Sambila Nzambi na Kyeleka

Lusambu na beto fwete wakana ti kyeleka, kana beto kezola nde Nzambi kundima yau. (Yoane 4:23) Biblia ketuba nde bansambidi ya kyeleka kele bantu ya “Dibundu yina ke simbaka mambu ya kieleka mutindu dikunzi ke simbaka nzo.” (1 Timoteo 3:15) Bantu yina kele na kati ya dibundu ya Nzambi, bau kekwikilaka ve Ndinga ya Nzambi kukwikila mpamba. Bau kesadilaka yau na luzingu na bau mpi kenwaninaka yau, na kuzabisaka yau na ntoto ya mvimba.​—Matayo 24:14; Roma 10:​9-15.

BAMBANGI YA YEHOWA mezabanaka mingi sambu na kisalu na bau ya kulonga bantu Biblia. Bau ke na kusala yau na bansi kuluta 200. Bau kelongukaka Biblia mpi kelongaka kaka kyeleka na yau. Bau kevukisaka yau ve ti luvunu ya mayele ya bantu. Keti nge zaba malongi ya Biblia ya bau kelongaka? Bantu mingi kezolaka ve kuwidikila Bambangi ya Yehowa sambu bau mewaka luvunu ya bantu ketubaka sambu na Bambangi. Kansi, beto kesonga bantu ya masonga yonso na kulanda ve muntu. Bau tala bau mosi kana makambu ya Bambangi ketubaka kele luvunu to kyeleka. Na dyambu ya mfunu ya mutindu yai, yau kelomba ve nde muntu kulanda biwawa. Bamingi melongukaka bau mosi na kuzaba inki Bambangi kelongaka, ye bau mebakaka mambote mingi.

Kuzaba Kyeleka Kekatulaka Boma

Beto baka mbandu ya Eugenia. Na nzo na bau, bau yonso yelaka na dibundu ya Katolika. Tata na yandi vandaka na ndonga ya bantu yina yidikaka makambu ya kuyamba Papa, na Mexique, na 1979. Kilumbu mosi Eugenia kutanaka ti Bambangi ya Yehowa, kisika yandi kwendaka kutala banduku. Bambangi sadisaka yandi na kulonguka mbotembote mambu ya Biblia ketuba. Yandi keyibuka nde: “Ntete, mono waka boma mingi na ntima. Sambu, ntangu mono mezwa kyeleka, malongi na mono ya ntete kumaka luvunu; dibuta na mono, banduku na mono, bantu ya mono kezolaka: bau yonso vandaka na kati ya luvunu. Mono kumaka bisakasaka. Mono bandaka kudiyula nde, inki tabwa na nzo ntangu bo tazaba mambu yampa yai ya mono mezaba? Tii, na nima ya bilumbu, ti lusadisu ya Yehowa, mono bandaka kuyikana ti mambu ya ngituka yai. Kilumbu mosi, mono kangulaka ntima, mono solulaka ti nduku ya dibuta na beto mosi. Yandi vandaka profesere ya malongi ya Nzambi. Mono songaka yandi nde mono kele na nzala ya kuzaba kyeleka. Yandi songaka mono nde, ‘Kana nge kezo zaba kyeleka, sosa Bambangi ya Yehowa.’ ”

Mambu yina Eugenia vandaka kubanga, yau kusalamaka. Bo kulaka yandi na nzo. Kansi, Bambangi landaka na kusadisa yandi na kimpeve. Yandi ketuba nde: “Bau pesaka mono kikesa na kubuya ve kyeleka. Mono bakisaka nde yau kele kima ya muntu lenda kunwanina. Kuyamba ya Bambangi yambaka mono vandaka kima mosi ya mfunu kibeni. Mono monaka nde bantu vandaka kuzola mono mingi na kati ya dibundu. Kukangama na mono na organizasio ya Nzambi katulaka mono boma ya mono vandaka kuwa nde dibuta na mono talosa mono.”

Tala mbandu yankaka. Na nzo ya ba Sabrina bo vandaka na kikalulu ya kufimpa Biblia mbala na mbala. Nkutu bau salaka kima ya beto lenda binga nde ‘dibundu ya dibuta.’ Mbala na mbala yandi vandaka sosa bantu ya mabundu yankaka, sambu na kutendudila bau luvunu ya bau kelongaka. Ntangu Mbangi ya Yehowa mosi songaka yandi nde bau longuka Biblia, yandi ndimaka kukonda mpasi. Na ntima, yandi vandaka na ngindu ya kumonisa yandi luvunu ya malongi ya Bambangi. Yandi ketuba nde: “Ntangu beto melonguka mvula mosi ya mvimba, boma kangaka mono nde mono tavidisa ‘kyeleka na mono.’ Mono vandaka mona mpasi ve na kupanza luvunu ya mabundu mingi ya mono zabaka, kansi na mbala yai, mono kangamaka.”

Boma yina nataka Sabrina na kubuya kulonguka dyaka Biblia ti Bambangi ya Yehowa. Kansi na nima, yandi monaka nde kimpeve na yandi bikalaka ya mpamba. Ale, yandi bakaka lukanu ya kuvutukila kulonguka mpi, nsukansuka, yandi ndimaka kyeleka yai ya mpa. Sabrina vutukaka dyaka nima ve. Yandi bakaka nkutu ngindu ya kulonga bantu yankaka mambu ya yandi vandaka longuka. Nkutu yandi lombaka mpi nswa ya kwenda kusamuna nzo na nzo ti Bambangi ya Yehowa. Yandi ketendula nde: “Na ntwala ya kuzwa nswa ya kusamuna kumosi ti Bambangi ya Yehowa, bo yulaka mono nde: ‘Keti nge kezola mpenza kukuma Mbangi ya Yehowa?’ Mono vutulaka nde, ‘Ve!’ Ntima kumaka mono dyaka bomaboma.” Nsukansuka, ntangu Sabrina melanda kukwenda na balukutakanu ti kutala bikalulu ya bantu ya Nzambi ti mutindu na bau ya kusadila minsiku ya Biblia, yandi monaka nde yau vandaka kyeleka, kima yankaka ve. Yandi bakaka mbotika ye ntangu yai, yandi kele na kisalu ya ntangu yonso.

Sambu na Inki Malongi ya Kuswaswana?

Bankaka keyulaka nde, ‘Sambu na inki malongi ya Bambangi ya Yehowa kele ya kuswaswana ti malongi ya mabundu yankaka?’ Beto tala mwa mambu ya Bambangi kekwikilaka, nge tabakisa nde bau kele Bakristu ya masonga, yina kelongukaka Biblia na dikebi yonso. Beto kelomba nge na kubaka Biblia na nge, sambu na kutanga bamvese yina kelanda malongi ya nene yai na zulu ya bau kelongaka.

Kana nge tadila mbotembote malongi ya Biblia yai ya Bambangi kekwikilaka, ti mutindu ya bau kesadilaka yau, nge tazwa dibaku ya kuzaba kyeleka yina takatula nge na kimpika. (Yoane 17:17) Kuwa ve boma ya kuzaba kyeleka. Yibuka mambu yai ya Yezu silaka: ‘Beno ta zaba kieleka, ebuna [kieleka] ta katula beno na kimpika.’​—⁠Yoane 8:⁠32.

[Lupangu ya kele na lutiti 6]

MWA MALONGI YA MFUNU YA BAMBANGI YA YEHOWA KEKWIKILAKA

◯ Yehowa kele Nzambi ya ngolo yonso. Na mikanda ya Biblia ya ntama kibeni, yina bo sonikaka na maboko, zina na yandi kemonanaka mbala kuluta 7 000.​—Nkunga 83:18.

◯ Yezu kele Mwana ya Nzambi, yandi kwisaka na ntoto sambu na kupesa luzingu na yandi sambu na kugulusa bantu. (Yoane 3:​16, 17) Bambangi ya Yehowa kelandaka malongi ya Yezu yonso yina kele na Baevanzile.

◯ Zina yai, ‘Bambangi ya Yehowa,’ mebasika na kati ya Biblia, na Yezaya 43:10. Mvese yai ketuba nde: “ ‘Beno kele bambangi [to, batemwe] na mono,’ Yehowa yandi mosi muntu ketuba.”

◯ Kimfumu yina ya bantu kelombaka na kisambu ya ‘Tata na Beto ya Kele na Zulu,’ kele luyalu. Luyalu yai tavanda na zulu. Kubika fyoti yau kekatula mpasi yonso na zulu ya ntoto. Yau ketula Paladisu yina beto ketangaka na Biblia.​—Yezaya 9:​5, 6; Daniele 2:44; Matayo 6:​9, 10; Kusonga 21:​3, 4.

◯ Konso muntu yina kesalaka luzolo ya Nzambi lenda baka mambote ya mvula na mvula yina Kimfumu tapesa.​—Yoane 17:3; 1 Yoane 2:⁠17.

◯ Bakristu fwete vanda na bikalulu yina Biblia kelonga. Bau fwete sala ngolo na kuvanda bantu ya masonga, ti bikalulu ya kitoko mpi ya mpembe na luzingu, bau fwete zola mpi bantu yankaka.​—Matayo 22:39; Yoane 13:35; 1 Korinto 6:​9, 10.

[Kifwanisu ya kele na lutiti 5]

Bambangi ya Yehowa ke na kulonga kyeleka ya Biblia na bansi kuluta 200