Kinsweki na Zina ya Nzambi

GAZE mosi ya ndikila kotaka na nzila ya nsi ya ntoto na Tokyo, mbanza ya Japon, na Marsi 1995. Yau fwaka bantu 12 mpi bedisaka mafunda ya bantu yankaka. Yau sadisaka na kupanza kinsweki mosi: bantu ya sekti mosi ya lusambu na zina ya Aum Shinrikyo (Kyeleka ya Kuluta Bakyeleka) bumbaka nkuta ya kufwana ya gaze mosi ya lufwa na zina ya sarin, sambu na kusadila yau na kulungisa balukanu na bau ya kinsweki.

Ngonda mosi na nima, bombe mosi panzaka nzo mosi ya luyalu ya États-Unis na mbanza Oklahoma. Yau fwaka bantu 167. Na kutadilaka banzikisa, yau fwete vanda nde kele dibundu ya Branch Davidian na Waco, Texas, muntu kusalaka dyambu yina. Mpamba ve, bamvula zole na ntwala, mavwanga kotaka na kati na yau ti luyalu. Na ntangu yina bantu 80 ya dibundu yina kufwaka. Kupanzana ya bombi yina songaka mpi kinsweki mosi ya bantu mingi vandaka kuzaba ve: Bimvuka mingi ya minkangu kesalaka na kati ya États-Unis, mingi na kati na yau kemonanaka bonso yau kesalaka bangidika sambu na kutelemanina luyalu.

Ntama mingi ve, na nsuka ya 1995, bau monaka banitu ya kupya tiya ya bantu 16 na kati ya mfinda mosi na lweka ya Grenoble, na insi ya France. Bau vandaka bantu ya Tempelo ya Ntangu, kadibundu mosi ya fyoti yina bau tubilaka mingi na bansangu na 1994, na Suisse ti na Canada, ntangu bantu 53 ya kimvuka na bau kudigondaka to kugondamaka. Kansi ata yau salaka mbi yina, kadibundu yango kefulaka kaka na kusala. Tii bubu yai bantu kezabaka ve bangindu ti balukanu na yau.

Bigonsa ya Kinsweki na Dibundu

Na kutalaka mambu ya mutindu yai kesalama, keti yau kele kima ya kuyituka kana bantu mingi ketalaka bimvuka ya lusambu na disu ya mbi?

Na masonga yonso, muntu mosi ve tazola kupesa maboko na kimvuka mosi ya kinsweki​—⁠yau vanda ya lusambu to ya lusambu ve​—⁠kana yandi ketula yau ntima, kansi yau kebaluka na kupusa yandi na kusala mambu yina yandi kezolaka ve. Kansi inki bantu lenda sala sambu na kubwa ve na mutambu ya kuvukana na kimvuka mosi ya kinsweki yina kezabana mbote ve?

Yau kemonana pwelele nde, muntu yonso ya mayele yina kezola kukota na kimvuka mosi ya kinsweki fwete zikisa mbotembote balukanu na yau. Bupusi ya bampangi to ya banduku fwete tulama na lweka. Nzengolo fwete bakama sambu na kyese ve, kansi na kulandaka mambu ya kyeleka. Yibuka nde malanda yonso ya mpasi tabwila muntu yango yina​—⁠yandi mosi​—⁠bantu yankaka ve.

Kulanda bandongisila ya Biblia kele mwaye ya kuluta mbote ya kutina kigonsa ya kukota na bimvuka yina kele na ngindu ya mbi. (Yezaya 30:21) Bandongisila yango ketubila kuvanda na bukatikati na mambu ya politiki, kumonisa zola na bankaka​—⁠ata bau kele bambeni, kubuya “bisalu ya kinsuni,” ye kukuna bambuma ya mpeve ya Nzambi. Na zulu ya mambu yonso, Bakristu ya kyeleka fwete vanda ve bantu ya inza, mutindu Yezu vandaka mpi ve muntu ya inza, ye ndyatilu yina yitaka monisa nde bau tavanda ve na mpila ya kukota na konso kimvuka ya kinsweki ya inza.​—⁠Galatia 5:​19-23; Yoane 17:​14, 16; 18:36; Roma 12:​17-21; Yakobo 4:⁠4.

Bambangi ya Yehowa kele balongoki ya ngolo ya Biblia. Bau kezitisaka lukwikilu na bau mpi kezinga na kulanda yau na mpenza. Na inza ya mvimba, bau mezabanaka bonso dibundu mosi ya ‘ke sosaka ngemba, ke landaka kaka yo.’ (1 Piere 3:11) Mukanda na bau Les Témoins de Jéhovah : Prédicateurs du Royaume de Dieu ketubaka mbote mpenza nde: “Bambangi ya Yehowa kele kimvuka ya kinsweki ve ata fyoti. Balukwikilu na bau yina kele ti lufulu na Biblia metendulama mbotembote na mikanda ya muntu yonso lenda tanga. Dyaka, bau kesalaka ngolo sambu na kubinga bantu yonso na balukutakanu na bau sambu bau mosi kumona mpi kuwa mambu ya kesalama.”

Lusambu ya kyeleka kesadilaka ve kinsweki ata fyoti. Nzambi longaka bansambidi na yandi ya kyeleka na kudibumba ve mpi na kufika ve kikuma ya bau kele. Bantumwa ya ntete ya Yezu fulusaka Yeruzalemi ti malongi na bau. Bau vandaka monisa na mpenza balukwikilu ti bisalu na bau. Bambangi ya Yehowa kesalaka mpi mutindu mosi bubu yai. Kansi, kana baluyalu ya badiktatere kukonda kuzaba kyeleka mebuyisa bau kimpwanza ya lusambu, bau fwete landa kisalu na bau na mayele yonso mpi na kikesa yonso. Bau fwete “lemfuka ntete na Nzambi, kansi na bantu ve,” mambu ya kekuminaka bau sambu na kusamuna na bau na kikesa na ntwala ya bantu yonso.​—⁠Bisalu 5:​27-29; 8:1; 12:​1-14; Matayo 10:​16, 26, 27.

Kana yau meyitaka kukumina nge na kuyindula nde Bambangi ya Yehowa kele lusambu ya kinsweki to sekti, mbala yankaka yau vandaka sambu nge zabaka bau mbotembote ve. Yau vandaka mpi mutindu mosi na mvu-nkama ya ntete.

Bisalu kapu 28 ketubila beto lukutakanu ya vukisaka ntumwa Polo ti “bambuta ya Bayuda” na Roma. Bau tubilaka yandi nde: “Beto zaba nde na ndambu yonso bo ke zolaka ve kimvuka yina ya nge kele.” (Bisalu 28:​16-22) Na mvutu na yandi, Polo “vandaka kaka ke longa bo; yandi vandaka kulonga bo sambu na Kimfumu ya Nzambi,” ye “bantu ya nkaka tulaka ntima na mambu yina ya yandi vandaka kutubila bo.” (Bisalu 28:​23, 24) Na ntembe ve, kuzaba kyeleka ya ketadila Bukristu ya kyeleka vandaka sambu na mambote na bau ya kimakulu.

Mutindu bau mekudipesaka sambu na kusadila Yehowa na mpenza mpi na meso ya bantu yonso, na kyese yonso Bambangi ya Yehowa kesepelaka na kusonga kyeleka yonso ya kisalu mpi lukwikilu na bau na konso muntu yina kezolaka kuzaba kyeleka. Ee, nge lenda sala nsosa nge mosi na mpila nde nge zaba mambu ya tasadisa nge na kubaka nzayilu ya mbote ya lukwikilu na bau.

[Kifwanisu ya kele na lutiti 6]

Bambangi ya Yehowa kele na kyese ya kusonga na bantu, bau kele banani ye inki bau kesalaka