Zinga na Kuwakana ti Nsiku ya Kristu

“Beno bakana bakilo beno na beno, mpidina beno ta landa nsiku ya Kristo.”​—GALATIA 6:2.

1. Sambu na inki yau lenda tubama nde nsiku ya Kristu kele ngolo ya kuluta ngolo sambu na kusala mambote bubu yai?

NA Rwanda, Bahutu ti Batutsi yina kele Bambangi ya Yehowa tulaka luzingu na bau na kigonsa sambu na kuditanina bamosi ti bankaka na kufwisana ya bikanda yina kombaka bwala na bilumbu ya meluta. Bambangi ya Yehowa na Kobe, Japon, yina vidisaka bamambere ya mabuta na ndikunu ya ngolo ya ntoto vandaka na mpasi mingi sambu na mvidisa na bau. Kansi, bau salaka nkatu kusukinina na kugulusa bantu yankaka. Ee, bambandu ya kepesa ntima kyese ya kekatuka na ntoto ya mvimba kemonisa nde nsiku ya Kristu kele na ngolo bubu yai. Yau kele ngolo ya nene sambu na kusala mambote.

2. Inki mutindu Kikristu mekukaka ve na kubakisa nsiku ya Kristu, ye inki beto lenda sala na kulungisa nsiku yina?

² Na ntangu yango yai mosi, mbikudulu ya Biblia yina metadila “bilumbu ya nsuka” ya mpasi kele na kulungana. Bantu mingi kesonga nde “bo kele na kinzambi” kansi bau ‘ke buya ngolo na yo.’ (2 Timoteo 3:​1, 5) Mingimingi na kati ya Kikristu, lusambu kesalama kaka na mpila ya kusalama, kansi yau kekatuka na ntima ve. Keti yau kesalama buna sambu yau kele mpasi na kuzinga na kulandaka nsiku ya Kristu? Ve. Yezu lungaka ve kupesa beto nsiku mosi yina lendaka kulandama ve. Kikristu mekukaka ve na kubakisa nsiku ya Kristu. Yandi menungaka ve na kulanda bangogo ya kupemama yai: “Beno bakana bakilo beno na beno, mpidina beno ta landa nsiku ya Kristo.” (Galatia 6:2) Beto “ta landa nsiku ya Kristo” na kubakaka bakilo bamosi ya bankaka, kansi na kulandaka ve mbandu ya Bafarize na kuyikaka nkatu kikuma kilo na zulu ya kilo ya bampangi na beto.

3. (a) Tanga mwa-bantuma ya kele na nsiku ya Kristu? (b) Sambu na inki yau tavanda mbi na kusukisa nde dibundu ya Bukristu fwete vanda na nsiku ve katula bantuma na yandi mosi Kristu?

³ Nsiku ya Kristu kele kimvuka ya bantuma yonso ya Kristu​—yau vanda kusamuna to kulonga, kuvanda na disu ya mbote mpi ya petepete, kusosa kubumba ngemba ti bampangi na beto, to kukatula mvindu na kati ya dibundu. (Matayo 5:​27-30; 18:​15-17; 28:​19, 20; Kusonga 2:​14-16) Ya kyeleka, Bakristu fwete landa bantuma yonso ya Biblia yina mepesamaka sambu na balandi ya Kristu. Mpi mambu kele mingi. Organizasio ya Yehowa, kumosi ti dibundu mosi mosi, fwete vanda ti bansiku ya mfunu mpi bansadilu sambu na kulunda ndonga ya mbote. (1 Korinto 14:​33, 40) Ee, sambu Bakristu takuka ve na kuvukana kumosi kana nsiku kele ve na yina metala ntangu, kisika, mpi mutindu ya kusala balukutakanu ya mutindu yina! (Baebreo 10:24, 25) Kuwisana ti nzila ya kisalu ya mbote ya bantu yina mepesamaka kiyeka kesonga na kati ya organizasio kele mpi na kati ya kulungisa nsiku ya Kristu.​—Baebreo 13:17.

4. Ngolo ya kepusaka lusambu ya kugedila kele inki?

⁴ Ata mpila yina, Bakristu ya kyeleka kebikisaka ve lusambu na bau kukuma ngidika mosi ya bansiku ya kukonda sansa. Bau kesadilaka ve Yehowa sambu muntu to organizasio mosi kesongaka bau na kusala mutindu yina. Kansi, ngolo ya kepusa lusambu na bau kele zola. Polo sonikaka nde: “Zola ya Kristu kepusaka beto.” (2 Korinto 5:​14, NW, noti na nsi ya lutiti) Yezu tumaka balandi na yandi na kuzolana bau na bau. (Yoane 15:​12, 13) Zola ya kuditambika kele lufulu ya nsiku ya Kristu, mpi yau kepusaka Bakristu ya kyeleka bisika yonso, yau vanda na dibuta to na dibundu. Bika beto tala na inki mutindu.

Na Kati ya Dibuta

5. (a) Inki mutindu bibuti lenda lungisa nsiku ya Kristu na banzo na bau? (b) Inki kima ya mfunu bana kekingaka na bibuti na bau, ye inki balukakilu bibuti yankaka fwete nunga sambu na kupesa yau?

⁵ Ntumwa Polo sonikaka nde: “Beno babakala, beno zola bankento na beno mutindu Kristo zolaka Dibundu ntangu yandi fwaka sambu na yo.” (Efezo 5:25) Ntangu bakala kelanda mbandu ya Kristu mpi ketadila nkento na yandi ti zola mpi mbakisa, yandi kelungisa kitini mosi ya mfunu ya nsiku ya Kristu. Kuluta dyaka, Yezu monisaka pwelele zola sambu na bana ya fyoti, na kubakaka bau na maboko na yandi, na kutulaka maboko na yandi na zulu na bau, mpi na kusakumunaka bau. (Marko 10:16) Bibuti yina kelungisaka nsiku ya Kristu kesongaka mpi zola na bau sambu na bana na bau. Ya kyeleka, kele ti bibuti yina kemonaka nde yau kele mpasi na kulanda mbandu ya Yezu na dyambu yai. Bamingi kele bantu ya kemonisaka ve mawi na bau tuka lubutuku. Bibuti, beno bika ve mambu ya mutindu yina kukangisa beno na kumonisa bana na beno zola ya beno kele na yau sambu na bau! Yau melunga ve nde kaka beno mpamba kuzaba nde beno kezolaka bana na beno. Bau mpi fwete zaba yau. Ye bau tazaba yau ve kana beno sosa ve mpila ya kumonisa zola na beno.​—Fwanisa ti Marko 1:11.

6. (a) Keti bana kele na mfunu ya bansiku ya bibuti, ye sambu na inki nge kevutula buna? (b) Inki kikuma ya ntete ya bansiku na nzo ya mwana fwete bakisa? (c) Inki bigonsa kekatukaka kana nsiku ya Kristu keyala na kati ya nzo?

⁶ Na ntangu yina mosi, bana mpi kele ti mfunu ya lutwadisu, yau kesonga nde bibuti na bau fwete tula bansiku mpi kukumisa yau ngolo bantangu yankaka ti ndongi (discipline). (Baebreo 12:​7, 9, 11) Ata mpila yina, bana fwete baka lusadisu malembemalembe na kumona kikuma ya kyeleka ya bansiku yina: bibuti na bau kezolaka bau. Mpi bau fwete bakisa nde kikuma ya kuluta mbote sambu na bulemfu na bau na bibuti na bau kele zola. (Efezo 6:1; Kolosai 3:20; 1 Yoane 5:3) Kikuma ya ndongi ya bibuti kele kulonga bana na kusadila “kiyeka ya ngangu” na bau, na mpila nde nsukansuka bau kuma kubaka bau mosi banzengolo ya mbote. (Roma 12:1; fwanisa ti 1 Korinto 13:11.) Na ndambu yankaka, bansiku fwete lutana mingi ve mpi ndongi fwete luta mpasi ve. Polo tubaka nde: “Beno batata, beno simbisa bana na beno makasi ve, mbaimbai bo ta vanda na kikesa diaka ve.” (Kolosai 3:21; Efezo 6:⁠4) Kana nsiku ya Kristu keyala na kati ya nzo, mfunu ya ndongi yina kepesamaka ti makasi ya kuluta kiteso to mafingu tavanda ve. Na nzo ya mutindu yina, bana kekudiwaka mbote mpi kikesa, bau kekudiwaka ve na nsi ya kilo to ya kulemba.​—Fwanisa ti Nkunga 36:7.

7. Na inki mutindu banzo ya Betele lenda pesa mbandu na yina metala kupesa bansiku na nzo?

⁷ Bamingi yina metalaka banzo ya Betele na inza ya mvimba ketubaka nde yau kele bambandu ya mbote ya bukatikati na yina metala kutula bansiku sambu na dibuta. Ata yau kele kimvuka ya bambuta, banzo yina kesalaka kibeni bonso mabuta.a Bisalu ya Betele kele mingi mpi yau kelombaka ntalu mosi ya mingi ya bansiku​—ya kyeleka, mingi kuluta yina ya dibuta ya muntu. Ata mpila yina, bankuluntu yina kebakaka ntwala na banzo ya Betele, babilo, ti imprimeri kesalaka ngolo na kusadila nsiku ya Kristu. Bau ketadila mukumba na bau bonso kutwadisa kisalu kaka ve, kansi mpi kuyedisa kuyela ya kimpeve mpi “kyese ya Yehowa” na kati ya bankundi na bau ya kisalu. (Nehemia 8:​10, NW) Yau yina, bau kesalaka ngolo na kusala mambu na mutindu mosi ya mbote, ya kepesa kikesa mpi kesalaka ngolo na kuvanda bantu ya keyindulaka. (Efezo 4:​31, 32) Mfunu ya kuyituka kele ve kana mabuta ya Betele mezabanaka sambu na mpeve na bau ya kyese!

Na Kati ya Dibundu

8. (a) Lukanu na beto ntangu yonso fwete vanda inki na dibundu? (b) Na kati ya inki bamvwandilu bankaka kulombaka bansiku to memekaka na kutula bansiku?

⁸ Na kati ya dibundu, mukumba na beto kele mpi kupesana kikesa na mpeve ya zola. (1 Tesalonika 5:11) Na yau, Bakristu yonso fwete keba na kuyika ve kilo na zulu ya bankaka na kudipesaka mukumba ya kundimisa ngindu na bau na mambu yina kelombaka nsola ya muntu na muntu. Na bantangu yankaka, bamingi kesonikilaka La Société Watch Tower sambu na kulomba bansiku na mambu bonso mboninu ya bau fwete vanda na yau sambu na bafilme yankaka, mikanda, to nkutu mpi biteki ya kusekinina. Kansi, La Société kele na nswa ve ya kufimpa bima ya mutindu yina mpi kuzenga nkanu na zulu na yau. Mbala mingi, yau kele mambu ya konso muntu to konso mfumu ya dibuta fwete baka nzengolo, na lufulu ya zola na yandi ya minsiku ya Biblia. Bankaka kemekaka kukitula bangindu mpi bandongisila ya La Société kepesaka bansiku. Mu mbandu, na Nzozulu ya Nkengi, nimero ya Marsi 15, 1996 (ya Kifalansa), kuvandaka ti disolo ya kitoko yina vandaka kupesa bankuluntu kikesa na kusala bavizite ya kingungudi mbala na mbala na bamambere ya dibundu. Keti lukanu vandaka ya kutula bansiku? Ve. Ata bayina mefwana na kulanda bangindu kemona mambote mingi, bankuluntu yankaka kekuka ve na kusala buna. Mutindu mosi, disolo “Bangyufula ya Batangi” na Nzozulu ya Nkengi ya Aprili 1, 1995 (ya Kifalansa), kebisaka na konda kufwa lukumu ya okazio ya mbotika na kulutisaka ndilu, mu mbandu kulutisa kudya, kunwa to kusala bafeti. Bankaka bakaka ndongisila ya kimbuta yai mpi kumisaka yau ngolo, na kusalaka nkutu nsiku nde kutinda karte sambu na kusyamisa muntu na okazio yai kele mbi!

9. Sambu na inki yau kele mfunu nde beto fwete zola ve kulutisa kutonga to kusambisa bankaka?

⁹ Yibuka mpi nde kana “nsiku ya kukuka ya kimpwanza” fwete yala na kati na beto, beto fwete ndima nde kansansa ya Bakristu yonso na kati na beto kele mutindu mosi ve. (Yakobo 1:25) Keti beto fwete kumisa yau dikambu kana bantu kele ti bansola na bau mosi yina kekulula ve minsiku ya Masonuku? Ve. Kusala buna tavanda kunata nkabisa. (1 Korinto 1:10) Polo, na kukebisaka beto na konda kusambisa mpangi na beto Mukristu kutubaka nde: “Kana yandi ke salaka kisalu ya mbote to ve, yina kele mambu ya mfumu na yandi na kuzenga yo. Yandi mpi ta sala kisalu ya mbote, sambu [“Yehowa,” NW] ke na kiyeka na kusadisa yandi.” (Roma 14:4) Kana beto keba ve, beto takonda kuyangidika Yehowa na kutubaka bamosi kontre bankaka sambu na mambu yina fwete yambulama sambu na kansansa ya muntu na muntu.​—Yakobo 4:​10-12.

10. Banani mepesamaka mukumba ya kulangidila dibundu, ye inki mutindu beto fwete simba bau?

¹⁰ Bika beto yibuka mpi nde, bankuluntu mepesamaka mukumba ya kulangidila kibuka ya Nzambi. (Bisalu 20:28) Bau kele pana sambu na kusadisa. Beto fwete banga ve na kumona bau sambu na ndongisila, sambu bau kele balonguki ya Biblia mpi meyikanaka ti mambu ya mebasikaka na mikanda ya La Société Watch Tower. Kana bankuluntu memona ndyatilu mosi ya lenda nata na kufwa minsiku ya Masonuku, nkatu boma, bau kepesaka ndongisila. (Galatia 6:1) Bamambere ya dibundu kelanda nsiku ya Kristu kana bau kewisana ti bankuluntu ya zolwa yai, yina kebaka ntwala na kati na bau.—Baebreo 13:7.

Bankuluntu Kesadilaka Nsiku ya Kristu

11. Inki mutindu bankuluntu kesadilaka nsiku ya Kristu na kati ya dibundu?

¹¹ Bankuluntu kele na mpusa mingi ya kusadila nsiku ya Kristu na kati ya dibundu. Bau kebakaka ntwala na kusamuna nsangu ya mbote, na kulonga mambu ya kele na kati ya Biblia sambu na kusimba bantima ye, bonso bangungudi ya zola, ya ntima ya mbote, bau ketubilaka “myoyo ya kunyokwama.” (1 Tesalonika 5:​14, NW) Bau kezolaka ve nkadilu ya konda Bukristu yina kele na kati ya mabundu mingi ya Kikristu. Ya kyeleka, inza yai kele na kufwa nswalunswalu, mpi bonso Polo, bankuluntu lenda wa mayindu sambu na kibuka; kansi bau kelunda bukatikati ntangu bau ketadila mambu ya mutindu yina.​—2 Korinto 11:28.

12. Kana Mukristu memona nkuluntu sambu na lusadisu, inki nkuluntu lenda sala?

¹² Mu mbandu, Mukristu mosi lenda zola kumona nkuluntu na yina metala dyambu mosi ya mfunu yina kemonana ve mbala mosi na Masonuku to yina kelomba kutesa minsiku ya kuswaswana ya Bukristu. Mbala yankaka bau mepesa yandi poste mosi ya nene na kisalu yina kele ti lufutu ya mingi kansi mukumba mpi mingi. To, tata yina kele nkwikidi ve, tata ya toko mosi ya Mukristu, lenda banda kupesa bantuma na mwana na yandi, bantuma ya lenda bebisa kisalu na yandi. Na mambu ya mutindu yina, nkuluntu fwete kudikangisa na kupesa dibanza na yandi mosi. Kansi, ziku yandi takangula Biblia mpi tasadisa muntu na kuyindula na minsiku ya ketadila yau. Yandi lenda sadila Publications de la Société Watch Tower​—Index, kana yau kele, na kuzaba bisika “mpika ya kwikama mpi ya mayele” metubilaka dyambu yango na Nzozulu ya Nkengi mpi na mikanda yankaka. (Matayo 24:​45, NW) Ebuna, kusala inki kana na nima Mukristu mebaka nzengolo yina kemonika ve ya mayele na ntwala ya nkuluntu? Kana nzengolo yina kefwa ve na mbala mosi minsiku ti bansiku ya Masonuku, Mukristu tamona nde nkuluntu kezaba nswa ya muntu na kubaka nzengolo ya mutindu yina, na kuzabaka nde “konso muntu [ta] baka kilo na yandi [mosi].” Kansi, Mukristu yango fwete yibuka nde “Muntu ke katulaka bambuma yina ya yandi ke kunaka.”—Galatia 6:​5, 7.

13. Na kisika ya kupesa mvutu mbala mosi na bangyufula to kupesa bangindu na bau mosi, sambu na inki bankuluntu kesadisaka bankaka na kuyindula mambu bau mosi?

¹³ Sambu na inki nkuluntu ya kele na ngikana kesalaka mutindu yina? Ntetentete sambu na bikuma zole. Ya ntete, Polo songaka dibundu mosi nde yandi vandaka ve ‘mfumu na zulu ya lukwikilu na bau.’ (2 Korinto 1:​24, NW) Nkuluntu, na kusadisaka mpangi na yandi na kuyindula na zulu ya Masonuku mpi kubaka nzengolo na yandi mosi na lufulu ya nzayilu, kelanda mbandu ya Polo. Yandi bakisaka nde kiyeka na yandi kele ti ndilu, kaka mutindu Yezu ndimaka nde kiyeka na yandi vandaka ti ndilu. (Luka 12:​13, 14; Yude 9) Na ntangu yina mosi, bankuluntu na luzolo yonso tapesa ndongisila ya Masonuku ya mfunu, to mpi ya ngolo kisika yau kelombama. Ya zole, yandi kele na kuyikanisa nkundi na yandi Mukristu. Ntumwa Polo tubaka nde: “Bambuta kaka me lunga na kudia madia ya ngolo, sambu bo me yikanaka konso ntangu na kuswasisa mambu ya mbote ti mambu ya mbi.” (Baebreo 5:14) Yau yina, sambu na kukuma mbuta, beto fwete sadila kiyeka na beto ya kuswasisa, na kuyekamaka ve ntangu yonso na lweka ya muntu sambu yandi pesa beto bamvutu. Na kusongaka nkundi na yandi Mukristu mutindu ya kuyindula na Masonuku, nkuluntu kesadisaka yandi na kuyela.

14. Inki mutindu bantu ya kuyela lenda monisa nde bau ketulaka ntima na Yehowa?

¹⁴ Beto lenda tula ntima nde Yehowa Nzambi na nsadisa ya mpeve santu tapusa ntima ya bansambidi ya kyeleka. Na yau, Bakristu ya kuyela kelombaka ntima ya bampangi na bau, na kudodukilaka bau, mutindu ntumwa Polo salaka. (2 Korinto 8:8; 10:1; Filemoni 8, 9) Polo zabaka nde mingimingi kele bantu ya kukonda lunungu, kansi bantu ya lunungu ve, kevandaka ti mfunu ya bansiku ya kutendulama mbotembote sambu na kudyatisa bau mbote. (1 Timoteo 1:9) Yandi monisaka, mbefula ve to kukonda kutula ntima, kansi lukwikilu na bampangi na yandi. Na dibundu mosi, yandi sonikaka nde: “Sambu na Mfumu, beto ke tulaka ntima na beno.” (2 Tesalonika 3:4) Lukwikilu ya Polo ti kutula ntima, na ntembe ve vandaka mfunu na kusyamisa Bakristu yina. Bankuluntu ti bankengi-ntambudi bubu yai kele ti balukanu ya mutindu mosi. Bantu ya ndembikilu ya inki mutindu bau kele, bantu yai ya kwikama ya kegungula na zola yonso kibuka ya Nzambi!​—Yezaya 32:​1, 2; 1 Piere 5:​1-3.

Zinga na Kuwakana ti Nsiku ya Kristu

15. Inki bangyufula beto lenda kudiyula na kumona kana beto kesadila nsiku ya Kristu na ngwisana na beto ti bampangi na beto?

¹⁵ Beto yonso fwete kudifimpa na kuzaba kana beto kezinga na kulandaka mpi na kuyedisaka nsiku ya Kristu. (2 Korinto 13:5) Ya kyeleka, beto yonso lenda baka mambote na kuyulaka nde: ‘Mono kesyamisaka to ketongaka? Mono kele na bukatikati to kelutisaka? Keti mono kemonisaka luzitu sambu na bankaka to kekangamaka kaka na banswa na mono mosi?’ Mukristu kemekaka ve kuzenga mambu yina ya mpangi na yandi fwete sala to fwete buya, kana yau metendulama ve mbala mosi na Biblia.​—Roma 12:1; 1 Korinto 4:6.

16. Inki mutindu beto lenda sadisa bayina kevandaka na ngindu ya mbi sambu na bau mosi, na kulungisaka na mutindu yina kitini mosi ya mfunu ya nsiku ya Kristu?

¹⁶ Na bantangu yai ya mpasi, yau kele mfunu nde beto sosa mitindu ya kupesana kikesa. (Baebreo 10:​24, 25; fwanisa ti Matayo 7:​1-5.) Ntangu beto ketala bampangi na beto ya babakala ti ya bankento, keti bikalulu na bau ya mbote kemonisa ve mambu mingi kuluta balebakanu na bau? Na ntwala ya Yehowa, muntu yonso kele na mbalu. Na mawa yonso, bantu yonso ve kewaka mutindu yina, ata sambu na bau mosi. Bamingi kele na kikalulu ya kumona kaka balebakanu ti kukonda kukuka na bau. Sambu na kupesa kikesa na bantu ya mutindu yina​—ti bankaka​—keti beto lenda solula na muntu mosi to zole na konso lukutakanu, na kuzabisaka bau sambu na inki kumonana na bau, ti yonso ya bau kesalaka na dibundu, kevandaka mfunu na meso na beto? Kyese ya inki mutindu na kulembika kilo na bau na mutindu yina mpi kulungisa na mbala mosi nsiku ya Kristu!​—Galatia 6:2.

Nsiku ya Kristu Kele na Kusala!

17. Na inki mitindu ya kuswaswana nge kemona nsiku ya Kristu kesala na kati ya dibundu na nge?

¹⁷ Nsiku ya Kristu kele na kusala na dibundu ya Bukristu. Beto kemona yau bilumbu yonso​—ntangu bankundi Bambangi kemwanga na mpusa yonso nsangu ya mbote, ntangu bau kepesana ndembikilu mpi kikesa, ntangu bau kesala ngolo na kusadila Yehowa ata nkutu mambu ya kuluta mpasi kele, ntangu bibuti kesala ngolo na kuyedisa bana na bau na kuzola Yehowa ti ntima ya kyese, ntangu bankengi kelonga Ndinga ya Nzambi na zola mpi tiyatiya, na kupusaka kibuka na kuvanda ti kikesa ya kepela bonso tiya sambu na kusadila Yehowa kimakulu. (Matayo 28:​19, 20; 1 Tesalonika 5:​11, 14) Ntangu konso muntu na kati na beto ketula nsiku ya Kristu na kisalu na luzingu na yandi, kyese ya inki mutindu ntima ya Yehowa kevandaka na yau! (Bingana 23:15) Yandi kezola bayina yonso kezolaka nsiku na yandi ya kukuka kuzinga mvula na mvula. Na Paladisu ya makwisa, beto tamona ntangu bantu takuma ya kukuka, ntangu ya kukonda babuki-nsiku, ye ntangu ya beto tayala bupusi ya mbi yonso ya ntima na beto. Lufutu ya mbote ya inki mutindu na bayina kuzingaka na kulandaka nsiku ya Kristu!

[Noti na nsi ya lutiti]

Inki Nge Kebanza?

◻ Sambu na inki Kikristu mekukaka ve na kubakisa nsiku ya Kristu?

◻ Inki mutindu beto lenda sadila nsiku ya Kristu na dibuta?

◻ Sambu na kusadila nsiku ya Kristu na dibundu, inki beto fwete buya, inki beto fwete sala?

◻ Inki mutindu bankuluntu lenda lemfuka na nsiku ya Kristu na bisalu na bau ti dibundu?

[Kifwanisu ya kele na lutiti 30]

Mwana na nge kele ti mfunu ya zola mingi

[Kifwanisu ya kele na lutiti 31]

Bantu ya ndembikilu ya inki mutindu bankuluntu na beto kele!