Luswaswanu na luzingu ya bantu keti Nzambi muntu zolaka nde yo vanda?

Mvutu kele kaka na ngogo mosi nde ve. Bika beto tala kikuma ya beto metubila mpidina.

NZAMBI zolaka nde luzingu kuvanda mutindu mosi sambu na bantu yonso sambu bo vanda na kyese. Sambu na yina metala mutindu yandi salaka muntu, beto ketanga mutindu yai: “Nzambi tubaka nde: ‘Ntangu yai beto ke sala bantu, bo ta vanda bonso beto, bo ta fwanana na beto. Bo ta yalaka bambisi ya masa, bandeke, ti bambisi yonso ya bwala ti ya mfinda, ya nene ti ya fyoti.’ ” Ntangu yandi manisaka na kusala bima yonso na ntoto, “Nzambi monaka nde mambu yonso ya yandi salaka yo kele mbote mpenza.”​—⁠Kuyantika 1:​26, 31.

Mutindu luzingu ya bantu keswaswana bubu yai, keti Nzambi lenda tuba nde “yo kele mbote mpenza”? Ata fyoti ve, sambu “Nzambi kele zola.” (1 Yoane 4:​8, NW) Biblia kezabisa beto nde “yandi ke talaka bantu yonso kiteso mosi” mpi nde “yandi ke salaka kaka mbote, yandi ke zengaka makambu na nzila ya mbote. Yandi ke salaka mambu yonso ya yandi ke tubaka, yandi ke taka luvunu ve, yandi kele muntu ya kieleka mpenza.” (Kulonga 10:17; 32:4; fwanisa ti Yobi 34:19.) Ebuna ntumwa Piere kusukisaka nde: “Ya kieleka, mono me bakisa nde Nzambi ke zolaka bantu yonso mutindu mosi. Na konso dikanda ya bantu yandi ke ndimaka bantu yina ke zitisaka yandi ti ke salaka mambu ya mbote.”​—⁠Bisalu 10:​34, 35.

Kana Nzambi kele zola, kana nde yandi kekabula-kabulaka ve, mpi kana yandi kesalaka kaka mbote, nki mutindu yandi salaka bantu ti kikalulu ya kukonda kusala mambu kiteso mosi sambu na bo yonso na yina metala nswa na bo ya kuzinga na kyese? Kubika nde bantu kudikabisa na kati na bo mpi kutula bo na luzingu ya keswaswana ve na kati na bo lenda wakana ve ata fyoti ti kimuntu na yandi. Yandi zolaka nde bo yonso “kubutuka ti kimpwanza mpi bo vanda ti lukumu mpi banswa kiteso mosi.” Kansi, yo ke pwelele nde bubu yai mambu kesalamaka ve mutindu yina. Sambu na nki?

Kisina ya kuswaswana ya luzingu

Ata beto tuba nde Nzambi kusalaka bantu sambu bo zinga kiteso mosi, yo kezo tuba ve nde yandi zolaka nde bo vanda kibeni kiteso mosi na mambu yonso. Bo zolaka kuvanda ya kuswaswana na mayele, na mambu ya bo mosi kezola, ti na kimuntu. Bo zolaka kuvanda mpi ya kuswaswana na biyeka na bo ti na kiteso ya kimfumu. Beto baka mbandu. Bakala ti nkento kele ve kiteso mosi na mambu yonso, sambu Nzambi salaka nkento sambu yandi ‘kusadisa’ bakala. (Kuyantika 2:18) Yo kele pwelele nde kiyeka ya tata ti ya bana kele mpi ya kuswaswana. Kansi ata mpidina, yo lombaka nde bantu yonso: babakala, bankento, ti bana, kuvanda ti nswa mosi yina Nzambi pesaka bo ya kuzwa bima ya lunga sadisa bo na kulungisa bampusa na bo ya ntetentete sambu bo vanda na kyese. Nzambi zolaka nde bo yonso kuvanda ti lukumu mpi pozisio mosi na meso na yandi.

Yo kele mutindu mosi mpi ti bana ya kimpeve yina Nzambi salaka na ntwala ya kusala bantu. Yandi pesaka bo bisalu ti mikumba ya kuswaswana. (Kuyantika 3:24; 16:​7-11; Yezaya 6:6; Yude 9) Ata mpidina, katula baluswaswanu yina vandaka na bisalu yina yandi pesaka bo, bo yonso vandaka ti nswa ya kubaka bima yonso yina Nzambi vandaka kupesa bo sambu bo zinga mpi bo vanda na kyese kiteso mosi. Na yau, bo monisaka na mutindu mosi ya mbote kibeni nde Nzambi kekabula-kabulaka ve.

Kansi, yo kele mawa mpenza na kumona nde kigangwa mosi ya mpeve yina Nzambi salaka kuyangalalaka ve ti mutindu yandi pesaka bantu bima kukonda kukabulakabula. Yandi zolaka kusala mambu mingi kuluta yina Nzambi pesaka yandi, yandi kumaka kuzola kisika mosi ya zulu, ya kuluta nene. Yandi yedisaka mpusa na yandi yina ya mbi, ebuna yandi kudikotisaka na kimbeni ti Yehowa, muntu ya kele ti nswa ya kuvanda ti kiyeka ya kuluta nene na zulu ya bima yonso, sambu yandi kele Ngangi. Na nima, mwana ya kimpeve yai ya kukolamaka pusaka bantu na kulomba Nzambi mambu mingi kuluta yina Yandi pesaka bo. (Kuyantika 3:​1-6; fwanisa ti Yezaya 14:​12-14.) Yo yina, bima ya Nzambi pesaka bantu sambu bo zinga mpi bo vanda na kyese kukumaka ya kuswaswana kibeni. Nkolami yina ya kimpeve, yina bo kebinga na Kusonga 20:2 (NW) nde “Diabulu mpi Satana,” yandi muntu kesalaka nde luzingu ya bantu kuvanda ya kuswaswana.

Keti kele ti kilumbu mambu tabaluka?

Mvutu kele kaka na ngogo mosi nde Ee!

Kansi nani muntu lenda balula mambu mutindu bantu kezolaka? Ntembe kele ve nde kele ti bamfumu mingi ya bantu yina menwanaka ti masonga yonso kibeni na bamvu-nkama mingi sambu na kumanisa mambu yai, kansi bo mekukaka ve ata fyoti. Bo mekukaka kaka na kubalula mambu fyoti. Yo yina kima menataka bantu mingi na kutuba nde bantu lenda ve kuvanda ti luzingu yina kele kiteso mosi sambu na bo yonso ata fyoti. Kansi, Yezaya 55:​10, 11 kemonisa nki kele dibanza ya Nzambi sambu na dyambu yai: “Mambu ya mono ke tubaka yo kele bonso mvula. Mutindu mvula ke katuka na zulu na kunoka, kansi yo ke vutuka kuna ve kana yo me podisa ntoto ve, kana yo me butisa yo ve, kana yo me menisa bima ve, kana yo me pesa ve bambuma ya bilanga na muntu ya bilanga ti madia na bantu ke zola kudia, mutindu yo yina mpi mambu yina ke katukaka na munoko na mono, yo ke vutuka[ka] ve mpamba na mono kana yo me sala ve ntete luzolo na mono, kana yo me lungisa ve bangindu na mono.”

Yo kepesa beto kyese mingi mpenza na kuzaba nde Yehowa Nzambi ketuba nde yandi talungisa lukanu na yandi ya kisina ya kupesa bantu yonso bima kiteso mosi sambu bo zinga mpi bo vanda na kyese! Yandi kele Nzambi ya ketubaka kyeleka, yandi mezengaka nde yandi fwete lungisa mambu ya yandi silaka. Yo kele kyese na kuzaba mpi nde yandi kele ti luzolo mpi ngolo ya kusala yo. Inki mutindu yandi tasala yo?

Mvutu kele na Kimfumu yina Yezu Kristu longaka balongoki na yandi yonso na kulomba: “Tata na beto kele na zulu, . . . Kimfumu na nge kwisa, luzolo na nge kusalama awa na ntoto bonso na zulu.” (Matayo 6:​9, 10) Ya kyeleka, Kimfumu ya Nzambi kele kima ya Yehowa tasadila sambu na “kufwa mpi kusukisa bimfumu yonso [ya keyala sesepi], ebuna yandi tayala tii kuna.”​—⁠Daniele 2:​44, NW.

Kimvuka ya mpa ya bantu tasalama na ntangu Kimfumu ya zulu tayantika kuyala. Yo yina, ntumwa Yoane sonikaka na mukanda ya nsuka ya Biblia, mukanda ya Kusonga, nde: “Mono monaka zulu ya mpa ti ntoto ya mpa. Zulu ya ntete ti ntoto ya ntete yo vilaka.” (Kusonga 21:⁠1) Mambu yonso ya mbi ya kesalaka nde luzingu ya bantu yonso kuvanda ve kiteso mosi, bunsukami, maladi, kukonda kuzaba mambu mingi, kukabana, ti bampasi yankaka ya bantu kemonaka tavila kimakulu.a

Bambangi ya Yehowa kebendaka dikebi ya bantu na Kimfumu yai kiteso ya kuluta mvu-nkama mosi meluta. (Matayo 24:14) Na nsadisa ya mikanda ya bo kesonikaka ti lusadisu ya bo mosi kepesaka, bo mekudipesaka na kusadisa bantu na kubaka nzayilu ya lukanu ya Nzambi mutindu Biblia ketuba yo. Kansi, kisalu na bo yai ya kulonga ya kesalama na inza ya mvimba, kepesaka kivuvu mpamba ve na bantu nde na bilumbu kekwisa bantu yonso tazinga kiteso mosi mpi tavanda na kyese, kansi yo kebutaka mpi mambote mingi ntangu yai na yina metala kunwana ti kikuma ya kesalaka nde luzingu ya bantu kuvanda ya kuswaswana. Beto tala nki mutindu yo tasalama.

[Noti na nsi ya lutiti]

[Bangogo sambu na kubenda dikebi ya kele na lutiti 5]

Nzambi zolaka nde bantu yonso kuvanda ti bima kiteso mosi sambu bo zinga mpi bo vanda na kyese