“Beto Kembila Nzambi Na Kyese”

Lukutakanu ya Distrike ya Bambangi ya Yehowa

Bilumbu tatu ya mbalu ya ndongolo ya Biblia kekinga nge. Na kati ya balukutakanu 36 ya mebongisama na Burundi, Congo mpi Zaïre, mosi takonda ve na kuvanda penepene na kisika ya nge kezingaka. Vanda pana ntangu manaka kebanda ti miziki na 9 h 40 na suka ya Kitanu.

Na Kitanu na suka, manaka tapesa baluzayisu ya kwisa ya mbote ti disolo ya ntu-dyambu, “Bau Mekabwana Bonso Bantu ya Kekembilaka Nzambi na Kyese na Nza ya Mvimba.” Na nima ya midi, manaka tatula dikebi ya ngolo na batoko, bibuti, ti ndongolo. “Keti Mono Mekudibongisa Sambu na Kukwela?” kele disolo mosi ya batoko tazola ve kukondana. Bibuti fwete kuwidikila mbotembote “Bibuti Yina Kesepelaka na Bana na Bau.” Nima ya midi tamana ti disolo “Ndongolo​—⁠Sadila yau Sambu na Kukembila Yehowa.” Mambu ya metubama fwete kusadisa batoko na kulanda nzo-nkanda mbotembote.

Na Sabala na suka, manaka tamonisa mbotika, mpi dibaku tapesama na bayina mekuka na kubaka mbotika. Na nima ya midi, tavanda ti disolo mosi ya masonga ya mutindu Satana, banda bantangu ya ntete, kesadilaka banzala ya bizumba sambu na kukanga bantu na mutambu na yandi. Tavanda mpi ti disolo ya ngolo “Tina Mitambu ya Dyabulu.” Manaka ya kilumbu yina tasuka na disolo ya mfunu “Sambu na Inki Bantu Kele na Mfunu ya Nzayilu ya Nzambi.”

Na Lumingu na suka, masolo ya kulandana na ntu-dyambu “Beto Kembila Nzambi na Kyese na Bilumbu yai ya Nsuka ya Ngidika ya Bima Yai” tabenda dikebi na mambu ya kele na ntwala na beto ya kebebisa nza. Yau tatubila mingi nkadilu ya kutina nswalunswalu sambu na lutaninu na ntwala ya luyantiku ya “mpasi ya nene” yina ya Yezu kutubilaka ya kele ya kusonama na Matayo 24:⁠21.

Manaka ya Lumingu na suka tasuka ti kifwanifwani ya mfunu “Beto Pesa Lukumu na Bayina Mefwana na Kubaka Yau na Bamvula na Bau ya Kinunu.” Na nima, na nima ya midi, disolo ya bantu yonso: “Beto Kembila Ntotila ya Mvula na Mvula!” tapesama. Yau tavanda ntendula ya nene ya lukutakanu.

Yilama ntangu yai sambu na kuvanda pana. Na kubakisa kisika ya kele penepene na bwala na nge, yufula na Nzo ya Kimfumu ya Bambangi ya Yehowa ya bwala na nge, to sonikila bantu ya kebasisaka zulunalu yai. Nzozulu ya Nkengi ya Marsi 1, 1995 (lutiti 32) kele ti ba adresi ya balukutakanu ya tasalama na Burundi, Congo mpi Zaïre.