‘Landa na Kusala Kisalu Yina Mfumu Mepesaka Nge’

‘[Landa, NW] na kusala kisalu yina Mfumu mepesaka nge.’​—KOL. 4:17.

1, 2. Inki mukumba Bakristu kele na yo na ntwala ya bantu?

BETO kele ti mukumba ya nene na ntwala ya bantu yina kezinga na nzyunga na beto. Badesizio ya bo kebaka ntangu yai lenda natila bo luzingu to lufwa na ntangu ya ‘mpasi ya nene.’ (Kus. 7:14) Nsoniki ya mukanda ya Bingana kusonikaka nde: “Botula bantu yina ya bo ke kwenda kufwa ata bo ke na mambu ve; gulusa bo, kubika bo ve.” Bangogo yai kele mfunu mingi mpenza! Beto lenda vanda na mukumba na lufwa ya bantu kana beto kekebisa bo ve na bansola yina bo fwete sala. Nkutu, verse yina mosi kelanda na kutuba nde: “Kana nge tuba nde: ‘A, mono zabaka ve,’ a Nzambi yina ke talaka ntima ya bantu, keti yandi ke mona ve? Keti yandi ta futa ve bantu mutindu kele kisalu na bo?” Yo kele pwelele nde bansadi ya Yehowa lenda tuba ve nde bo ‘kezaba ve’ kigonsa yina kele na ntwala ya bantu.​—Bing. 24:11, 12.

² Yehowa kebakaka luzingu na valere. Yandi kelongisila bansadi na yandi na kusala yonso sambu na kusadisa bantu mingi na kuguluka. Konso nsadi ya Nzambi fwete zabisa bantu nsangu ya kegulusaka yina kele na Ndinga ya Nzambi. Kisalu na beto kele bonso ya santinele yina kepesaka lukebisu kana yandi mona kigonsa mosi kekwisa. Beto kezola ve nde menga ya bantu yina kele na kigonsa ya lufwa kuvanda na ntu na beto. (Ezek. 33:1-7) Yo yina, yo kele mfunu mingi mpenza nde beto landa na ‘kulonga nsangu ya Nzambi’!​—Tanga 2 Timoteo 4:1, 2, 5.

3. Inki mambu beto tatadila na disolo yai ti yina zole kelanda?

³ Na disolo yai, beto tatadila mutindu ya kununga mambu ya kekangaka beto nzila na kusala kisalu ya kusamuna nsangu ya kegulusaka mpi mutindu beto lenda sadisa bantu mingi mpenza. Disolo ya zole tatubila mutindu beto lenda yedisa mayele ya kulongila bakyeleka ya mfunu. Disolo ya tatu tatubila bambuma ya mbote yina bansamuni ya Kimfumu ke na kubaka na ntoto ya mvimba. Kansi, na ntwala ya kutadila mambu yai, yo tavanda mbote na kutadila mwa bikuma ya kelomba nde beto sala mambu kukonda kusukinina bubu yai.

Sambu na Nki Bantu Mingi Kekonda Kivuvu

4, 5. Inki mambu bantu kekutana ti yo, mpi bantu mingi kesalaka inki?

⁴ Mambu ya keluta na nsi-ntoto kemonisa nde beto kezinga na ntangu “ngidika yai ya bima kekwenda na nsuka” (NW) mpi nde nsuka mekuma penepene. Bantu kekutana ti mambu yina Yezu ti balongoki na yandi kutubaka nde yo tavanda kidimbu ya “bilumbu ya nsuka.” Bamvita, nzala, kunikana ya ntoto, mpi bampasi yankaka yina kele bonso “misongo,” kemonisa bantu mpasi. Kukonda kuzitisa nsiku, bwimi, mpi bikalulu ya mbi kele bisika yonso. Bilumbu yai kele mpi “mpasi mingi” ata sambu na bantu yina kesala kikesa na kulemfuka na minsiku ya Biblia.​—Mat. 24:3, 6-8, 12; 2 Tim. 3:1-5.

⁵ Kansi, bantu mingi kezaba ve ntendula ya kyeleka ya mambu ya kesalama na ntoto. Yo yina, bo kekudiyangisa sambu na kusosa lutaninu na bo ti ya mabuta na bo. Kana bo fwila muntu ya bo kezolaka to kana mambu yankaka ya mpasi kubwila bo, yo kepesaka bo mpasi mingi. Bantu yai kekonda kivuvu sambu bo kezaba mpenza ve kikuma ya kesala nde mambu ya mutindu yai kusalama mpi kisika bo lenda zwa lusadisu.​—Ef. 2:12.

6. Sambu na nki ‘Babilone ya Nene’ mekukaka ve kusadisa bantu na yo?

⁶ ‘Babilone ya Nene,’ kintinu ya nsi-ntoto ya mvimba ya mabundu ya luvunu, kepesaka mpenza ve bantu kikesa. Kansi, na nzila ya “vinu na yandi ya pite,” Babilone ya Nene mesalaka nde bantu mingi kukuma kisakasaka na kimpeve. Dyaka, mabundu ya luvunu mesalaka bonso nkento ya ndumba na mutindu yo mekusaka mpi meyalaka “bamfumu ya nene ya ntoto.” Yo mesadilaka malongi ya luvunu mpi bisalu ya bampeve ya mbi sambu na kupusa bantu na kusala mambu yonso yina bamfumu ya politiki kelombaka bo, ata bo kebakisa ve. Yo mesalaka nde mabundu ya luvunu kukuma na kiyeka ti bupusi mingi, kansi na ntangu yo yina mosi, bo kelongaka ve bakyeleka ya Biblia.​—Kus. 17:1, 2, 5; 18:23.

7. Inki kevingila bantu mingi, kansi nki mutindu beto lenda sadisa bankaka?

⁷ Yezu kulongaka nde bantu mingi ketambula na nzila ya nene yina kenataka na lufwa. (Mat. 7:13, 14) Bantu mingi kele na nzila yina ya nene sambu bo mebuyaka na luzolo yonso mambu yina Biblia kelongaka, kansi mingi yankaka kele na nzila yina sambu bamfumu ya mabundu na bo mekusaka bo to melongaka bo ve mambu yina Yehowa kelombaka bo na kusala. Ziku bantu yankaka tasoba luzingu na bo kana beto songa bo bikuma ya pwelele yina Masonuku kepesa na kusala yo. Kansi, bayina kebikala na Babilone ya Nene mpi kelanda na kubuya minsiku ya Biblia taguluka ve na ‘mpasi ya nene.’​—Kus. 7:14.

Landa “Kaka” na Kulonga

8, 9. Bakristu ya mvu-nkama ya ntete kusalaka nki na ntwala ya kimbeni, mpi sambu na inki?

⁸ Yezu kutubaka nde balongoki na yandi talonga nsangu ya mbote ya Kimfumu mpi takumisa bantu balongoki. (Mat. 28:19, 20) Yo yina, Bakristu ya kyeleka ketadilaka ntangu yonso kisalu ya kusamuna nde yo kele dyambu ya metala kwikama na bo na Nzambi mpi kima mosi ya mfunu ya bo fwete sala sambu na lukwikilu na bo. Yo yina, balongoki ya ntete ya Yezu kulandaka na kusala yo ata na ntwala ya kimbeni. Bo vandaka kutula ntima nde Yehowa tapesa bo ngolo, ebuna bo vandaka kusamba nde yandi kusadisa bo na kulanda na “kuzabisa bantu nsangu” na yandi ti “kikesa yonso.” Yehowa kuwaka kisambu na bo mpi kupesaka bo mpeve santu na yandi yina kusadisaka bo na kutuba ndinga na yandi ti kikesa yonso.​—Bis. 4:18, 29, 31.

⁹ Ntangu kimbeni kukumaka ngolo, keti balongoki ya Yezu kuyambulaka kuzabisa nsangu ya mbote? Ve ata fyoti. Bamfumu ya mabundu ya Bayuda kuwaka makasi sambu na kisalu ya kusamuna ya bantumwa, ebuna bo kangaka bo, bo titisaka bo, mpi kubulaka bo. Ata mpidina, bantumwa “vandaka kulonga kaka ti kuzabisa nsangu ya mbote ya Yesu Mesia.” Bo bakisaka nde bo “fweti lemfuka ntete na Nzambi, kansi na bantu ve.”​—Bis. 5:28, 29, 40-42.

10. Inki mambu ya mpasi Bakristu kekutana ti yo bubu yai, kansi bikalulu na bo ya mbote lenda pusa bantu na kusala inki?

¹⁰ Bansadi mingi ya Nzambi bubu yai kekutana ve ti minyokudi bonso yina bantumwa kukutanaka ti yo. Bantu kebula bo ve mpi ketula bo ve na boloko sambu na kisalu na bo ya kusamuna. Kansi, Bakristu yonso ya kyeleka kekutanaka ti mimekamu mpi bampasi ya mutindu na mutindu. Mu mbandu, kansansa na nge ya melongamaka na Biblia lenda pusa nge na kusala kima mosi yina bantu mingi kesepelaka na yo ve to yina keswaswanisa nge ti bo. Banduku ya kisalu, banduku ya nzo-nkanda, to bantu ya kezinga na nzyunga na nge lenda yindula nde nge kele ya kuswaswana sambu badesizio na nge kesimbamaka na minsiku ya Biblia. Ata mpidina, mambu ya mbi ya bo ketuba fwete lembisa nge ve nitu. Insi-ntoto kele na mpimpa ya kimpeve, kansi Bakristu fwete “pela . . . mutindu ke pelaka bambwetete na zulu.” (Filp. 2:15) Ziku bantu yankaka ya masonga ya ketalaka nge tamona mpi tasepela na bisalu na nge ya mbote, mpi yo tapusa bo na kupesa lukumu na Yehowa.​—Tanga Matayo 5:16.

11. (a) Bantu yankaka lenda sala beto nki sambu na kisalu na beto ya kusamuna? (b) Inki kimbeni ntumwa Polo kukutanaka na yo, mpi nki yandi salaka?

¹¹ Beto kele na mfunu ya kikesa sambu na kulanda na kulonga nsangu ya Kimfumu. Bantu yankaka, mpi nkutu bantu ya fami, lenda seka nge to kusosa kulembisa nge nitu. (Mat. 10:36) Mbala mingi, bo bulaka ntumwa Polo sambu yandi vandaka kusala kisalu ya kusamuna na kwikama yonso. Tala mambu ya yandi tubaka ntangu bo nyokulaka yandi: ‘Bo monisaka beto mpasi mpi bo fingaka beto, kansi, Nzambi pesaka beto kikesa na kuzabisa beno nsangu ya mbote yina ke katukaka na yandi.’ (1 Tes. 2:2) Ya kyeleka, yo lombaka nde Polo kuvanda ti kikesa sambu na kulanda na kuzabisa nsangu ya mbote ntangu bo kangaka yandi, kukatulaka yandi bilele, kubulaka yandi fimbu, mpi kutulaka yandi na boloko. (Bis. 16:19-24) Inki kupesaka yandi kikesa ya kulanda na kuzabisa nsangu na nima? Yo vandaka mpusa na yandi ya ngolo ya kulungisa mukumba ya kusamuna yina Nzambi kupesaka yandi.​—1 Kor. 9:16.

12, 13. Inki bampasi bantu mingi kenwana na yo, mpi nki mutindu bo mesosaka kununga yo?

¹² Yo lenda vanda mpi mpasi na kuvanda ntangu yonso ti kikesa na bateritware yina bantu kevandaka ve mbala mingi na banzo to na bisika yina bantu mingi kendimaka ve nsangu ya Kimfumu. Inki beto lenda sala kana beto kele na bateritware ya mutindu yai? Beto fwete sala ngolo sambu na kuzwa kikesa ya kutuba na bantu na konso kisika yina beto lenda kutana ti bo. Beto lenda mpi kusoba manaka na beto to kusala yonso sambu na kusamuna na bisika yina beto lenda kutana ti bantu mingi.​—Fwanisa ti Yoane 4:7-15; Bisalu 16:13; 17:17.

¹³ Bampasi yankaka yina bantu mingi kenwana na yo kele kimununu mpi mavimpi ya mbote ve yina lenda kanga bo nzila na kusala mingi na kisalu ya kusamuna. Kana yo kele mpidina sambu na nge, kulemba nitu ve. Yehowa kezaba mbote bandilu na nge mpi yandi kesepelaka na yonso yina nge lenda sala. (Tanga 2 Korinto 8:12.) Konso mpasi yina nge lenda kutana ti yo, yo vanda kimbeni, bantu ya kebuya nsangu, to maladi, sala yonso yina luzingu na nge kepesa nge nzila na kusala sambu na kuzabisa bankaka nsangu ya mbote.​—Bing. 3:27; fwanisa ti Marko 12:41-44.

‘Landa na Kusala Kisalu’ na Nge ya Kusamuna

14. Inki mbandu ntumwa Polo kupesaka bampangi na yandi Bakristu, mpi nki ndongisila yandi pesaka?

¹⁴ Ntumwa Polo vandaka kusala mbotembote kisalu na yandi ya kusamuna, mpi yandi syamisaka bampangi na yandi Bakristu na kusala mutindu mosi. (Bis. 20:20, 21; 1 Kor. 11:1) Muntu mosi ya Polo kusyamisaka mingi kuvandaka Arshipe, Mukristu mosi ya mvu-nkama ya ntete. Na mukanda ya yandi tindilaka Bakristu ya Kolosai, Polo kusonikaka nde: ‘Beno tubila Arshipe nde yandi fweti landa na kusala kisalu yina ya Mfumu pesaka yandi.’ (Kol. 4:17) Beto kezaba ve kana Arshipe kuvandaka nani to nki kuvandaka luzingu na yandi, kansi yo kemonana nde yandi ndimaka kisalu ya kusamuna. Kana nge kele Mukristu yina mekudipesaka dezia na Nzambi, nge mpi mendimaka kisalu ya kusamuna. Keti nge kelanda na kusala yo?

15. Kudipesa na beto na Nzambi ketendula inki, mpi yo kebasisa nki bangyufula?

¹⁵ Na ntwala ya kubaka mbotika, beto kudipesaka na Yehowa na kisambu. Kudipesa yina kutendulaka nde beto bakaka lukanu ya kusala luzolo na yandi. Yo yina, beto fwete kudiyula ntangu yai nde, ‘Keti kusala luzolo ya Nzambi kele mpenza kima ya kuluta mfunu na luzingu na munu?’ Mbala yankaka beto kele ti mikumba mingi yina Yehowa kevingila nde beto lungisa, bonso mukumba ya kulungisa bampusa ya dibuta na beto. (1 Tim. 5:8) Kansi, inki mutindu beto kesadilaka ntangu ti ngolo yina kebikalaka? Inki kima beto ketulaka na kisika ya ntete?​—Tanga 2 Korinto 5:14, 15.

16, 17. Inki mabaku baleke yina kele Bakristu to bayina kele ve ti mikumba mingi lenda tadila?

¹⁶ Keti nge kele leke, yina mekudipesaka na Nzambi, yina memanisa dezia nzo-nkanda to kele penepene na kumanisa? Ziku, nge kele ntete ve ti mikumba mingi ya dibuta. Kana mpidina, inki mutindu nge kekana kusadila luzingu na nge? Inki badesizio nge lenda baka yina tasadisa nge na kulungisa lusilu na nge ya kusala luzolo ya Yehowa na mutindu mosi ya kuluta mbote? Baleke mingi mekudibongisaka sambu na kusala kisalu ya kimupasudi-nzila, mpi bo mebakaka mambote ti kyese mingi.​—Nk. 110:3; Lo. 12:1.

¹⁷ Mbala yankaka nge kele leke mosi yina mebanda kukuma mbuta. Nge kesalaka kisalu ya kinsuni konso kilumbu, kansi nge kele ve ti mikumba mingi, katula kaka kulungisa bampusa na nge mosi. Ntembe kele ve nde nge kesepelaka na kusala bisalu ya dibundu na kiteso yina manaka na nge kepesaka nge nzila. Keti nge kezola kubaka kyese ya kuluta mingi? Keti nge meyindulaka dezia na kusala mingi na kisalu ya kusamuna? (Nk. 34:8; Bing. 10:22) Na bateritware yankaka, kisalu kele kaka mingi yina beto fwete sala sambu na kunatila konso muntu nsangu ya kyeleka yina kegulusaka. Keti nge lenda sala bansoba na luzingu na nge, mu mbandu kusala na kisika yina bo kele na mfunu mingi ya bansamuni ya Kimfumu?​—Tanga 1 Timoteo 6:6-8.

18. Inki bansoba baleke zole yina katukaka kukwela kusalaka, mpi nki mambote bo bakaka?

¹⁸ Beto tadila mbandu ya Kevin ti Elena, na États-Unis.a Mutindu bantu yonso ya nsi na bo kesalaka kana bo mekatuka kukwela, bankwelani yai kumonaka nde bo fwete sumba nzo. Bo yonso zole vandaka kusala konso kilumbu sambu na kulanda na kuvanda na luzingu mosi ya mbote. Kansi, manaka ya kisalu na bo mpi bisalu ya nzo vandaka kubikila bo ntangu fyoti sambu na kisalu ya kusamuna. Bo bakisaka nde bo vandaka kusadila ntangu ti ngolo na bo yonso sambu na kimvwama. Yo yina, ntangu bo monaka kyese yina bankwelani zole ya bapasudi-nzila yina kuvandaka ti luzingu ya pete kuvandaka na yo, Kevin ti Elena kubakaka desizio ya kusoba mambu yina bo vandaka kutula na kisika ya ntete na luzingu na bo. Na nima ya kulomba Yehowa na kusadisa bo na kubaka desizio ya mayele, bo tekaka nzo na bo ya nene mpi bo kwendaka kuzinga na nzo mosi ya fyoti. Elena kufyotunaka bantangu yina yandi vandaka kulutisa na kisalu na yandi ya kinsuni mpi yandi kumaka mupasudi-nzila. Ntangu Kevin kumonaka kyese yina nkento na yandi vandaka kubaka na kisalu ya kusamuna, yandi yambulaka kisalu na yandi mpi yantikaka kusala kisalu ya kimupasudi-nzila. Ntangu fyoti na nima, bo kwendaka na insi mosi ya Amerika ya Sudi, kisika bo vandaka na mfunu mingi ya bansamuni ya Kimfumu. Kevin ketuba nde: “Banda ntama, makwela na beto kevandaka ya kyese. Kansi, ntangu beto kumaka kusala mingi sambu na kulungisa balukanu ya kimpeve, kyese na beto kukumaka dyaka mingi mpenza.”​—Tanga Matayo 6:19-22.

19, 20. Sambu na nki kulonga nsangu ya mbote kele kisalu ya kuluta mfunu bubu yai?

¹⁹ Kulonga nsangu ya mbote kele kisalu ya kuluta mfunu yina ke na kusalama na ntoto bubu yai. (Kus. 14:6, 7) Yo kesantisa zina ya Yehowa. (Mat. 6:9) Konso mvula, nsangu ya Biblia ketomisa luzingu ya bantu mingi yina kendima yo, mpi yo lenda natila bo luguluku. Kansi, ntumwa Polo kuyulaka nde: “Nki mutindu bo lenda wa nsangu yina, kana muntu me longaka bo yo ntete ve?” (Roma 10:14, 15) Ya kyeleka, yo tavanda mpasi. Nge lenda baka mpenza lukanu ya kusala yonso sambu na kusala kisalu na nge ya kusamuna!

²⁰ Kutomisa mayele na nge ya kulongila kele mutindu yankaka yina nge lenda sadisa bantu na kubakisa mfunu ya kusala mambu kukonda kusukinina na ntangu yai ya mpasi mpi na kubakisa malanda ya badesizio yina bo kebaka. Na disolo yina kelanda, beto tatadila mutindu nge lenda sala yo.

[Noti na nsi ya lutiti]

Inki Mvutu Nge Tapesa?

• nki mukumba Bakristu kele na yo na ntwala ya bantu?

• Inki mutindu beto fwete nunga mambu ya kekangaka beto nzila na kusala kisalu ya kusamuna?

• Inki mutindu beto lenda sala kisalu ya kusamuna yina Mfumu mepesaka beto?

[Kifwanisu ya kele na lutiti 9]

Kikesa kele mfunu sambu na kusamuna na ntwala ya kimbeni

[Kifwanisu ya kele na lutiti 10]

Inki nge lenda sala kana nge kesamunaka na bateritware yina bantu kevandaka ve mbala mingi na banzo?