Bangyufula ya Batangi — Watchtower MIKANDA YA KE NA INTERNET

Bangyufula ya Batangi

Inki mutindu beto kezaba nde mayele ya bo ketubila na Bingana 8:22-31 kemonisa Yezu Kristu na ntwala nde yandi kuma muntu?

Mukanda ya Bingana ketubila mayele na mutindu yai: “Na bima yonso ya Mfumu Nzambi salaka, yandi salaka ntete mono; mono kele kisalu ya ntete ya yandi salaka. . . . Mono butukaka ntangu bangumba ya nene ti ya fyoti vandaka ntete ve na bisika na yo, . . . Mono vandaka ntangu yandi tulaka zulu na kisika na yo . . . Mono vandaka penepene na yandi bonso kapita ya kisalu, mono vandaka kupesa yandi kiese konso kilumbu; mono vandaka mpi kiese na meso na yandi . . . Mono vandaka ti kiese sambu na ntoto ti bantu.”

Baverse yai lenda tubila kaka ve mayele ya Nzambi to mayele yina kemonanaka ve. Sambu na nki beto metuba mutindu yina? Sambu mayele ya baverse yai ketubila ‘kusalamaka’ bonso luyantiku ya bima yina Yehowa kugangaka. Yehowa kele kaka Nzambi tii kuna mpi yandi kevandaka mayele ntangu yonso. (Nkunga 90:1, 2) Mayele na yandi kele na luyantiku ve mpi muntu kusalaka yo ve. Yo “butukaka” ve. Dyaka, baverse ketubila mayele bonso muntu yina ketuba mpi kesala kisalu.—Bingana 8:1.

Mukanda ya Bingana ketuba nde mayele kuvandaka penepene na Ngangi, Yehowa bantangu mingi kibeni, bonso “kapita ya kisalu.” Yo mefwana na kundima nde mayele ya baverse yai ketubila kele Yezu. Na ntwala nde yandi kwisa na ntoto, Yezu kusalaka penepene ti Yehowa. Yo yina, Biblia ketuba nde: “Ntangu Nzambi vandaka me sala ntete ve bima yonso, Kristo vandaka; bima yonso me vukanaka mpi sambu na yandi Kristo.”—Kolosai 1:17; Kusonga 1:14.

Kumonisa Mwana ya Nzambi bonso mayele mefwana mpenza, sambu yandi vandaka muntu yina kumonisaka balukanu mpi bansiku na yandi ya mayele. Na ntwala nde yandi kuma muntu, Yezu kuvandaka Ndinga ya Nzambi, to Kinati-ndinga. (Yoane 1:1) Biblia ketuba nde yandi kele “ngolo ya Nzambi ti mayele ya Nzambi.” (1 Korinto 1:24, 30) Mutindu baverse yai metubila Mwana ya Nzambi mefwana mpenza, sambu kyese na yandi sambu na bantu kupusaka yandi na kupesa luzingu na yandi bonso nkudulu sambu na bo.—Yoane 3:16.