“Beno Kwenda Penepene na Nzambi, Ebuna Yandi Ta Kwisa Penepene na Beno”

Na Ntwala mpi na Nima Yandi Zwaka Ngolo ya Kusoba

SANDRA, nkento mosi ya Mexique, vandaka kudiwa bonso nde bo kezolaka yandi ve na kati ya dibuta na yandi. Na butoko na yandi, yandi vandaka kudiwa bonso nde bo melosaka yandi mpi bo kezolaka yandi ve. Yandi ketuba nde: “Mono lutisaka butoko na mono ti mawi ya kudimona kukonda mfunu mpi mu vandaka kudiyula sambu na nki mu butukaka mpi nki mfunu ya kuvanda na luzingu.”

Ntangu yandi vandaka na nzo-nkanda ya kati-kati, Sandra yantikaka na kunwa malafu yina tata na yandi vandaka na yo na nzo. Na nima, yandi yantikaka kusumba malafu yandi mosi mpi yandi kumaka kunwa mingi kibeni. Yandi kendima nde: “Mu vandaka kumona ve mfunu ya kuzinga.” Sambu yandi vandaka ve ata na kivuvu fyoti, Sandra yantikaka kusadila bima yina kelausaka. Yandi ketuba nde: “Kima mosi mpamba yina vandaka kusadisa mono na kuvila mambu yina vandaka kupesa mono mpasi vandaka bima yina mono vandaka na yo na sakoshi na mono: mulangi ya malafu, bambuma ya nkisi ya kelausaka, to ndambu ya dyamba.”

Na nima ya kumanisa nzo-nkanda ya kimunganga, Sandra kudikotisaka mpenza na luzingu ya kunwa malafu. Yandi mekaka nkutu na kudifwa. Kansi yandi salaka yo ve.

Sandra kusosaka lusadisu ya kimpeve mpi ya mawi na mabundu mingi ya kuswaswana kansi yandi zwaka yo ve. Sambu yandi vidisaka kivuvu yonso, yandi vandaka kudidila Nzambi mbala na mbala nde: “Nge ke wapi? Sambu na nki nge kesadisa mu ve?” Ntangu bangindu na yandi ya kudiwa nde yandi kele ve mfunu ata fyoti kukumaka mingi mpenza, Mbangi mosi ya Yehowa kusolulaka ti yandi. Yo sadisaka yandi na kuyantika kulonguka Biblia. Sandra kuyitukaka mpenza ntangu yandi waka nde “[Yehowa] kele penepene na bantu yina ke na kikesa ve, yandi ke gulusaka bantu yonso yina me katulaka ntima.”​—Nkunga 34:19.

Mpangi yina vandaka kulonguka Biblia ti Sandra kusadisaka yandi na kubakisa nde Yehowa Nzambi mezaba nde beto kevandaka ve na ngolo sambu na disumu mpi kukonda kukuka yina mekatukaka na Adami. Sandra kubakisaka nde Nzambi mezaba nde beto lenda kuka ve na kuzitisa bansiku na yandi ya lunungu kukonda kubwa. (Nkunga 51:7; Roma 3:23; 5:12, 18) Yandi vandaka na kyese ya kuzaba nde Yehowa ketulaka ve dikebi na yandi yonso kaka na mambu ya mbi ya beto kesalaka, mpi yandi kevingilaka ve nde beto sala mambu mingi kuluta yina ya beto lenda sala. Muyimbi-bankunga kuyulaka nde: “Kana nge landaka masumu na beto, [O Yah, O Yehowa, NW], nani zolaka kubaka ndola ve?”​—Nkunga 130:3.

Kyeleka mosi ya Biblia ya mfunu yina kupesaka Sandra kikesa mingi kele nkudulu ya kimenga ya Yezu Kristu. Na nsadisa na yo, Yehowa mendimaka na mawa yonso bantu ya bulemfu ata bo kesalaka masumu. (1 Yoane 2:2; 4:9, 10) Ya kyeleka, beto lenda baka “ndolula ya masumu na beto” (NW) mpi mpidina kubaka lusadisu sambu na kukatula bangindu yonso ya kudimona kukonda mfunu.​—Efezo 1:7.

Sandra kulongukaka malongi ya mfunu na mbandu ya ntumwa Polo. Polo kumonisa ntonda mingi sambu na ntima ya mbote yina Nzambi kumonisaka na mutindu yandi lolulaka mambu ya mbi ya yandi salaka ntama, mpi kusadisaka yandi na kunwana ti bifu na yandi ya mbi yina vandaka kuvutukila yandi. (Roma 7:15-25; 1 Korinto 15:9, 10) Polo kusobaka luzingu na yandi, yandi vandaka ‘kumonisa nitu na yandi mpasi mpi kuyala yo mpenza’ sambu yandi bikala na nzila yina Nzambi kendimaka. (1 Korinto 9:27) Yandi yambulaka ve nde masumu na yandi kuyala yandi.

Sandra vandaka kubwa dyaka na mambu ya mbi yina yandi vandaka kusala, kansi yandi landaka na kunwana ti yo. Yandi sambaka na masonga yonso sambu Yehowa kusadisa yandi na kununga yo mpi Nzambi kumonisaka yandi mawa na yandi. (Nkunga 55:23; Yakobo 4:8) Sambu yandi monaka nde Nzambi vandaka kutudila yandi dikebi, Sandra kusobaka luzingu na yandi. Yandi ketuba nde: “Mono kele na kyese ya kulonga Biblia na bantu yankaka ntangu yonso.” Sandra kusadisaka mbuta ti leke na yandi ya nkento na kuzaba Yehowa. Sambu yandi ‘kesalaka mambu yina kele ya mbote,’ yandi kesadilaka mpi mayele na yandi ya kimunganga na kusadisa bampangi na balukutakanu ya distrike ya Bambangi ya Yehowa.​—Galatia 6:10.

Inki beto lenda tuba sambu na kimpika yina Sandra kuvandaka na yo? Yandi ketuba na masonga yonso nde: “Mabanza na mono mekumaka mbote. Mu kenwaka dyaka ve malafu, makaya, to bima yina kelausaka. Mu kele dyaka ve na mfunu na yo. Mono mezwaka kima ya mono vandaka kusosa.”

[Bangogo sambu na kubenda dikebi ya kele na lutiti 9]

“Mu mezwaka kima ya mu vandaka kusosa”

[Lupangu ya kele na lutiti 9]

Minsiku ya Biblia Kesadisa

Minsiku ya Biblia ya melanda mesadisaka bantu mingi na kukatuka na kimpika ya bikalulu ya mbi:

“Beto fweti katula mambu yina yonso ke nataka mbi na nitu na beto ti na ntima na beto, beto fweti tula ngolo na kuvanda mpenza bantu ya Nzambi, beto fweti zitisa Nzambi.” (2 Korinto 7:1) Nzambi kesakumunaka bantu yina meyambulaka mambu ya mbi, mpi mebuyaka kusala mambu ya mvindu.

“Kutina Yehowa boma ketendula kubuya mambu ya mbi.” (Bingana 8:13, NW) Kutina Nzambi boma na luzitu yonso kesadisaka muntu na kuyambula bikalulu ya mbi, mpi kubuya na kusadila bima yina kelausaka. Katula kupesa Yehowa kyese, muntu yina mesoba luzingu na yandi, kekuditaninaka na bamaladi ya mbi.

“[Beno] fweti lemfuka na bamfumu ya leta, [beno] fweti wila bo.” (Tito 3:1) Na bisika mingi, kuvanda to kusadila bima yina kelausaka kele kufwa nsiku ya leta. Bakristu ya kyeleka kevandaka ve mpi kesadilaka ve bima yina kelausaka ya nsiku ya leta mebuyisaka.