Ta Nkinsi ya Lusungiminu na Mutindu Yina Mefwana

YEZU kubyadisaka (instituer) Lusungiminu na nkokila ya Nisani 14, ya mvu 33 T.B.a Ntembe kele ve sambu na dati yai, sambu Yezu kumanisaka ntete kuta nkinsi ya Paki ti bantumwa na yandi 12. Ntangu yandi kubasisaka ngyekudi, Yudasi, imene, Yezu “bakaka mampa, yandi pesa Nzambi merci, yandi zenga yo bitini-bitini, yandi pesa na balongoki na yandi, ebuna yandi tuba nde: ‘beno baka mampa yai; yo kele nitu na mono.’ Ebuna yandi bakaka dikopa; yandi pesaka merci na Nzambi, yandi pesaka bo yo, ebuna bo yonso nwaka yo. Na nima, yandi tubilaka bo nde: ‘Yai kele menga na mono yina ke songa kuwakana ya Nzambi me wakana ti bantu. Menga yai ke losana sambu na bantu mingi.’ ”​—Marko 14:22-24.

Yezu tumaka balongoki na yandi na kusungimina lufwa na yandi sambu na mfunu na yau. (Luka 22:19; 1 Korinto 11:23-26) Lufwa na yandi vandaka kimenga kaka mosi yina lendaka kusumba bantu na lusingu ya disumu mpi lufwa yina beto byadilaka (hériter). (Roma 5:12; 6:23) Dimpa ye vinu yina yandi sadilaka vandaka bidimbu ya nitu na yandi ya kukuka mpi menga na yandi. Mutindu beto mezaba dati mbotembote, konso mvula na kilumbu yina, beto lenda sungimina okazyo yango, mutindu Paki ya Bayuda vandaka kusalama. Kansi beto fwete kusala yau na mutindu mosi yina mefwana. Sambu na inki?

Ntumwa Polo tubaka nde bayina kedya dimpa mpi kenwa vinu “ta zabisaka bantu nsangu ya lufwa ya Mfumu, tii kuna yandi ta kwisa kuvutuka.” (1 Korinto 11:26, beto bantu metengimisa bisono.) Nkinsi yango zolaka kutadila ntetentete lufwa ya Yezu mpi ntendula na yau sambu na bantu. Okazio mosi ya nsaka ve, kansi ntangu ya kuyindula na yina metala bumbote ya Nzambi mpi na yina metala ntonda ya beto fwete kuvanda na yau sambu na Yehowa mpi Mwana na yandi. (Roma 5:8; Tito 2:14; 1 Yoane 4:9, 10) Na yau, Polo kebisaka nde: “Yo yina, konso muntu yina ke dia mampa ya mfumu to ke nwa dikopa ya Mfumu na nzila ya kukonda kulunga, yandi ke sala mbi na nitu ya Mfumu ti na menga na yandi.”​—1 Korinto 11:27.

Na Mutindu Yina Mefwana—Inki Mpila?

Na pwelele, Nzambi keyangalalaka ve kana beto kevweza okazio yango na kusadilaka bansadilu ya ketiketi to bansadilu ya mimpani. (Yakobo 1:27; 4:3, 4) Disongidila kukatula mambu yonso yina kesalamaka na nsungi ya Pake ya Lufutumuku. Na kulandaka ntuma ya Yezu ya “kusalaka mpidiyai sambu na kuyindula [yandi],” beto tazola kukembisa Lusungiminu bonso yandi byadisaka yau. (Luka 22:19; 1 Korinto 11:24, 25) Na yau, beto fwete kukatula bidimbu yina mabundu ya Kikristu meyikaka na nkinsi yango. Buku New Catholic Encyclopedia ketuba nde: “Misa ya bubu meswaswana mingi ti nkinsi ya fyoti yina Kristu ti balongoki na yandi salaka.” Ye na kusalaka Misa mbala na mbala, nkutu konso kilumbu, Kikristu kwisaka kubikisa kima Yezu kanisilaka mpi kumisaka yau bonso nkinsi mosi ya mpamba.

Polo sonikilaka Bakristu ya Korinto na yina metala bayina mefwana ve na kudya, sambu dyambu basikaka na dibundu na yina metadila Madya ya Nkokila ya Mfumu. Bankaka vandaka kuzitisa ve nkadilu ya santu ya nkinsi yango. Bau vandaka kunata madya na bau mosi mpi vandaka kudya yau na ntwala to na ntangu ya lukutakanu. Mbala mingi bau vandaka kudya mpi kunwa mbiki. Yau vandaka kunatila bau mpongi mpi kulembisa luswasukisu na bau. Sambu bau sikamaka ve na ngindu mpi na kimpeve, bau lendaka ve “kuswasukisa nitu” ye mpidina bau salaka “mbi na nitu mpi na menga ya Mfumu.” Na ntangu yango kaka, bayina kudyaka ve na nkokila vandaka na nzala mpi vandaka kidibakidiba. Na kyeleka, muntu mosi ve kati na bau vandaka na mvwandilu ya kudya bidimbu ti ntonda yonso mpi kubakisa mfunu ya okazyo yango—nde nkinsi yango vandaka sambu na kubambuka lufwa ya Mfumu. Malanda kuvandaka nde bau vandaka kusambisama, sambu bau vandaka kumonisa kukonda luzitu, nkutu mpi luvwezo, sambu na yau.—1 Korinto 11:27-34.

Luswasukisu Kele Mfunu

Bankaka medyaka bidimbu ya Lusungiminu, ata nkutu, na nima bau kekwisaka kubakisa nde, bau lendaka kudya ve. Bayina kele na nswa ya kudya bidimbu ya Lusungiminu mesolamaka na Nzambi mpi kele ti kimbangi ya mpeve ya Nzambi na mambu yai. (Roma 8:15-17; 2 Korinto 1:​21, 22) Yau kele ve nzengolo to lukanu na bau mosi kekumisaka bau ya kufwana na kudya. Nzambi mezengaka ntalu ya bayina tayala na Kristu na mazulu, 144 000, ntalu mosi ya fyoti mpenza na kutesa ti bayina yonso kebaka mambote ya nkudulu ya Kristu. (Kusonga 14:1, 3) Kuponama kuyantikaka na bilumbu ya Yezu, yau yina bayina kedyaka kele ndambu bubu yai. Mpi bonso lufwa kenata bamingi kati na bau, ntalu yango fwete kukita.

Sambu na inki muntu lenda kudya bidimbu na kifu? Yau lenda kuvanda sambu na mboninu ya lusambu na bau ya nkulu—nde bantu ya kwikama yonso kekwendaka na zulu. To yau lenda kuvanda sambu na lulendo to dibanza ya bwimi—mawi ya kumona nde bamosi meluta bankaka—mpi mpusa ya kudikumisa. Yau lenda kuvanda mpi malanda ya bangindu ya imbi yina mekatuka na mambu ya mpasi to na nkuba yina lenda kukatula muntu mfunu ya luzingu awa na ntoto. Yau lenda kuvanda mpi sambu na kinduku ya ngolo ti muntu yina mezwaka lubokilu ya zulu. Beto yonso fwete kubambuka nde nkanu yango kele Nzambi yandi mosi kezengaka, kansi beto ve. (Roma 9:16) Na yau, kana muntu “kuditala . . . na ntima na yandi mosi,” mpi kumona nde yandi lenda ve kudya bidimbu, yandi fwete kubika.—1 Korinto 11:28.

Na bantu yonso yina mebikala, Nzambi mepesa kivuvu ya luzingu ya mvula na mvula na kati ya paladisu ya ntoto. Yau kele lusakumunu ya nene yina beto lenda kuvingila na kyese yonso, mpi kivuvu ya lenda kubenda beto nkatu mpasi. (Luyantiku 1:28; Nkunga 37:9, 11) Kisika ya bantu ya kwikama tavukana ti bafutumuki na bau ya zolwa kele ntoto, bau takutana mpi ti bantu ya kwikama ya ntangu ya nkulu bonso Abrahami, Sara, Moize, Rahabi, Davidi mpi Yoane Mbotiki—bayina yonso kufwaka na ntwala Yezu kukangulaka nzila ya luzingu ya zulu.—Matayo 11:11; fwanisa ti 1 Korinto 15:20-23.

Bayina kele na kivuvu ya ntoto keta nkinsi ya Madya ya Nkokila ya Mfumu na kuvandaka na nkinsi yango mpi na kutulaka dikebi ya luzitu, ata nkutu bau kedya mpi kenwa ve dimpa ti vinu. Bau mpi kezwa mambote ya kimenga ya Kristu, kimenga yina kekumisa bau ya kukuka na kutelama na lemvo na ntwala ya Nzambi. (Kusonga 7:14, 15) Bonso bau kewidikila disolo yina kesalama, ntonda na bau sambu na mambu ya santu kesyamisama, mpi mpusa na bau ya kukangama na bumosi ti bantu ya Nzambi yina kele bisika yonso kekula.

Na mvula yai, na nima ya kudinda ya ntangu na Kizole, Aprili 2, Lusungiminu takembisama kati ya mabundu kuluta 78 000 ya Bambangi ya Yehowa na ntoto ya mvimba. Keti nge tavanda kati ya bayina tavanda pana?

[Noti na nsi ya lutiti]

[Kifwanisu ya kele na lutiti 8]

Bambangi ya Yehowa ketaka nkinsi ya Lusungiminu mbala mosi konso mvula