Mpeve Santu Kesadisaka na Kupona Bankengi ti Bansadi ya Kisalu
“Beno keba beno mosi, beno keba mbote-mbote mameme yina ya Mpeve ya Nzambi me pesaka beno na kutala.”—BISALU 20:28.
1, 2. Inki mutindu Yezaya 60:22 ke na kulungana?
YEHOWA kutubaka tuka ntama nde dyambu mosi ya nene tasalama na ntangu ya nsuka. Na nsadisa ya profete Yezaya, Yandi tubaka nde: “Ata bantu kele mingi ve, mono ta kumisa bo mingi; ata bo kele mfunu mingi ve, mono ta kumisa bo ngolo mingi. Mono Mfumu Nzambi, mono ta sala nswalu mambu yai, mono ta sala yo na ntangu na yo.”—Yezaya 60:22.
2 Keti kele ti mambu ya kemonisa nde mbikudulu yai ke na kulungana bubu yai? Ee! Na bamvula 1870, dibundu mosi ya Bambangi ya Yehowa kusalamaka na Allegheny, na État ya Pennsylvanie na États-Unis. Banda na kimvuka yina ya fyoti, mabundu mingi mebutukaka mpi ke na kutambula mbote na inza ya mvimba. Bansamuni ya Kimfumu mingi, disongidila dikanda ya ngolo, ke na kuvukana bubu yai na mabundu kuluta 91 000 yina kele na bansi 235 na ntoto ya mvimba. Ntembe kele ve nde, mambu yai kendimisa beto nde Yehowa ke na kusala nswalu sambu na kuvukisa Bakristu ya kyeleka na ntwala nde “mpasi ya nene,” ya mekuma mpenza penepene, kuyantika.—Matayo 24:21, NW; Kusonga 7:9-14.
3. Kubaka mbotika ‘na zina ya Tata, ti ya Mwana, ti ya Mpeve-Santu’ kezola kutuba inki?
3 Na nima ya kudipesa na Yehowa, mpi sambu na kulungisa mambu yina Yezu kutubaka, bantu yai kubakaka mbotika “na zina ya Tata ti ya Mwana ti ya Mpeve-Santu.” (Matayo 28:19) Kubaka mbotika “na zina ya Tata” ketendula nde bantu yai ya mekudipesaka kendimaka nde Yehowa kele Tata na bo ya kele na zulu mpi nde yandi Muntu kepesaka luzingu mpi bo kelemfukilaka kimfumu na yandi. Mbotika ‘na zina ya Mwana’ kezola kutuba nde bo kendimaka Yezu Kristu nde yandi kele Muntu ya kupesaka nkudulu, Ntwadisi, mpi Ntotila na bo. Bo kendimaka mpi nde mpeve santu ya Nzambi, to ngolo na yandi, kutwadisa luzingu na bo. Yo kesonga nde bo kebakaka mbotika ‘na zina ya Mpeve-Santu.’
4. Inki mutindu baministre yina kele Bakristu ketumbamaka?
4 Na ntangu bo kebakaka mbotika, balongoki ya mpa ketumbamaka bonso baministre ya Yehowa Nzambi. Nani muntu ketumbikaka bo? Na kutuba ya mbote, mambu ya bo ketuba na 2 Korinto 3:5 kelunganaka na bo: “Ngolo yina ya beto ke salaka kisalu yai [bonso baministre] ke katukaka na Nzambi.” Yo kele lukumu ya nene kibeni sambu na bo na kubaka ntumbama na maboko ya Yehowa Nzambi yandi mosi! Na nima ya mbotika na bo, bo talanda na kuyela na kimpeve bonso baministre ya “Nsangu ya Mbote” kana bo kendima kaka nde mpeve ya Nzambi kutambusa bo mpi kana bo kesadila kaka Ndinga na yandi.—Matayo 24:14; Bisalu 9:31.
Nzambi Muntu keponaka bo kansi bantu ve
5. Nani keponaka bankengi ti bansadi ya kisalu? Tendula.
5 Ntalu ya baministre ya kikesa yina kekuma kaka mingi kelombaka bankengi ti bansadi ya kisalu ya kuyela sambu na kusungimina bampusa na bo ya kimpeve. (Filipi 1:1) Inki mutindu bo keponaka babakala ya kimpeve ya mutindu yai? Bo kesalaka ve bonso na Kikristu. Mu mbandu, bo keponaka ve bankengi na kulandaka bansiku ya demokrasi, disongidila, kusadisa vote na bantu ya dibundu mosi. Kansi, Nzambi muntu keponaka bo. Inki yo kezola kutuba?
6. (a) Teokrasi ya kyeleka kele inki? (b) Sambu na nki bo kelandaka bansiku ya teokrasi na ntangu bo keponaka bankuluntu ti bansadi ya kisalu?
6 Na bunkufi, teokrasi ya kyeleka kele luyalu yina Nzambi ketwadisaka. Bambangi ya Yehowa kendimaka na luzolo yonso na kulemfuka na luyalu na yandi mpi kusala kumosi sambu na kulungisa luzolo ya Nzambi. (Nkunga 143:10; Matayo 6:9, 10) Nzambi muntu keponaka Bakristu yina fwete kuma bankengi, to bankuluntu, ti bansadi ya kisalu sambu bo kelandaka bansiku yina Nzambi yandi mosi mepesaka yina kele na Masonuku ya Santu. Ebuna sambu yandi kele “mfumu ya bantu yonso,” Yehowa muntu kele ti nswa ya kusonga mutindu organizasio na yandi ya kemonana fwete tambula.—1 Bansangu 29:11; Nkunga 97:9.
7. Inki mutindu lutwadisu kesalamaka na Bambangi ya Yehowa?
7 Bambangi ya Yehowa kesalaka ve mambu na ntu na bo mosi sambu na kuzenga mutindu organizasio na bo ya kimpeve fwete tambula bonso mabundu mingi ya Kikristu kesalaka. Bakristu yai ya masonga kesalaka ngolo na kuzitisa bansiku ya Yehowa. Bantu yina kekumaka bankengi, kiyeka na bo kekatukaka ve na bamfumu ya dibundu, ya kele ti biyeka ya kuswaswana, to mutindu bo kesalaka na dibundu ya misioni. Kana bangindu ya inza kesosa kukota na ntangu ya kupona, bantu ya Yehowa kebuyaka na kulanda yo. Bo kelandaka na kwikama yonso mambu yina bantumwa kutubaka na mvu-nkama ya ntete ntangu bo tubaka nde: “Beto fweti lemfuka ntete na Nzambi, kansi na bantu ve.” (Bisalu 5:29) Yo yina, Bambangi kelemfukilaka Nzambi na mambu yonso. (Baebreo 12:9; Yakobo 4:7) Nzambi kendimaka bo ntangu bo kesala mambu na nzila ya teokrasi.
8. Inki mutindu bansiku ya demokrasi ti teokrasi meswaswana?
8 Beto bansadi ya Teokrate ya Nene, Yehowa, beto fwete vila ve luswaswanu yina kele na kusala mambu na nzila ya demokrasi ti ya teokrasi. Na demokrasi, yo kelombaka nde konso kimvuka ya bantu kuvanda ti kandida na bo mpi mbala mingi bo kesalaka kampanye sambu na kubaka kisika ya bo kenwanina mpi bantu mingi kekwendaka kusala vote. Kansi bo kesadilaka ve mitindu yina sambu na kupona bantu na teokrasi. Bantu ve keponaka bankengi; bo keponaka bo mpi ve na kimvuka ya nene ya mezabana na nsiku. Ntangu yandi vandaka kutubila mutindu Yezu mpi Yehowa kuponaka yandi sambu na kuvanda ‘ntumwa ya bantu yina kele Bayuda ve,’ Polo kuzabisaka bantu ya Galatia nde “kisalu na mono ya kintumwa katukaka ve na bantu to na lusadisu ya muntu mosi. Kansi Yesu Kristo ti Tata Nzambi yina tedimisaka Yesu na lufwa, bo bantu tulaka mono ntumwa.”—Roma 11:13; Galatia 1:1.
Mpeve Santu kuponaka bo
9. Inki Bisalu 20:28 ketuba sambu na yina metala kupona bankengi?
9 Polo kuyibusaka bankengi yina vandaka kuzinga na Efezo nde Nzambi muntu kuponaka bo na nsadisa ya mpeve santu. Yandi tubaka nde: “Beno keba beno mosi, beno keba mbote-mbote mameme yina ya Mpeve ya Nzambi me pesaka beno na kutala. Beno keba mbote-mbote Dibundu yina ya Nzambi bakaka na menga ya mwana na yandi mpenza.” (Beto bantu metengimisa bisono; Bisalu 20:28.) Bankengi yina vandaka na mfunu ya kulanda lutwadisu ya mpeve santu na ntangu bo vandaka kulungisa mikumba na bo bonso bankengi ya mameme ya Nzambi. Kana muntu mosi yina bo ponaka na kisika yina vandaka kulungisa dyaka ve mambu yina Nzambi kelombaka, na ntangu yina mefwana mpeve santu vandaka kumonisa yo sambu bo katula yandi na kisika yina.
10. Sambu na nki beto ketuba nde mpeve santu kesalaka kisalu ya mfunu na kupona bantu na teokrasi?
10 Inki mutindu mpeve santu kesalaka kisalu mosi ya mfunu? Ntetentete, disolo yina kemonisa mambu yina muntu fwete lungisa sambu na kubaka mikumba ya kimpeve bo sonikaka yo na ngolo ya mpeve santu. Na mikanda na yandi na Timoteo ti Tito, Polo kupesaka lisiti ya mambu yina bankengi ti bansadi ya kisalu fwete lungisa. Na kimvuka, yandi tangaka mambu 16 ya kuswaswana yina bo fwete lungisa. Mu mbandu, bankengi fwete vanda na bifu ya mbi ve, bo lenda lutisa kiteso ve na konso mambu yina, bo fwete kudiyala, bo lenda vanda bantu ya kisakasaka ve, bo fwete vanda bantu ya kuzaba kuyamba banzenza, bo fwete zaba kulonga bantu mbotembote, mpi bo fwete vanda bamfumu ya mabuta ya kepesaka mbandu ya mbote. Yo vandaka kulomba kutadila bo na mutindu bo kesadilaka malafu, bo fwete vanda ve bantu yina kezolaka mbongo mingi, mpi bo fwete zaba kudiyala. Mutindu mosi, yandi pesaka bansiku ya nene yina bantu ya kesosa kukuma bansadi ya kisalu fwete landa.—1 Timoteo 3:1-10, 12, 13; Tito 1:5-9.
11. Tanga mwa mambu yina babakala yina kesosa kubaka mikumba na kati ya dibundu fwete lungisa.
11 Kana beto tadila mambu yai ya bo fwete lungisa, yo kesonga nde Bakristu yina kele ti mikumba na dibundu ya Yehowa fwete pesa mbandu ya mbote na luzingu na bo. Babakala yina kesosa kubaka mikumba na kati ya dibundu fwete monisa nde mpeve santu kesala na kati na bo. (2 Timoteo 1:14) Yo fwete monana pwelele nde mpeve ya Nzambi ke na kubuta na kati ya bantu yai bambuma yai: ‘Zola, kiese, ngemba, kukanga ntima, ntima ya mbote, kusala mambu ya mbote, lukwikilu, ntima pima, kudiyala.’ (Galatia 5:22, 23) Bambuma yina tamonana na mutindu bo kezinga ti bampangi na bo Bakristu mpi ti bantu yankaka. Ya kyeleka, bankaka lenda vanda ngolo na kumonisa bambuma yankaka ya mpeve, kansi bankaka lenda lungisa na kiteso mosi ya kuluta mambu yankaka yina bankengi kelungisaka. Kansi, na luzingu na bo yonso, bantu yina ketula kivuvu nde bo pona bo bonso bankengi to bonso bansadi ya kisalu fwete monisa nde bo kele babakala ya kimpeve, ya kelungisa mambu yina Ndinga ya Nzambi kelomba bo.
12. Banani beto lenda tuba nde mpeve santu keponaka bo?
12 Ntangu Polo kulongisilaka bantu yankaka na kusala bonso yandi, yandi tubaka yo na kimpwanza yonso sambu yandi mosi vandaka kusala bonso Yezu Kristu, yina ‘kubikilaka beto mbandu sambu beto landa yandi.’ (1 Piere 2:21; 1 Korinto 11:1) Bantu yina melungisa mambu yina bo kelomba na Masonuku na ntangu bo mepona bo sambu na kukuma bankengi to bansadi ya kisalu, beto lenda tuba nde mpeve santu mepona bo.
13. Inki mutindu mpeve santu kesadisaka bantu yina kepesaka bazina ya babakala yina fwete sala na dibundu?
13 Kele ti dyambu yankaka ya kesongaka mutindu mpeve santu kesalaka na ntangu ya kupesa bazina mpi kupona bankengi. Yezu kutubaka nde: “Tata yina kele na zulu ta pesa mpenza Mpeve na yandi na bantu yina ke lombaka yandi.” (Luka 11:13) Yo yina, ntangu bankuluntu ya dibundu mosi kekutanaka sambu na kupesa zina ya muntu mosi ya bo kezola kupesa mikumba ya dibundu, bo kelombaka mpeve ya Nzambi sambu yo twadisa bo. Bo kepesaka bazina na kulandaka mambu yina Ndinga ya kupemama ya Nzambi ketuba, mpi mpeve santu kesadisaka bo na kuzaba kana muntu yina bo mepona kelungisa mambu yina Masonuku kelombaka. Bantu yina kepesa bazina fwete bika ve nde bupusi ya mambu yina kemonikaka na meso, kiteso ya bantu yango melongukaka, to mayele na bo ya kubutukila kukusa bo. Bo fwete tula ntetentete dikebi na bo na kuzaba kana muntu yango kele muntu ya kimpeve, muntu yina bantu ya dibundu tabuya ve ata fyoti na kwenda kulomba yandi ndongisila ya kimpeve.
14. Inki mambu Bisalu 6:1-3 kelonga beto?
14 Kana bimvuka ya bankuluntu mevukana ti bankengi ntambudi sambu na kupesa bazina ya bampangi yina lenda kuma bankuluntu mpi bansadi ya kisalu, bo fwete sala yo na kulandaka mbandu ya mambu yina kusalamaka na mvu-nkama ya ntete. Na ntangu yina, bo vandaka na mfunu ya babakala ya kuyela na kimpeve sambu na kulungisa mukumba mosi ya nene. Nto-kimvuka kupesaka ndongisila yai: “Beno sola babakala nsambwadi na kati na beno bayina ke na bikalulu ya mbote. Bo fweti vanda bantu yina me fuluka na Mpeve ya Nzambi, bo fweti vanda mpi na mayele mingi. Ebuna beto ta tula bo na kisalu yai.” (Bisalu 6:1-3) Ata bantu ya kupesaka bazina ya bantu yango kele bayina vandaka kuzinga ti bo, bantu ya kuponaka bo kele bayina vandaka na Yeruzalemi ya kuvandaka ti kiyeka ya kusala yo. Bubu yai mpi mambu kesalamaka mutindu mosi.
15. Inki mutindu Nto-Kimvuka kekotaka na mambu ya metala kupona bantu?
15 Nto-Kimvuka ya Bambangi ya Yehowa yo mosi keponaka bantu yonso yina kesalaka na ba Komite ya Filiale. Na ntangu bo kepona muntu yina lenda baka mukumba ya nene ya mutindu yina, Nto-Kimvuka ketadilaka mambu yina Yezu kutubaka: “Muntu yina ya Nzambi me pesaka mambu mingi, yandi ta lomba yandi mpi mambu mingi; na muntu yina ya Nzambi me pesaka kiyeka mingi, yandi ta lomba yandi mpi mambu ya kuluta mingi.” (Luka 12:48) Katula mukumba ya kupona bantu ya Komite ya Filiale, Nto-Kimvuka keponaka dyaka bankuluntu ya Betele, ti bankengi-ntambudi. Kansi, Nto-Kimvuka kepesaka kiyeka na bampangi ya kuyela sambu bo pona bantu yankaka. Masonuku kele mpi ti bambandu ya mutindu yai.
‘Tula Bambuta ya dibundu, mutindu mono songaka nge’
16. Sambu na nki Polo kubikaka Tito na Kreta, mpi nki yo kesonga sambu na yina metala kupona bantu na teokrasi bubu yai?
16 Polo kusongaka Tito, muntu ya vandaka kusala ti yandi nde: “Mono bikisaka nge na kisanga ya Kreta sambu nge kubika kuyidika mambu yonso yina bikaka, nge kutula bambuta ya Dibundu na konso bwala, landa mambu yonso mutindu mono songaka nge.” (Tito 1:5) Na nima, Polo kupesaka lisiti ya mambu yina Tito fwete mona na bantu yina yandi fwete pona. Bubu yai mpi, Nto-Kimvuka keponaka bampangi ya kuyela na bafiliale mpi yandi kepesaka bo kiyeka ya kupona bankuluntu ti bansadi ya kisalu. Bo kelandilaka mbotembote bampangi yina bo mepona na kusala mambu na zina ya Nto-Kimvuka sambu na kuzikisa kana bo kebakisaka mpi kelandaka bandongisila yina Masonuku kepesaka sambu na yina metala kupona bankuluntu ti bansadi ya kisalu. Yo yina, bantu ya kuyela yina bo keponaka sambu na kusala na mabundu ya Bambangi ya Yehowa na inza ya mvimba, bo keponaka bo na lutwadisu ya Nto-Kimvuka.
17. Inki mutindu biro ya filiale kesalaka kana bo metindila bo bazina sambu na kupona bankengi ti bansadi ya kisalu?
17 Kana bo metinda bazina ya bampangi na biro ya filiale ya Société Watchtower, sambu bo pona bo na kuvanda bankuluntu mpi bansadi ya kisalu, babakala yina kele ti eksperiansi kelombaka lutwadisu ya mpeve ya Nzambi sambu yo twadisa bo na kupona bantu yango. Babakala yai kezabaka nde bo tasamba sambu na mambu yai, ebuna bo kezabaka nde bo fwete tula ve maboko na bo ntinu-ntinu na zulu ya muntu yina bo kezola kupona, kana ve bo takota na masumu na yandi.—1 Timoteo 5:22.
18, 19. (a) Inki mutindu bo kezabisaka bazina ya bantu yankaka yina bo mepona? (b) Inki mutindu bo kesalaka sambu na kupesa bazina mpi kupona bantu?
18 Kana bo mepona bantu, kimvuka mosi yina kele ti kiyeka lenda sonika mambu yonso na mukanda mosi yina kele ti kidimbu ya la Société sambu na kuzabisa bo. Bo lenda sadila mukanda yango sambu na kutula bazina ya bampangi mingi ya bo mepona.
19 Kupona bantu na nzila ya teokrasi kesalamaka na Yehowa yandi mosi na nzila ya Mwana na yandi mpi ya “mpika ya kwikama mpi ya mayele” ti Nto-Kimvuka na yo, nzila ya kemonanaka yina Nzambi kesadilaka na ntoto. (Matayo 24:45-47, NW) Kupesa bazina ti kupona yonso kesalamaka, to ketwadisamaka, na mpeve santu. Yo kele ya kyeleka sambu mambu yina bantu fwete lungisa kele na Ndinga ya Nzambi, ya bo sonikaka na ngolo ya mpeve santu, mpi muntu yina bo mepona kemonisaka nde yandi kemonisa bambuma ya mpeve yina. Yo yina, kana bo mepona bantu, beto fwete zaba nde mpeve santu mepona bo. Kaka mutindu bo vandaka kupona bankuluntu ti bansadi ya kisalu na mvu-nkama ya ntete na kulandaka bansiku ya teokrasi, bubu yai mpi yo kesalamaka mutindu mosi.
Beto kepesa Yehowa matondo sambu na lutwadisu na yandi
20. Sambu na nki beto kendima mambu yina Davidi kutubaka na Nkunga 133:1?
20 Na ntangu yai ya beto kekuma na kimvwama mingi ya kimpeve mpi ya kisalu ya kulonga nsangu ya Kimfumu ke na kuyela mingi, beto kepesa Yehowa matondo sambu yandi mosi muntu ke na kupona bankengi ti bansadi ya kisalu. Kulanda Masonuku mutindu yai kesadisaka beto na kuzitisa bansiku ya nene ya lunungu ya Nzambi na kati ya Bambangi ya Yehowa. Dyaka, mpeve ya Bukristu ti kikesa ya babakala kesalaka nde beto bansadi ya Yehowa kuvanda na ngemba mpi na bumosi. Bonso muyimbi-bankunga Davidi, beto mpi ketuba na ndinga ya ngolo nde: “Kiese mingi kana bantu ya Nzambi ke zinga kisika mosi bonso bampangi.”—Nkunga 133:1.
21. Inki mutindu Yezaya 60:17 ke na kulungana bubu yai?
21 Beto kepesa Yehowa matondo mingi sambu na lutwadisu na yandi na nsadisa ya Ndinga mpi ya mpeve santu na yandi! Ebuna, mambu yina bo ketuba na Yezaya 60:17 kele mpenza na ntendula mingi sambu na beto: “Na kisika ya bronze mono ta tindila nge wolo, na kisika ya bibende mono ta tindila nge arza, na kisika ya banti mono ta tindila nge bronze, na kisika ya matadi mono ta tindila nge bibende. Bamfumu na nge ta monisa nge diaka mpasi ve, bo ta yala nge na ngemba ti na masonga.” Sambu Bambangi ya Yehowa kesadilaka malembemalembe bansiku ya teokrasi mingi, beto kemona balusakumunu yai na organizasio ya ntoto ya Nzambi.
22. Sambu na nki mambu beto kepesa mpenza matondo na Yehowa, mpi beto fwete baka desizio ya kusala inki?
22 Beto kepesa mpenza matondo sambu na bangidika ya teokrasi yina beto kesadilaka. Beto kepesa mpi matondo mingi sambu na kisalu ya mpasi kansi ya kyese yina bankuluntu ti bansadi ya kisalu yina bo keponaka na mpeve santu kesalaka. Beto kepesa lukumu mingi na Tata na beto ya kele na zulu, yina mepesaka beto kimvwama ya kimpeve yai mpi ya mesakumunaka beto mingi mutindu yai. (Bingana 10:22) Yo yina, beto baka desizio ya kulanda na kutambula kumosi ti organizasio ya Yehowa. Kuluta dyaka, bika beto salaka kumosi sambu na lukumu mpi nkembo ya zina ya nene mpi ya santu ya Yehowa.
Inki Mutindu Nge Tavutula?
• Sambu na nki beto lenda tuba nde bankuluntu ti bansadi ya kisalu bo keponaka bo na kulandaka bansiku ya teokrasi, kansi ya demokrasi ve?
• Inki mutindu mpeve santu keponaka Bakristu yina kebakaka mikumba?
• Inki mutindu Nto-Kimvuka kekotaka na mambu ya metala kupona bankuluntu ti bansadi ya kisalu?
• Sambu na yina metala mutindu ya kupona bantu na kulandaka bansiku ya teokrasi, sambu na nki beto fwete pesa Yehowa matondo?
[Bifwanisu ya kele na lutiti 9]
Bo keponaka bankuluntu ti bansadi ya kisalu na kulandaka bansiku ya teokrasi