Kwisa na Lukutakanu ya Distrike “Lukwikilu na Ndinga ya Nzambi”!

BANTU mingi tavanda na bankama ya bisika yina lukutakanu tasalama na ntoto ya mvimba. Na Burundi, Congo mpi Zaïre mpamba, balukutakanu 53 mebongisama. Ya ntete tasalama na Yuni 11-13, ebuna ya nsuka na Septembri 19-21. Na ntembe ve, mosi na kati ya balukutakanu yai ya bilumbu tatu​—⁠yantika Kitanu tii Lumingu​—⁠tavanda na kisika ya kele mfinama ti bwala na nge.

Nge tawa malongi mingi ya Biblia ya kusadila na luzingu. Na bisika mingi, manaka tayantika konso suka na 9:30. Na Kitanu na ntwala ya midi tavanda ti minuta 25 ya ba interview na bantu yina metulaka lukwikilu ya ngolo na Ndinga ya Nzambi na luzingu na bau. Kitini yina ya ntete tasuka ti disolo ya ntu-dyambu, “Kutambula na Lukwikilu Kansi na Kumona ya Meso ve.”

Disolo ya ntete na Kitanu na nima ya midi tatadila kisika ya mfunu ya baleke kele na yau na kati ya dibundu ya Bukristu. Sympozium ya bitini tatu yina talanda, tatadila minsiku ya Biblia mpi mutindu yau kewakanaka ti ndyatilu ya Bukristu na ntubilu, na bikalulu, ti na kimuntu ya nganda. Na nima, badiskure yai: “Keba na Kukonda ya Lukwikilu” ti “Ndinga ya Nzambi Kele ya Moyo” tatubila mingi lukebisu ya mbote yina kele na Baebreo kapu 3 ti kapu 4. Lukutakanu na Kitanu tamana ti diskure yai: “Mukanda Mosi Sambu na Bantu Yonso.”

Disolo ya ntete na Sabala na ntwala ya midi kele “Lukwikilu ya Kukonda Bisalu Kele ya Kufwa.” Diskure yankaka ya mfunu na ntwala ya midi yina tavanda “Tula Bansimbulu mpi Kuma Ngolo na Lukwikilu.” Yau tatendula mutindu ya kuyedisa kimpeve. Kitini yina tamana ti kima ya kesalamaka na balukutakanu yonso, “Lukwikilu na Ndinga ya Nzambi Kenataka na Mbotika,” na nima na yau, balongoki ya mpa tazwa dibaku ya kubaka mbotika.

Nima ya midi ya Sabala takanguka ti disolo, “Nwana Ngolo Sambu na Lukwikilu.” Yau ketubila lukebisu yina kele na mukanda ya Yude. Sympozium mosi ya tasala ntangu mosi kele na ntu-dyambu: “Bika Beto Kwenda na Nzo ya Yehowa.” Yau tatadila mambote ya balukutakanu ya Bukristu. Kilumbu yina, lukutakanu tasuka ti diskure “Nkadilu ya Lukwikilu na Nge​—⁠Kemekama Ntangu Yai.”

Manaka ya Lumingu na ntwala ya midi kele ti sympozium yina tatadila mukanda ya Yoele, kumosi ti mfunu na yau na bilumbu na beto. Na nima, tavanda kifwanifwani ya Biblia, yina kele na ntu-dyambu: “Lunda Disu na Nge Petepete.” Kima ya kuluta mfunu ya lukutakanu yina tasalama na nima ya midi kele diskure ya bantu yonso, “Lukwikilu mpi Makwisa na Nge.”

Ya kyeleka mpenza, kana nge mevanda pana, nge tavwama mpenza na kimpeve. Beto kezodila nge kukwisa ya mbote na bitini yonso. Kudibongisa banda sesepi yai sambu nge vanda pana. Sambu na kuzaba kisika ya kele mfinama na nzo na nge, yula Bambangi ya Yehowa na Nzo ya Kimfumu ya bwala na nge to sonikila bambasisi ya zulunalu yai.

[Lupangu ya kele na lutiti 32]

Keti Nge Tazola Mvutukilu Mosi?

Ata na kati ya inza yai ya mavwanga, nge lenda kubaka kyese na nsadisa ya nzayilu ya kyeleka ya Biblia kepesa na yina ketala Nzambi, Kimfumu na yandi mpi lukanu ya kitoko ya yandi kusalaka sambu na bantu. Kana nge tazola kuzaba mambu ya nkaka to nge tazola nde muntu mosi kwisa kulonguka ti nge Biblia ya ofele na inzo, beto kelomba nge na kusonika na Association “Les Témoins de Jéhovah,” B.P. 634 Limete, Kinshasa, Zaïre, to na mosi na adresi mebonga na nge yina kele na lutiti 2.