‘Kieleka Ta Katula Beno na Kimpika’
‘Beno ta zaba kieleka, ebuna [kieleka] ta katula beno na kimpika.’ Yai mambu ya Yezu tubaka kilumbu mosi ntangu yandi vandaka longa bantu na tempelo na Yeruzalemi. (Yoane 8:32) Balongoki ya Yezu zabaka, kukonda mpasi, nde malongi ya Yezu vandaka kyeleka. Bau monaka mambu mingi ya kesonga nde longi na bau vandaka muntu ya Nzambi kutindaka.
KANSI bubu yai, bantu mingi kekukaka ve na kuzaba kyeleka yina Yezu longaka. Bau kele bonso bantu yina Yezaya tubilaka na bilumbu na yandi nde: “Kima ya mbi beno ke binga yo kima ya mbote, kima ya mbote beno ke binga yo kima ya mbi. Mpimpa beno ke mona yo mwini, mwini beno ke mona yo mpimpa. Kima ya bululu beno ke baka yo kima ya sukadi, kima ya sukadi beno ke baka yo kima ya bululu.” (Yezaya 5:20) Na bilumbu yai, bangindu, malongi ti mitindu ya kuzinga ya mpila na mpila mebasikaka. Bamingi ketubaka nde: muntu na muntu fwete tadila mambu na mpila na yandi, ke ti kima ve ya beto lenda binga nde kyeleka.
Ntangu Yezu songaka Bayuda nde kyeleka takatula beno na kimpika, bau vutulaka nde: “Beto kele bantu ya dikanda ya Abrahami, beto me vandaka ntete ve ata bampika ya muntu mosi. Nki mutindu nge lenda tubila beto nde: ‘Beno ta katuka na kimpika’?” (Yoane 8:33) Bau vandaka ve na mfunu ya kima, to ya muntu ya kukatula bau na kimpika. Kansi, Yezu tendudilaka bau nde: “Mono ke tubila beno mambu ya kieleka: Konso muntu yina ke salaka masumu, yandi kele mpika ya masumu.” (Yoane 8:34) Kyeleka yina Yezu vandaka tubila lenda katula muntu na kimpika ya masumu. Yezu tubaka nde: “Kana Mwana kukatula beno na kimpika, beno ta vanda diaka bampika ve.” (Yoane 8:36) Yau yina, kyeleka ya kekatulaka bantu na kimpika, kele kyeleka ya ketadila Mwana ya Nzambi, Yezu Kristu. Muntu kekatukaka na kimpika ya disumu ti lufwa kaka kana yandi metula lukwikilu na kimenga ya luzingu ya kukuka ya Yezu.
Kilumbu yankaka, Yezu tubaka nde: “Na nzila ya kieleka, kitula bo kimakulu bantu na nge; [“ndinga na nge kele kyeleka,” NW].” (Yoane 17:17) Ndinga ya Nzambi yina kele na Biblia kele kyeleka yina kekatulaka bantu na kimpika ya bibanga-banga ti ya lusambu ya luvunu. Kyeleka na yina metadila Yezu kele na kati ya Biblia. Yau kenataka bantu na kukwikila yandi ye yau kepesaka bantu kivuvu ya kuvanda na kyese na bilumbu ya kekwisa. Kyese mingi na muntu yina mezaba kyeleka yina kele na Ndinga ya Nzambi!
Keti kuzaba kyeleka kele kima mosi ya mfunu? Mabundu mingi bubu keyindulaka nde bau kelandaka Biblia, kisi ve filozofi ti nsiku ya bambuta mekotaka na malongi na bau. Mbala mingi, bamfumu ya mabundu kesalaka ve ngolo na kusosa kuzaba kana malongi na bau kele kyeleka. Na bau, kima ya mfunu kele kulonga malongi yina ya bantu kezolaka mingi. Bankaka kemonaka nde Nzambi kendimaka lusambu yonso ya kesalamaka na masonga yonso. Kansi, Yezu Kristu tendulaka nde: “Ntangu ke kwisa, yo mpi me lungaka; na ntangu yina bantu ya kieleka ta sambaka Tata na [“mpeve mpi na kyeleka,” NW], sambu Tata ke zolaka bayina ke sambaka yandi mutindu yina.”—Yoane 4:23.
Kana beto kezola nde Nzambi kundima lusambu na beto, beto fwete zaba kyeleka. Mambu yai kele mfunu mingi kana beto kezola kuzwa kyese ya mvula na mvula. Yau yina, konso muntu fwete kudiyula mutindu yai: ‘Keti Nzambi kendimaka lusambu na mono? Keti mono kele ti luzolo ya kyeleka ya kulonguka kyeleka ya Ndinga ya Nzambi? To mono kebangaka kulonguka sambu kana ve mono tazaba mambu mingi?’