Lusakumunu ya Yehowa Kekumisaka Beto Bamvwama
“Lusakumunu ya Yehowa—yo yina kima kekumisaka muntu mvwama, mpi yandi keyikaka ve ata mpasi mosi ti yo.”—BINGANA 10:22, NW.
1, 2. Sambu na nki kyese mesimbama ve na kimvwama ya kinsuni?
KUSOSA kuvanda na bima mingi ya kinsuni ketwadisaka luzingu ya bantu mingi bubu yai. Kansi, keti bima ya kinsuni kepesaka bo kyese? Zulunalu mosi (The Australian Women’s Weekly) ketuba nde, “Bubu yai bantu kele na basusi mingi kibeni sambu na luzingu na bo kuluta bantu na ntangu ya ntama.” Yo keyika nde: “Yo kele dyambu mosi ya mpasi na kutendula. Bantu ketubaka nde na Australie luzingu kele mbote mpenza sambu na yina metala kimvwama, ata mpidina, bo keyikaka nde luzingu mekumaka ntete mbote ve. . . . Ebuna, bantu kevandaka kaka na bangindu ya mbi na insi yonso. Babakala ti bankento kemonaka bonso nde kima mosi kekonda na luzingu na bo, kansi bo kekukaka ve na kutendula nki kima yango.” Biblia ketuba mpenza masonga ntangu yo ketendula nde kyese ti luzingu kekatukaka ve na bima yina beto kele na yo!—Longi 5:10; Luka 12:15.
2 Biblia kelongaka nde kyese ya kuluta nene kekatukaka na lusakumunu yina Nzambi kepesaka. Yo yina, Bingana 10:22 (NW) ketuba nde: “Lusakumunu ya Yehowa—yo yina kima kekumisaka muntu mvwama, mpi yandi keyikaka ve ata mpasi mosi ti yo.” Mpasi kekwisaka mbala mingi sambu na mpusa ya ngolo ya kuzwa bima mingi ya kinsuni. Yo yina, ntumwa Polo kukebisaka nde: “Bantu yina ke zolaka kukuma bamvwama, Satana ke bwisaka bo; nzala mingi ya buzoba ti ya mbi yina ke bebisaka bantu, yina ke fwaka bo, yo ke kangaka bo. Sambu kuzola mbongo mingi ke bendaka mambu ya mbi ya mutindu na mutindu. Bantu ya nkaka vandaka na nzala mingi ya mbongo; yo yina nzala yango vidisaka lukwikilu na bo, yo pesaka bo mpasi mingi na ntima.”—1 Timoteo 6:9, 10.
3. Sambu na nki bansadi ya Nzambi kemonaka mpasi?
3 Kansi, bantu yonso yina ‘kelemfukaka na Mfumu Nzambi’ kebakaka balusakumunu ya kenataka ve ata mpasi fyoti. (Kulonga 28:2) Ata mpidina, bantu yankaka lenda yula nde, ‘Kana lusakumunu ya Yehowa keyikaka ve ata mpasi mosi, sambu na nki bansadi ya Nzambi kemonaka mpasi?’ Biblia kesonga nde Nzambi muntu kupesaka nzila na bampasi ya beto kemonaka, kansi yo kekatukaka na Satana, na ngidika na yandi ya mbi, mpi na kimuntu na beto ya kukonda kukuka. (Kuyantika 6:5; Kulonga 32:4, 5; Yoane 15:19; Yakobo 1:14, 15) Yehowa kele nto ya “makabu yonso ya mbote mpenza.” (Yakobo 1:17) Yo yina, balusakumunu na yandi kenataka ve ata mpasi fyoti. Beto tala mwa makabu ya kukuka yina Nzambi mepesaka beto.
Ndinga ya Nzambi Kele Dikabu ya Kuluta Kitoko
4. Inki lusakumunu mpi dikabu ya kuluta kitoko bantu ya Yehowa mebakaka na “ntangu ya nsuka” yai?
4 Sambu na yina metala “ntangu ya nsuka,” mbikudulu ya Daniele ketuba nde: “Nzayilu ya sikisiki takuma mingi.” (NW) Kansi, bangogo yai kumonisaka pwelele banani zolaka kubaka yo: “Bantu ya ntima ya mbi ta bakisa ve, bo ta landa kaka na kusala mbi; kansi bayina kele mayele bo ta zaba mambu yina ke bwa.” (Daniele 12:4, 10) Yindula dyambu yai! Ndinga ya Nzambi, mingimingi bambikudulu, kesongaka mayele ya Nzambi na mpila nde bantu ya mbi kubakisa yo ve mbote, kansi bantu ya Yehowa kebakisaka yo. Mwana ya Nzambi kusambaka nde: “Tata, nge muntu kele Mfumu ya ntoto ti ya zulu, mono ke pesa nge mersi sambu mambu yina ya nge me bumbaka na bantu ya mayele ti na bantu yina me longukaka, nge me kwisa kuzabisa yo na bantu yina me longukaka ve.” (Luka 10:21) Yo kele lusakumunu ya nene na kuvanda na dikabu ya kuluta kitoko ya Ndinga ya Nzambi ya bo mesonikaka, Biblia, mpi na kuvanda na kati ya bantu yina Yehowa ke na kupesa mayele ya kimpeve!—1 Korinto 1:21, 27, 28; 2:14, 15.
5. Mayele kele nki, mpi nki mutindu beto lenda baka yo?
5 Beto zolaka kuvanda ve na mayele ya kimpeve kana beto bakaka ve “mayele yina ke katukaka na zulu.” (Yakobo 3:17) Mayele kele kuzaba kusadila nzayilu yina muntu kele na yo mpi kuzaba kuyidika makambu, kubuya kuditula to kudikotisa na kigonsa, kulungisa balukanu, to kuzaba kupesa bandongisila ya mbote. Inki mutindu beto kebakaka mayele ya Nzambi? Bingana 2:6 ketuba nde: “Mfumu Nzambi muntu ke pesaka mayele; ngangu ti kuzaba mambu ke katukaka na yandi.” Ee, Yehowa tapesa beto mayele kana beto kelanda na kulomba yandi yo na kisambu, kaka mutindu yandi pesaka Ntotila Salomo “mayele ti ngangu.” (1 Bantotila 3:11, 12; Yakobo 1:5-8) Sambu na kubaka mayele, beto fwete lemfukaka mpi na Yehowa na ntangu beto kelonguka mpi kesadila Ndinga na yandi konso ntangu.
6. Sambu na nki yo ke mayele na kusadila bansiku ti minsiku ya Nzambi na luzingu na beto?
6 Bambandu ya ntetentete ya kesongaka mayele ya Nzambi kele bansiku ti minsiku yina kele na Biblia. Yo kesadisaka beto na mitindu mingi, na kinsuni, na mabanza, na mawi, ti na kimpeve. Yo yina, muyimbi-bankunga kuyimbaka nde: “Bansiku ya Mfumu Nzambi kele mbote mpenza, yo ke pesaka ngolo na ntima. Bansiku ya Mfumu Nzambi bantu lenda tula yo ntima, yo ke pesaka mayele na bantu yina ke na mayele ve. Bansiku ya Mfumu Nzambi kele ya kieleka, bantu yina ke landaka yo bo kele kiese; yo ke na kifu ve, yo ke kangulaka meso ya bantu. Bansiku ya Mfumu Nzambi kele ya masonga, yo ta vandaka tii kuna; yo kele ya kieleka, yonso kele kiteso mosi. Mono ke zolaka bansiku ya Mfumu Nzambi mingi, mono ke zolaka yo kuluta wolo.”—Nkunga 19:8-11; 119:72.
7. Inki mambu kukonda kulemfuka na bansiku ya lunungu ya Nzambi kenataka?
7 Kansi, bantu yina kelemfukaka ve na bansiku ya lunungu ya Nzambi kezwaka ve kyese ti kimpwanza ya bo kesosaka. Nsukansuka, bo kebakisaka nde Nzambi kele ve muntu ya beto lenda seka, sambu muntu kebukaka bima yina yandi kekunaka. (Galatia 6:7) Bantu mingi yina kelemfukaka ve na minsiku ya Biblia kebukaka bambuma ya mpasi, bonso, mavumu ya kukonda kukana, bamaladi ya ngolo, to kumana mayele sambu na bima yina kelausaka. Kana bo balula ve ntima mpi luzingu na bo, nsukansuka, nzila na bo tanata bo na lufwa mpi ziku na lufwa ya kimakulu na meso ya Nzambi.—Matayo 7:13, 14.
8. Sambu na nki bantu yina kezolaka Ndinga ya Nzambi kevandaka na kyese?
8 Kansi, bayina kezolaka Ndinga ya Nzambi mpi kesadilaka yo tabaka balusakumunu mingi bubu yai mpi na bilumbu kekwisa. Bo kele na kikuma ya mbote ya kumona nde nsiku ya Nzambi mepesaka bo kimpwanza, bo kele na kyese ya kyeleka, mpi bo kekinga ti ntima na zuluzulu ntangu yina yandi takatula bo na kimpika ya masumu ti lufwa. (Roma 8:20, 21; Yakobo 1:25) Kivuvu yai kele ya kyeleka sambu kima mesimba yo kele dikabu ya kuluta nene ya zola yina Nzambi mepesaka bantu, disongidila kimenga ya nkudulu ya Mwana na yandi mosi kaka yina kubutukaka, Yezu Kristu. (Matayo 20:28; Yoane 3:16; Roma 6:23) Dikabu ya kuluta nene ya mutindu yai kendimisa beto bunene ya zola yina Nzambi kele na yo na bantu mpi yo kemonisa beto pwelele nde bantu yina kelemfukaka na Yehowa tabaka balusakumunu mingi.—Roma 8:32.
Beto Kepesa Mersi Sambu na Dikabu ya Mpeve Santu
9, 10. Inki mambote beto kebakaka na nsadisa ya mpeve santu ya Yehowa? Pesa mbandu mosi.
9 Dikabu yankaka ya zola ya Nzambi yina fwete pusa beto na kupesa yandi mersi kele mpeve santu na yandi. Na kilumbu ya Pantekoti ya mvu 33 ya T.B., ntumwa Piere kulongisilaka bantu mingi yina kukwisaka na Yeruzalemi nde: “Mbote konso muntu na kati na beno kubalula ntima, yandi kubaka mbotika na zina ya Yesu Kristo sambu Nzambi kulolula beno. Ebuna Nzambi ta pesa beno Mpeve-Santu makabu.” (Bisalu 2:38) Bubu yai, Yehowa kepesaka mpeve santu na bansadi na yandi ya mekudipesaka yina kelombaka yandi yo na kisambu mpi kezolaka kusala luzolo na yandi. (Luka 11:9-13) Na ntangu ya ntama, ngolo yai ya kuluta bangolo yonso na inza, disongidila mpeve santu ya Nzambi, to ngolo ya yandi kesadilaka bisalu, kupesaka kikesa na babakala ti bankento ya lukwikilu, ti na Bakristu ya ntete. (Zakaria 4:6; Bisalu 4:31) Yo lenda sala mutindu mosi bubu yai sambu na beto, ata beto kutana ti bampasi ya kuluta ngolo sambu beto kele bantu ya Yehowa.—Yoele 2:28, 29.
10 Beto baka mbandu ya Laurel, yina kubelaka maladi ya buka-buka mpi yina vandaka kupema na nsadisa ya masini yina vandaka kusala na kisika ya bapumo na yandi bamvula 37.a Ata luzingu na yandi vandaka ya mpasi kibeni, yandi vandaka kusadila Nzambi na kikesa yonso tii kuna yandi fwaka. Na bamvula yina yonso, Laurel kumonaka balusakumunu yina Yehowa kupesaka yandi. Mu mbandu, yandi sadisaka kiteso ya bantu 17 na kubaka nzayilu ya sikisiki ya kyeleka ya Biblia, ata yandi vandaka kaka ya kukangama konso kilumbu kisika masini na yandi ya kupemina kuvandaka! Luzingu na yandi keyibusa beto mambu yina ntumwa Polo kutubaka: “Kana mono ke na kikesa ve, na ntangu yo yina mono ke vandaka ngolo.” (2 Korinto 12:10) Ee, kana beto menunga na kulonga nsangu ya mbote, beto lenda tuba ve nde beto mesala yo na ngolo mpi ngangu na beto mosi, kansi na lusadisu ya mpeve santu yina Nzambi kepesaka beto, mpeve ya yandi kepesaka na bantu yina kelemfukaka na ndinga na yandi.—Yezaya 40:29-31.
11. Inki bikalulu mpeve ya Nzambi kebutaka na bantu yina kelwataka “kimuntu ya mpa”?
11 Kana beto kelemfuka na Nzambi, mpeve na yandi tabuta bikalulu yai na ntima na beto: zola, kyese, ngemba, kukanga ntima, kusala mambote na bantu yankaka, ntima ya mbote, lukwikilu, ntima ya pima, ti kudiyala. (Galatia 5:22, 23) “Bambuma yai ya kimpeve” kele kitini ya “kimuntu ya mpa” (NW) yina Bakristu keyingisaka na kisika ya bikalulu ya mbi ya bo vandaka na yo ntete, yina kuvandaka bonso ya bambisi ya makasi. (Efezo 4:20-24; Yezaya 11:6-9) Zola kele mbuma mosi ya kimpeve ya kele na mfunu sambu yo ke ‘vukisaka beto na kimvuka mosi ya kieleka mpenza.’—Kolosai 3:14.
Zola ya Bukristu Kele Dikabu ya Beto Fwete Zola Mingi
12. Inki mutindu Tabita ti Bakristu yankaka ya mvu-nkama ya ntete kumonisaka zola na bo?
12 Zola ya Bukristu kele dikabu yankaka ya mbote yina Yehowa mepesaka beto, ya beto kezolaka mingi. Minsiku ketwadisaka yo, kansi yo kevandaka na mawi mingi na mpila nde yo kevukisaka Bakristu kisika mosi kuluta mutindu bangwisana ya kinsuni lenda sala. (Yoane 15:12, 13; 1 Piere 1:22) Beto baka mbandu ya Tabita, nkento mosi yina kuvandaka Mukristu ya mbote na mvu-nkama ya ntete. “Yandi vandaka kusala kaka mambu ya mbote,” mingimingi na mifwidi yina kuvandaka na kati ya dibundu. (Bisalu 9:36) Yo fwete vanda nde bankento yai kuvandaka ti bampangi na bo ya kinsuni, kansi Tabita zolaka kusala yina yandi vandaka na ngolo ya kusala sambu na kusadisa bo mpi kupesa bo kikesa. (1 Yoane 3:18) Tabita kupesaka mbandu ya mbote kibeni! Prisila ti Akilasi ‘zolaka kufwa’ sambu na zola yina bo vandaka na yo na mpangi na bo Polo. Zola kupusaka dyaka Epafrasi, Luka, Onezifore, ti bantu yankaka na kusadisa ntumwa [Polo] ntangu yandi vandaka na boloko na Roma. (Roma 16:3, 4; 2 Timoteo 1:16; 4:11; Filemoni 23, 24) Ee, Bakristu ya mutindu yina ‘kezolanaka bo na bo’ bubu yai. Zola yai kele dikabu ya kitoko ya Nzambi mepesaka bo yina kesadisaka bantu na kuzaba nde bo kele balongoki ya kyeleka ya Yezu.—Yoane 13:34, 35.
13. Inki mutindu beto lenda songa nde beto kebaka na valere mpi kepesa mersi sambu na bampangi na beto ya Bukristu?
13 Keti nge kezolaka zola yina kevandaka na dibundu ya Bukristu? Keti nge kepesaka mersi sambu na bampangi na beto ya kimpeve, yina kele na ntoto ya mvimba? Yai mpi kele makabu ya kyese mpi ya kitoko ya mekatukaka na Yehowa. Inki mutindu beto lenda monisa nde beto kebakaka yo na valere? Kana beto kesadila Nzambi kisalu ya santu, kana beto kekwenda na balukutakanu ya Bukristu, mpi kana beto kemonisa zola mpi bambuma yankaka ya mpeve ya Nzambi.—Filipi 1:9; Baebreo 10:24, 25.
‘Makabu ya Bantu’
14. Inki mambu Mukristu yina kezola kusala bonso nkuluntu to nsadi ya kisalu fwete lungisa?
14 Babakala ya kele Bakristu yina kezola kusadila bampangi na bo bonso bankuluntu to bansadi ya kisalu kele na lukanu mosi ya mbote. (1 Timoteo 3:1, 8) Sambu na kumonisa nde yandi mefwana na kubaka mikumba yai, mpangi ya bakala fwete vanda muntu ya kimpeve, ya mezaba Masonuku mbote mpi ya kele ngolo na kisalu ya bilanga. (Bisalu 18:24; 1 Timoteo 4:15; 2 Timoteo 4:5) Yandi fwete monisa kudikulumusa, kukonda lulendo, mpi kukanga ntima, sambu Nzambi kesakumunaka ve bantu ya lulendo, ya kekudimonaka, mpi ya kezolaka makambu ya nene. (Bingana 11:2; Baebreo 6:15; 3 Yoane 9, 10) Kana yandi mekwelaka, yandi fwete vanda tata ya dibuta ya kezolaka mpi ya ketwadisaka mbote dibuta na yandi yonso. (1 Timoteo 3:4, 5, 12) Sambu yandi kebakaka kimvwama ya kimpeve na valere, bakala ya mutindu yina tabaka lusakumunu ya Yehowa.—Matayo 6:19-21.
15, 16. Banani kemonisaka mpenza nde bo kele ‘makabu ya bantu’? Pesa bambandu.
15 Na ntangu bantu yina kele bankuluntu na kati ya dibundu kesala kisalu ya kuzabisa nsangu ya mbote, ya kutanina mameme, mpi ya kulonga, bo kepesaka beto bikuma ya mbote ya kubaka ‘makabu ya bantu’ ya mutindu yai na valere mingi. (Efezo 4:8, 11) Yo lenda salama nde bantangu yankaka bantu yina kebaka mambote ya kisalu na bo kupesa ve mersi sambu na kisalu ya zola ya babakala yai kesalaka, kansi Yehowa kemonaka mambu yonso yina bankuluntu ya kwikama kesalaka. Yandi tavila ve zola yina bo kemonisaka na zina na yandi na mpila bo kelongaka bantu na yandi.—1 Timoteo 5:17; Baebreo 6:10.
16 Beto baka mbandu ya nkuluntu mosi ya kesalaka mingi yina kwendaka kutala mwana-nkento mosi ya Mukristu yina vandaka kuyilama sambu bo pasula yandi na ntu. Nduku mosi ya dibuta yina kusonikaka nde: “Yandi vandaka kutuba na mawete yonso, yandi pesaka beto kikesa kibeni, mpi yandi tulaka dikebi na yandi yonso na beto. Yandi lombaka nzila na kusamba Yehowa kumosi ti beto. Na ntangu yandi vandaka kusamba, tata na beto [yina kuvandaka ve Mbangi ya Yehowa] yantikaka kudila na nsi-nsi, ebuna mansanga vandaka kubasika na meso ya bantu yonso yina kuvandaka na shambre yina ya lupitalu. Kisambu ya nkuluntu yina kulembikaka beto kibeni ntima, mpi yo songaka nde Yehowa kezolaka beto mingi na mpila yandi tindaka yandi kaka na ntangu yina!” Mbangi yankaka kutubaka sambu na bankuluntu yina kwendaka kutala yandi nde: “Ntangu bo kumaka penepene ti mbeto na mono na salle des soins intensifs, banda na ntangu yina mono ndimisaka ntima na mono nde ntangu yai konso mambu yina kezola kusalama, yo salama, sambu mono takanga kaka ntima. Yo pesaka mono ngolo mingi mpi ngemba na ntima.” Keti kele na muntu ya lenda sumba kinduku ya zola ya mutindu yina na mbongo? Ata fyoti ve! Yo kele dikabu yina kekatukaka na Nzambi, yina yandi mepesaka beto na nsadisa ya dibundu ya Bukristu.—Yezaya 32:1, 2.
Dikabu ya Kisalu ya Bilanga
17, 18. (a) Inki dikabu ya kisalu Yehowa mepesaka bantu na yandi yonso? (b) Inki lusadisu Nzambi mepesaka beto sambu beto kuka na kusala kisalu na beto?
17 Kele ve na lukumu ya kuluta nene ya bo lenda pesa muntu katula kusadila Yehowa, Muntu ya Kuluta Zulu. (Yezaya 43:10; 2 Korinto 4:7; 1 Piere 2:9) Kansi, mukumba ya kulonga nsangu ya mbote kele sambu na muntu yonso, baleke ti bambuta, babakala ti bankento, yina kele na mpusa ya kyeleka ya kusadila Nzambi. Keti nge kesadilaka dikabu yai ya kitoko? Bankaka lenda buya kusala yo sambu bo kemona nde bo mekuka ve, kansi beto vila ve nde Yehowa kepesaka mpeve santu na bantu yina kesadilaka yandi, mpi yo kesadisaka beto na kuzwa mayele ya beto kekonda.—Yeremia 1:6-8; 20:11.
18 Yehowa mepesaka kisalu ya kulonga Kimfumu na bansadi na yandi ya kudikulumusa, kansi na bantu ya lulendo mpi ya ketulaka ntima na mayele na bo mosi ve. (1 Korinto 1:20, 26-29) Bantu ya kudikulumusa, ya kukonda lulendo kezabaka kisika mayele na bo mesuka mpi bo ketulaka ntima na lusadisu ya Nzambi na ntangu bo kekwendaka na kisalu ya bilanga. Bo kepesaka mpi mersi sambu na lusadisu yina yandi kepesaka bo na nsadisa ya “mpika ya kwikama.”—Luka 12:42-44, NW; Bingana 22:4.
Luzingu ya Dibuta ya Kyese Kele Dikabu ya Mbote
19. Inki mambu kesadisaka na kununga na kusansa bana?
19 Makwela ti luzingu ya dibuta ya kyese kele makabu ya kekatukaka na Nzambi. (Ruti 1:9; Efezo 3:14, 15) Bana mpi kele “makabu ya Mfumu Nzambi,” ya kepesaka bibuti yina kenungaka na kulonga bo bikalulu yina kepesaka Nzambi kyese. (Nkunga 127:3) Kana nge kele kibuti, lemfukaka ntangu yonso na ndinga ya Yehowa na kulongaka Ndinga na yandi na bana na nge. Bayina kesalaka mutindu yina kevandaka na ntembe ve nde Yehowa tasadisa bo mpi tapesa bo balusakumunu mingi.—Bingana 3:5, 6; 22:6; Efezo 6:1-4.
20. Inki kima lenda sadisa bibuti yina bana na bo mebasikaka na lusambu ya kyeleka?
20 Ata bibuti yina kebangaka Nzambi kesalaka mpenza ngolo, ziku bana na bo yankaka keponaka kukatuka na lusambu ya kyeleka kana bo meyela. (Kuyantika 26:34, 35) Dyambu yai lenda pesa bibuti basusi mingi. (Bingana 17:21, 25) Kansi, na kisika ya kuvidisa kivuvu kimakulu, yo tavanda mbote nde bo yibuka kingana ya mwana ya kuvilaka yina Yezu kupesaka. Ata mwana yina kubikaka nzo na bo mpi kukumaka na luzingu mosi ya mbi, na nsuka yandi vutukaka na nzo ya tata na yandi, ebuna tata kuyambaka yandi na kyese mpi na zola yonso. (Luka 15:11-32) Ata konso nki mambu yina mekumina bo, bibuti ya kwikama yina kele Bakristu lenda tula ntima nde Yehowa kebakisaka bo, yandi ketulaka bo dikebi na yandi ya zola, mpi yandi tasadisa bo.—Nkunga 145:14.
21. Na nani beto fwete lemfuka, mpi sambu na nki?
21 Yo yina, bika konso muntu na kati na beto, kuzaba nki kima meluta mpenza mfunu na luzingu na beto. Keti beto kesosaka kuzwa na bwimi yonso bima mingi ya kinsuni, yina lenda natila beto ti mabuta na beto mpasi? To beto kelandaka ‘makabu ya mbote mpenza’ yina kekatukaka na “Nzambi yina salaka bamwinda ya zulu”? (Yakobo 1:17) Satana, “tata ya luvunu,” kezolaka nde beto kudipesa na kusosa bimvwama ya kinsuni mpi beto vidisa kyese mpi luzingu na beto. (Yoane 8:44; Luka 12:15) Kansi, Yehowa ketaninaka beto mpi yandi kezodilaka beto mambu ya mbote. (Yezaya 48:17, 18) Yo yina, bika beto lemfukaka na Tata na beto ya zola yina kele na zulu mpi beto vandaka ntangu yonso na “kiese” na yandi. (Nkunga 37:4) Kana beto landa luzingu ya mutindu yai, makabu ya kitoko mpi balusakumunu mingi ya Yehowa takumisa beto bamvwama, mpi yo tayika beto ve ata mpasi fyoti.
[Noti na nsi ya lutiti]
a Tala Réveillez-vous! ya Yanuari 22, 1993, balutiti 18-21.
Keti Nge Keyibuka?
• Wapi beto lenda zwa kyese ya kuluta nene?
• Inki makabu Yehowa mepesaka bantu na yandi?
• Sambu na nki kisalu ya bilanga kele dikabu?
• Inki bibuti lenda sala sambu na kubaka lusakumunu ya Nzambi na ntangu bo kesansa bana na bo?
[Kifwanisu ya kele na lutiti 14]
Keti nge kepesaka Nzambi mersi sambu na dikabu ya Ndinga na yandi ya kusonika?
[Kifwanisu ya kele na lutiti 15]
Ata yandi vandaka kuzinga na mpasi, Laurel Nisbet kusadilaka Nzambi na kikesa yonso
[Bifwanisu ya kele na lutiti 16]
Bonso Tabita, Bakristu ya ntangu yai mezabanaka mbote sambu na bisalu na bo ya zola
[Kifwanisu ya kele na lutiti 17]
Bankuluntu kekudibanzaka na zola yonso sambu na bampangi na bo Bakristu