Bangyufula ya Batangi

Yezu zolaka kutuba nki ntangu yandi tubaka nde mpika na yandi ya kwikama tavanda “mayele”?

Yezu kuyulaka nde: “Nani kele mpenza mpika ya kwikama mpi ya mayele yina mfumu na yandi metulaka na zulu ya bantu ya kisalu ya nzo na yandi, sambu na kupesa bo madya na ntangu ya mbote?” (Matayo 24:45, NW) “Mpika” ya kepesaka “madya” ya kimpeve kele kimvuka ya Bakristu ya kupakulama. Sambu na nki Yezu kutubaka nde bo kele mayele?a

Kaka malongi ya Yezu lenda sadisa beto na kubakisa mbote kima ya yandi zolaka kutuba ntangu yandi sadilaka ngogo “mayele.” Mu mbandu, ntangu yandi tubilaka “mpika ya kwikama mpi ya mayele,” Yezu kupesaka kingana ya bana-bankento kumi yina vandaka kuvingila kukwisa ya bakala ya makwela. Bana-bankento yina keyibusa beto Bakristu ya kupakulama na ntwala ya mvu 1914, yina vandaka kuvingila na kyese yonso kukwisa ya Yezu Kristu, bakala ya makwela. Na kati ya bana-bankento yina kumi, tanu kuvandaka ve na mafuta mingi ntangu bakala ya makwela kukwisaka, mpi bo kotaka ve na fete ya makwela. Tanu yankaka kumonisaka nde bo vandaka mayele. Bo bakaka mafuta mingi yo yina bamwinda na bo vandaka kupela kaka ntangu bakala ya makwela kukwisaka mpi bo kotaka na fete.​—Matayo 25:10-12.

Ntangu Yezu kubakaka kiyeka ya Kimfumu na mvu 1914, Bakristu ya kupakulama mingi vandaka kuvingila na kukwenda mbala mosi ti yandi na zulu. Kansi, bo vandaka na kisalu mingi ya kusala na ntoto, mpi bankaka kuvandaka ve ya kuyilama sambu na yo. Bonso bana-bankento ya kukonda mayele, bo kumisaka ve kimpeve na bo ngolo na ntwala, ebuna bo vandaka ve ya kuyilama sambu na kulanda na kunata nsemo. Kansi, mingi na kati na bo kusalaka mambu na mayele, bo monaka mambu na ntwala, mpi bo bakaka kikesa na kimpeve. Ntangu bo bakisaka nde kisalu mingi kekinga bo na ntwala, bo yantikaka kusala yo na kyese. Yo yina, bo monisaka nde bo kele “mpika ya kwikama mpi ya mayele.”

Beto tadila mpi mutindu Yezu kusadilaka ngogo “mayele” na Matayo 7:24. Yandi tubaka nde: “Konso muntu yina me wa mambu yai ya mono me tuba, kana yandi landa yo, yandi me fwanana na muntu ya mayele yina tungaka nzo na yandi na zulu ya matadi.” Muntu ya mayele kutungaka nzo ya ngolo sambu yandi monaka na ntwala nde mvula ya ngolo lenda noka. Kansi, zoba kutungaka nzo na yandi na zulu ya zelo mpi yo bwaka. Yo yina, longoki ya mayele ya Yezu kele muntu yina kemonaka na ntwala malanda ya mbi ya kulanda mayele ya bantu. Luswasukusu na yandi kesadisaka yandi na kusala na mpila nde lukwikilu, bisalu, mpi malongi na yandi kusimbama ngolo na mambu yina Yezu longaka. “Mpika ya kwikama mpi ya mayele” kesalaka mutindu mosi.

Tala mpi mutindu bo kesadila ngogo ya bo mebalulaka nde “mayele” na bambalula mingi ya Masonuku ya Kiebreo. Mu mbandu, Farao kuponaka Yozefi na kukabula madya na Ezipte. Yo vandaka ngidika yina Yehowa kubakaka sambu na kupesa bantu na yandi madya. Sambu na nki bo ponaka Yozefi? Farao kusongaka yandi nde: “Muntu ya nkaka kele ve yina me luta nge mayele.” (Kuyantika 41:33-39; 45:5) Mutindu mosi, Biblia ketuba nde Abigaile kuvandaka “mayele.” Yandi pesaka madya na Davidi, muntu yina Yehowa kuponaka, mpi na bantu na yandi. (1 Samuele 25:3, 11, 18) Biblia ketuba nde Yozefi ti Abigaile kuvandaka mayele sambu bo bakisaka luzolo ya Nzambi, bo monaka na ntwala mpi bo sadilaka luswasukusu ntangu bo salaka mambu.

Yo yina, ntangu Yezu kutubaka nde mpika ya kwikama kele mayele, yandi monisaka nde bantu yina mpika kemonisaka zolaka kumonisa luswasukusu mpi kumona mambu na ntwala sambu lukwikilu, bisalu, mpi malongi na bo mesimbama na Ndinga ya kyeleka ya Nzambi.

[Noti na nsi ya lutiti]