Bisumbula ya Lugangu Keti Yo Ke Monisa nde Nzambi Kele Nku?

MAMBU YINA BANTU YA NKAKA KE TUBAKA: “Nzambi ke yalaka nsi-ntoto, na mutindu yina yandi kele na kisina ya bisumbula ya lugangu; yo yina yandi fwete vanda muntu ya nku.”

MAMBU YINA BIBLIA KE LONGAKA: “Nsi-ntoto ya mvimba kele na nsi ya kiyeka ya muntu ya mbi.” (1 Yoane 5:19) Nani kele “muntu ya mbi”? Biblia ke monisa nde muntu yina kele Satana. (Matayo 13:19; Marko 4:15) Keti yo kele mpasi na kundima dibanza yina? Beto yindula diambu yai: Kana nsi-ntoto yai kele na nsi ya kiyeka ya Satana, disongidila nde yandi ke pusaka bantu na kuvanda bantu ya bwimi, ya lukasi mpi bo ke monaka ve ntama bonso yandi. Keti yo ke monisa ve kikuma yina bantu ke bebisaka bima yina kele na ntoto, kisika yina bo ke zingaka? Bantu mingi ya mayele ke tubaka nde kubebisa bima mutindu yina lenda vanda ti bupusi ya ngolo na bisumbula ya lugangu, kuvanda na kisina na yo, kusala nde yo salama mingi kuluta, to nkutu kutula luzingu ya bantu na kigonsa ya nene.

Ebuna, sambu na nki Nzambi bikaka nde Satana kuvanda ti bupusi ya mingi mutindu yina? Mvutu ke monana tuka luyantiku ya disolo ya luzingu ya bantu, ntangu bibuti na beto ya ntete kolamaka na Luyalu ya Nzambi. Yantika ntangu yina bantu mingi mpi me buyaka luyalu ya Nzambi. Nsola yina, disongidila kubuya luyalu ya Nzambi me tulaka bantu na nsi ya lutwadisu ya Satana, mbeni ya Nzambi. Yo yina, Yezu bingaka Satana “mfumu ya nsi-ntoto.” (Yoane 14:30) Keti Satana ta yalaka kimakulu? Ve!

Yehowaa ke bakisaka bampasi yina Satana ke basisilaka bantu. Nkutu, bampasi yina bantu ke monaka ke pesaka Nzambi mpasi mingi na ntima. Mu mbandu, na yina me tala bantangu ya mpasi yina dikanda ya Izraele vandaka kukutana ti yo, Biblia ke tuba sambu na Nzambi nde: ‘Ntangu yonso yina bo vandaka na mpasi, yandi mosi mpi vandaka na mpasi.’ (Yezaya 63:9) Na kiese yonso, Nzambi me bakaka bangidika sambu na kutula nsuka na luyalu ya nku ya Satana, mpi yo ta salama ntama mingi ve! Yandi me ponaka Mwana na yandi, Yezu Kristu sambu na kuvanda Ntotila ya mbote mpi ya lunungu mvula na mvula.

KIKUMA YINA YO KE TADILA NGE: Ata luyalu ya Satana me taninaka ve bantu na bisumbula ya lugangu, luyalu ya Yezu ta sala yo. Kilumbu mosi Yezu taninaka balongoki na yandi na mupepe ya ngolo. Biblia ke tuba nde: “Yandi . . . nganinaka mupepe mpi songaka nzadi-mungwa nde: ‘Bika makelele! Vanda pima!’ Mpi mupepe manaka, ebuna pima ya nene kotaka.” Balongoki tubaka nde: “Muntu yai kele nani kibeni? Ata mupepe mpi nzadi-mungwa ke lemfukila yandi.” (Marko 4:37-41) Diambu yina ke pesa beto kivuvu nde, Yezu ta tanina bantu yonso yina ke lemfukilaka Nzambi ntangu yandi ta yala bonso Ntotila.​—Daniele 7:13, 14.