Landa na Kusala Kisalu ya Luguluku na Nge Mosi!

“Banduku na mono, . . . beno fweti landa kaka na kusala kisalu ya [“luguluku na beno mosi,” NW] na boma ti na matekita.”​—⁠FILIPI 2:⁠12.

1, 2. Inki menataka bantu mingi na kumona nde bau lenda sola ve nzila ya luzingu na bau?

“KETI nge butukaka mutindu yina?” Ngyufula yai bantu mekatuka kutanga yau, na bisono ya nene, na lutiti ya zulu ya zulunalu mosi. Na nsi na yau, bo sonikaka bangogo yai: “Mambu ya mpa ya bo melonguka kemonisa nde, kimuntu, bikalulu, ti nzila ya muntu kelandaka na luzingu na yandi, beto kebakaka yau na bibuti na beto.” Mambu yai lenda nata bantu na kuyindula nde, bau kele dyaka ve na nzila ya kusola sambu na luzingu na bau mosi.

² Bantu yankaka bibuti ti balongi na bau kulongaka bau mbote ve. Bau kemonaka boma nde luzingu na bau tavandaka kaka mpasi na zulu ya mpasi. Bankaka dyaka kemonaka nde, nge mata nge kita, bau tasalaka kaka bifu ya bibuti na bau kusalaka, bau talandaka kaka bikalulu na bau ya mbi, bau tavandaka mpi ya kukonda kwikama na Yehowa. Na bunkufi, bau kemonaka nde bau lenda sola ve nzila ya mbote. Keti Biblia kelonga mutindu yina? Mabundu yankaka kendimaka nde Biblia kelongaka nde, mambu yonso ya tabwilaka konso muntu na luzingu, Nzambi metulaka yau dezia na ndonga. Dilongi yai bo ke bingaka yau nde prédestination.

3. Inki kikesa Biblia kepesa beto na kuzaba nde beto mosi lenda bongisa makwisa na beto?

³ Bangindu yai yonso ketuba kaka kima mosi nde: Nge lenda sola ve nzila na nge mosi sambu na luzingu na nge. Ngindu yai kepesa kikesa ve ata fyoti, ebuna yau kebebisa kibeni dikambu yai. Bingana 24:10 ketuba nde: “Kana nge kele kikesa ve na ntangu ya mpasi, [“nge tavanda na ngolo mingi ve,” NW].” Kansi, kima ya kepesa beto kikesa kele yai: Biblia ketuba nde beto ‘lenda sala kisalu ya luguluku na beto mosi.’ (Filipi 2:12) Beto kezola kutula ntima mingi na dilongi yai ya Masonuku. Inki tasadisa beto?

Kisalu ya ‘Kuditunga’ Beto Mosi

4. Inki ngindu Polo vandaka na yau ve ntangu yandi sonikaka 1 Korinto 3:​10-15?

⁴ Tadila mbandu ya ntumwa Polo pesaka na 1 Korinto 3:​10-15. Kuna yandi tubilaka kisalu ya kutunga ya Mukristu kesalaka, ye mbandu yai lenda tadila kisalu ya yandi kesalaka sambu na bantu yankaka to sambu na yandi mosi. Ya kyeleka, yandi tubaka ve nde, kuzenga ya longoki kezengaka na kusadila Yehowa mpi na kubikala na nzila yina, kele kaka mukumba ya bayina kelongaka yandi. Ve, Polo vandaka monisa nde longi fwete tunga kisalu ya kuluta mbote ya yandi lenda. Kansi, mutindu beto monaka yau na dilongi ya kuyitaka, yandi tubaka ve nde longoki yandi mosi kele na kima ya kusala ve. Ya kyeleka, mbandu ya Polo ketadila kisalu ya beto kesalaka na kutunga bantu yankaka; na kutunga beto mosi ve. Yau kele mutindu yina, sambu Polo tubaka nde, kisalu ya kukonda ngolo tafwa, kansi muntu ya kutungaka yau taguluka. Kansi, na bisika yankaka, Biblia kesadila mpi kaka ngindu ya kutunga, sambu na kutendula kisalu ya beto kesalaka na nitu na beto mosi.

5. Inki mikapu kemonisa nde Mukristu kesalaka kisalu ya ‘kuditunga’ yandi mosi?

⁵ Beto baka mbandu ya Yude 20, 21. Yau ketuba nde: “Beno bampangi na mono, [“beno kuditunga na lukwikilu na beto ya kuluta santu, beno samba ti mpeve santu,” NW], beno zinga kaka na kuzola yina ya Nzambi ke zolaka beno.” Ngogo ya Kigreki ya Yude mesadila awa, mpi ya beto mebalula “kuditunga” kele yo yina mosi ya Polo sadilaka na 1 Korinto kapu 3. Kansi, yandi ketuba nde beto kuditunga beto mosi na zulu ya fondasio ya lukwikilu na beto. Ngogo ya Kigreki ya Polo kesadila sambu na kufwanisa kisalu ya kutunga ya Bakristu kesalaka, ye yina bau mebalula nde “fondasio” kele kiteso mosi ti yina ya Luka kesadila na kati ya kingana ya Yezu, yina ya muntu mosi tungaka nzo na yandi na zulu ya matadi. (Luka 6:​48, 49) Dyaka, ntangu Polo kepusa bampangi na yandi Bakristu na kuyela na kimpeve, yandi monisaka bau bonso bantu ya bo metungaka na zulu ya “fondasio.” Ee, Ndinga ya Nzambi kelonga beto na kusala kisalu ya kutunga na kati na beto mosi.​—⁠Efezo 3:​15-19; Kolosai 1:23; 2:⁠7.

6. (a) Pesa mbandu ya kemonisa nde kutunga Mukristu kele kisalu mosi ya bantu mingi ketulaka maboko. (b) Inki mukumba konso longoki kenataka yandi mosi?

⁶ Keti kutunga Mukristu kele kisalu ya muntu mosi? Beto baka mbandu mosi. Kana nge kezola kutunga nzo, nge takwenda na muntu ya kesalaka bapula ya banzo, yandi pesa nge pula mosi. Kana nge kezo tunga nzo yango nge mosi, nge tabaka maso mosi sambu na kusala ti nge mpi na kupesaka nge bangindu. Kana maso yai mesadila nge fondasio ya ngolo, metendudila nge mutindu ya kulanda pula, mesonga nge bima ya mbote ya nge fwete sumba na kutunga nzo ya ngolo, mpi mesongasonga nge mayele ya kutungila, nge tandima mpenza nde yandi mesadisa nge mbote. Ebuna kana na nima nge melosa malongi na yandi, nge mesumba bima ya kukonda ngolo, to nge melanda kwa nge pula ve, kifu tavanda ya nani kana nzo na nge mebwa? Nge tabokutila ve maso to muntu yina kusalaka pula, luvunu? Mutindu mosi, kutunga Mukristu kele kisalu ya bantu mingi ketulaka maboko. Pula kekatukaka na Yehowa. Mukristu ya kwikama yina kelongaka mpi ketungaka longoki “kesalaka kumosi ti Nzambi.” Yehowa kesadisaka yandi. (1 Korinto 3:​9, NW) Kansi keba, longoki yandi mosi mpi fwete sala. Mukumba ya luzingu na yandi kevandaka na mukongo na yandi mosi. (Roma 14:12) Kana yandi kezola kuvanda ti bikalulu ya mbote ya Bakristu, yandi fwete tula ngolo na kuzwa yau ti kutunga yau na kati na yandi mosi.​—⁠2 Piere 1:​5-8.

7. Inki mambu kepesaka Bakristu yankaka mpasi, ye inki ngindu lenda pesa bau kikesa?

⁷ Keti yau kesonga nde kimuntu na beto ya kubutukila, mambu ya mezyunga beto, ti bikalulu ya balongi na beto kele na mfunu ve? Mpidina ve. Ndinga ya Nzambi kendima nde bima yai kele mfunu mpi kele na ngolo, yau lenda pusa muntu. Bikalulu mingi ya mbi kevandaka ya kubutukila mpi yo lenda vanda mpasi na kubika yau. (Nkunga 51:5; Roma 5:12; 7:​21-23) Malongi ya bibuti ti luzingu ya kelutaka na nzo lenda vanda ngolo ya mbote to ya mbi sambu na bana. (Bingana 22:6; Kolosai 3:21) Yezu bedisaka bamfumu ya mabundu ya Bayuda nde malongi na bau vandaka na ngolo mosi ya mbi sambu na bantu. (Matayo 23:​13, 15) Bubu mambu ya mutindu yina kenwanisaka beto yonso. Mu mbandu, kele ti bantu ya Nzambi bubu yai ya kemonaka mpasi sambu bo yelaka na mpasi. Bantu ya mutindu yai beto fwete tala bau na disu ya mbote ti mawa. Bau baka kikesa na kuzaba nde, yo mesonamaka ve nde bau tasalaka mpi mbi bonso bibuti na bau, to nde bau tavanda mpi bantu ya kukonda kwikama. Na kukwikila mbote dyambu yai, tala mwa bambandu ya bantotila ya Yuda ya ntangu ya ntama.

Bantotila ya Yuda: Konso Muntu Solaka Nzila na Yandi

8. Inki mbandu ya mbi Oziasi bikisilaka mwana na yandi Yotami, kansi inki nzila Yotami kuponaka?

⁸ Oziasi kumaka ntotila ya Yuda ntangu yandi vandaka kaka na bamvula 16. Yandi yalaka bamvula 52. Na kimfumu na yandi, yandi “salaka mambu yina ke pesaka Mfumu Nzambi kiese, yandi landaka mbandu ya tata na yandi Amasia.” (2 Bantotila 15:⁠3) Yehowa sadisaka yandi na kununga bitumba mingi. Kansi, mawa mingi, kununga pesaka yandi kwiti na ntu. Yandi kumaka lulendo mingi mpi kolamaka na Yehowa. Yandi vandaka nganga-nzambi ve, kansi yandi kwendaka kuyoka ndumbu na mesa-kimenga ya tempelo. Oziasi waka makasi ntangu bo songisaka yandi. Kansi na nima, Nzambi pesaka yandi ndola mosi ya nsoni: maladi ya lepre. Yandi zingaka dyaka ve na kati ya bantu, tii kuna lufwa na yandi. (2 Bansangu 26:​16-23) Inki mwana na yandi Yotami salaka na mambu yai yonso? Mwana yai lendaka kulanda luzingu ya tata na yandi, mpi kubuya Yehowa sambu na ndola ya yandi pesaka tata na yandi. Ziku bantu yankaka yonso na bwala vandaka bambandu ya mbi, sambu bau vandaka kusadila banzambi ya luvunu. (2 Bantotila 15:⁠4) Kansi, Yotami ponaka nzila na yandi mosi. Yandi “salaka mambu yina ke pesaka Mfumu Nzambi kiese.”​—⁠2 Bansangu 27:⁠2.

9. Inki bantu kupesaka mbandu ya mbote na Ahazi, kansi inki yandi salaka na luzingu na yandi?

⁹ Yotami yalaka bamvula 16, kaka ya kwikama na Yehowa. Na yau, yandi vandaka mbandu ya mbote ya kwikama sambu na mwana na yandi Ahazi. Ahazi vandaka ti bambandu yankaka ya mbote. Mwana-bakala yai zingaka ntangu mosi ti baprofete ya kwikama ya Nzambi bonso Yezaya, Ozea, ti Mishe. Kansi, yandi ponaka nzila ya mbi. “Yandi landaka ve bifu ya mbote ya nkaka na yandi Davidi.” Yandi salaka biteki ya Baale, yandi sambilaka yau, nkutu yandi yokaka bana na yandi na kupesa makabu na banzambi ya mimpani. Yandi yelaka na kisika ya mbote, kansi ntotila mpi nsadi ya Yehowa yai salaka kisalu mosi ya mbi.​—⁠2 Bansangu 28:​1-4.

10. Ahazi vandaka tata ya inki mutindu, kansi inki nzila mwana na yandi Ezekiasi kuponaka?

¹⁰ Na yina metala lusambu ya kugedila, Ahazi kemonana mpenza tata mosi ya kuluta mbi. Kana bo keponaka tata, mwana na yandi Ezekiasi lendaka kupona yandi ve! Bana yina ya Ahazi kuyokaka fwete vanda baleke to bambuta ya Ezekiasi. Keti Ezekiasi vandaka ya kukonda kwikama na Yehowa sambu yandi zingaka na kati ya mambi yai yonso? Ve, nkutu bo ketangaka Ezekiasi na kati ya bantotila ya nene ya kyeleka ya Yuda; muntu mosi ya kwikama, ya mayele, ya bantu vandaka kuzola. “Mfumu Nzambi vandaka ti yandi.” (2 Bantotila 18:​3-7) Na kutuba ya mbote, beto lenda ndima nde Nkunga 119 ke Ezekiasi muntu sonikaka yau ntangu yandi vandaka leke. Kana yau kele mpenza buna, beto lenda bakisa kikuma ya yandi sonikaka nde: “Mono me suka na kudila sambu na mawa.” (Nkunga 119:28) Ata mpasi ya nene kuvandaka, Ezekiasi landaka lutwadisu ya Ndinga ya Yehowa na luzingu na yandi. Nkunga 119:105 ketuba nde: “Mambu [to, “ndinga,” NW] na nge kele mwinda ke pelaka na nzila na mono, yo ke tambusaka makulu na mono.” Ee, Ezekiasi solaka nzila na yandi mosi: nzila ya mbote.

11. (a) Ata tata na yandi vandaka muntu ya mbote, inki mambu ya kuluta mbi Manase salaka na meso ya Yehowa? (b) Inki Manase salaka na nsuka ya luzingu na yandi, ye inki yau kelonga beto?

¹¹ Mambu ya kuyituka, ntotila ya kuluta mbote ya Yuda butaka ntotila ya kuluta mbi ya Yuda. Manase, mwana ya Ezekiasi, kotisaka lusambu ya biteki, ya bampeve ya mbi, ti nku na kiteso ya bantu vandaka memonaka ntete ve. Biblia ketuba nde Yehowa “tubaka na Manase ti bantu na yandi.” Ziku yandi tindaka baprofete na yandi na kutuba ti yandi. (2 Bansangu 33:10) Bayuda ketubaka nde Yehowa tindaka Yezaya, ebuna Manase zengazengaka yandi ti si. (Fwanisa ti Baebreo 11:37.) Ata yo kele kyeleka to luvunu, beto kezaba nde Manase wilaka Nzambi ve. Yandi salaka bonso nkaka na yandi Ahazi, yandi yokaka bana na yandi na kupesa makabu. Kansi, ntangu muntu ya mbi yai kotaka na mpasi ya nene, yandi balulaka ntima, ye yandi ponaka nzila ya mbote. (2 Bansangu 33:​1-6, 11-20) Mbandu na yandi kelonga beto nde muntu yina mepona nzila ya mbi mefwa ve kimakulu. Yandi lenda soba.

12. Inki mutindu Amoni ti mwana na yandi Yoziasi ponaka banzila ya kuswaswana na mutindu ya kusadila Yehowa?

¹² Amoni, mwana ya Manase, monaka mbote mutindu tata na yandi balulaka ntima. Kansi, yandi solaka nzila ya mbi. “Yandi salaka diaka masumu kuluta tata na yandi,” tii na ntangu ya bo fwaka yandi. Kyese mingi na kumona nde mwana na yandi Yoziasi landaka dikulu yina ve. Yoziasi bakaka dilongi na mambu yina kubwilaka nkaka na yandi Amoni. Yandi kumaka ntotila ti bamvula nana mpamba. Ntangu yandi kumaka na bamvula 16, yandi yantikaka kusosa Yehowa. Na nima, yandi kumaka ntotila mosi ya mbote mpi ya kwikama. (2 Bansangu 33:20–34:⁠5) Yandi ponaka nzila ya mbote.

13. (a) Inki dilongi beto mebaka na bambandu ya bantotila ya Yuda ya beto metadila? (b) Monisa mfunu ya malongi ya bibuti.

¹³ Mbandu ya bantotila nsambwadi ya Yuda ya beto metadila mepesa beto dilongi mosi ya ngolo. Bantangu yankaka, bantotila ya kuluta mbi vandaka bikisa bana ya mbote, bantotila ya mbote bana ya mbi. (Fwanisa ti Longi 2:18-21.) Beto ketuba ve nde malongi ya bibuti kele na mfunu ve. Bibuti yina kelonga bana na bau banzila ya Yehowa, kepesaka bau dibaku ya mbote ya kukuma bansadi ya kwikama ya Yehowa. (Kulonga 6:​6, 7) Kansi bana yankaka, ata bibuti na bau mesala ngolo, bau keponaka nzila ya mbi. Bankaka dyaka, bibuti lenda pesa bau mbandu ya mbi, kansi bau keponaka kuzola ti kusadila Yehowa. Yehowa kesakumunaka bau, ye luzingu na bau kekumaka mbote. Keti nge kekudiyulaka, bantangu yankaka, nde nge tavanda na inki ndonga? Beto tala inki Yehowa kesonga nge, sambu nge ndima nde nge lenda sola nzila ya mbote!

Yehowa Ketudilaka Nge Ntima!

14. Inki kesonga nde Yehowa kezabaka nsuka ya ngolo na beto?

¹⁴ Yehowa kemonaka mambu yonso. Bingana 15:3 ketuba nde: “Meso ya Mfumu Nzambi kele bisika yonso; yandi ke talaka bantu ya mbote ti bantu ya mbi.” Ntotila Davidi tubaka nde: “Nge [Yehowa] monaka mono ntangu mono me butuka ntete ve. [Ata luzingu na mono] vandaka me yantika ntete ve, yo vandaka ya kusonika na mukanda na nge.” (Nkunga 139:16) Yau kesonga nde Yehowa kezabaka bikalulu ya mbi yonso ya kenwanisaka nge. Ata nge butukaka ti yau, to nge melonguka yau na bantu yankaka kukonda kuzaba. Yandi kezaba inki mutindu mambu yina ke na kuyangisa nge. Yandi kezaba nsuka ya ngolo na nge kuluta nge mosi. Ye yandi kele Nzambi ya mawa. Yandi kelombaka beto ve na kusala mambu yina ya beto lenda ve.​—⁠Nkunga 103:​13, 14.

15. (a) Inki kepesa beto kikesa kana bantu yankaka mesalaka beto mbi na luzolo yonso? (b) Inki mukumba ya lukumu Yehowa mepesaka beto?

¹⁵ Dyaka, Yehowa kemonaka beto ve bonso bantu ya fwete bwa kaka sambu na mambu ya mekuminaka beto na luzingu. Kana bantu mesalaka beto mbi, beto baka kikesa na kuzaba nde, Yehowa kemengaka mambi yonso yina bantu kesalaka na luzolo yonso. (Nkunga 11:5; Roma 12:19) Kansi, keti yandi tabika beto kukonda ndola kana beto pona nzila ya mbi na luzolo yonso? Ve. Ndinga na yandi ketuba nde: “Konso muntu fweti baka kilo na yandi mosi.” (Galatia 6:⁠5) Yehowa mepesaka beto yonso, bigangwa na yandi ya ngangu, mukumba mosi ya lukumu: kusala mambu ya mbote ti kusadila yandi. Yo kele kaka mutindu Moize songaka dikanda ya Izraele nde: “Bubu yai mono ke pesa beno mambu yai na kusola: luzingu to lufwa, mambote to bampasi. Mono ke binga zulu ti ntoto na kuvanda batemwe na mono. Beno sola luzingu sambu beno zinga, beno ti bana na beno.” (Kulonga 30:19) Yehowa kezaba nde beto mpi lenda sola mambu ya mbote. Inki mutindu beto kezaba yau?

16. Inki mutindu beto lenda ‘landa na kusala kisalu ya luguluku na beto mosi’?

¹⁶ Tala mambu ya ntumwa Polo sonikaka: “Banduku na mono, . . . beno fweti landa kaka na kusala kisalu ya [“luguluku na beno mosi,” NW] na boma ti na matekita, sambu konso ntangu Nzambi ke salaka na [kati na] beno na mpila nde beno kuzola mambu yina ya yandi ke zolaka, mpi nde beno kumona mpila ya kusala yo.” (Filipi 2:​12, 13) Ngogo ya Kigreki ya bo mebalula awa nde ‘kusala kisalu’ ketendula, kumanisa kisalu ya nge mebanda. Yau yina, ke ti muntu ve ya bo mesonikaka nde yandi fwete bela to yandi fwete nunga. Yehowa kezaba nde beto lenda manisa kisalu ya yandi mepesaka beto: kisalu ya tanata beto na kuguluka. Kana buna ve, yandi zolaka sonikisa mambu yai ve na Biblia. Kansi, inki mutindu beto tanunga? Yau kele na ngolo na beto mosi ve. Kana beto vandaka ti ngolo ya kufwana, mfunu ya ‘boma ti matekita’ zolaka kuvanda ve. Kansi, Yehowa ‘ke salaka na kati na beto.’ Disongidila, mpeve santu na yandi kesalaka na mabanza ti na ntima na beto, yau kesadisaka beto na “kuzola” mpi na “kusala.” Kana Yehowa kepesa beto lusadisu yai na zola na yandi, keti kele ti kima ya takangisa beto na kusola nzila ya mbote ti kulanda yau? Ve!​—⁠Luka 11:⁠13.

17. Inki beto lenda soba na kimuntu na beto, ye inki mutindu Yehowa kesadisaka beto na kununga?

¹⁷ Beto tavanda ti mambu ya kunwana na yau: mu mbandu bikalulu ya mbi ti bupusi ya mbi yina tayangisaka beto na luzingu ya mvimba. Kansi, ti ngolo ya mpeve ya Yehowa, beto lenda nunga yau! Bonso Polo sonikilaka Bakristu ya Korinto, Ndinga ya Nzambi kele na ngolo ya kufwa “balupangu ya ngolo ya matadi.” (2 Korinto 10:⁠4) Na masonga yonso, Yehowa lenda sadisa beto na kusoba ngolo. Ndinga na yandi kesonga beto na ‘kubikisa bikalulu [to, “kimuntu,” NW] na beto ya ntama,’ beto “lwata bikalulu [to, “kimuntu,” NW] ya mpa . . . yina me fwanana na Nzambi yina salaka yo, y[a] ke monikaka na luzingu yina kele ya mbote, ya santu ti ya kieleka.” (Efezo 4:​22-24) Keti mpeve ya Yehowa lenda sadisa beto na kusoba mpidina kibeni? Ee, ntembe kele ve! Mpeve ya Nzambi kebutaka bambuma na kati na beto; disongidila, bikalulu ya kitoko kibeni, yina beto yonso kezolaka kukuna. Ya ntete kele zola.​—⁠Galatia 5:​22, 23.

18. Inki nzila muntu yonso lenda sola, ye yau tanata beto na kubaka inki lukanu?

¹⁸ Kyeleka mosi ya nene kele ya kuswekama awa. Yehowa kele ti zola mosi ya kele na nsuka ve. Yandi mesalaka beto na kifwani na yandi. (Kuyantika 1:26; 1 Yoane 4:⁠8) Yau yina, beto lenda pona nzila ya kuzola Yehowa. Kima ya tapesa beto luzingu na bilumbu kekwisa kele zola yai; kima yankaka ve, yo vanda luzingu na beto ya ntete, bifu ya beto melongukaka to ya beto butukaka ti yau. Kima ya kukondaka na Adami ti Eve sambu bau bikala ya kwikama na Edeni kele zola ya Yehowa Nzambi. Na kuguluka na Armagedoni, konso muntu na kati na beto fwete vanda na zola ya Yehowa. Mpidina yandi tanunga mumekanu ya nsuka na nsuka ya Luyalu ya Kristu ya Bamvu Funda. (Kusonga 7:14; 20:​5, 7-10) Konso muntu na kati na beto, ata luzingu na yandi kele inki mutindu, yandi lenda kuna zola ya mutindu yai. (Matayo 22:37; 1 Korinto 13:13) Bika beto baka lukanu ya kuzola Yehowa, mpi ya kutunga na zulu ya zola yina mvula na mvula.

Inki Nge Keyindula?

◻ Inki bantu kelongaka na kubalula ngindu ya Biblia yina ketuba nde muntu na muntu fwete nata mukumba na yandi?

◻ Inki kisalu ya kutunga muntu na muntu fwete sala na nitu na yandi?

◻ Inki mutindu bambandu ya bantotila ya Yuda kemonisa nde muntu na muntu keponaka nzila na yandi?

◻ Inki mutindu Yehowa kendimisa beto nde beto lenda sala mambu ya mbote na luzingu, ata beto kezinga ti bantu ya mbi?

[Kifwanisu ya kele na lutiti 29]

Keti bo sonikaka dezia luzingu na nge ya nge tazinga na ntwala ya kubutuka na nge?

[Kifwanisu ya kele na lutiti 31]

Tata ya Yoziasi vandaka muntu ya mbi, kansi Ntotila Yoziasi solaka nzila ya kusadila Yehowa