Madya ya Nkokila ya Mfumu Ketendula Nki Sambu na Nge?
“Konso muntu yina ke dia mampa ya Mfumu to ke nwa dikopa ya Mfumu na nzila ya kukonda kulunga, yandi ke sala mbi na nitu ya Mfumu ti na menga na yandi.”—1 KORINTO 11:27.
1. Inki dyambu ya kuluta mfunu yina bo meyidika sambu na mvu 2003, mpi nki mutindu yo yantikaka?
DYAMBU ya kuluta mfunu ya bo meyidika sambu na mvu 2003 tasalama na Aprili 16 na nima ya kudinda ya ntangu. Bambangi ya Yehowa tavukana sambu na kuta nkinsi ya Lusungiminu ya lufwa ya Yezu Kristu. Mutindu beto monaka yo na disolo yina meluta, Yezu kutulaka nkinsi yai, ya bo kebingaka mpi nde Madya ya Nkokila ya Mfumu na nima ya kuta nkinsi ya Paki ti balongoki na yandi na Nisani 14, ya mvu 33 ya T.B. Bidimbu ya Lusungiminu ya kele dimpa ya kukonda levire mpi vinu ya mbwaki kele kidimbu ya nitu ya kukonda masumu ya Kristu mpi menga na yandi ya kutyamukaka. Yo mpamba kele kimenga ya mefwana na kukatula bantu na disumu mpi lufwa yina bo bakaka na bankaka na bo.—Roma 5:12; 6:23.
2. Inki lukebisu kele na 1 Korinto 11:27?
2 Bantu yina kedyaka bidimbu ya Lusungiminu fwete vanda ya kulunga sambu na kusala yo. Ntumwa Polo kumonisaka yo pwelele ntangu yandi sonikilaka Bakristu ya Korinto ya ntama, kisika bo vandaka kuta ve nkinsi ya Madya ya Nkokila ya Mfumu na mutindu mosi ya kufwana. (1 Korinto 11:20-22) Polo kusonikaka nde: “Konso muntu yina ke dia mampa ya Mfumu to ke nwa dikopa ya Mfumu na nzila ya kukonda kulunga, yandi ke sala mbi na nitu ya Mfumu ti na menga na yandi.” (1 Korinto 11:27) Bangogo yai ketendula inki?
Bantu Yankaka Vandaka Kusala Yo Kukonda Kulunga
3. Inki mutindu Bakristu mingi ya Korinto vandaka kusala na bankinsi ya Madya ya Nkokila ya Mfumu?
3 Bakristu mingi ya Korinto vandaka kudya bidimbu ya Lusungiminu bo ya kukonda kulunga. Bo vandaka kukabwana na kati na bo, mpi kuvandaka ti ntangu mosi, bankaka yantikaka kunata madya na bo ya nkokila mpi bo vandaka kudya yo na ntwala to na ntangu lukutakanu vandaka kusalama, mbala mingi bo vandaka kulutisa kudya mpi kunwa. Bo vandaka kutadila ve nkadilu ya mabanza ti ya kimpeve na bo. Dyambu yai kunataka bo na “kudikota nsoki sambu na nitu ya Mfumu ti na menga na yandi.” (NW) Bantu yina kudyaka ve na nkokila vandaka na nzala mpi vandaka kulanda ve na dikebi. Ya kyeleka, bantu mingi vandaka kudya kukonda luzitu mpi kukonda kubakisa mbote ntendula ya nene ya dyambu yai. Ntembe kele ve nde bo vandaka kudisambisa bo mosi!—1 Korinto 11:27-34.
4, 5. Sambu na nki yo kele mfunu nde bantu yina kedyaka bidimbu ya Lusungiminu mbala na mbala kuditala mbotembote?
4 Ntangu Lusungiminu kekumaka penepene konso mvula, yo kelombaka nde bayina kedyaka bidimbu mbala na mbala kuditala mbotembote. Sambu na kudya madya yai ya kimvuka na mutindu ya kufwana, bo fwete vanda na mavimpi ya mbote ya kimpeve. Konso muntu yina kemonisa kukonda luzitu, to nkutu kuvweza kimenga ya Yezu, yandi takuma na kigonsa ya ‘kukatuka na ndonga ya bantu ya Nzambi,’ kaka mutindu bo vandaka kukatula muntu ya Izraele yina kudyaka madya ya kimvuka na masumu.—Levi 7:20; Baebreo 10:28-31.
5 Polo kufwanisaka Lusungiminu na madya ya kimvuka na Izraele ya ntama. Yandi tubilaka bantu yina vandaka kudya na kimvuka mosi ti Kristu mpi na nima yandi tubaka nde: “Beno lenda nwa ve dikopa ya Mfumu Yesu ebuna na nima beno kwisa kunwa dyaka dikopa ya bampeve ya mbi. Beno lenda dia ve na mesa ya Mfumu ebuna na nima beno kwisa kudia diaka na mesa ya bampeve ya mbi.” (1 Korinto 10:16-21) Kana muntu yina kedyaka bidimbu ya Lusungiminu mesala disumu ya ngolo, yandi fwete funguna na Yehowa mpi kusosa lusadisu ya kimpeve na bankuluntu ya dibundu. (Bingana 28:13; Yakobo 5:13-16) Kana yandi mebalula kibeni ntima mpi yandi mesonga bambuma ya kemonisa kubalula ntima, yandi tavanda dyaka ve muntu ya kedya kukonda kulunga.—Luka 3:8.
Kuvukana Sambu na Kutala Kaka na Luzitu Yonso
6. Nzambi mepesaka dibaku ya kudya Madya ya Nkokila ya Mfumu na banani?
6 Keti bantu yina kesalaka mambote bubu yai na bampangi ya Kristu yina mebikalaka na kati ya bantu 144 000 fwete dya bidimbu ya Madya ya Nkokila ya Mfumu? (Matayo 25:31-40; Kusonga 14:1) Ve. Nzambi mepesaka dibaku yai ya nene kaka na bantu yina yandi mepakulaka na mpeve santu na yandi na kuvanda “bantu ya yandi meponaka sambu na kuyala kumosi ti Kristu.” (Roma 8:14-18, NW; 1 Yoane 2:20) Ebuna, inki bantu yina kele na kivuvu ya kuzinga mvula na mvula na paladisu ya ntoto na nsi ya luyalu ya Kimfumu fwete sala? (Luka 23:43; Kusonga 21:3, 4) Sambu bo kele ve bantu yina tayala kumosi ti Yezu mpi bo kele ve na kivuvu ya zulu, bo kekwendaka na Lusungiminu sambu na kutala na luzitu yonso.—Roma 6:3-5.
7. Inki kima kusadisaka Bakristu ya mvu-nkama ya ntete na kuzaba nde bo fwete dya bidimbu ya Lusungiminu?
7 Bakristu ya kyeleka na mvu-nkama ya ntete kupakulamaka na mpeve santu. Mingi na kati na bo kusadilaka dikabu mosi to makabu mingi ya kuyituka ya mpeve, bonso kutuba na bandinga. Yo yina, yo vandaka mpasi ve sambu na bantu ya mutindu yina na kubakisa nde bo vandaka bantu ya kupakulama na mpeve mpi nde bo fwete dya bidimbu ya Lusungiminu. Kansi, na bilumbu na beto, muntu lenda zaba nde yandi kele muntu ya kupakulama na mpeve na nsadisa ya bangogo ya kupemama bonso yai: “Bantu yonso yina ya Mpeve ya Nzambi ke nataka bo kele bana ya Nzambi. Sambu Nzambi pesaka beno Mpeve na yandi ve na mpila nde beno kituka bampika to beno vanda diaka na boma. Kansi Mpeve ke kumisaka beno bana ya Nzambi, ti ke pesaka beto nzila na kubinga Nzambi nde: ‘[Abba, Tata!, NW]’”—Roma 8:14, 15.
8. “Bambuma ya ble” ti “bambuma ya matiti ya mbi” yina Matayo kapu 13 ketubila kele kifwani ya banani?
8 Banda ntangu ya dibundu ya Bukristu ya ntete, bapakulami ya kyeleka meyelaka bonso “bambuma ya ble” na bilanga ya “bambuma ya matiti ya mbi,” disongidila Bakristu ya luvunu. (Matayo 13:24-30, 36-43) Banda na bamvula 1870, “bambuma ya ble” kumonanaka mbotembote kibeni, mpi na nima ya bamvula kiteso ya 100 na nima bo zabisaka Bakristu ya kupakulama yina kuvandaka bankengi nde: “Bankuluntu . . . fwete zabisa bantu yonso yina kevukana [sambu na lukutakanu] bangogo yai,—(1) lukwikilu na menga [ya Kristu]; mpi (2) Kudipesa na Mfumu mpi na kisalu na yandi, ata tii na lufwa. Ebuna bo fwete lomba bayina yonso ketulaka lukwikilu na menga ya Kristu na kuta nkinsi ya lufwa ya Mfumu.”—Études des Écritures, Volime VI, La Nouvelle Création, lutiti 473.a
Kusosa “Mameme ya Nkaka”
9. Inki mutindu “kibuka ya nene” kuzabanaka mbotembote na mvu 1935, mpi nki bantu yina vandaka kudya bidimbu ya Lusungiminu kusalaka?
9 Na nima ya bilumbu, organizasio ya Yehowa kuyantikaka kutula dikebi na bantu yankaka yina tayikama na Bakristu ya kupakulama ya Kristu. Na katikati ya bamvu 1930 dyambu mosi ya mfunu ya ketadila kimvuka yai kusalamaka. Na ntwala ya bamvula yai, bantu ya Nzambi vandaka kuyindula nde “kibuka ya nene” yina Kusonga 7:9 (NW) ketubila kele kimvuka ya zole ya bantu ya kimpeve yina tavukana ti bapakulami 144 000 yina kufutumukaka mpi mekwendaka na zulu—sambu na kuvanda bonso bana ya bankento yina kevandaka penepene ti nkento yina mekwela to bampangi ya nkento ya Kristu. (Nkunga 45:14, 15; Kusonga 7:4; 21:2, 9) Kansi na Mayi 31, na mvu 1935, diskure mosi yina kusalamaka na lukutakanu ya distrike ya Bambangi ya Yehowa na Washington, na États-Unis, mutubi kupesaka ntendula yina kukatukaka na Biblia nde “kibuka ya nene” (“kibuka ya bantu mingi,” King James Version) kele “mameme ya nkaka” yina kezinga na ntangu ya nsuka. (Yoane 10:16) Na nima ya lukutakanu ya distrike yina, bantu yankaka yina vandaka kudya bidimbu ya Lusungiminu kuyambulaka na kudya yo sambu bo bakisaka nde kivuvu na bo vandaka ya kuzinga na ntoto, kansi ya zulu ve.
10. Inki mutindu nge lenda tendula kivuvu mpi mikumba ya “mameme yankaka” ya bilumbu na beto?
10 Kubanda na mvu 1935, bo yantikaka kusosa bantu yina mekumaka “mameme ya nkaka,” bayina ketulaka lukwikilu na nkudulu, bayina mekudipesaka na Nzambi, mpi kesadisaka “kibuka ya fyoti” (NW) ya bapakulami na kisalu ya kusamuna Kimfumu. (Luka 12:32) Mameme yankaka yai kele ti kivuvu ya kuzinga mvula na mvula na ntoto, kansi na mambu yankaka yonso, bo kele kiteso mosi ti bantu yina mebikalaka bubu yai yina tayala na Kimfumu. Bonso banzenza yina vandaka kuzinga na Izraele ya ntama vandaka kusambila Yehowa mpi kuzitisa Nsiku, mameme yankaka ya ntangu na beto kendimaka kusala bisalu ya Bukristu, bonso kusamuna nsangu ya mbote kumosi ti bantu ya Izraele ya kimpeve. (Galatia 6:16) Kansi, kaka mutindu yo vandaka nde nzenza lenda kuma ve mfumu ya Izraele to nganga-Nzambi, ata muntu mosi ve na kati ya mameme yai yankaka lenda yala na Kimfumu ya zulu to kusala bonso banganga-Nzambi.—Kulonga 17:15.
11. Sambu na nki dati ya muntu bakaka mbotika lenda songa mbote kivuvu ya yandi kele na yo?
11 Ebuna, na kutuba ya mbote, banda na bamvula 1930 yo yantikaka kukuma pwelele nde kimvuka ya bantu yina takwenda na zulu bo meponaka bo dezia. Bamvula 70 meluta bubu yai, bo mekumaka kusosa kaka mameme yankaka, bayina kele ti kivuvu ya kuzinga na ntoto. Kana mupakulami mosi na kati ya 144 000 kumonisa kukonda kwikama, yo fwete vanda kibeni nde Nzambi tabinga muntu mosi yina mesadilaka yandi tuka ntama na kwikama na kati ya mameme yankaka sambu na kulungisa dyaka ntalu yina.
Kikuma Bantu Yankaka Kekudikusaka nde Bo Kele ti Kivuvu ya Zulu
12. Inki mambu fwete nata muntu mosi na kuyambula na kudya bidimbu ya Lusungiminu, mpi sambu na inki?
12 Bakristu ya kupakulama kendimaka mpenza nde bo takwenda na zulu. Kansi nki beto lenda tuba kana bantu yankaka yina Nzambi mebingaka ve na kuzinga na zulu kedyaka bidimbu ya Lusungiminu? Ntangu yai ya bo mebakisa nde bo kele ve ti kivuvu ya zulu, ntembe kele ve nde kansansa na bo tapusa bo na kuyambula na kudyaka yo. Nzambi lenda sepela ve ti muntu yina keyindulaka yandi mosi nde bo mebingaka yandi na kuvanda mfumu mpi nganga-Nzambi na zulu ata yandi kezaba nde yandi kele ve ti kivuvu yai. (Roma 9:16; Kusonga 20:6) Yehowa kufwaka Kore sambu yandi vandaka kusosa kubaka na lulendo yonso kisika ya kinganga-Nzambi ya Aroni. (Kubasika 28:1; Kutanga 16:4-11, 31-35) Kana Mukristu mosi mebakisa nde yandi vandaka kudya bidimbu ya Lusungiminu kukonda kuzaba, yandi fwete yambula kudya yo mpi kusamba na kudikulumusa yonso sambu na kulomba ndolula na Yehowa.—Nkunga 19:13.
13, 14. Sambu na nki bantu yankaka lenda kudikusa nde Nzambi mebinga bo na kukwenda na zulu?
13 Sambu na nki bantu yankaka keyindulaka kukonda kuzaba nde Nzambi mebingaka bo na zulu? Lufwa ya nkwelani mosi to dyambu yankaka ya mpasi lenda pusa bo na kuvanda dyaka ve na nzala ya kuzinga na ntoto. To bo kezola kukwenda kisika mosi ti nduku na bo yina ketubaka nde yandi kele Mukristu ya kupakulama. Ya kyeleka, Nzambi mepesaka ve ata muntu mosi mukumba ya kupona bantu yankaka sambu na kupesa bo dikabu yai. Mpi yandi kekumisaka ve bantu bapakulami yina tayala na Kimfumu na kusalaka na mpila nde bo yantika kuwa bandinga to bansangu yina kendimisa nde bo kele bapakulami.
14 Ngindu ya luvunu ya mabundu kevandaka na yo nde bantu yonso ya mbote kekwendaka na zulu lenda pusa bankaka na kuyindula nde bo mebingaka bo na kukwenda kuzinga na zulu. Yo yina, beto fwete keba na mpila nde mabanza ya mbi to mambu yankaka ya melutaka kukusa beto ve. Mu mbandu, bantu yankaka lenda kudiyula nde: ‘Keti mu kenwaka bankisi yina kevandaka ti bupusi na mawi na mono? Keti mu kele na mawi ya ngolo yina lenda kusa mono na kuyindula nde mu kele mupakulami?’
15, 16. Sambu na nki bantu yankaka lenda yindula na mutindu mosi ya mbi nde bo kele bapakulami?
15 Bankaka dyaka lenda kudiyula nde: ‘Keti mu kele na nzala ya kukuma muntu ya lukumu ya mezabana na bantu mingi? Keti mu kewaka mpusa ya kukuma ti kiyeka bubu yai to muntu yina tayala ti Kristu na bilumbu kekwisa?’ Ntangu Nzambi kuponaka bantu yina tayala ti Kristu na mvu-nkama ya ntete, bo yonso vandaka ve ti biyeka na dibundu. Dyaka, bantu yina kele ti kivuvu ya kukwenda na zulu kesosaka ve lukumu to kekudisikisaka ve sambu bo kele bapakulami. Bo kemonisaka kudikulumusa yina bantu ya kele ti “mabanza ya Kristo” fwete vanda na yo.—1 Korinto 2:16.
16 Mbala yankaka bankaka keyindulaka nde bo takwenda na zulu sambu bo mekumaka ti nzayilu ya mingi ya Biblia. Kansi mpeve yina Nzambi kepakulaka na bantu kepesaka ve muntu nzayilu ya kuluta mingi, sambu yo lombaka nde Polo kulonga mpi kupesa bandongisila na bantu yina vandaka bapakulami. (1 Korinto 3:1-3; Baebreo 5:11-14) Nzambi mesalaka ngidika mosi sambu na kupesa madya ya kimpeve na bantu na yandi yonso. (Matayo 24:45-47) Yo yina ata muntu mosi ve fwete yindula nde kuvanda Mukristu ya kupakulama kepesa yandi mayele ya kuluta ya bantu yina kele na kivuvu ya kuzinga na ntoto. Mpeve yina kepakulaka bantu kemonikaka ve na mayele ya muntu kevandaka na yo na kupesa bamvutu na bangyufula ya kimpeve, na kuta kimbangi, to na kusala badiskure ya mekatuka na Biblia. Bakristu mingi ya kele na kivuvu ya kuzinga na ntoto kesalaka mpi mambu yai mbote.
17. Mpeve yina kekumisaka muntu mupakulami ketadilaka nki mpi nani?
17 Kana mpangi mosi yina kele Mukristu kuyula ngyufula yina metala kivuvu ya kukwenda na zulu, nkuluntu to Mukristu mosi ya kuyela lenda solula ti yandi na dyambu yai. Kansi, ata muntu mosi ve lenda bakila muntu yankaka desizio yai. Mukristu yina kele kibeni ti kivuvu ya kukwenda na zulu kevandaka ve na mfunu ya kuyula bantu yankaka kana ya kyeleka yandi kele ti kivuvu ya mutindu yai. Bapakulami ‘me butukaka diaka kubutuka ya mpa, na batata yina ke fwaka ve, bo me butukaka ve na [nzila ya nkeni, NW] yina ke fwaka, kansi bo me butuka na nsangu ya Nzambi, nsangu yina kele moyo ti ya mvula na mvula.’ (1 Piere 1:23) Na nsadisa ya mpeve mpi Ndinga na yandi, Nzambi ketulaka “nkeni” yina kekumisaka muntu “muntu mosi ya mpa,” ti kivuvu ya zulu. (2 Korinto 5:17) Yehowa muntu keponaka. Kupakulama ‘kelandaka ve mambu yina ya muntu ke zolaka, to yina ya muntu ke salaka, kansi luzolo ya Nzambi.’ (Roma 9:16) Ebuna nki mutindu muntu lenda zaba mpenza nde yandi kele ti kivuvu ya kukwenda na zulu?
Kikuma ya Kendimisaka Bo
18. Inki mutindu mpeve ya Nzambi ketaka kimbangi ti mpeve ya bapakulami?
18 Kimbangi yina mpeve ya Nzambi kesalaka kendimisaka Bakristu ya kupakulama nde bo kele ti kivuvu ya zulu. “Mpeve ke kumisaka beno bana ya Nzambi, ti ke pesaka beto nzila na kubinga Nzambi nde: ‘[Abba, Tata!, NW]’ Mpeve ya Nzambi ke tubaka yo mosi na ntima na beto nde beto kele bana ya Nzambi. Beto kele bana na yandi; yo yina beto ta baka mpi makabu yina ya Nzambi silaka na bantu na yandi. Beto ta baka makabu na beto yina na kimvuka ti Kristo; beto ta vanda na ndambu ya lukumu na lukumu na yandi, sambu beto ke monaka mpasi nzila mosi ti yandi.” (Roma 8:15-17) Na ngolo ya mpeve santu ya Nzambi, mpeve to kikalulu ya ntete ya bapakulami kepusaka bo na kusadila mambu yina Masonuku ketuba sambu na bana ya kimpeve ya Yehowa. (1 Yoane 3:2) Mpeve ya Nzambi kepesaka bo mayele ya kuzaba nde bo kele bana na ntwala na yandi mpi yandi ketulaka na ntima na bo kivuvu mosi ya kuluta ngolo. (Galatia 4:6, 7) Ya kyeleka, luzingu ya mvula na mvula bonso bantu ya kukuka na ntoto kisika mosi ti bantu ya dibuta mpi banduku na beto tavanda kitoko, kansi bo bapakulami kele ve na kivuvu yai ya Nzambi mepesaka beto. Na nsadisa ya mpeve na yandi, Nzambi metulaka na kati na bo kivuvu yai ya ngolo ya kukwenda na zulu na mpila nde bo kele na luzolo ya kutambika kyese mpi bivuvu na bo ya kuzinga na ntoto.—2 Korinto 5:1-5, 8; 2 Piere 1:13, 14.
19. Inki kima kuwakana ya mpa kesalaka na luzingu ya Mukristu ya kupakulama?
19 Bakristu ya kupakulama kevandaka ve na dute ata fyoti sambu na yina metala kivuvu na bo ya kukwenda na zulu, ya kuzaba nde bo mekotisaka bo na kuwakana ya mpa. Yezu kutubilaka yo ntangu yandi tulaka Lusungiminu mpi yandi tubaka nde: “Dikopa yai ke songa kuwakana ya mpa ya Nzambi me wakana ti beno na menga na mono yai ke losana sambu na beno.” (Luka 22:20) Bantu yina kesala kuwakana ya mpa kele Nzambi ti bapakulami. (Yeremia 31:31-34; Baebreo 12:22-24) Yezu kele muwakanisi. Sambu kuwakana ya mpa mesalamaka na nsadisa ya menga ya Kristu yina kutyamukaka, Bayuda kaka ve bantu kele na kati na yo kansi yandi mebakaka mpi bantu na makanda sambu na zina ya Yehowa mpi yandi mekotisaka bo na kati ya “nkuna” (NW) ya Abrahami. (Galatia 3:26-29; Bisalu 15:14) “Kuwakana ya mvula na mvula” yai kesalaka nde bantu yonso ya Izraele ya kimpeve kufutumuka sambu na luzingu ya kukonda kufwa na zulu.—Baebreo 13:20.
20. Nzambi mekotisaka bapakulami na nki kuwakana ti Kristu?
20 Bapakulami kekwikilaka kibeni na kivuvu na bo. Nzambi mekotisaka bo na kuwakana yankaka, kuwakana ya Kimfumu. Sambu na yina metala kuyala na bo kumosi ti Kristu, Yezu kutubaka nde: “Na bampasi yonso ya mono vandaka kumona, beno vandaka kutina mono ve. Mono ke pesa beno kiyeka ya kuyala na Kimfumu ya Tata na mono mutindu yandi pesaka mono mpi yo.” (Luka 22:28-30) Kuwakana yai na kati ya Kristu ti bantotila yina tayala ti yandi tabikala mvula na mvula.—Kusonga 22:5.
Nsungi ya Lusungiminu Kele Ntangu Mosi ya Kyese
21. Inki mutindu beto lenda baka mambote mingi na nsungi ya Lusungiminu?
21 Beto kevandaka na baokazio mingi ya kyese na nsungi ya Lusungiminu. Beto lenda baka mambote yina kekatukaka na manaka ya lutangu ya Biblia sambu na nsungi yai. Yo kevandaka mpi mingimingi ntangu mosi ya mbote sambu na kusamba, sambu na kuyindulula luzingu ya Yezu na ntoto mpi lufwa na yandi, mpi ya kusala kisalu ya kusamuna Kimfumu. (Nkunga 77:12; Filipi 4:6, 7) Nkinsi yango yo mosi keyibusaka beto zola yina Nzambi ti Kristu kumonisaka na yina metala nkudulu ya kimenga ya Yezu. (Matayo 20:28; Yoane 3:16) Dyambu yai ya Nzambi meyidikaka kepesaka beto kivuvu mpi kikesa mpi fwete pesa ngolo na lukanu na beto ya kulanda kuzinga bonso Kristu. (Kubasika 34:6; Baebreo 12:3) Lusungiminu fwete pesa beto mpi ngolo ya kulungisa kudipesa na beto bonso bansadi ya Nzambi mpi kuvanda balongoki ya kwikama ya Mwana na yandi ya yandi kezolaka.
22. Inki kele dikabu ya kuluta nene ya Nzambi mepesaka bantu, mpi nki kele mutindu mosi ya kumonisa ntonda sambu na yo?
22 Yai kele makabu ya mbote kibeni Yehowa mepesaka beto! (Yakobo 1:17) Beto kele na lutwadisu ya Ndinga na yandi, lusadisu ya mpeve na yandi, mpi kivuvu ya luzingu ya mvula na mvula. Dikabu ya kuluta nene ya Nzambi mepesaka beto kele kimenga ya Yezu sambu na masumu ya bapakulami mpi ya bantu yankaka yonso yina kekwikilaka na yandi. (1 Yoane 2:1, 2) Yindula ntangu yai, lufwa ya Yezu ketendula nki sambu na nge? Keti nge tavanda na kati ya bantu yina kemonisaka ntonda na lufwa ya Yezu na kuvukana na nima ya kudinda ya ntangu na Aprili 16, 2003, sambu na kuta nkinsi ya Madya ya Nkokila ya Mfumu?
[Noti na nsi ya lutiti]
a Bambangi ya Yehowa bantu kubasisaka yo kansi bo kebasisaka yo dyaka ve.
Inki Kele Bamvutu na Nge?
• Nani fwete dya bidimbu ya Lusungiminu?
• Sambu na nki “mameme ya nkaka” kekwendaka na Madya ya Nkokila ya Mfumu kaka sambu na kutala?
• Inki mutindu Bakristu ya kupakulama kezabaka nde bo fwete dya dimpa mpi kunwa vinu ya Lusungiminu ya lufwa ya Kristu?
• Nsungi ya Lusungiminu kevandaka ntangu ya mbote sambu na kusala inki?
[Tablo/Bifwanisu ya kele na lutiti 14]
(Sambu na kumona mambu yonso, tala mukanda)
Bantu Yina Kuvandaka na Lusungiminu
NTALU NA BAMILIO
15 597 746
15
14
13 147 201
13
12
11
10
9
8
7
6
5
4 925 643
4
3
2
1
878 303
63 146
1935 1955 1975 1995 2002
[Kifwanisu ya kele na lutiti 14]
Keti nge tavanda na Madya ya Nkokila ya Mfumu na mvula yai?
[Bifwanisu ya kele na lutiti 17]
Nsungi ya Lusungiminu kele ntangu mosi ya mbote sambu na kutanga dyaka mingi Biblia mpi kusala mingi kisalu ya kusamuna Kimfumu