Mutindu Bankento Zole Kukumaka Mifwidi

SANDRA kele mufwidi ya kezingaka na Australie. Ntangu bakala na yandi kufwaka kiteso ya mwa bamvula meluta, Sandra kuwaka mpasi mingi mpenza na ntima. “Kuzaba nde mono mevidisa na mbala mosi bakala mpi nduku na mono ya kuluta mbote, kuvalangasaka bangindu na mono. Mono kezabaka mpenza ve nki mutindu beto kumaka na nzo na ntangu beto katukaka na lupitalu to mambu ya mono salaka na bangunga yina kulandaka kilumbu yango. Na bamposo yina kulandaka, boma ya mono vandaka kuwa kunatilaka mono maladi na nitu.”

Sandra kele ti nduku mosi ya ntama, zina na yandi Elaine, ya kele mpi mufwidi bamvula sambanu melunga. Elaine vandaka kusadisa bakala na yandi, Davidi, bangonda sambanu ya mvimba na ntwala nde yandi fwa na cancer. Yandi vandaka kumona mpasi mingi mpenza na mpila nde na nima ya lufwa ya bakala na yandi, yandi vandaka kumona dyaka mbote ve sambu na mwa ntangu ya nda. Bamvula zole na nima, yandi bwaka na meso ya bantu. Munganga yina vandaka kusansa yandi, kumonaka ve ata maladi mosi na nitu na yandi. Kansi, yandi monaka nde Elaine vandaka ti basusi mingi na ntima, yo yina, yandi lombaka Elaine na kuvutuka na nzo mpi na kusala ngolo na mpila nde yandi kudila. Elaine kendima nde: “Yo bakaka mwa ntangu ya nda sambu mpasi na mono kumana.” Yandi keyika nde: “Mono kumaka ti kikalulu ya kukwenda na suku mpi kufika ntu na mono ti bilele ya David.”

Ya kyeleka, lufwa ya nkwelani lenda nata bampasi ya mutindu na mutindu, sambu kuvanda mufwidi ketendula ve kaka kuzinga kukonda bakala, kansi yo ketendula mambu mingi dyaka. Mu mbandu, Sandra vandaka kudiwa dyaka ve nde yina yandi. Bonso bankento mingi yankaka ya mekatuka kuvidisa babakala na bo, yandi kumaka kubela-bela, mpi boma-boma. Sandra keyibuka nde: “Mutindu mono yikanaka na kubika bakala na mono kubaka badesizio ya nsuka na mambu yonso, mono bikalaka mono mosi kaka na mbala mosi sambu na kubaka badesizio ya nsuka. Mpongi na mono kutinaka. Mono lembaka mingi mpi nitu na mono kuvandaka dyaka na ngolo ve. Yo vandaka mpasi na kuzaba nki mono fwete sala.”

Makambu ya mutindu yai ya kukuminaka Sandra ti Elaine ke na kusalama konso kilumbu na nsi-ntoto ya mvimba. Maladi, ba aksida, bitumba, kusosa kufwa to kukula bantu ya mpusu yankaka, ya ndinga yankaka to bayina ke na mabanza ya politiki yankaka, mpi nku ya kesala nkutu nde mifwidi kukuma mingi.a Mingi na kati ya bankento yai kenyokwamaka ti bampasi yai na ntima, kukonda kuzaba nki bo fwete sala. Inki kima banduku mpi bampangi lenda sala sambu na kusadisa bantu yina kezinga na kimufwidi? Disolo ya melanda kele na mwa bangindu yina lenda sadisa.

[Noti na nsi ya lutiti]