Dibundu ya Mbote Kesyamisaka Minsiku ya Kuzanguka ya Bikalulu ya Mbote

DIBUNDU ya mbote kelongaka beto na kuyindula mambu ya mbote mpi yo kesongaka beto mutindu ya kutomisa bikalulu na beto. Yo kesadisaka beto na mvita ya beto kenwanaka sambu na kusala mambu ya mbote mpi na kuvanda bantu ya mbote mpenza. Inki mutindu beto mezaba nde dibundu ya mbote kesalaka mambu yina?

Beno simba mambu yina ntumwa Polo kusonikilaka Bakristu ya mvu-nkama ya ntete ya vandaka kuzinga na Korinto, na Grese. Mbanza yina kuzabanaka sambu na luzingu na yo ya mansoni. Polo kukebisaka nde: “Bantu yina ke salaka pite na bantu yina me kwelaka to na bayina me kwelaka ve, bantu yina ke sambaka banzambi ya biteki, babakala yina ke ladisaka babakala ya nkaka, bamiyibi, bantu yina ke vandaka na nzala ya kuvanda na konso kima yina, bantu yina ke laukaka malafu, bantu yina ke fingaka bantu ya nkaka, bantu yina ke kusaka bantu ya nkaka sambu na kubaka mbongo na bo ata muntu mosi ve na kati ya bantu yina ta vanda muntu ya Kimfumu ya Nzambi.” Na nima Polo kuyikaka nde: “Kansi beno me sukulaka ntima na beno, Nzambi na beto me kitulaka beno bantu na yandi, yandi me ndimaka beno mpi na zina ya Mfumu Yesu Kristo ti na mpeve-santu” ya Nzambi na beto. (1 Korinto 6:9-11) Beno yindula fyoti​—dibundu ya mbote kusadisaka bantu yankaka yina vandaka ntete kukonda minsiku ya bikalulu ya mbote na kukuma bansadi ya Nzambi ya bunkete mpi ya mbote!

Kansi, Biblia kekebisa nde: “Na bilumbu ke kwisa na ntwala, bantu ta zola diaka ve kuwa malongi ya kieleka, kansi bo ta landaka mabanza na bo mosi, bo ta bakaka balongi ya nkaka mingi sambu na kulonga bo konso mambu yina ya bo zola wa.”​—2 Timoteo 4:3.

Mabundu ya nge mezaba kesalaka nki na dyambu yai? Keti yo kelandaka minsiku ya kuzanguka ya bikalulu ya mbote ya Biblia? To keti yo kezitisaka ve bandongisila ya pwelele ya kele na Ndinga ya Nzambi, mpi kezabisaka bantu kaka ‘mambu yina ya bo kezola kuwa’?

Sambu na kusadisa nge na kuzaba kana dibundu mosi buna ke na kubuta mbuma ya mbote, sambu na nki ve kubaka ntangu ya kupesa mvutu na bangyufula yai ya melanda?

NTU-DYAMBU: Makwela.

MAMBU YINA BIBLIA KELONGAKA: “Bantu yonso kuzitisa makwela; konso muntu yina me kwela, yandi fweti zinga kaka na muntu yina ya yandi me kwela na yandi, ata nkento ata bakala. Nzambi ta pesa ndola na bantu yina ke salaka pite, ata na bayina me kwelaka ata na bayina me kwelaka ve.”​—Baebreo 13:4.

NGYUFULA: Keti dibundu yai kelombaka nde na kati ya bantu na yo, bankwelani yina kezingaka kumosi kukwelana na kuwakana ti nsiku ya leta?

NTU-DYAMBU: Kufwa makwela.

MAMBU YINA BIBLIA KELONGAKA: Ntangu bantu kuyulaka Yezu kana kele ti bikuma ya fwete sala nde bo fwa makwela, yandi tubaka nde: “Konso muntu yina ta bikisa nkento na yandi kana nkento yina me sala pite ve, ebuna muntu yina kukwela nkento ya nkaka, muntu yango me sala pite.”​—Matayo 19:9.

NGYUFULA: Keti dibundu yai kezitisaka lutwadisu ya Yezu mpi kepesaka bantu nzila na kufwa makwela mpi kukwela dyaka kaka kana nkwelani mosi mesala mansoni?

NTU-DYAMBU: Bikalulu ya mbote na yina metala kuvukisa nitu.

MAMBU YINA BIBLIA KELONGAKA: “Beno sala pite ve. Masumu ya nkaka ya muntu ke salaka, yo ke bebisaka nitu na yandi ve, kansi muntu yina ke salaka pite, yandi ke salaka masumu yina ke bebisaka nitu na yandi mosi.”​—1 Korinto 6:18.

“Ata bankento na bo, bo ke salaka ve mambu yina ya Nzambi kanaka sambu na nitu na bo, kansi bo ke lalaka bo na bo bankento. Mutindu mosi na babakala, bo ke zolaka ve kulala ti bankento na bo, kansi ntima na bo me fulukaka na nzala ya kulala bo na bo babakala. Babakala yina ke salaka mambu ya nsoni bo na bo, yo yina Nzambi ke pesaka bo ndola na nitu na bo sambu na mambu na bo ya mbi.”​—Roma 1:26, 27.

NGYUFULA: Keti dibundu yai kelongaka nde kusala pite bakala ti nkento, babakala ti babakala to bankento ti bankento kele disumu?

NTU-DYAMBU: Bantu na yo fwete zitisa na kikesa yonso minsiku ya Biblia.

MAMBU YINA BIBLIA KELONGAKA: “Beno lenda vukana ve ti muntu yina ke tubaka nde yandi kele mukristo, kansi yandi ke salaka pite, to yandi ke vandaka na nzala ya kuvanda na konso kima yina, to yandi ke sambaka biteki, to ke fingaka bantu ya nkaka, to ke laukaka malafu, to ke yibaka. Beno dia mpi ve kisika mosi ti muntu ya mutindu yina.” (1 Korinto 5:11) Inki takumina bantu yina ketubaka nde bo kele Bakristu kansi bo kesalaka masumu mpi kebuyaka kubalula ntima? Ndinga ya Nzambi ketuba nde: “Beno katula muntu ya mbi na kati na beno.”​—1 Korinto 5:13.

NGYUFULA: Keti dibundu yai kekatulaka na kati ya bantu na yo konso muntu yina kefwaka minsiku ya Biblia mpi kebuyaka kubalula ntima?

[Bangogo sambu na kubenda dikebi ya kele na lutiti 6]

Inki dibundu mezabanaka nde yo kezitisaka minsiku ya kuzanguka ya bikalulu ya mbote ya Biblia?