Masolo Ya Bansamuni Ya Kimfumu

“Sala Kisalu ya Evanzelizatere”

KUVANDA evanzelizatere kesongidila inki? Ngogo yango kebasika na ngogo ya Kigreki eu·ag·ge·li·stesʹ, yina kele kibeni na kuwakana ti ngogo eu·ag·geʹli·on, yina ketendula “nsangu ya mbote.” Yau yina, evanzelizatere kele nsamuni ya nsangu ya mbote.

Bakristu ya kyeleka yonso kele baevanzelizatere sambu bau kesamunaka nsangu ya mbote ya Kimfumu ya Nzambi. Na mutindu mosi ya kufwana, ntumwa Polo kukebisaka Timoteo na “kusala kisalu [ya evanzelizatere, NW].” Yau vandaka kulomba nde Timoteo kusala kisalu yai na ntima mosi. Polo kusyamisaka yandi na ‘kudiyala na mambu yonso’ mpi na ‘kubongisa kisalu na yandi yonso.’​—⁠2 Timoteo 4:⁠5.

Bonso baevanzelizatere, beto mpi kebakaka kisalu na beto ti dikebi yonso ye beto ‘ke kudiyalaka’, to kebikalaka na dikebi na kusamuna nsangu ya mbote na mabaku yonso. Bamingi mekwisaka kuzaba Yehowa ti balusilu na yandi na nima ya kukutana ti Bambangi ya Yehowa na dibaku ya mbote. Yai kele mambu ya kukuminaka Seymore, muntu mosi ya Barbados.

Seymore vandaka longi na nzo-nkanda mosi ya leta. Charles, longi ya nkaka ya ntangu fyoti na nzo-nkanda yango mpi Mbangi ya Yehowa, kuvandaka evanzelizatere ya dikebi. Yandi kuvandaka nsadi ya ntangu yonso, to mupasudi-nzila, mpi yandi vandaka kusadila mabaku yonso sambu na kusamuna nsangu ya mbote na bankaka. Seymore kuwaka nsangu ya Kimfumu ya Nzambi na mbala ya ntete na nsadisa ya kimbangi ya dibaku ya mbote ya Charles.

Ntama mingi ve, Seymore mpi kusilaka na kusamuna bakyeleka ya Biblia na kiteso ntangu tapesa yandi nzila. Ebuna, yandi kuyantikaka masolo ya mabaku ya mbote ti bantu na kisika ya kisalu na yandi, mingimingi bana ya nzo-nkanda na yandi. Ata nkutu na bansi ya nkaka malongi ya Nzambi fwete kulongama ve na banzo-nkanda ya leta, bau pesaka muntu yai mukumba ya kulonga malongi ya Nzambi mpi malongi ya bantoma. Kansi ntangu yai, mboninu ya nkulu ya Seymore na malongi yina kuyingisamaka na nzayilu na yandi ya mpa ya Biblia. Na bantangu ya mvunda, yandi vandaka kusonga bana ya nzo-nkanda na yandi mambu ya metala balusilu ya Nzambi ya inza ya mpa mpi kivuvu ya luzingu ya mvula na mvula.

Inki bana kusalaka? Bamingi kumonisaka dikebi ya kyeleka na nsangu ya mbote ya Kimfumu ya Yehowa. Na ntangu ya mbote, Seymore yantikaka kutwadisa bana 13 ya nzo-nkanda na yandi bonso balongoki ya Biblia. Kusepela na bau vandaka ya mingi na mpila nde, bau kudibongisaka sambu na kulonguka Biblia mbala zole na mposo mosi. Nsukansuka, mingi na kati na bau yantikaka kukwenda na balukutakanu ya Bakristu na Nzo ya Kimfumu ya Bambangi ya Yehowa. Bubu yai, bana uvwa na kati na bau mekumaka Bambangi ya Yehowa ya kudipesa mpi ya kubotama. Sambu na yandi mosi Seymore, yandi kele na kulungisa kisalu na yandi yonso na kusalaka bonso mupasudi-nzila ya ngonda na ngonda mpi nkuluntu na mosi na kati ya mabundu ya Bambangi ya Yehowa yina kele na Barbados.

Yai kele kaka mbandu mosi ya kemonisa mutindu Bambangi ya Yehowa na ntoto ya mvimba ‘ke salaka kisalu ya baevanzelizatere,’ na mutindu ya kusamuna na dibaku ya mbote. Bau kelandaka lukebisu ya kele na Kolosai 4:​5, 6, yina ketuba nde: “Beno zinga na mayele na bantu yina kele bakristo ve. Sambu ntangu beno ke na ntangu ya mbote, beno fweti sadila yo. Ntangu yonso beno fweti tuba mambu ya mbote ti ya mfunu; beno fweti zaba kupesa bavumtu ya mbote na konso muntu.”