Beto Kelembaka Kansi Kimakulu Ve

“Mfumu Nzambi salaka ntoto yonso tii na nsuka na yo, . . . Yandi ke pesaka ngolo na muntu yina me lemba, yandi ke yikaka ngolo na muntu yina me konda ngolo.”​—YEZAYA 40:28, 29.

1, 2. (a) Inki emvitasio ya kitoko Biblia kepesa bantu yonso yina kezola kukota na lusambu ya kukonda mvindu? (b) Inki kima lenda kuma kigonsa ya nene sambu na kimpeve na beto?

SAMBU beto kele balongoki ya Yezu, beto mezaba mbote emvitasio yai ya kitoko: “Beno kwisa na mono, beno yonso bantu yina me lemba, sambu beno ke nata kilo ya nene, ebuna mono ta pesa beno [kikesa, NW]. . . . Kilo yina ya mono ta pesa beno yo kele mpasi ve na kunata yo, sambu yo kele kilo mingi ve.” (Matayo 11:28-30) Bakristu kebakaka mpi “bansungi ya kikesa . . . ya kekatukaka na Yehowa.” (Bisalu 3:19, NW) Ya kyeleka, nge mosi memonaka kikesa yina kekatukaka na kulonguka bakyeleka ya Biblia, na kuvanda ti kivuvu ya kitoko sambu na bilumbu kekwisa, mpi na kusadila minsiku ya Yehowa na luzingu na nge.

² Kansi, bansambidi yankaka ya Yehowa kelembaka na mawi na bansungi yankaka. Mbala mingi bansungi yai ya kulemba kevandaka ya nkufi. Kansi bantangu yankaka yo kebakaka bansungi ya nda. Mutindu ntangu keluta, bankaka lenda kudiwa nde mikumba na bo ya Bukristu mekuma kizitu na kisika ya kuvanda kilo mosi ya kepesa kikesa mutindu Yezu kusilaka. Mawi ya mbi ya mutindu yina lenda kuma kigonsa ya ngolo sambu na bangwisana ya Mukristu ti Yehowa.

3. Sambu na nki Yezu kupesaka ndongisila yina kele na Yoane 14:1?

³ Ntama mingi ve na ntwala nde bo kanga Yezu mpi bo fwa yandi, yandi zabisaka balongoki na yandi nde: “Beno kumona mpasi ve na ntima. Beno tula ntima na Nzambi, beno tula ntima mpi na mono.” (Yoane 14:1) Yezu kutubaka bangogo yai sambu ntama mingi ve, bantumwa zolaka kukutana ti mambu ya mpasi. Na nima ya mambu yai mbangika ya kintulumukina zolaka kubasika. Yezu kuzabaka nde kana bantumwa na yandi kulemba nitu, bo lenda bula dibaku. (Yoane 16:1, NW) Kana bo landaka kaka na kuvanda na mawa, bo zolaka kulemba mpenza na kimpeve mpi kukatula ntima na bo na Yehowa. Dyambu yai lenda kumina mpi Bakristu ya bubu yai. Kulemba yina kezingaka ntangu mingi lenda pesa mawa ya kuluta ndilu, mpi ntima na beto lenda kuma kilo mingi. (Yeremia 8:18) Kimuntu na beto ya kati lenda lemba. Mambu yai yonso lenda sala nde beto lemba mpenza na mawi ti na kimpeve, to nkutu kuvidisa mpusa ya kusambila Yehowa.

4. Inki lenda sadisa beto na kutanina ntima na beto ya kifwani na mpila nde yo lemba ve?

⁴ Ndongisila yai ya Biblia mefwana mpenza: “Kuluta bima yonso yankaka ya nge fwete keba, tanina ntima na nge, sambu luzingu na nge kekatukaka na yo.” (Bingana 4:23, NW) Biblia kepesaka bandongisila ya mbote yina kesadisaka beto na kutanina ntima na beto ya kifwani na mpila nde yo vanda kaka ngolo mpi yo lemba ve na kimpeve. Kansi, ntetentete beto fwete zaba nki kesalaka nde beto lemba.

Bukristu Kenyokulaka Ve

5. Inki kukonda kuwakana lenda monana na yina metala kuvanda longoki ya Kristu?

⁵ Yo kele kyeleka nde kuvanda Mukristu kelombaka kutula ngolo. (Luka 13:24) Nkutu Yezu kutubaka nde: “Konso muntu yina ke nata [nti na yandi ya mpasi, NW] ve, ke landa mono ve, yandi lunga kuvanda mulonguki na mono ve.” (Luka 14:27) Kana muntu kutadila bangogo yai na zuluzulu, yo lenda monana bonso nde yo kewakana ve ti yina ya Yezu kutubaka ntangu yandi tubilaka kilo na yandi yina kele mpasi ve na kunata mpi ya kepesaka kikesa. Kansi na kuta masonga, kukonda kuwakana kele ve.

6, 7. Sambu na nki beto lenda tuba nde mutindu ya lusambu na beto kekumisaka ve bantu nitu kilo?

⁶ Ata kusala bikesa mpi kisalu ya ngolo kelembisaka na kinsuni, yo lenda pesa kyese mpi kikesa kana muntu kesala yo sambu na kikuma ya mbote. (Longi 3:13, 22) Nkutu, inki dyambu yankaka ya mbote ya beto lenda sala yina meluta kuzabisa bakyeleka ya kitoko ya Biblia na bantu yina kezingaka penepene ti beto? Dyaka, bitumba ya beto kenwanaka sambu na kuzitisa minsiku ya kuzanguka ya Nzambi yina metala bikalulu ya mbote kekumaka fyoti kibeni kana beto fwanisa yo ti mambote ya beto kebakaka na nima ya kuzitisa yo. (Bingana 2:10-20) Ata ntangu beto kekutanaka ti mbangika, beto kemonaka nde kunyokwama sambu na Kimfumu ya Nzambi kele dyambu mosi ya kepesaka lukumu.​—1 Piere 4:14.

⁷ Ya kyeleka, kilo ya Yezu kepesaka kikesa, mingimingi kana beto fwanisa yo ti mpimpa ya kimpeve ya bantu yina mebikalaka na nsi ya vangu ya dibundu ya luvunu. Nzambi kezolaka beto mingi mpi yandi kelombaka beto ve mambu yina meluta ngolo na beto. “Bansiku [ya Yehowa] kele mpasi ve beto na kulanda yo.” (1 Yoane 5:3) Mutindu Masonuku kemonisaka yo, Bukristu ya kyeleka kenyokulaka ve bantu. Ya kyeleka, mutindu ya lusambu na beto kekumisaka ve bantu nitu kilo mpi yo kelembisaka ve.

‘Katula Mambu Yonso Yina Kepesaka Kilo’

8. Mbala mingi nki kenataka kulemba ya kimpeve?

⁸ Mbala mingi konso kulemba ya kimpeve yina beto kekutanaka ti yo kekatukaka na kizitu yina ngidika yai ya mbi ya bima kenatilaka beto. Sambu “nsi-ntoto kele na maboko ya Muntu ya Mbi,” bampeve ya mbi yina lenda lembisa beto mpi kukulumusa bukatikati na beto ya Bukristu mezyungaka beto. (1 Yoane 5:19) Bisalu ya kukonda mfunu lenda natila beto mindondo mpi kukotisa mavwanga na bisalu na beto ya Bukristu. Kizitu yai ya ngika lenda lembisa beto to nkutu kunyokula beto. Yo yina, Biblia kelongisila beto na ‘kukatula mambu yonso yina kepesaka kilo.’​—Baebreo 12:1-3.

9. Inki mutindu kusosa bima ya kinsuni lenda lembisa beto?

⁹ Mu mbandu, susi ya bantu ya inza kevandaka na yo na kusosa lukumu, mbongo, kudipesa na bansaka ya kulutisa ntangu, bavwayaze ya kyese, mpi mambu yankaka lenda vanda ti bupusi na mabanza na beto. (1 Yoane 2:15-17) Bakristu yankaka ya mvu-nkama ya ntete yina vandaka kusosa kimvwama kudinatilaka mindondo mingi na luzingu na bo. Ntumwa Polo kutendulaka nde: “Bantu yina ke zolaka kukuma bamvwama, Satana ke bwisaka bo; nzala mingi ya buzoba ti ya mbi yina ke bebisaka bantu, yina ke fwaka bo, yo ke kangaka bo. Sambu kuzola mbongo mingi ke bendaka mambu ya mbi ya mutindu na mutindu. Bantu ya nkaka vandaka na nzala mingi ya mbongo; yo yina nzala yango vidisaka lukwikilu na bo, yo pesaka bo mpasi mingi na ntima.”​—1 Timoteo 6:9, 10.

10. Inki beto lenda longuka na yina metala kimvwama na kingana ya Yezu ya muntu yina kukunaka bankeni?

¹⁰ Ntangu beto kekudiwaka ya kulemba na kisalu na beto ya Nzambi, keti yo lenda vanda nde beto kelutisaka ndilu na kusosa bima ya kinsuni yina kebakaka kisika yonso ya beto fwete pesa na mambu na beto ya kimpeve? Dyambu yai lenda salama mpenza mpidina, mutindu kingana ya Yezu ya muntu yina kukunaka bankeni kemonisa yo. Yezu kufwanisaka basusi ya ‘luzingu yai ya nsi-ntoto . . . , kiese ya kimvwama yina kekusaka bantu ti nzala ya mambu ya mutindu na mutindu’ na bansende yina ‘kekotaka mpi kekangisaka’ nkeni ya ndinga ya Nzambi na ntima na beto. (Marko 4:18, 19) Yo yina, Biblia kelongisila beto nde: “Na luzingu na beno, beno lenda pesa ntima na beno na mbongo ve; kansi beno fweti vanda na kiese na bima yina ya beno ke na yo ntete, sambu Nzambi yandi mosi me tubaka nde: ‘Mono ta bikisa nge ve ata fioti.’” ​—Baebreo 13:5.

11. Inki mutindu beto lenda katula bima yina lenda lembisa beto?

¹¹ Bantangu yankaka kima kenatilaka beto mindondo na luzingu kevandaka ve kusosa bima mingi, kansi mutindu ya beto kesadilaka bima yina beto kele ti yo dezia. Bankaka lenda lemba na mawi sambu na bamaladi ya ngolo, lufwa ya bantu yina bo vandaka kuzola, to mambu yankaka ya kepesaka mpasi. Bo memonaka mfunu ya kusala bansoba mbala na mbala. Bankwelani zole kubakaka lukanu ya kuyambula mwa ndambu ya bansaka yankaka ya kulutisila ntangu ti bisalu yankaka ya kukonda mfunu yina bo vandaka kukana na kusala. Bo tadilaka bima na bo mpi bo vukisaka bima yonso ya bo vandaka kukana na kusadila na bisalu yango mpi bo katulaka yo kimakulu. Mbala na mbala, beto yonso lenda tadilaka mambu ya beto kesalaka ti bima ya beto kele na yo, mpi kukatula konso kilo ya kukonda mfunu na mpila nde beto lemba ve mpi beto mana ve ngolo na myoyo na beto.

Bukatikati mpi Kukonda Lulendo Kele Mfunu

12. Inki beto fwete ndima na yina metala bifu na beto mosi?

¹² Bifu na beto mosi, ata na mambu ya fyotifyoti, lenda natila beto mindondo na luzingu malembemalembe. Bangogo yai ya Davidi kele mpenza ya kyeleka: “Mono ke fwa na masumu bonso muntu ke dinda na masa, kilo na yo me lutila mono.” (Nkunga 38:5) Mbala mingi, kusala bansoba ya mefwana takatula beto bizitu ya nene.

13. Inki mutindu bukatikati kesadisaka beto na kuvanda na dibanza ya bukatikati sambu na kisalu na beto?

¹³ Biblia kesyamisa beto na kuyedisa “mayele ya kusadila mpi mayele ya kuyindula.” (Bingana 3:21, 22, NW) Biblia ketuba nde: “Mayele yina kekatukaka na zulu kele . . . na bukatikati.” (Yakobo 3:17, NW) Mpusa ya kusosa kusala kisalu ya Bukristu kiteso mosi ti bantu yankaka mesalaka nde kisalu yango kukumina bo mpasi. Kansi, Biblia kelongisila beto nde: “Konso muntu kutala mbote-mbote [kisalu] na yandi mosi. Ebuna, kana yandi mona nde yandi lenda kudikumisa yandi mosi nde [kisalu] na yandi kele ya mbote, yo ta tadila yandi mosi kansi bantu ya nkaka ve. Sambu konso muntu fweti baka kilo na yandi mosi.” (Galatia 6:4, 5) Ya kyeleka, mbandu ya mbote ya bampangi-Bakristu lenda syamisa beto na kusadila Yehowa na ntima ya mvimba, kansi mayele ya kusadila mpi bukatikati tasadisa beto na kuditudila balukanu yina mefwana na kiteso ya ngolo na beto mosi.

14, 15. Inki mutindu beto lenda monisa mayele ya kusadila na ntangu beto kelungisa bampusa na beto ya kinsuni ti ya mawi?

¹⁴ Bukatikati na beto, ata na mambu yina kemonanaka mfunu mingi ve, lenda tanina beto na kukonda kulemba. Mu mbandu, keti beto keyedisaka bikalulu ya bukatikati yina kesalaka nde muntu kuvanda ti mavimpi ya mbote? Tadila mbandu ya bankwelani zole yina kesalaka na biro ya filiale mosi ya Bambangi ya Yehowa. Bo memonaka valere ya kusadila mayele na mpila nde bo lemba ve. Nkento ketuba nde: “Ata beto kele ti bisalu mingi nki kiteso, beto kesalaka ngolo sambu na kukwenda kulala kaka na ntangu mosi konso mpimpa. Beto kesalaka mpi ngalasisi mbala na mbala. Bikalulu yai mesadisaka beto mpenza. Beto mezabaka bandilu na beto, mpi beto kesalaka mambu yina kewakana ti yo. Beto kesosaka ve kudifwanisa ti bantu yina kemonanaka nde bo kele ti ngolo mingi kibeni.” Keti mbala na mbala beto kedyaka madya ya mbote mpi kelalaka na kiteso ya mefwana? Kutula dikebi ya mefwana na mavimpi na beto lenda fyotuna kulemba na beto na mawi mpi na kimpeve.

¹⁵ Bankaka na kati na beto kele ti bampusa yina ketadila kaka bo mosi. Mu mbandu, mpangi mosi ya nkento mesalaka kisalu ya ntangu yonso na bisika mingi ya mpasi. Yandi vandaka na bamaladi ya ngolo mpi ti kansere. Inki kesadisaka yandi na kunwana ti mambu yai ya mpasi? Yandi ketuba nde: “Yo kevandaka mfunu nde munu kudibumbila ntangu ya kuvanda munu mosi mpi pima. Ntangu basusi ti kulemba kekumaka mingi, yo kelombaka nde mu sukinina ve na kubaka bantangu ya kuvanda munu mosi sambu na kutanga mpi kupema.” Mayele ya kusadila ti mayele ya kuyindula kesadisaka beto na kuzaba mpi kulungisa bampusa na beto na mpila nde beto kuditanina na kukonda kulemba na kimpeve.

Yehowa Nzambi Kepesaka Beto Kikesa

16, 17. (a) Sambu na nki kukeba mavimpi na beto ya kimpeve kele mfunu mingi? (b) Inki mambu beto fwete kotisaka na manaka na beto ya konso kilumbu?

¹⁶ Ya kyeleka, kukeba mavimpi na beto ya kimpeve kele mfunu mingi kibeni. Kana beto kele ti bangwisana ya ngolo ti Yehowa Nzambi, beto lenda lemba na kinsuni, kansi beto talemba ve ata fyoti na kusambila yandi. Yehowa kele muntu yina “ke pesaka ngolo na muntu yina me lemba, yandi ke yikaka ngolo na muntu yina me konda ngolo.” (Yezaya 40:28, 29) Ntumwa Polo, yina kumonaka yandi mosi bukyeleka ya bangogo yai kusonikaka nde: “Beto kele kaka na kikesa. Ata nitu na beto ke fwa, kansi mabanza ya ntima na beto ke kuma ya mpa konso kilumbu.” ​—2 Korinto 4:16.

¹⁷ Simba bangogo “konso kilumbu.” Yo ketendula kusadila mbote konso kilumbu bangidika yina Yehowa kepesaka beto. Bansungi yankaka, mpangi mosi yina kusalaka kisalu ya kimisionere na kwikama yonso bamvula 43 vandaka kulemba na kinsuni mpi kukonda ngolo. Kansi yandi lembaka ve kimakulu. Yandi ketuba nde: “Mu kevandaka ti kikalulu ya kutelama na ntwala na mpila nde mu lutisa mwa ntangu na kusamba Yehowa mpi kutanga Ndinga na yandi na ntwala ya kuyantika konso kisalu yina. Kusala mpidina konso kilumbu mesadisaka munu na kukanga ntima tii bubu yai.” Ya kyeleka, beto lenda tula ntima na ngolo ya Yehowa yina kesadisaka kana beto kesamba yandi mbala na mbala, “konso kilumbu,” mpi beto keyindulula bikalulu ti balusilu na yandi ya kuluta nene.

18. Inki kikesa Biblia kepesa bantu ya kwikama yina menuna to kebela?

¹⁸ Kusala mpidina kesadisaka kibeni, mingimingi bantu yina melembaka sambu na kimununu mpi maladi. Bantu ya mutindu yina lenda lemba nitu sambu bo kekudifwanisa ti bantu yankaka ve kansi sambu bo kefwanisa kisalu yina bo vandaka kusala ntete ti ya bo kesala ntangu yai. Yo kepesa kikesa na kuzaba nde Yehowa kepesaka minunu lukumu! Biblia ketuba nde: “Nsuki ya mpembe kele bonso mpu ya kimfumu ya kitoko kana yo kele na nzila ya lunungu.” (Bingana 16:31, NW) Yehowa mezaba bandilu na beto mpi yandi kebakaka na valere mingi lusambu ya beto kepesaka yandi na ntima ya mvimba ata beto kele ti bifu mingi. Mpi kisalu ya mbote ya beto mesalaka dezia kele mpenza ya kusonika na mabanza ya Nzambi. Masonuku kendimisa beto nde: “Sambu Nzambi kele ve ya kukonda lunungu sambu yandi kuvila kisalu na beno ti zola ya beno monisaka sambu na zina na yandi, na mutindu beno sadilaka basantu mpi beno kelanda na kusadila bo.” (Baebreo 6:10, NW) Beto yonso kele na kyese kibeni na kuvanda kumosi ti bantu yina kemonisaka kwikama na bo na Yehowa banda ntama!

Kulemba Ve

19. Inki mambote beto kebakaka ntangu beto kelandaka na kusadila bantu yonso mbote?

¹⁹ Bantu mingi keyindulaka nde kusala kisalu ya ngolo mbala na mbala lenda sala nde muntu kuwa dyaka ve kulemba mingi. Mutindu mosi, kusala bisalu ya kimpeve mbala na mbala lenda sadisa beto na kubaka dyaka ngolo kana kulemba mekwisila beto na mawi to na kimpeve. Biblia ketuba nde: “Beto lemba ve na kusala mambu ya mbote. Sambu, kana beto ke sala kaka, beto ta katula bambuma na ntangu ya mbote. Yo yina, ntangu yonso ya beto ke mona mpila, beto sala bantu yonso mbote, [kansi mingi kuluta na, NW] bampangi na beto bakristo.” (Galatia 6:9, 10) Simba bangogo “kusala mambu ya mbote” mpi ‘kusala bantu yonso mbote.’ Yo kelomba nde beto sala kima mosi. Ya kyeleka, kusadila bankaka mambu ya mbote lenda sadisa beto na kukonda kulemba kimakulu na kisalu na beto ya Yehowa.

20. Sambu na kuditanina na kulemba, beto fwete buya kusala kinduku ti banani?

²⁰ Kansi, kusala kinduku mpi mambu yankaka kumosi ti bantu yina kezitisaka ve bansiku ya Nzambi lenda kuma kizitu yina kelembisa. Biblia kekebisa beto nde: “Ditadi ti zelo kele kilo, kansi makasi ya zoba meluta bima yai yonso zole na kilo.” (Bingana 27:3, NW) Sambu na kuditanina na mawi ya kukonda ngolo mpi ya kulemba, beto fwete buya kusala kinduku ti bantu yina kevandaka ti bangindu ya kulembisa mpi kesosaka kaka kuzwa bifu ya bankaka sambu na kutonga bo.

21. Inki mutindu beto lenda pesa bankaka kikesa na balukutakanu ya Bukristu?

²¹ Balukutakanu ya Bukristu kele ngidika mosi ya mekatukaka na Yehowa yina lenda pesa beto ngolo na kimpeve. Kuna beto kevandaka na dibaku ya mbote mpenza ya kupesana kikesa na nsadisa ya malongi yina kepesaka beto ngolo mpi ya kinduku yina beto kesalaka ti bampangi. (Baebreo 10:25) Bantu yonso na kati ya dibundu fwete sala ngolo na kutuba mambu yina ketungaka ntangu bo kepesa bakomantere na balukutakanu to ntangu bo kesala disolo na estrade. Mukumba ya kupesa bankaka kikesa kele ntetentete na maboko ya bampangi yina kelongaka. (Yezaya 32:1, 2) Ata ntangu yo kelomba kulongisila to kunganina, muntu yina kepesa bandongisila fwete pesa yo na mpila nde yo pesa kikesa. (Galatia 6:1, 2) Ya kyeleka, zola na beto sambu na bankaka tasadisa beto na kusadila Yehowa kukonda kulemba kimakulu.​—Nkunga 133:1; Yoane 13:35.

22. Ata beto kele bantu ya kukonda kukuka, sambu na nki beto lenda vanda na kikesa?

²² Kusambila Yehowa na ntangu yai ya nsuka kelombaka kusala mpenza kikesa. Dyaka, Bakristu mpi kekutanaka ti mambu yina kelembisaka bo na mabanza, bo kenwanaka ti mpasi ya mawi mpi ti mambu yina kepesaka bo basusi. Kimuntu na beto ya kukonda kukuka kele ngolo ve, yo kele bonso nzungu ya tuma. Kansi, Biblia ketuba nde: “Beto bantu ke na kimvwama yina ya mambu ya Nzambi, beto kele bonso mabungu ya kukonda ngolo ya bo ke salaka na ntoto. Beto kele mpidina sambu na kusonga na bantu nde Nzambi muntu ke na ngolo ya nene kansi beto ve.” (2 Korinto 4:7) Ya kyeleka beto talemba, kansi bika nde beto lemba ve kimakulu ata fyoti. Kansi, bika beto vanda “na kikesa ntangu beto ke tuba mambu yai, nde: ‘Mfumu Nzambi muntu ke sadisaka mono.’”​—Baebreo 13:6.

Mvutukilu ya Nkufi

• Tanga mwa bizitu yina beto lenda kuka na kukatula.

• Inki mutindu beto lenda vukana na kusadila bampangi na beto Bakristu “mambu ya mbote”?

• Inki mutindu Yehowa ketaninaka beto ntangu beto kekudiwaka ya kulemba?

[Kifwanisu ya kele na lutiti 19]

Yezu kuzabaka nde bantumwa lendaka kudiyangisa kana kulemba na bo kuzinga mingi

[Bifwanisu ya kele na lutiti 20]

Bankaka meyambulaka bansaka yankaka ya kulutisila ntangu ti bisalu ya kukonda mfunu yina bo vandaka kukana na kusala

[Kifwanisu ya kele na lutiti 22]

Ata beto kele ti bandilu Yehowa kebakaka na valere mingi lusambu ya beto kepesaka yandi na ntima ya mvimba