Inki Kesalamaka Mpenza na Lufwa?

“Myoyo yonso kefwaka ve, ata ya bantu ya mbi . . . Sambu yo kebakaka ndola ya bampasi ya kukonda nsuka na tiya yina kefwaka ve, mpila kele ve sambu bampasi na bo kusuka.”​—Clément d’Alexandrie, nsoniki ya mvu-nkama ya zole mpi ya tatu T.B.

BONSO Clément, bantu yina kelongaka nde bilungi kele kisika ya mpasi mingi keyindulaka nde moyo ya muntu kefwaka ve. Keti Biblia kelongaka dilongi yai? Tadila mambu yina Biblia ketuba sambu na kupesa mvutu na bangyufula yai ya melanda.

Keti muntu ya ntete, Adami, kuvandaka muntu ya kefwaka ve? Ntangu fyoti na nima ya kuganga Adami, Nzambi kupesaka muntu nsiku yai: “Nge lunga kudia bambuma ya konso nti yina kele na kilanga yai, kansi nge lunga kudia ve bambuma ya nti yai ke pesaka mayele sambu na kuzaba mambu ya mbote ti mambu ya mbi. Kilumbu ya nge ta dia yo, kilumbu yo yina nge ta fwa.” (Kuyantika 2:16, 17) Adami kuvandaka muntu ya kefwaka.

Nsukansuka nki kukuminaka Adami na nima ya kusala disumu? Ndola ya Nzambi kuzengilaka yandi kuvandaka ve mpasi ya mvula na mvula na bilungi. Kansi, Biblia na Kituba ya bantu ya Misioni ti ya Katolika kebalula mambu ya Nzambi tubaka mutindu yai: “Na kubaka madia nge ta basikaka mutoki tii kuna nge ta vutuka na ntoto yina ya mono salaka nge. Sambu nge kele ntoto, nge ta vutuka mpi na ntoto.” (Beto bantu metengimisa bisono; Kuyantika 3:19) Mambu ya Nzambi kutubaka kemonisa ve nde kitini mosi ya nitu ya Adami kubikalaka na luzingu na nima ya lufwa na yandi.

Keti kele ti muntu yina kefwaka ve? Bantu yonso kefwaka. Biblia ketuba mutindu yai na Longi 3:20: “Bo yonso zole ke kwenda kisika mosi. Bo yonso zole katukaka na ntoto, bo ta vutuka mpi na ntoto.” Ntumwa Polo kusonikaka nde: “Masumu me kotaka na nsi-ntoto sambu na mbi ya muntu mosi yai Adami, ebuna masumu me kwisaka kunata lufwa. Yo yina, bantu yonso ke fwaka sambu bo yonso ke salaka masumu.” (Roma 5:12) Bantu yonso kesalaka masumu, mpi yo yina bantu yonso kefwaka.

Keti bafwa kezabaka mambu to kevandaka ti mawi? Ndinga ya Nzambi ketuba nde: “Bantu yina ke na moyo, bo ke zaba nde bo ta fwa; kansi bantu ya kufwa kuzaba kima ve.” (Longi 9:5) Biblia ketuba mutindu yai ntangu yo ketendula mambu yina kekuminaka bantu na lufwa: “Bo ta vutuka na ntoto; na kilumbu yo yina bangindu na bo yonso ta suka.” (Nkunga 146:4) Kana bafwa “kuzaba kima ve” mpi ‘bangindu na bo yonso mesukaka,’ inki mutindu bo lenda wa konso mpasi yina na bilungi?

Yezu Kristu kufwanisaka ve lufwa ti mutindu mosi buna ya kuzaba mambu, kansi yandi fwanisaka yo ti mpongi. (Yoane 11:11-14) Ata mpidina, bantu yankaka lenda buya mpi kutuba nde Yezu kulongaka nde bilungi kevandaka tiya mpi nde bo talosa bantu ya masumu na bilungi ya tiya. Bika beto tadila mambu yina Yezu kutubaka mpenza na yina metala bilungi.