Bangyufula ya Batangi

Keti Bisumbula ya Lugangu Kele Ndola ya Nzambi?

Nzambi kesadilaka ve bisumbula ya lugangu sambu na kupesa bantu ndola. Yandi mesadilaka yo ntete ve, mpi tasadilaka yo ve ata fyoti. Sambu na inki? Sambu na 1 Yoane 4:8 (NW) Biblia ketuba nde “Nzambi kele zola.”

Zola kevandaka na kisina ya mambu yonso ya Nzambi kesalaka. Zola kepusaka ve na kupesa bankaka mpasi, sambu Biblia ketuba nde zola ‘kesalaka ve ata mambu mosi ya mbi na mpangi.’ (Roma 13:10) Na Yobi 34:12, Biblia ketuba nde: ‘Nzambi lenda sala mbi ata fioti ve!’

Ya kyeleka, Biblia kutubilaka na ntwala bisumbula ya kesalama na ntangu na beto, mu mbandu ‘kunikana ya ngolo ya ntoto.’ (Luka 21:11) Météorologue (muntu ya kepesaka bansangu ya kemonisa mutindu ntangu tavanda) lenda pesa bansangu ya kemonisa nde mupepe ya ngolo tasalama, kansi yandi kevandaka ve na kisina ya bampasi yina yo kenataka. Mutindu mosi, Yehowa kevandaka ve na kisina ya mpasi yina bisumbula kebasisaka. Kana Nzambi kele ve na kisina ya bampasi yina bisumbula ya lugangu kenatilaka bantu, banani kele na kisina na yo?

Biblia kemonisa nde, “nsi-ntoto [ya mvimba] kele na maboko ya Muntu ya Mbi,” Satana Dyabulu. (1 Yoane 5:19) Yandi kele muntu ya kefwaka bantu banda kukolama na yandi na luyantiku ya luzingu ya bantu tii na ntangu na beto. (Yoane 8:44) Satana kemonaka luzingu ya bantu bonso kima ya mpamba mpenza. Kima ketwadisaka yandi kele balukanu ya bwimi, yo yina mpila ya kuyituka kele ve na kumona nde yandi mesalaka ngidika ya mvimba yina mesimbama na bwimi. Ngidika ya ntoto ya ntangu yai kendimaka kunyokula bantu nkutu na kiteso ya kesalaka nde bantu ya kukonda lutaninu kuzinga na kigonsa, yo vanda ya bisumbula ya lugangu to yina ya bantu kebasisaka. (Efezo 2:2; 1 Yoane 2:16) Yo yina, bantu ya bwimi bantu kevandaka na kisina ya bampasi yankaka ya kebwilaka bantu. (Longi 8:9) Inki mutindu?

Na kiteso mosi buna, bantu kevandaka na kisina ya bisumbula mingi kibeni. Beto baka mbandu ya bampasi yina kubwilaka bantu ya mbanza Nouvelle-Orléans, na États-Unis, kisika mvula ya mupepe kunokaka, to potopoto yina katukaka na bangumba ya Venezuela ya vandaka na lweka ya masa mpi yina kubwisaka banzo. Na bambandu yai mpi yankaka, mambu ya kesalamaka na nsi-ntoto, bonso mupepe mpi mvula, kukumaka bisumbula ya nene mingi-mingi sambu bantu zabaka ve mbote mambu ya mupepe, bantu ya ketungaka kutungaka ve mbote, bantu kuyidikaka ve mambu mbote na ntwala, bantu kulandaka ve balukebisu, mpi sambu na bifu ya bamfumu.

Beto tadila kisumbula mosi ya salamaka na ntangu ya ntama. Na bilumbu ya Yezu, kubwa ya kintulumukina ya nzo mosi ya nda kufwaka bantu 18. (Luka 13:4) Yo lenda vanda nde kisumbula yina kukatukaka na kifu ya bantu, na “ntangu ti mambu ya kukonda kukana,” to na yonso zole kansi yo vandaka ve ata fyoti ndola ya Nzambi.​—Longi 9:11, NW.

Keti Nzambi mebwisaka dezia bisumbula? Ee, kansi na kuswaswana ti bisumbula ya lugangu to ya bantu kebasisaka, bisumbula ya kukatukaka na Nzambi kuponaka bantu ya kufwaka, yo vandaka ti lukanu mosi, mpi yo vandaka ya kutanga na misapi. Beto lenda tanga bambandu zole: Mvula ya Ngolo ya bilumbu ya Noa mpi kufwa ya bambanza Sodome ti Gomore na bilumbu ya Loti. (Kuyantika 6:7-9, 13; 18:20-32; 19:24) Bandola yai ya Nzambi kufwaka bantu ya mbi yina kubalulaka ve ntima, kansi yo taninaka bantu yina kuvandaka ya mbote na meso ya Nzambi.

Yo kele kyeleka nde Yehowa Nzambi kele ti mayele, luzolo, mpi ngolo ya kusukisa bampasi yonso mpi ya kukatula bantu na malanda ya bisumbula ya lugangu. Sambu na yina metala Yezu Kristu, Ntotila ya Nzambi meponaka, Nkunga 72:12 ketuba nde: “Yandi ta sadisaka bantu ya mawa yina ke didila yandi ti bantu ya kukonda muntu ya kusadisa bo.”