‘Tii Nki Ntangu Mu Fweti Binga Sambu Nge Sadisa?’

Jayne kudilaka nde: “Mu kezola kaka nde mpasi kumana!” Yandi vandaka ti kansere, mpi yo vandaka kupanzana na nitu ya mvimba. Dibuta ti banduku na yandi kuvandaka mpenza ti mpusa ya ngolo ya kumanisa maladi mpi mpasi na yandi! Bo sambaka sambu Nzambi kusadisa yandi. Keti yandi zolaka kuwa? Keti yandi tulaka dikebi?

NZAMBI mezaba mambu ya luzingu ya bantu. Ndinga na yandi, Biblia, ketuba nde: “Bima yonso ya Nzambi salaka ke dila ngolo, yo ke mona mpasi.” (Roma 8:22) Nzambi mezaba nde kele ti bamilio ya bantu yina, bonso Jayne, kele na kumona mpasi konso kilumbu yo vanda ya nitu, ya mawi, to ya mabanza. Nzambi kemonaka bantu bamilio 800 yina kelalaka nzala konso kilumbu, bamilio yankaka yina bo kenyokulaka na banzo, mpi bibuti mingi yina kekudiyangisaka sambu na makwisa mpi mambote ya bana na bo. Keti nge mekudiyulaka dezia kana Nzambi tasala kima sambu na kumanisa bampasi yai? Ya kyeleka, sambu beto kevandaka ti mpusa ya kusadisa bantu ya beto kezolaka, keti beto fwete ndima ve nde Nzambi kezolaka mpi kusadisa bantu, bigangwa na yandi?

Kana nge meyulaka bangyufula yai, zaba nde nge kele nge mosi ve. Bamvula kuluta 2 600, Habakuki, muntu mosi ya kwikama, kudiwaka mutindu bantu mingi kekudiwaka bubu yai, mpi kuyulaka Nzambi nde: “Mfumu Nzambi, tii nki ntangu mono fweti binga nge sambu nge kwisa kusadisa beto ti kugulusa beto na maboko ya bantu ya nku, ebuna nge ndima? Sambu na nki nge ke bika mono kumona mambu ya mbi mutindu yai? Sambu na nki nge ke tala bampasi ke niokula bantu mpidiyai? Mono ke mona kaka lufwa ti nku me ziunga mono. Bisika yonso mono ke wa kaka makelele ya kunwana ti ya kuswana.” (Habakuki 1:2, 3) Habakuki, profete mosi ya Ebreo, kumonaka mubulu mpi nku ya buzoba yina vandaka kupesa mpasi kuluta na bilumbu na yandi. Bubu yai, mambu ya mutindu yai mekumaka bansangu ya konso kilumbu mpi yo kepesa bantu ya ntima mawa mpasi.

Keti Nzambi kumonaka mpamba mambu yina vandaka kuyangisa Habakuki? Ve. Yandi widikilaka bangyufula ya masonga ya Habakuki, ebuna yandi lembikaka mpi kupesaka kikesa na bakala yai ya kuvandaka na mpasi. Yehowa Nzambi kukumisaka ngolo lukwikilu ya Habakuki na kusilaka nde Yandi tamanisa bampasi. Nsangu ya kivuvu ya Nzambi lenda bwisa mpi ntima na nge, mutindu yo bwisaka ntima ya Jayne ti ya dibuta na yandi. Masolo yina kelanda tapesa mvutu na bangyufula yai: Inki mutindu beto lenda ndima nde Nzambi kekudibanzaka mpenza sambu na beto? Inki Nzambi tasala sambu na kumanisa bampasi, mpi nki ntangu?