi lenda kusyamisa bantu na kukatuka na kimpika ya inki mitindu ya bisalu ya mbi?

¹⁰ Nkadilu ya kubanga Nzambi kesyamisaka beto na kukonda kusala bisalu mingi ya mbi. (2 Korinto 7:1) Kana yau mekunama mbotembote, yau kesadisaka muntu na kusukisa masumu ya kinsweki, ya mezabanaka kaka na yandi mosi ti Yehowa. Yau lenda kusadisa yandi na kukatuka na kimpika ya nkolwa to ya dyamba. Munwi dyamba mosi ya ntama na Afrika ya Sudi ketendula nde: “Ntangu mono bakaka nzayilu ya Nzambi, mono kuyedisaka mpi boma ya kupesa yandi mpasi to ya kuyinisa yandi. Mono zabaka nde yandi vandaka kukengila, mpi mono vandaka kukinga na mpwisa yonso kundimama na meso na yandi. Yau kupusaka mono na kubungula dyamba ya mono vandaka na yau na kulosaka yau na kabine.” Nkadilu ya kubanga Nzambi mesadisaka mafunda ya bantu ya nkaka mingi na mutindu mosi.​—Bingana 5:21; 15:3.

Lutaninu Sambu na Boma ya Bantu

11. Nkadilu ya mbote ya kubanga Yehowa lenda kutanina beto na inki mutambu ya kebwisaka bantu mingi?

¹¹ Kubanga ya mbote ya Nzambi ketaninaka beto mpi na boma ya bantu. Bantu mingi kele na kunyokwama na boma ya bantu na kiteso ya mingi to ya fyoti. Nkutu ata bantumwa ya Yezu Kristu kuyambulaka yandi mpi kutinaka ntangu basoda kukangaka yandi na masamba ya Getesemani. Na nima, na kibansala ya nganga nzambi ya nene, Piere kuvidisaka bukatikati mpi sambu na boma, yandi kubuyaka nde yandi vandaka ve longoki ya Yezu mpi nde nkutu yandi kuzabaka yandi ve. (Marko 14:48-50, 66-72; Yoane 18:15-27) Kansi bantumwa kubakaka lusadisu na kuzwa dyaka bukatikati ya kimpeve. Na ndambu ya nkaka, na bilumbu ya Ntotila Yoyakimi, Uria mwana ya Shemaya kutungisamaka mingi na boma na mpila nde yandi kuyambulaka kisalu na yandi ya kimbikudi ya Yehowa mpi yandi kutinaka nsi, ata mpila yina, bau kukangaka mpi kufwaka yandi.​—Yeremia 26:20-23.

12. (a) Inki lutaninu Bingana 29:25 kepesa na yina metala kubanga bantu? (b) Inki mutindu kutula ntima na Yehowa keyedisamaka?

¹² Inki lenda kusadisa muntu na kununga boma ya bantu? Na nima ya kukebisa nde: “Kana nge tina bantu boma, nge ta bwa na mutambu;” Bingana 29:25 keyika nde: “Kansi kana nge tula ntima na [Yehowa, NW], nge ta zinga na ngemba.” Kutula ntima na Yehowa kele nsampi. Kutula ntima ya mutindu yina kele na lufulu na nzayilu mpi na ngikana. Na kulongukaka Ndinga na yandi, beto kemona bukyeleka ya lunungu ya banzila ya Yehowa. Beto kekwisa kumona mambu ya kemonisa mfunu ya kutudila yandi ntima, bukyeleka ya balusilu na yandi (ti yina ya metala lufutumuku), zola na yandi ti ngolo na yandi ya kuluta mingi. Mpi ntangu beto kesadila nzayilu yango, na kusalaka mambu ya Yehowa ketuma mpi na kubuyaka na nsyaminina yonso yina ya yandi kekebisilaka beto, beto keyantika kumona ntetentete mutindu yandi kensungimina beto na zola mpi mfunu ya kutudila yandi ntima. Beto mosi kemona bukyeleka ya ngolo na yandi kesalaka sambu na kulungisa luzolo na yandi. Kutula ntima na beto na yandi keyela mpi, na nsadisa na yau, zola na beto sambu na yandi ti mpwisa ya kyeleka ya kubuya kuyinisa yandi keyela. Kutula ntima ya mutindu yina metungama na lufulu ya ngolo. Yau kesadisa bonso kibaka ya lutaninu sambu na boma ya bantu.

13. Inki mutindu nkadilu ya kubanga Nzambi lenda kusadisa beto na kisalu na beto ya kinsuni, na nzo, mpi na nzo-nkanda?

¹³ Kutula ntima na beto na Yehowa, ya kuvukisa ti nkadilu ya kubanga Nzambi, tasyamisa beto na kusala yina kele mbote kana patro mosi kenwanisa beto nde beto tavidisa kisalu na beto sambu beto mebuya na kuvukana na kinkita ya kukonda masonga. (Fwanisa ti Mishe 6:11, 12.) Nkadilu ya kubanga Nzambi ya mutindu yina kesadisa mafunda mingi ya Bakristu na kukwamina na lusambu ya kyeleka na ntwala ya nkandikila ya kekatuka na bamambere ya dibuta yina kele ve bankwikidi. Yau kepesaka mpi baleke yina kekwendaka na nzo-nkanda kikesa na kudimonisa bau mosi nde bau kele Bambangi ya Yehowa, mpi yau kesyamisaka bau na kuvibidila maseka ya bankundi na bau ya nzo-nkanda yina kevwezaka bansiku ya Biblia. Na yau, mwana ndumba mosi ya Mbangi kutubaka nde: “Yina ya baleke ya nza keyindulaka nde yau kele mpenza mfunu ve, yau yina ya Yehowa keyindulaka nde yau kele mfunu.”

14. Inki mutindu bansadi ya Yehowa kekukaka na kununga ata ntangu luzingu na bau kevandaka na kigonsa?

¹⁴ Kundima ya mutindu mosi kesyamisa Bakristu ya kyeleka na kusyamina na banzila ya Yehowa ata ntangu luzingu na bau kele na kigonsa. Bau kezaba nde munyokudi ya kekatuka na nza fwete kukumina bau. Bau kebakisa nde bantumwa kubulamaka mpi nde Yezu yandi mosi kubulamaka fimbu mpi bau kufwaka yandi na bantu ya mbi. (Marko 14:65; 15:15-39; Bisalu 5:40; Fwanisa ti Daniele 3:16-18.) Kansi bansadi ya Yehowa ketula mpenza ntima nde yandi lenda kusyamisa bau na kuvibidila; nde na nsadisa ya Nzambi bau lenda kununga; nde nkatu kubela Yehowa tapesa nsendo na bayina kele ya kwikama​—nkutu ata na nzila ya lufutumuku kana yau kele mfunu, sambu na kuzinga na ntoto na yandi ya mpa. Zola na bau sambu na Yehowa, ya kuvukisa ti nkadilu ya kubanga Nzambi kepusa bau mpenza na kubuya kusala konso kima yina ya lenda kuyinisa yandi.

15. Inki kusadisaka Bambangi ya Yehowa na kusikila ya kwikama na baka ya kosatrasio ya Nazi?

¹⁵ Bupusi yai kusadisaka Bambangi ya Yehowa na kubikala ya kukangama na bampasi ya baka ya kosatrasio ya Nazi na kati ya bamvula 1930 ti 1940. Bau landaka ndongisila ya Yezu yina kele na Luka 12:4, 5 (NW) nde: “Banduku na mono, mono ketubila beno nde, Beno kubanga ve bayina kefwaka nitu mpi na nima na yau bau kekukaka ve kusala kima ya nkaka ya kuluta. Kansi mono tasonga beno muntu yina ya beno fwete kubanga: Beno kubanga muntu yina, na nima ya kufwa, kele na kiyeka ya kulosa na Gehenne. Ee, mono ketubila beno, beno kubanga Muntu yina.” Sambu na yau, Gustav Auschner, Mbangi mosi ya kuvandaka na ka ya kosatrasio ya Sachsenhausen, kusonikaka na nima nde: ‘Mfumu ya SS August Dickmann kubulaka masasi mpi kunwanisaka nde bau kufwa beto yonso ya kubikalaka kana beto kutulaka ve diboko na mukanda mosi ya kubuya lukwikilu na beto. Ata muntu mosi ve na kati na beto kutulaka diboko. Beto vandaka na kubanga mingi ya kuyinisa Yehowa kuluta boma ya masasi na bau.’ Boma ya bantu kenataka na kigonsa, kansi kubanga Nzambi kekumisaka muntu ngolo sambu na kusala yina kele ya mbote.

Lutaninu ya Luzingu

16. Inki kusadisaka Noa na kusikila na luzingu ya mbote bamvula mingi tii na ntangu ya mvula ya ngolo, mpi inki kukuminaka yandi ti dibuta na yandi?

¹⁶ Noa kuzingaka na bilumbu ya nsuka ya nza ya ntama. Yehowa kubakaka lukanu ya kubungula nza ya mbi ya ntangu yina sambu na mambi ya muntu. Kansi, na ntantu yango yina, Noa kuvandaka na nza yango yina vandaka ya kufuluka na kufwa ya bantu, mansoni ya nene, mpi kubuya ya luzolo ya Nzambi. Ata nkutu Noa kusamunaka lunungu, “Bau kubakisaka ata kima mosi ve tii kuna mvula ya ngolo kukwisaka mpi yau kufwaka bau yonso.” (Matayo 24:39, NW) Kansi Noa kulembaka ve na kisalu ya Nzambi kutulaka na ntwala na yandi. Yandi salaka “na kutadila yonso ya Nzambi kutumaka yandi. Yandi salaka kaka mutindu yau yina.” (Kuyantika 6:22, NW) Inki kusadisaka Noa na kusikila konso mvula tii na ntangu ya Mvula ya ngolo? Baebreo 11:7 (NW) kevutula nde: “Na nsadisa ya lukwikilu Noa, na nima ya kupesama lukebisu ya Nzambi na mambu yina ya vandaka kumonana ntete ve, kumonisaka nkadilu ya kubanga Nzambi.” Na nsuka na yau, yandi ti nkento na yandi mpi bana na yandi ti bankento na bau kugulukaka na mvula ya ngolo.

17. (a) Ata inki mambu bantu ya nkaka kesala inki beto fwete kusala? (b) Sambu na inki bantu yina kebanga Yehowa kele mpenza bantu ya kyese?

¹⁷ Beto kele na kuzinga nsungi ya kefwanana ti yina ya ntangu ya Noa na mambu mingi. (Luka 17:26, 27) Lukebisu kele na kupesama dyaka. Kusonga 14:6, 7 (NW) ketubila wanzio mosi yina kepumbuka na katikati ya zulu mpi kelongisila bantu ya bansi yonso mpi bikanda yonso mpi ya bandinga yonso na “kubanga Nzambi mpi na kupesa yandi nkembo.” Ata inki mambu nza ya mezyunga nge kesala, tula dikebi na bangogo yina, mpi na nima, yalumuna invitasio na bankaka. Bonso Noa, sala na lukwikilu mpi monisa nkadilu ya kubanga Nzambi. Nsadilu na nge ya mutindu yina lenda kunata nge na luguluku ya luzingu na nge ti ya bantu ya nkaka mingi. Mutindu beto kemona mambote ya bantu yina kebanga Nzambi ya kyeleka keyangalala na yau, beto lenda kaka kundima kumosi ti muyimbi bankunga ya kupemama yina kuyimbaka nde: “Kyese kele na muntu yina kebangaka Yehowa, yina keyangalalaka mingi na bansiku na yandi.”​—Nkunga 112:1, NW.

Inki Mutindu Nge Lenda Kupesa Mvutu?

◻ Inki mambote ya kuluta mfunu kekwisaka na kubanga Nzambi ya kyeleka?

◻ Inki mutindu mayele ya metungama na nkadilu ya kubanga Nzambi lenda kutanina beto?

◻ Sambu na inki nkadilu ya kubanga Nzambi kesadisa beto na kubuya mambi?

◻ Inki mutindu nkadilu ya kubanga Nzambi ketanina beto na boma ya muntu?

◻ Inki mbutu nkadilu ya kubanga Nzambi kele na yau na bivuvu na beto ya makwisa?

[Bifwanisu ya kele na balutiti 16]

“Kyese kele na muntu yina kebangaka Yehowa, yina keyangalalaka na bansiku na yandi.”​—Nkunga 112:1, NW