Sosa Lukanu ya Nzambi Bubu Yai
“Kristo me fwaka sambu na bantu yonso, sambu bantu yina ke na moyo, bo zinga sambu na bo mosi diaka ve.”—2 KORINTO 5:15.
1. Ta eksperiansi ya misionere mosi kukutanaka na yo na teritware na yandi.
MISIONERE mosi na zina ya Aaron keyibuka nde: “Katula bakamio ya basoda, kamio na beto kuvandaka kamio ya ntete yina kukotaka na bwala mosi ya Afrika na nima ya bitumba.a Mpila ya kusolula ti dibundu ya fyoti ya bwala yina kuvandaka ve, kansi yo lombaka nde beto lungisa bampusa ya bampangi yango. Katula madya, bilele, mpi mikanda ya ketendulaka Biblia, beto nataka mpi bande video Les Témoins de Jéhovah : un nom, une organisation.b Sambu bantu mingi kibeni ya vandaka kusepela na kyeleka kukwisaka sambu na kutala bande yango na nzo mosi ya nene ya nyanga yina vandaka ti manieto mpi televizio, yo lombaka nde beto songa yo mbala zole. Konso mbala ya beto songaka yo, bantu mingi kumonisaka mpusa ya kulonguka Biblia. Yo ke pwelele nde bikesa na beto kubutaka mbuma.”
2. (a) Sambu na nki Bakristu mebakaka lukanu ya kusadila luzingu na bo na kisalu ya Nzambi? (b) Inki bangyufula beto tatadila ntangu yai?
2 Sambu na nki Aaron ti banduku na yandi kusalaka nzyetolo yina ya mpasi? Yo kele sambu bo vandaka na ntonda na kimenga ya nkudulu ya Yezu Kristu, yo yina bo pesaka luzingu na bo na Nzambi mpi bo zolaka kusadila yo na kuwakana ti lukanu ya Nzambi. Bonso bampangi yina, Bakristu yonso ya mekudipesaka na Nzambi kebakaka lukanu ya kuzinga “sambu na bo mosi diaka ve,” kansi na kusala yonso “sambu na nsangu ya mbote.” (2 Korinto 5:15; 1 Korinto 9:23) Bo zabaka nde ntangu ngidika yai ya bima tafwa, mbongo ti lukumu yonso ya ntoto yai tavanda ve ti mfunu. Yo yina, sambu bo kele na luzingu mpi mwa mavimpi ya mbote, bo kezola kusadila yo na kuwakana ti lukanu ya Nzambi. (Longi 12:1) Inki mutindu beto lenda sala yo? Na wapi beto lenda zwa kikesa ti ngolo yina beto kele na yo mfunu sambu na kusala yo? Mpi nki mabaku ya kisalu beto kele na yo?
Sala Bitambi ya Sikisiki Malembe-Malembe
3. Inki bitambi ya mfunu beto fwete sala sambu na kusala luzolo ya Nzambi?
3 Sambu na Bakristu ya kyeleka, kusala luzolo ya Nzambi kele kima mosi ya bo fwete sala luzingu ya mvimba. Mbala mingi yo keyantikaka ti bitambi ya mfunu bonso kusonikisa zina na Nzo-Nkanda ya Kisalu ya Teokrasi, kutanga Biblia konso kilumbu, kusala kisalu ya kusamuna, mpi kubaka mbotika. Ntangu beto keyela, beto keyibukaka bangogo yai ya ntumwa Polo: “Sala bisalu yina mbote-mbote, nge kudipesa mvimba na yo, ebuna bantu yonso ta mona nde bisalu na nge ke kwenda na ntwala.” (1 Timoteo 4:15) Mfunu ya kuyela yai kele ve ya kudipesa lukumu, kansi yo kele ya kumonisa lukanu na beto ya kusala luzolo ya Nzambi kukonda bwimi. Kusala mutindu yai kemonisaka nde beto kebika nde Nzambi kutwadisa bitambi na beto na mambu yonso ya luzingu, mpi yandi kesalaka yo mbote kibeni kuluta yina beto mosi lenda sala.—Nkunga 32:8.
4. Inki mutindu beto lenda katula boma ya kukonda mfunu?
4 Kansi, kusukinina sambu na kubaka badesizio to kudiyangisa mingi sambu na beto mosi lenda kanga beto nzila ya kuyela na kisalu ya Nzambi. (Longi 11:4) Yo yina, na ntwala ya kuzwa kyese ya kyeleka na kusadila Nzambi mpi bantu yankaka, beto lenda vanda ntete ti mfunu ya kununga boma na beto. Beto baka mbandu ya Erik yina vandaka kuyindula kukwenda kusala na dibundu ya bo kesadilaka ndinga ya banzenza. Kansi yandi vandaka kudiyula nde: ‘Keti bampangi tandima munu? Keti munu tazola bo? Keti bo tazola munu?’ Yandi tubaka nde: “Nsukansuka mu bakisaka nde yo vandaka kulomba nde mu kudiyangisa mingi sambu na bampangi kansi sambu na munu mosi ve. Mu bakaka lukanu ya kudiyangisa dyaka ve mpi ya kudipesa kukonda bwimi na kusala mambu yonso ya mu lendaka kusala. Mu sambaka sambu Nzambi kusadisa munu mpi mu bakaka lukanu ya kusala mambu ya mu kanaka. Ntangu yai, mu kesepelaka mingi ti kisalu na munu na dibundu yina.” (Roma 4:20) Ya kyeleka, na kiteso yina beto kesadila Nzambi mpi bantu yankaka kukonda bwimi, beto tabaka kyese.
5. Sambu na nki beto fwete kudiyidika mbote-mbote sambu na kusosa lukanu ya Nzambi? Pesa mbandu.
5 Kununga na kusosa lukanu ya Nzambi kelombaka mpi nde beto yidika bitambi na beto mbote-mbote. Beto kebuyaka na mayele yonso kukuma ti bamfuka mingi yina lenda sala nde beto kuma bampika ya ngidika yai mpi kukonda ntangu ya kusala kisalu ya Nzambi. Biblia keyibusa beto nde: “Kana nge defa mbongo na muntu, nge ta kuma mpika na yandi.” (Bingana 22:7) Kutula ntima na Yehowa mpi kutula mambu ya kimpeve na kisika ya ntete kesadisaka beto na kuvanda kaka ti lukanu na beto na mabanza. Beto baka mbandu ya Guoming mpi bampangi na yandi zole ya bankento yina kezingaka ti mama na bo na kisika yina banzo kele ntalu mingi mpi yo kevandaka mpasi na kuzwa kisalu yina nge lenda sala kukonda kuzenga. Sambu bo kesadilaka mbote mbongo na bo mpi kekabulaka badepanse, bo kevandaka ti bima ya kuzingila ata na ntangu yina bo yonso kesalaka ve. Guoming ketuba nde: “Bantangu yankaka, beto yonso kevandaka ve ti mbongo. Ata mpidina, beto lenda landa kusala kisalu ya kimupasudi-nzila mpi kukeba mama na beto. Beto ketonda mama na beto sambu yandi kezolaka ve nde beto yambula mambu ya kimpeve sambu na kusadisa yandi na kuzinga bonso mvwama.”—2 Korinto 12:14; Baebreo 13:5.
6. Inki mbandu kemonisa mutindu beto lenda wakanisa luzingu na beto ti lukanu ya Nzambi?
6 Kana nge mekudipesa mingi na mambu ya kinsuni, yo vanda kusosa mbongo to mambu yankaka, kutula lukanu ya Nzambi na kisika ya ntete lenda lomba nde nge sala bansoba ya nene. Mbala mingi bansoba yai kesalamaka ve na mbala mosi, mpi kana nge kenunga ve na luyantiku, nge fwete yindula ve nde nge tanunga ve. Beto baka mbandu ya Koichi, yina vandaka kulutisa ntangu mingi na bansaka. Koichi kulongukaka Biblia na kileke na yandi, kansi na nsungi ya bamvula mingi, bansaka ya video vandaka kubaka ntangu mingi na luzingu na yandi. Kilumbu mosi yandi kuditubilaka nde: ‘Nge ke na kusala inki? Nge kele ti bamvula 30 ti ndambu, mpi nge kesala ve ata kima mosi ya mfunu na luzingu na nge!’ Koichi kuyantikaka dyaka kulonguka Biblia mpi kundimaka lusadisu ya bampangi ya dibundu. Ata bansoba yai kusalamaka malembe-malembe, yandi yambulaka ve. Sambu yandi vandaka kusamba mingi mpi bampangi kusadisaka yandi na zola yonso, nsukansuka yandi nungaka na kuyambula bansaka yina. (Luka 11:9) Ntangu yai, yandi kesadila Nzambi na kyese yonso bonso nsadi ya kisalu.
Longuka na Kuvanda na Bukatikati
7. Sambu na nki beto fwete vanda na bukatikati ntangu beto kesala kisalu ya Nzambi?
7 Yo mefwana nde beto sala bikesa ya masonga sambu na kusosa lukanu ya Nzambi. Beto fwete sala mpenza ngolo mpi kuvanda ve bamolo. (Baebreo 6:11, 12) Kansi, Yehowa kezola ve nde beto lemba ngolo kibeni, yo vanda na nitu, na mabanza to na mawi. Kundima na kudikulumusa yonso nde beto lenda sala ve kisalu ya Nzambi na ngolo na beto mosi kepesaka yandi lukumu mpi kemonisaka nde beto kele na bukatikati. (1 Piere 4:11) Yehowa kesila na kupesa beto ngolo ya beto kele na yo mfunu sambu na kusala luzolo na yandi, kansi beto fwete sala ve mambu yina meluta ngolo na beto, mpi kusosa kusala mambu yina yandi kelomba beto ve na kusala. (2 Korinto 4:7) Sambu na kulanda kusadila Nzambi kukonda kulemba ngolo kibeni, beto fwete sadila ngolo na beto na mayele yonso.
8. Inki kusalamaka ntangu leke mosi ya Mukristu kusosaka kusala mingi na kisalu na yandi mpi sambu na Yehowa, mpi nki bansoba yandi salaka?
8 Beto baka mbandu ya Ji Hye, yina kezingaka na Esti ya Azia. Ntangu yandi vandaka mupasudi-nzila, yandi salaka kisalu mosi ya vandaka kubaka yandi ntangu mingi na nsungi ya bamvula zole. Yandi ketuba nde: “Mu vandaka kusosa kusala mingi sambu na Yehowa mpi na kisalu na munu, kansi mu vandaka kulala kaka bangunga tanu konso kilumbu. Nsukansuka, mu vandaka ve ti ngolo sambu na kyeleka, mpi mu vandaka dyaka ve ti kyese mingi na kusala mambu ya kimpeve.” Sambu na kusadila Yehowa ‘na ntima, na luzolo, na mabanza ti na ngolo na yandi yonso,’ Ji Hye kusosaka kisalu yina vandaka kubaka yandi ve ntangu mingi. (Marko 12:30) Yandi ketuba nde: “Ata dibuta na munu vandaka kupusa munu na kusosa kuzwa mbongo mingi, mu salaka ngolo na kutula lukanu ya Nzambi na kisika ya ntete. Ntangu yai, mu kezwaka mwa mbongo sambu na bima ya mfunu, bonso kusumba bilele ya mbote. Mpi mu kewaka kyese sambu mu mekumaka kulala mbote! Mu kesepelaka na kisalu na munu ya kusamuna, mpi mu kele ngolo mingi na kimpeve sesepi yai. Yo kele mutindu yai sambu mu kekutanaka ve mingi ti mambu ya ntoto yai ya kebendaka mpi kekatulaka dikebi ya bantu.”—Longi 4:6; Matayo 6:24, 28-30.
9. Inki mutindu bikesa na beto na kisalu ya bilanga lenda vanda ti bupusi na bantu?
9 Bantu yonso ve lenda sala kisalu ya ntangu yonso. Kana nge kele mununu, ke na maladi, to kekutana ti mambu yankaka ya mpasi, zaba nde Yehowa kebakaka na valere kwikama na nge mpi konso kisalu yina nge lenda sadila yandi na ntima ya mvimba. (Luka 21:2, 3) Yo yina, ata muntu ve na kati na beto fwete mona mpamba bupusi yina bikesa na beto lenda vanda na yo na bantu yankaka, ata yo kele fyoti. Mu mbandu, yindula nde beto mesamuna na mwa banzo mpi ata muntu mosi ve mesepela na nsangu na beto. Na nima ya viziti na beto, ziku bantu yango tasolula sambu na viziti na beto na nsungi ya bangunga to bilumbu mingi, yo vanda na ntangu yina ata muntu mosi ve kuyambaka beto! Beto kevingilaka ve nde bantu yonso yina kewa nsangu ya mbote kundima yo, kansi bankaka tasala yo. (Matayo 13:19-23) Ziku bankaka tandima yo na nima, ntangu mambu ya ntoto to ya luzingu na bo tasoba. Yo vanda bo ndima yo to ve, kana beto kesala yonso na kisalu ya kusamuna, pana beto kesala kisalu ya Nzambi, mpi kesala kumosi ti yandi.—1 Korinto 3:9.
10. Inki mabaku konso muntu kele na yo na dibundu?
10 Dyaka, beto yonso lenda sadisa bantu ya mabuta na beto mpi bampangi na beto ya kimpeve. (Galatia 6:10) Beto lenda vanda ti bupusi ya mbote na bankaka, mpi bupusi yango lenda vanda ngolo mpi kuzinga mingi. (Longi 11:1, 6) Ntangu bankuluntu ti bansadi ya kisalu kelungisaka mikumba na bo na kikesa yonso, bo kesadisaka bampangi na kuvanda ti kimpeve ya mbote mpi ya ngolo, ebuna kisalu ya Bukristu keyelaka. Beto ketula ntima nde ntangu beto ‘kekudipesaka ntangu yonso na kisalu ya Mfumu,’ kisalu na beto kevandaka “ya mfunu.”—1 Korinto 15:58.
Sosa Lukanu ya Nzambi Luzingu ya Mvimba
11. Katula kusala ti dibundu na beto, nki mabaku yankaka beto lenda zwa?
11 Beto Bakristu, beto kezolaka luzingu mpi beto kezolaka kupesa Nzambi lukumu na mambu yonso ya beto kesalaka. (1 Korinto 10:31) Ntangu beto kekudipesaka na kwikama yonso na kusamuna nsangu ya mbote ya Kimfumu mpi na kulonga bankaka na kulanda mambu yonso ya Yezu kulongaka, beto kevandaka ti mabaku mingi ya kisalu. (Matayo 24:14; 28:19, 20) Katula kusala ti dibundu na beto, beto lenda zwa mpi mabaku ya kusala kisika mpusa kele mingi, yo vanda na teritware, na ndinga, to na insi yankaka. Bo lenda binga bankuluntu ti bansadi ya kisalu ya mefwana yina mekwelaka ntete ve na kukota na Nzo-Nkanda Yina Kelongaka Mutindu ya Kusala Kisalu, ebuna na nima kukwenda kusala na mabundu yina bo kele ti mfunu ya Bakristu ya kuyela, yo vanda na insi na bo to na insi yankaka. Bankwelani yina kele na kisalu ya ntangu yonso lenda lungisa mambu ya bo kelombaka sambu na kubaka formasio ya kimisionere na Gileadi mpi kusala na bansi ya nzenza. Mpi beto kele kaka ti mpusa mingi ya bampangi sambu na kusala bisalu mingi na Betele mpi na kutunga ti kutanina bisika ya lusambu ti babiro ya filiale.
12, 13. (a) Inki mutindu nge lenda pona mabaku ya kisalu yina nge tasosa? (b) Pesa mbandu ya kemonisa mutindu eksperiansi ya muntu mebaka na kisalu mosi lenda sadisa yandi na bisalu yankaka.
12 Inki mabaku ya kisalu nge fwete sosa? Sambu nge kele nsadi ya Yehowa, sosa konso ntangu lutwadisu ya Nzambi ti ya organizasio na yandi. Mpeve na yandi ya mbote tasadisa nge na kubaka desizio ya mbote. (Nehemia 9:20) Mbala mingi, dibaku mosi ya kisalu kenataka na dibaku yankaka, mpi eksperiansi ti mayele ya beto kebaka na kisalu mosi lenda vanda mfunu na kisalu yankaka ya beto tasala na nima.
13 Mu mbandu, Dennis ti nkento na yandi Jenny, vandaka kusadisa mbala na mbala na kutunga Banzo ya Kimfumu. Na nima ya ntangu yina mupepe ya ngolo ya bo bingaka Katrina kusalamaka na sudi ya États-Unis, bo kudipesaka na luzolo yonso sambu na kusadisa bampangi. Dennis ketuba nde: “Kusadila mayele yina beto bakaka ntangu beto vandaka kutunga Banzo ya Kimfumu sambu na kusadisa bampangi na beto mepesaka beto kyese mingi. Ntonda yina bampangi ya beto sadisaka kumonisaka, kusimbaka mpenza ntima na beto. Bimvuka yankaka yina vandaka kusadisa na kutunga dyaka banzo yina kubebaka kukukaka mpenza ve. Bambangi ya Yehowa meyidikaka dezia to metungaka dyaka banzo kuluta 5 300 mpi Banzo ya Kimfumu mingi. Bantu kumonaka mambu yai mpi ntangu yai bo kesepelaka mingi ti nsangu na beto.”
14. Inki nge lenda sala kana nge kezola kusala kisalu ya ntangu yonso?
14 Keti nge lenda vanda ti lukanu ya kusala kisalu ya ntangu yonso na luzingu na nge ya mvimba? Kana nge sala mpidina, nge tabaka balusakumunu mingi. Kana luzingu na nge kepesa nge ve nzila ya kusala yo ntangu yai, ziku nge lenda sala bansoba. Sala bonso Nehemia. Ntantu yandi zolaka kusala kisalu mosi ya mfunu, yandi sambaka nde Yehowa ‘kubongisa makambu na yandi.’ (Nehemia 1:11) Na nima, tula ntima na Muntu ya “ke ndimaka bisambu,” mpi sala mambu na kuwakana ti kisambu na nge. (Nkunga 65:3) Sambu Yehowa kusakumuna bikesa ya nge kezola sala sambu na kusadila yandi mingi, nge fwete sala ntete bikesa yango. Na nima ya kubaka lukanu ya kusala kisalu ya ntangu yonso, kangama na desizio na nge. Na nima ya ntangu, eksperiansi na nge takuma mingi, mpi nge takuma na kyese mingi.
Luzingu ya Mbote Mpenza
15. (a) Inki mutindu beto kebakaka mambote kana beto ketanga masolo ya bampangi yina mesadilaka Nzambi banda ntama? (b) Tanga disolo mosi ya luzingu yina kupesaka nge kikesa mingi.
15 Inki mambote nge lenda baka kana nge kesosa kusala lukanu ya Nzambi? Solula ti bampangi yina mesadilaka Yehowa banda ntama, mingimingi bayina mesalaka bamvula mingi na kisalu ya ntangu yonso. Bo kele na luzingu mosi ya mbote kibeni! (Bingana 10:22) Bo tazabisa nge nde konso ntangu Yehowa kesadisaka bo na kuzwa bima yina bo kevandaka na yo mpenza mfunu mpi bima yankaka, ata na ntangu ya mpasi. (Filipi 4:11-13) Banda na mvu 1955 tii 1961, Nzozulu ya Nkengi ya Kifalansa kubasisaka na nsi ya ntu-dyambu “Comment je poursuis le but de ma vie” masolo ya kulandana ya luzingu ya bampangi ya kwikama. Banda na ntangu yina, bo mebasisaka masolo mingi ya luzingu ya bantu. Konso disolo kemonisaka kikesa ti kyese yina keyibusaka beto masolo ya Biblia ya kele na mukanda ya Bisalu. Kutanga masolo yai tapusa nge na kutuba nde, ‘Yai mpenza luzingu ya mu kezola kuzinga!’
16. Inki kesalaka nde luzingu ya Mukristu kuvanda ya kyese mpi ti lukanu?
16 Aaron, yina beto tubilaka na luyantiku, keyibuka nde: “Mbala mingi na Afrika, mu vandaka kukutana ti baleke yina vandaka kukwenda na bansi yankaka sambu na kusosa lukanu na luzingu. Bamingi kuzwaka yo ve. Kansi awa beto vandaka kusosa lukanu ya Nzambi na mutindu beto vandaka kupesa maboko na kisalu ya kusamuna nsangu ya Kimfumu, mpi beto vandaka ti mambu mingi ya kusala mpi luzingu na beto vandaka mbote. Beto monaka beto mosi mpenza nde kyese kevandaka mingi na kupesa kansi na kubaka kyese kevandaka fyoti.”—Bisalu 20:35.
17. Sambu na nki beto fwete sosa lukanu ya Nzambi ntangu yai?
17 Ebuna nge? Inki lukanu nge ke na kusosa? Kana nge kele ve ti lukanu ya sikisiki ya kimpeve, mabanza na nge tafuluka na mambu yankaka. Sambu na nki kubebisa luzingu na nge na ngidika yai ya Satana kemonisaka bonso nde yo kele kitoko? Ntama mingi ve na bilumbu kekwisa, ‘mpasi ya nene’ tayantika. Bimvwama ya kinsuni ti lukumu ya nsi-ntoto tavanda ve ti mfunu. Kima tavanda mfunu kele bangwisana na beto ti Yehowa. Beto tapesa mpenza Nzambi mersi sambu beto sadilaka yandi mpi bantu yankaka, mpi sambu beto sosaka mpenza lukanu ya Nzambi na luzingu na beto!—Matayo 24:21; Kusonga 7:14, 15.
[Banoti na nsi ya lutiti]
a Beto mesoba bazina yankaka.
b Yina Bambangi ya Yehowa mebasisaka.
Keti Nge Lenda Tendula?
• Inki mutindu Yehowa ketadilaka kisalu ya beto kesadilaka yandi?
• Inki mutindu kusala bitambi ya sikisiki mpi bukatikati kesadisaka beto na kusadila mpi bantu yankaka?
• Inki mabaku ya kisalu beto kele na yo?
• Inki mutindu beto lenda vanda na luzingu ya mbote mpenza bubu yai?
[Bifwanisu ya kele na lutiti 25]
Bukatikati kele mfunu sambu na kulanda kusadila Yehowa na ntima ya mvimba
[Bifwanisu ya kele na lutiti 26]
Kisalu ya santu kele ti mabaku mingi