Bo Bakaka Kikesa

YO KEVANDAKA ve ntangu yonso pete na kubaka kikesa sambu na kusamuna. Yo yina, ntumwa Polo kutubaka nde kilumbu mosi, yandi “nwanaka ngolo” sambu na kusamuna. (1 Tesalonika 2:​2, NW) Keti ‘kunwana’ sambu na kusamuna kele mpenza mfunu? Beto kele ve na mfunu ya kumona baeksperiansi yina ketedimisa mawi mpi yina kesalamaka na meso ya bantu, kansi bantu ya Nzambi kevandaka mbala mingi na kyese na ntangu bo kebakaka kikesa sambu na kusamuna. Tala bambandu yai.

Mwana-nkento mosi ya bamvula nana, na zina ya Tara, vandaka kuwidikila na dikebi yonso ntangu longi na bo vandaka kuzabisa bana ya nzo-nkanda nde na Mvita ya Zole ya Inza ya Mvimba, Bayuda yina bo vandaka tula na ba kan ya konsatrasio vandaka kulwata kidimbu ya jaune ya Mbwetete ya Davidi sambu na kuzaba bo mbote. Tara vandaka kudiyula kana yandi lenda kangula munoko sambu na kutuba. Yandi keyibuka nde: “Mono sambaka meso ya kukangula.” Na nima, yandi tombulaka diboko mpi yandi tubaka nde Bambangi ya Yehowa vandaka mpi na ba kan yina, mpi bo vandaka kulwata kidimbu ya triangle ya violet. Longi yangalalaka na kuwa dyambu yai, ebuna, yandi pesaka Tara matondo. Komantere ya Tara kangulaka nzila na masolo yankaka ti longi. Na nima, longi songaka bana ya nzo-nkanda na yandi yonso kaseti video yina kele na ntu-dyambu La fermeté des Témoins de Jéhovah face à la persécution nazie.

Na Guinée, na Afrika ya Westi, nsamuni mosi ya leke ya mebaka ntete ve mbotika zina na yandi Irène, zolaka kutomisa kisalu na yandi ya kusamuna. Misionere yina longukaka Biblia ti yandi, syamisaka yandi na kumeka kukabula Nzozulu ya Nkengi ti Réveillez-vous ! na banduku nandi ya nzo-nkanda. Irène vandaka kuwa ntima boma-boma na kusala yo sambu bana ya nzo-nkanda na bo vandaka kundima ve kyeleka. Kansi, sambu misionere pesaka yandi kikesa, Irène bakaka lukanu ya kwenda kusolula ntetentete ti mwana ya nzo-nkanda na bo yina vandaka kumonana nde yandi kele mbeni ya ntete ya kyeleka. Irène kuyitukaka na kumona nde mwana-nkento yango kuwidikilaka yandi, mpi yandi ndimaka baperiodike na kyese yonso. Bana ya nzo-nkanda yankaka ndimaka mpi kubakaka baperiodike. Irène kukabulaka baperiodike mingi kibeni na ngonda yina kuluta kiteso ya yandi kabulaka na bangonda tanu yina kuyitaka.

Na kisanga ya Trinité, nkuluntu mosi vandaka kuwa boma mingi na kwenda kukutana ti mfumu ya ekole mosi sambu na kumonisa yandi nde Réveillez-vous ! kevandaka na malongi mingi ya mfunu. Ata mpidina, yandi bakaka kikesa. Yandi ketuba nde: “Mono sambaka ntangu mono kotaka na lupangu. Mu ndimaka ve ntangu mu monaka kiteso ya kyese yina mfumu ya ekole kuwaka.” Yandi bakaka Réveillez-vous ! yina vandaka kutubila kivuvu ya baleke ya bubu (Quel espoir pour les jeunes?) mpi yandi ndimaka na kusadila yo sambu na kulonga bana ya nzo-nkanda na yandi. Banda pana, yandi mebaka dezia baperiodike 40 yina ketubila masolo ya mutindu na mutindu.

Ntangu Vaughn vandaka leke, yandi vandaka kumona ntangu yonso kisalu ya kusamuna mpasi. Yandi ketuba nde: “Mono vandaka kuwa boma, maboko na munu vandaka kutoka, mpi mu vandaka kutuba ntinuntinu. Mu vandaka kuka ve kutuba malembe.” Ata mpidina, yandi kumaka ministre ya ntangu yonso. Kansi, yo vandaka kaka mpasi sambu na kutuba ti kikesa. Kilumbu mosi, na nima ya kutambula-tambula mpamba na kusosa kisalu, yandi lembaka mingi. Yandi zolaka kuta kimbangi na muntu mosi yina vandaka na tre, “ata kilumbu yango mevanda mbi, kima ya mbote lendaka kumonana.” Kansi, yandi waka boma ya bambuta-bantu ya bakomersa yina vandaka na kati ya tre yina ketambulaka na nsi ya ntoto. Nsukansuka, yandi bakaka kikesa ya kutuba na mununu mosi yina vandaka penepene na yandi. Bo solulaka mingi. Ebuna, komersa mosi kutubaka nde: “Nge ke mwana ya fyoti kansi, nge keyufula bangyufula ya kitoko mutindu yai.” Ebuna, Komersa yango kuyulaka yandi nde: “Keti nge mesalaka nzo-nkanda ya banganga-Nzambi?” Vaughn kuvutulaka nde: “Ve, mu ke Mbangi ya Yehowa.” Muntu yango kutubaka na kumweta nde: “Ah! Ntangu yai mu mebakisa.”

Bambangi yai yonso ti bankaka mingi kibeni kele na kyese sambu bo bakaka kikesa ya kusamuna. Keti nge mpi tasala mutindu mosi?

[Kifwanisu ya kele na lutiti 17]

Tara

[Kifwanisu ya kele na lutiti 17]

Vaughn