Beno Vanda Kaka na Kyese na Kisalu ya Yehowa

“Beno vanda na kiese ntangu yonso sambu na Mfumu Yesu. Mono ke tuba diaka nde: Beno vanda na kiese!”​—FILIPI 4:4.

1, 2. Inki mutindu mpangi mosi ya bakala ti dibuta na yandi kukukaka na kuvanda kaka na kyese ata bo vidisaka bima yonso yina bo vandaka na yo?

JAMES, Mukristu mosi ya bamvula 70 yina vandaka kuzinga na Sierra Leone, kusalaka kisalu mingi luzingu na yandi ya mvimba. Yindula kyese yina yandi vandaka na yo ntangu, nsukansuka, yandi lungisaka mbongo ya kusumba nzo mosi ya mwa mbote yina vandaka ti basuku iya! James ti dibuta na yandi kukotaka na nzo na bo. Kansi, mwa ntangu fyoti na nima, mvita kuyantikaka na insi yango, ebuna nzo na bo yonso kuyokamaka. Bo vidisaka nzo na bo, kansi bo vidisaka ve kyese na bo. Sambu na nki?

² James ti dibuta na yandi kutulaka ve meso na bo na bima yina kuvilaka, kansi na bima yina ya bo bikalaka na yo. James ketendula nde: “Ata ntangu beto vandaka na boma ya mingi, beto vandaka kusala balukutakanu, kutanga Biblia, kusamba kumosi, mpi kukabula mwa bima ya beto vandaka na yo ti bantu yankaka. Beto kukaka kubikala na kyese na beto sambu beto vandaka tula dikebi mingimingi na bangwisana ya mbote yina beto vandaka na yo ti Yehowa.” Ntangu bo vandaka kutala balusakumunu yina bo vandaka na yo, mingimingi, ngwisana ya kitoko yina muntu na muntu kuvandaka na yo ti Yehowa, Bakristu yai ya kwikama ‘kuvandaka kaka na kyese.’ (2 Korinto 13:11, NW) Ya kyeleka, kukanga ntima na ntwala ya mambu yina bo kutanaka na yo kuvandaka ve dyambu mosi ya pete. Kansi, kyese na bo na Yehowa kumanaka ve.

3. inki mutindu Bakristu yankaka ya ntete kuvidisaka ve kyese na bo?

³ Bakristu ya ntete kukutanaka ti bampasi bonso yina James ti dibuta na yandi kukutanaka ti yo. Ntete, ntumwa Polo kusonikaka bangogo yai na Bakristu ya Bayuda: “Beno vandaka kundima na kiese nde bo kwenda na [bima na beno].” (Beto bantu metengimisa bisono.) Na nima, Polo kutendulaka kisika kyese na bo vandaka kukatuka: “Sambu beno zaba nde beno ke na kimvwama ya kuluta mbote yina ke zingaka mvula na mvula.” (Baebreo 10:34) Ya kyeleka, Bakristu yina ya ntete kuvandaka ti kivuvu mosi ya ngolo. Bo vandaka kutula ntima na bo ya mvimba nde bo tabaka kima mosi yina muntu lenda yiba ve, yina muntu lenda katula ve, kima yango kele “moyo yina kele bonso mpu ya lukumu” na Kimfumu ya Nzambi na zulu. (Kusonga 2:10) Bubu yai, kivuvu na beto ya Bukristu, yo vanda ya kuzinga na zulu to na ntoto, lenda sadisa beto na kuvanda kaka na kyese ata na ntangu ya mpasi.

“Vanda na Kyese Sambu na Kivuvu”

4, 5. (a) Sambu na nki ndongisila yina Polo kupesaka Bakristu ya Roma nde bo “vanda na kyese sambu na kivuvu” kukuminaka bo na ntangu ya mbote? (b) Inki lenda sala nde Mukristu kuvidisa kivuvu na yandi?

⁴ Ntumwa Polo kupesaka bampangi na yandi Bakristu yina kuvandaka na Roma kikesa ya ‘kuvanda na kyese sambu na kivuvu’ ya luzingu ya mvula na mvula. (Roma 12:12, NW) Ndongisila yai kukuminaka bampangi ya Roma na ntangu mosi ya mbote mpenza. Bamvula kumi kulungaka ve banda Polo kusonikilaka bo mambu yai, bo kumaka kunyokula bo ngolo, mpi kupesa bamingi mpasi, nkutu bankaka bo fwaka bo na nswa ya Mfumu Nero. Kansi, ntembe kele ve nde lukwikilu yina bo vandaka na yo nde Nzambi tapesa bo mpu ya luzingu ya yandi silaka na kupesa bo, kusadisaka bo na ntangu bo kutanaka ti bampasi. Ebuna beto bubu yai?

⁵ Sambu beto kele Bakristu, beto mezaba nde beto mpi tamona mpasi. (2 Timoteo 3:12) Beto mezaba dyaka nde “ntangu ti mambu ya kukonda kukana” kebwilaka beto yonso. (Longi 9:11, NW) Muntu mosi ya beto kezolaka lenda fwa na aksida. Maladi mosi ya ngolo lenda fwa kibuti na beto to nduku yina beto kezolaka mingi. Kana beto ketula ve ntangu yonso meso na beto na kivuvu ya Kimfumu, yo tavanda kigonsa ya nene sambu na kimpeve na beto ntangu bampasi ya mutindu yai tabwila beto. Yo yina, yo kele mbote beto kudiyula nde, ‘Keti mono “kevandaka na kyese sambu na kivuvu”? Mbala ikwa mono kebakaka ntangu ya kuyindula yo? Keti lusilu ya Paladisu kele kima mosi ya kyeleka sambu na munu? Keti mono keyindulaka nde mono takota kuna? Keti tii bubu yai mono kevandaka na mpusa ya ngolo ya mu vandaka na yo ntangu mu longukaka kyeleka ya kumona nswalu lufwa ya inza yai?’ Beto fwete yindula mingi ngyufula yai ya nsuka. Sambu na nki? Sambu kana beto kele na mavimpi ya mbote, kana beto kele na bima mingi na luzingu, mpi beto kezinga na bansi yina bamvita kele mingi ve, nzala kele ve, to mambu ya mpasi yina kebwaka na lugangu kele ve, beto lenda yantika kumona nde mfunu kele ve nde inza ya mpa ya Nzambi kukwisa nswalu.

6. (a) Ntangu Polo ti Silasi kumonaka mpasi, bo tulaka mabanza na bo na nki mambu? (b) Inki mutindu mbandu ya Polo ti Silasi lenda pesa beto kikesa bubu yai?

⁶ Polo kulongisilaka dyaka Bakristu ya Roma nde: “Beno kanga ntima sambu na mpasi na beno.” (Roma 12:12) Polo vandaka kukutana ti mambu ya mpasi. Kilumbu mosi, yandi monaka na mbona-meso muntu mosi kelomba yandi na “kusabuka na Masedonia” sambu na kusadisa bantu ya bwala yai na kulonguka mambu yina metala Yehowa. (Bisalu 16:9) Ntangu yandi waka mutindu yina, Polo kusimbaka nzila kumosi ti Luka ti Silasi ti Timoteo, bo kwendaka na Eropa. Inki mambu vandaka kinga bamisionere yai ya kikesa? Mpasi! Na nima ya kulonga na bwala Filipi, na provense ya Masedonia, bo bulaka Polo ti Silasi bafimbu, na nima bo tulaka bo na boloko. Yo kemonana pwelele nde, bantu yankaka ya bwala Filipi vandaka kubuya nsangu ya Kimfumu kaka ve, kansi mpi bo vandaka mpenza bambeni ya ngolo ya nsangu yango. Keti mambu ya kukuminaka bamisionere yai ya kikesa kusalaka nde bo vidisa kyese na bo? Ve. Na nima ya kubula bo ti kutula bo na boloko, “na bamidi ya mpimpa, Paulo ti Silasi vandaka kusamba Nzambi, bo vandaka kuyimba mpi sambu na kupesa Nzambi lukumu.” (Beto bantu metengimisa bisono; Bisalu 16:25, 26.) Na kutuba ya mbote, mpasi yina Polo ti Silasi vandaka kuwa ntangu bo vandaka kubula bo kupesaka bo ve kyese, kansi bamisionere yai zole kutulaka ve mabanza na bo yonso kaka na kubula yina ya bo bulaka bo. Mabanza na bo yonso kukwendaka kaka na Yehowa ti na mambu yina yandi vandaka kusala sambu na kusakumuna bantu na yandi. Ntangu bo vandaka ‘kukanga ntima sambu na mpasi’ na kyese yonso, Polo ti Silasi kupesaka bambandu ya mbote na bampangi na bo ya Filipi ti yina vandaka kuzinga na bisika yankaka.

7. Sambu na nki beto fwete pesaka Nzambi mersi na bisambu na beto?

⁷ Polo kusonikaka nde: “Beno samba Nzambi konso ntangu.” (Roma 12:12) Keti nge kesambaka na bantangu yina nge kevandaka na basusi? Nki mambu nge ketubaka na bisambu na nge? Ntembe kele ve nde nge ketubaka makambu ya sikisiki yina metala nge mosi mpi nge kelombaka Yehowa na kusadisa nge. Kansi nge lenda kotisa mpi bangogo ya kemonisa nde nge kepesa yandi mersi sambu na balusakumunu yina yandi kepesaka nge. Na ntangu mpasi mebwila beto, kuyindula mambu ya mbote yina Yehowa kesalaka sambu na beto lenda sadisa beto na “kuvanda na kyese sambu na kivuvu.” Davidi yina kumonaka mpasi mingi na luzingu na yandi, kusonikaka nde: “Mfumu Nzambi, Nzambi na mono, nge me sadila beto mambu mingi ya mbote; nzambi ya nkaka kele ve bonso nge. Nge me sadila beto mambu mingi ya kuyituka; kana mono mekaka na kutuba yo yonso, mono zolaka kukuka ve.” (Nkunga 40:6) Kana beto keyindula mbala na mbala balusakumunu yina Yehowa kepesaka beto, mutindu Davidi vandaka kusala, ya kyeleka, beto tabakisa nde beto kele ve na kikuma ya kukonda kuvandila na kyese.

Vanda Ntangu Yonso na Mabanza ya Mbote

8. Inki kesadisaka Mukristu na kuvanda kaka na kyese ata na ntangu yandi kemona mpasi?

⁸ Yezu kupesaka balongoki na yandi kikesa nde bo fwete vandaka ntangu yonso na mabanza ya mbote na ntangu bo kekutana ti mimekamu. Yandi tubaka nde: “Kiese na beno kana bo ke fingaka beno, kana bo ke monisaka beno mpasi, kana bo ke kusilaka beno mambu ya mbi ti ya luvunu ya mutindu na mutindu sambu beno kele balonguki na mono.” (Matayo 5:11) Inki kikuma beto kele na yo ya kuvandila na kyese ntangu beto kekutana na makambu ya mutindu yina? Kikesa yina beto kevandaka na yo ya kubikala ngolo na ntwala ya bambeni kele kidimbu ya kendimisa beto nde mpeve ya Yehowa kele ti beto. Ntumwa Piere kutubilaka Bakristu yina vandaka kuzinga na bilumbu na yandi nde: “Beno ke na kiese kana bo ke finga beno sambu beno kele bakristo, sambu Mpeve ya lukumu ya Nzambi ke zingaka na beno.” (1 Piere 4:13, 14) Na nsadisa ya mpeve na yandi, Yehowa tasadisa beto mpi na kukanga ntima, na mpila nde beto vanda kaka na kyese.

9. Inki kima kusadisaka bampangi yankaka na kuzwa bikuma ya kuvandila na kyese na ntangu bo kangaka bo na boloko sambu na lukwikilu na bo?

⁹ Ata ntangu beto kemona mpasi ya kuluta ngolo, beto lenda zwa bikuma ya kuvandila na kyese. Mukristu mosi na zina ya Adolf kundimaka dikambu yai. Yandi kezingaka na insi mosi yina bo mebuyisaka kisalu ya Bambangi ya Yehowa banda ntama. Adolf ti bampangi na yandi mingi bo kangaka bo mpi bo zengilaka bo bamvula mingi ya boloko sambu bo buyaka na kuyambula lukwikilu na bo yina mekatuka na kati ya Biblia. Luzingu ya boloko kuvandaka mpasi kibeni, kansi bonso Polo ti Silasi, Adolf ti bampangi na yandi kumonaka bikuma ya kupesila Nzambi mersi. Bo tubaka nde mambu yina bo kutanaka na yo na boloko, kusadisaka bo na kukumisa lukwikilu na bo ngolo mpi na kuyedisa bikalulu ya Bukristu yina kele mfunu, bonso kukaba, kuwa mawa, mpi kuzola bampangi. Mu mbandu, kana mosi na kati ya bampangi yina kuvandaka na boloko mebaka dibuki mosi ya mekatuka na fami na yandi, mpangi yango vandaka kukabisa yo ti bampangi na yandi Bakristu, yina vandaka kubakisa nde lusadisu ya mutindu yina vandaka kukatuka na Yehowa, Mupesi ya kuluta nene ya “makabu yonso ya mbote mpenza.” Mambu ya mutindu yina vandaka kumonisa ntima ya mbote mpi yo vandaka kupesa kyese na mupesi ti na bantu yina vandaka kubaka. Boloko yina bo kotisaka bo sambu bo fwa lukwikilu na bo, kukumisaka bo dyaka ngolo mingi na kimpeve!​—Yakobo 1:17; Bisalu 20:35.

10, 11. Inki mutindu mpangi mosi ya nkento kusalaka ntangu bo vandaka kusambisa yandi kukonda kupemisa yandi tii kuna ya bo kangaka yandi bamvula mingi na boloko?

¹⁰ Ella, yina kezingaka mpi na insi mosi yina bo buyisaka kisalu ya Kimfumu bamvula mingi, bo kangaka yandi sambu yandi vandaka kuzabisa bantu yankaka kivuvu ya Bukristu yina yandi kele na yo. Bo sambisaka yandi bangonda nana ya mvimba kukonda kupemisa yandi. Nsukansuka, ntangu bo nataka yandi na tribinale, bo zengilaka yandi bamvula kumi ya boloko mpi bo tindaka yandi na boloko mosi yina bantu yankaka ya kesambilaka Yehowa kuvandaka ve. Ella kuvandaka kaka ti bamvula 24 na ntangu yina.

¹¹ Ya kyeleka, Ella vandaka kutula ntima ve nde yandi tazinga bamvula na yandi yonso ya mwa kimbuta na kati ya boloko. Kansi, sambu yandi lendaka ve kusoba makambu yina kubwilaka yandi, yandi bakaka desizio ya kusoba mabanza na yandi. Yo yina, yandi yantikaka kubaka boloko bonso teritware na yandi mosi kisika ya yandi fwete ta kimbangi. Yandi ketuba nde: “Mu vandaka ti kisalu mingi ya kusala na kisalu ya kusamuna na mpila nde bamvula yango vandaka kuluta nswalu kibeni.” Na nima ya bamvula kuluta tanu, bo yulaka dyaka Ella bangyufula. Ntangu bo bakisaka nde ndola ya boloko mefwa ve lukwikilu na yandi, bantu yina vandaka kusambisa yandi kutubilaka yandi nde: “Beto lenda basisa nge ve, sambu nge mesoba ve.” Kansi, Ella kuvutulaka mvutu na kikesa yonso nde: “A si mu mesoba! Mu mekuma na mabanza ya kuluta mbote ntangu yai kuluta yina ya mu vandaka na yo ntangu mu kotaka na boloko, nkutu lukwikilu na munu mekuma dyaka ngolo mingi kuluta mpila yo vandaka ntete!” Na nima yandi yikaka nde: “Kana beno kezola ve kubasisa munu, mu tavanda kaka tii kuna Yehowa tamona nde ntangu ya kugulusa munu melunga.” Ya kyeleka, bamvula tanu ti ndambu yina Ella kusalaka na boloko, kukatulaka yandi ve kyese na yandi! Yandi longukaka na kuvanda na kyese na konso makambu yina yandi kutanaka na yo. Keti nge lenda baka dilongi na mbandu na yandi?​—Baebreo 13:5.

12. Inki dyambu lenda pesa Mukristu ngemba na mabanza ntangu yandi kekutana ti bampasi?

¹² Kuyindula ve nde Ella kuvandaka ti dikabu mosi ya kuswaswana yina kusadisaka yandi na kunwana ti bampasi ya mutindu yina. Ntangu yandi keyindula dyaka nsungi yina bo vandaka kusambisa yandi na bangonda yina bo kwisaka kuzengila yandi ndola ya boloko, Ella kendima nde: “Mu keyibuka nde meno na munu vandaka kutekita, mu vandaka kudiwa bonso kamwana ya nsusu yina menokila mvula.” Ata mpidina, Ella kuvandaka na lukwikilu ya ngolo na Yehowa. Yandi longukaka na kutudila yandi ntima. (Bingana 3:5-7) Yo yina bubu yai, Nzambi mekumaka muntu ya kyeleka mpenza na meso na yandi. Yandi ketendula nde: “Konso ntangu ya mu vaa kota na nzo yina bo vandaka kusambisa munu, mu vandaa wa ngemba kekwisila munu . . . Ntangu makambu vandaka kukuma ngolo mingi, ngemba na munu mpi vandaka kukuma mingi.” Yehowa muntu vandaka kupesa yandi ngemba yina. Ntumwa Polo ketendula nde: “Beno kumona mpasi ve na ntima sambu na konso mambu yina; kansi konso ntangu ya beno ke samba Nzambi, beno lomba yandi konso mambu yina ya beno ke na yo mfunu; ntangu beno ke lomba yandi yo, beno pesa yandi mersi. Ebuna ngemba ya Nzambi, ngemba yina me luta mambu yonso ya bantu ke yindulaka, yo ta keba ntima na beno ti mabanza na beno sambu na kimvuka yina ya beno kele ti Yesu Kristo.”​—Filipi 4:6, 7.

13. Inki dyambu kendimisa beto nde kana dyambu ya mpasi mekumina beto, beto tavanda ti ngolo ya kukanga ntima?

¹³ Tii kuna ya bo basisaka yandi na boloko, Ella vandaka kaka na kyese ata yandi kutanaka na mambu mingi ya mpasi. Yandi salaka mambu yai yonso, na ngolo na yandi mosi ve, kansi na ngolo yina Yehowa kupesaka yandi. Yo vandaka mpi mutindu mosi sambu na ntumwa Polo, yina kusonikaka nde: “Mono ke lutaka kumona kiese na kuditula na mambu yina ke monikaka nde mono ke na kikesa ya kusala yo ve. Mpidina ngolo ya Kristo lenda keba mono. . . . Kana mono ke na kikesa ve, na ntangu yo yina mono ke vandaka ngolo.”​—2 Korinto 12:9, 10.

14. Pesa mbandu mosi yina kemonisa mutindu Mukristu lenda vanda na mabanza ya mbote na ntwala ya dyambu mosi ya mpasi mpi nki mbuma yo lenda buta.

¹⁴ Ziku bampasi ya nge kekutana na yo bubu yai kele kiteso mosi ve ti yina ya beto metubila awa. Kansi, ata yo vanda ya nki mutindu, kukanga ntima na ntwala ya bampasi kevandaka kima ya pete ve. Mu mbandu, mfumu na nge ya kisalu lenda vanda na kikalulu ya kulandila ngolo kisalu na nge sambu na kusosa ntangu yonso bifu ya nge kesala. Yandi kelandila nge ngolo kibeni kuluta bantu ya kisalu yina kesambilaka na mabundu yankaka. Ziku nge kele ve na mwaye ya kusosa kisalu kisika yankaka. Ebuna nki mutindu nge lenda sala sambu na kuvanda kaka na kyese? Yindula disolo ya Adolf ti banduku na yandi, yina kulongukaka bikalulu ya mbote na kati ya boloko. Kana nge sala kikesa na masonga yonso sambu na kupesa patro na nge kyese, ata yandi kele ‘mfumu ya mpasi,’ nge tayedisa bikalulu ya Bukristu bonso kukanga ntima ti ntima ya nda. (1 Piere 2:18) Dyaka, nge lenda kuma mpenza muntu ya kisalu ya mbote, mpi yo lenda sala nde kilumbu yankaka nge baka dyaka kisalu ya kuluta mbote. Kansi, bika beto tubila ntangu yai mambu yankaka ya beto lenda sala sambu na kuvanda kaka na kyese na kisalu ya Yehowa.

Luzingu ya Petepete Kenataka Kyese

15-17. Inki mambu kusalaka nde bankwelani zole kufyotuna susi na bo, ata mpila ya kukatula kikuma na yo kimakulu kuvandaka ve?

¹⁵ Nge lenda vanda ve na mwaye ya kupona kisalu ya musuni yina nge kezola kusala to kisika yina ya nge fwete sala, kansi na mambu yankaka ya luzingu nge lenda vanda na kiyeka ya kupona mambu yina ya nge mezola. Beto tala eksperiansi yai.

¹⁶ Bankwelani zole ya Bakristu kubingisaka nkuluntu mosi na nzo na bo sambu na madya. Na nkokila, mpangi ya bakala yina ti nkento na yandi kukangudilaka nkuluntu yango ntima, bo monisaka yandi nde bilumbu yina bo vandaka kulemba mingi sambu bisalu kulutilaka bo mingi. Ata bo zole vandaka kusala bisalu yina vandaka kulomba bo ntangu mpi kikesa ya mingi, bo vandaka na mwaye ve ya kusosa bisalu yankaka. Bo vandaka kudiyula kana tii nki ntangu bo talanda na kuzinga luzingu ya mutindu yina.

¹⁷ Ntangu bo lombaka ndongisila, nkuluntu yina kupesaka bo mvutu nde, “Beno kumisa luzingu na beno petepete.” Nki mutindu? Bakala yina ti nkento na yandi vandaka kusala bangunga tatu konso kilumbu sambu na kukwenda na kisalu mpi na kuvutuka na nzo na bo. Nkuluntu, yina vandaka zaba mbote bankwelani yai zole, kulongisilaka bo nde bo sosa nzo penepene ti kisika na bo ya kisalu, mpidina yo tasadisa bo na kufyotuna ntangu yina bo vandaka kulutisa na kukwenda mpi na kuvutuka na kisalu konso kilumbu. Mpidina, ntangu yina bo vandaka kubebisa lenda sadisa bo na kusala mambu yankaka mingi ya mfunu, to mpi na kupema fyoti. Kana bisalu kekatula nge kyese, sambu na nki nge tala ve mbotembote bansoba yina nge lenda sala sambu na kuzwa mwaye ya kupema fyoti?

18. Sambu na nki yo kele mfunu na kuyindula mbotembote na ntwala ya kubaka badesizio?

¹⁸ Dyambu yankaka ya lenda sadisa muntu na kufyotuna basusi ya luzingu kele kuyindula mbotembote na ntwala ya kubaka badesizio. Mu mbandu, Mukristu mosi kubakaka desizio ya kutunga nzo. Yandi salaka pula mosi ya vandaka kulomba mambu mingi ya mpila na mpila, ata yandi vandaka yandi metungaka ntete ve nzo na luzingu na yandi. Ntangu yai, yandi mebakisa nde yandi zolaka kuditanina na makambu yina yonso kana yandi ‘yindulaka ntete’ na ntwala ya kupona pula ya nzo na yandi. (Bingana 14:15) Mukristu yankaka kundimaka nde yandi tafutila mpangi mosi ya Mukristu mfuka. Bo wakanaka nde, kana mpangi yina kudefaka mbongo kekuka ve kufuta, mpangi yina kundimaka na kufutila yandi tafuta yo. Na luyantiku, bo salaka mutindu bo wakanaka, kansi na nima muntu yina kudefaka mbongo vandaka zola dyaka ve kufuta mfuka yango. Mpangi yina kudefisaka mbongo na yandi kuwaka makasi mpi yandi yantikaka kulomba nde mpangi yina kundimaka na kufutila yandi kufuta mfuka yonso. Yandi yantikaka kuyangisa mpangi yango mingi kibeni. Keti mpangi yai zolaka kuditanina ve na makambu kana yandi yindulaka mbotembote na ntwala ya kundima mukumba ya mfuka ya mutindu yina?​—Bingana 17:18.

19. Inki mambu beto lenda sala sambu na kufyotuna kulemba na luzingu na beto?

¹⁹ Kana beto melemba, beto meka ve kuyindula nde kana beto fyotuna ntangu ya beto kelutisaka na kulonguka Biblia beto mosi, na kisalu ya bilanga, mpi na balukutakanu, yo tasadisa beto na kukitisa bisalu na beto mpi na kuvutukila kyese na beto. Beto sala ve mutindu yina sambu, mambu yai ya mfunu yo yina kesadisaka beto na kubaka mpeve santu ya Yehowa, yina kepesaka kyese. (Galatia 5:22) Bisalu ya Bukristu kelembikaka beto konso ntangu mpi na kutuba ya mbote yo kelembisaka ve mingi. (Matayo 11:28-30) Mbala mingi bisalu ya musuni ti ya kulutisa ntangu kelembisaka beto, kansi bisalu ya kimpeve ve. Kusala kikesa sambu na kulala na ntangu ya mbote, lenda sadisaka beto na kuvanda kikesa. Kupema dyaka fyoti na ntangu yankaka lenda sadisa beto mpi. N. H. Knorr, yina kuvandaka mambre ya Nto-Kimvuka ya Bambangi ya Yehowa tii kuna na lufwa na yandi, vandaka ti kikalulu ya kusonga bamisionere nde: “Kana kulemba mekwisila beno, kima ya ntete ya beno fwete sala kele kupema fyoti. Beno tayituka na kumona nde makambu yonso ya beno tasosa kusala tavanda dyaka mpasi ve na nima ya kulala mbote na mpimpa!”

20. (a) Tanga na bunkufi mambu yina beto lenda sala sambu na kuvanda kaka na kyese. (b) Yindula bikuma yankaka ya fwete pesa beto kyese? (Tala lupangu na lutiti 27.)

²⁰ Bakristu kele na dibaku mosi ya mbote ya kusadila ‘Nzambi ya kiese.’ (1 Timoteo 1:11) Mutindu beto monaka yo, beto lenda vanda na kyese ata na ntangu ya beto ke na mawa sambu na makambu ya mpasi yina beto kekutana na yo. Bika beto landa na kutula kivuvu ya Kimfumu na ntwala na beto, beto soba mabanza na beto na ntangu yo kelomba kusala mutindu yina, mpi beto landa na kukumisa luzingu na beto petepete. Mpidina, ata beto kutana na makambu ya nki mutindu, beto tandima bangogo ya ntumwa Polo yina ketuba nde: “Beno vanda na kiese ntangu yonso sambu na Mfumu . . . Mono ke tuba diaka nde: Beno vanda na kiese.”​—Filipi 4:4.

Yindula Mbotembote Bangyufula Yai:

• Sambu na nki Bakristu fwete tula dikebi na bo yonso na kivuvu ya Kimfumu?

• Inki lenda sadisa beto na kuvanda kaka na kyese ata na ntangu ya mpasi?

• Sambu na nki beto fwete sala ngolo sambu na kukumisa luzingu na beto petepete?

• Na nki mambu bantu yankaka kukumisaka luzingu na bo petepete?

[Lupangu/​Bifwanisu ya kele na lutiti 27]

Mambu Yankaka ya Fwete Pesa Beto Kyese

Beto Bakristu, beto kele na bikuma mingi ya kuvandila na kyese. Tala mambu yai kelanda:

 1. Beto mezabaka Yehowa.

 2. Beto melongukaka kyeleka yina kele na Ndinga ya Nzambi.

 3. Nzambi lenda lolula masumu na beto na nsadisa ya lukwikilu yina beto ketulaka na kimenga ya Yezu.

 4. Kimfumu ya Nzambi ke na kuyala, mpi kubika fyoti inza ya mpa kukwisa!

 5. Yehowa mekotisaka beto na paladisu ya kimpeve.

 6. Beto kele na kati ya dibuta ya mbote ya Bakristu.

 7. Beto kele ti dibaku ya kusala kisalu ya kusamuna.

 8. Beto kele na luzingu, mpi beto kele na kikesa ya kufwana.

 Bikuma yankaka ikwa ya kuvandila na kyese nge lenda tanga?

[Kifwanisu ya kele na lutiti 24]

Polo ti Silasi kuvandaka na kyese ata na boloko

[Bifwanisu ya kele na lutiti 26]

Keti mabanza na nge yonso ke na kivuvu ya kyese ya inza ya mpa ya Nzambi?